Tsebo ya Lena e Tšweletše Boitshwaro
Tsebo ya Lena e Tšweletše Boitshwaro
“Tsebô e tšweletšê boithswarô.”—2 PETRO 1:5-8.
1. Mathata a mantši a batho ke ditla-morago tša bofokodi bofe?
LESOLONG le legolo la go lwantšhana le go dirišwa gampe ga dihlare-tagi, bafsa ba kua United States ba ile ba lemošwa gore: “Ganang.” Dilo di be di ka ba kaone gakaakang ge e ba motho yo mongwe le yo mongwe a be a ka se gane feela go dirišwa gampe ga dihlare-tagi eupša a be a ka gana le go nwa ka mo go feteletšego, mekgwa ya bophelo e sego bohlale goba e gobogilego, mekgwa ya go se botege ya kgwebo le “dikganyogo tša nama”! (Ba-Roma 13:14, NW) Lega go le bjalo, ke mang a ka bolelago gore ka mehla go gana go bonolo?
2. (a) Ke mehlala efe ya ka Beibeleng yeo e bontšhago gore go thatafalelwa ke go gana ga se taba e mpsha? (b) Mehlala ye e swanetše go re kgothaletša go dira’ng?
2 Ka ge batho ka moka ba sa phethagalago ba e-na le bothata bja go bontšha boitshwaro, re swanetše go kgahlegela go ithuta kamoo re ka fenyago ntwa le ge e le efe ya motho ka noši yeo re lebeletšanego le yona. Beibele e re botša ka batho bao nakong e fetilego ba bego ba katanela go hlankela Modimo eupša bao ka dinako tše dingwe ba bilego le bothata bja go gana. Gopola Dafida le sebe sa gagwe sa bootswa le Batseba. Se ile sa lebiša lehung la ngwana wa bona yo a bego a imilwe ka bootswa le la monna wa Batseba, bao bobedi bja bona ba bego ba se na molato. (2 Samuele 11:1-27; 12:15-18) Goba nagana ka moapostola Paulo yoo a ilego a ipolela phatlalatša ka gore: “Xa ke dire botse byo ke bo rataxo; ke dira bobe byo ke sa bo ratexo.” (Ba-Roma 7:19) Na ka dinako tše dingwe o ikwa o tlaletšwe ka tsela ye? Paulo o tšwetše pele ka gore: “Xobane ka thokô ya motho wa teng ke thabêla Molaô wa Modimo. Xomme mo dithong tša-ka ke bôna molaô o šele [o lwantšhanago] le molaô wa pelo ya-ka, wa nthopa wa mpušiša molaô wa sebe o lexo dithong tša-ka. Joo, nna motho wa madi-mabe! Ké mang a tl’o xo nkhunolla ka tloxa mmele wó wa lehu!” (Ba-Roma 7:22-24) Mehlala ya ka Beibeleng e swanetše go matlafatša boikemišetšo bja rena gore le ka mohla re se ke ra langwa boitekong bja rena bja go ba le boitshwaro ka tekanyo e kgolo.
Boitshwaro, Thuto Yeo e Swanetšego go Ithutwa
3. Hlalosa lebaka leo ka lona go ka se bego bonolo go bontšha boitshwaro.
3 Boitshwaro, e lego selo seo se akaretšago bokgoni bja go gana, go bolelwa ka bjona go 2 Petro 1:5-7 gotee le tumelo, bothakga, tsebo, kgotlelelo, boineelo go Modimo, maikwelo a borutho a borwarre le lerato. Ga go le setee sa dika tše tše rategago tšeo motho a belegwago a e-na le tšona ka mo go feletšego. Di swanetše go hlagolelwa. Go di bontšha ka tekanyo e kgolo go nyaka boikemišetšo le boiteko. Ka gona na re swanetše go letela gore go bontšha boitshwaro go be bonolo?
4. Ke ka baka la’ng ba bantši ba nagana gore ga ba na bothata ka go bontšha boitshwaro, eupša se ke pontšho ya eng?
4 Ke therešo gore batho ba dimilione ba ka nagana gore ga ba na bothata bja go bontšha boitshwaro. Ba phela ka tsela yeo ba e ratago, ba itshwara ka go dumelelana le melao ya nama ya bona e sa phethagalago ba tseba goba ba sa tsebe gomme ga ba lebiše tlhokomelo go ditla-morago—go bona goba go ba bangwe. (Juda 10) Go hlaelela ga bokgoni bja go gana le go hlaelela ga go ikemišetša go gana ke mo go bonagalago kudu gona bjale go feta le ge e le neng pele. Ke pontšho ya gore re tloga re phela “mehleng ya bofêlô” yeo Paulo a boletšego e sa le pele ka yona ka gore: “Xo tlo tla mabaka a mathata. Batho e tlo ba ba xo ithata, ba mexabaru, ba lenyatšô le baikxoxomoši, le ba maroxa, . . . le ba ba sa tsebexo xo ithswara.”—2 Timotheo 3:1-3.
5. Ke ka baka la’ng Dihlatse tša Jehofa di e-na le kgahlego ka taba ya boitshwaro, gomme ke keletšo efe yeo e sa dutšego e šoma?
5 Dihlatse tša Jehofa di tloga di lemoga gabotse tlhohlo yeo e tšweletšwago ke go nyakega ga boitshwaro. Ka go swana le Paulo, di lemoga ntwa ya magareng ga kganyogo ya go kgahliša Modimo ka go phela ka go dumelelana le ditekanyetšo tša gagwe le tsela yeo nama ya tšona e sa phethagalago e ka di kgothaletšago go e tšea. Ke ka baka leo e lego kgale di dutše di e-na le kgahlego ya kamoo di ka fenyago ntwa ye. Morago kua ka 1916, tokollo ya mathomong ya makasine wo gona bjale o o balago e boletše ka “tsela e swanetšego yeo re ka e tšeago e le gore re kgone go itaola, go laola dikgopolo tša rena, mantšu a rena le boitshwaro bja rena.” E ile ya šišinya gore go dulwe go gopolwa lengwalo la Ba-Filipi 4:8. Keletšo e tšwago go Modimo ye e lego temaneng yeo e sa dutše e šoma, gaešita le ge mathomong e ile ya newa nywaga e ka bago 2 000 e fetilego gomme mohlomongwe go le thata kudu go e latela gona bjale go feta ka nako yeo goba ka 1916. Lega go le bjalo, Bakriste ba katanela go gana dikganyogo tša lefase, ba lemoga gore ka go dira bjalo ba dumelelana le Mmopi wa bona.
6. Ke ka baka la’ng re se na lebaka la go langwa ge re dutše re hlagolela boitshwaro?
6 Boitshwaro bo boletšwe go Ba-Galatia 5:22, 23 e le karolo ya “dienywa tša môya [o mokgethwa].” Ge e ba re bontšha seka se gotee le ‘lerato, lethabo, khutšo, go se fele pelo, botho, bonolo, potego le boleta,’ re tla holega kudu. Bjalo ka ge Petro a hlalositše, go dira bjalo go tla re thibela go “hlôka dienywa” tirelong ya rena go Modimo. (2 Petro 1:8) Eupša ga se ra swanela go langwa goba go ipea molato ge e ba re palelwa ke go bontšha dika tše kapejana le ka mo go tletšego kamoo re ka ratago ka gona. Mohlomongwe o lemogile gore sekolong morutwana yo mongwe o ithuta kapejana kudu go feta yo mongwe. Goba mošomong motho yo mongwe o ithuta mošomo o mofsa kapejana kudu go feta bašomi-gotee le yena. Ka mo go swanago, ba bangwe ba ithuta go bontšha dika tša Bokriste kapejana kudu go feta ba bangwe. Selo sa bohlokwa ke go tšwela pele re hlagolela dika tša go boifa Modimo ka tsela e kaone kudu kamoo re ka kgonago. Re ka dira se ka go diriša ka mo go tletšego thušo yeo Jehofa a e neago ka Lentšu la gagwe le ka phuthego. Go akgofela go fihlelela pakane ya rena ga go bohlokwa go feta maiteko a rena a go ikemišetša go tšwela pele re dira tšwelopele.
7. Ke’ng seo se bontšhago gore boitshwaro ke bja bohlokwa?
7 Go sa šetšwe gore bo lokeleditšwe mafelelong dikeng tšeo di tšweletšwago ke moya, ka ntle le pelaelo boitshwaro ga se gore bo na le bohlokwa bjo bonyenyane ge bo bapišwa le tše dingwe. E tloga e le selo se se fapanego. Re swanetše go dula re gopola gore “medirô ya nama” e be e ka phengwa ge nkabe re be re e-na le boitshwaro bjo bo phethagetšego. Lega go le bjalo batho ba sa phethagalago ba sekametše go ineeleng mohuteng o itšego wa “medirô ya nama . . . bootswa, le dithšila, le bohlôtlôlô. . . . Xo hlankêla medimo, le boloi, le thlôyanô, le dintwa, le pefêlô, le boxale, le dithsêlê, le boxarexare.” (Ba-Galatia 5:19, 20) Ka go rialo re swanetše go dula re e-lwa, re ikemišeditše go tumola ditshekamelo tše di fošagetšego bobedi ka pelong le monaganong.
Ba Bangwe ba Thatafalelwa Kudu ke go ba le Boitshwaro
8. Ke mabaka afe ao a dirago gore go bontšha boitshwaro go be thata kudu go ba bangwe?
8 Bakriste ba bangwe ba hwetša go le thata kudu go bontšha boitshwaro go feta ba bangwe. Ka baka la’ng? Tlwaetšo ya batswadi goba diphihlelo tša nakong e fetilego di ka kgatha tema boemong bjo. Ge e ba go bonagala re sa ka ra ba le bothata bja go bontšha boitshwaro, seo se swanetše go re thabiša. Eupša ka ntle le pelaelo re swanetše go ba le kwelobohloko le kwešišo ge re dirišana le bao ba nago le bothata bja go bo bontšha, gaešita le ge go hlaelelwa ga bona ke boitshwaro go re bakela mathata. Ka baka la go se phethagale ga rena, ke mang mo gare ga rena yo a nago le lebaka le ge e le lefe la go bontšha boemo bja kgopolo bja go itira moloki?—Ba-Roma 3:23; Ba-Efeso 4:2.
9. Ke mafokodi afe ao ba bangwe ba nago le ona, le gona ke neng moo mafokodi a a tlago go fedišwa ka mo go sa felego?
9 Ka mohlala: Re ka ba re tseba gore Bakriste-gotee le rena ba bangwe bao ba tlogetšego motšoko goba go diriša tšeo go thwego ke diokobatši tša boitapološo mohlomongwe ka dinako tše dingwe ba di kganyoga kudu. Goba ba bangwe ba hwetša e le tlhohlo go lekanyetša dijo tša bona goba dino tše di tagago. Ba bangwe ba na le bothata bja go laola maleme a bona, ka gona gantši ba foša ka mantšu. Go lebeletšana le mafokodi a bjalo go nyaka boiteko bjo bo tseneletšego go hlagoleleng boitshwaro. Ka baka la’ng? Jakobo 3:2 e dumela ka mo go kwagalago gore: “Re ba xo foša xa-ntši ka moka xa rena. Xe xo ka ba le e a sa fošexo ka leleme, yêna-eo ké monna yo bolô-ka-tlalô, e a kxônaxo xo buša mmele wa xaxwe ka moka ka moxala.” Go sa na le ba bangwe bao ba nago le kganyogo e matla ya go petšha. Goba ba ka hwetša go le thata go laola kgalefo ya bona. Go ithuta go lebeletšana ka katlego le mafokodi a goba a mangwe a swanago le ona go ka tšea nako. Gaešita le ge re ka dira tšwelopele e bonagalago gona bjale, dikganyogo tše di fošagetšego di tla fedišwa ka mo go sa felego ge feela re fihla phethegong. Go sa dutše go le bjalo, go katanela go bontšha boitshwaro go tla re thuša go phema go boela morago mokgweng wa bophelo wa sebe. Ge re dutše re katana, a re thušaneng gore re se ke ra langwa.—Ditiro 14:21, 22.
10. (a) Ke ka baka la’ng go ba le boitshwaro ditabeng tša dikopano tša botona le botshadi go le thata kudu go ba bangwe? (b) Ke phetogo efe e kgolo yeo ngwanabo rena yo mongwe a ilego a e dira? (Bona lepokisi go letlakala 16.)
10 Karolong e nngwe yeo go yona go lego thata go ba bangwe go bontšha boitshwaro ke tabeng ya dikopano tša botona le botshadi. Dikopano tša botona le botshadi tša batho ka botšona ke karolo ya kamoo Jehofa Modimo a re bopilego ka gona. Lega go le bjalo, ba bangwe ba na le bothata kudu go boloka dikopano tša botona le botshadi lefelong la tšona, ka go dumelelana le ditekanyetšo tša Modimo. Bothata bja bona bo ka mpefala ka gobane ba e-na le kganyogo e matla e sa tlwaelegago ya dikopano tša botona le botshadi. Re phela lefaseng leo le gafišwago ke dikopano tša botona le botshadi leo le gakatšago kganyogo ye ka ditsela tše dintši. Se se ka baka bothata bjo bogolo go Bakriste bao ba nyakago go dula ba se lenyalong—bonyenyane ka nakwana—e le gore ba hlankele Modimo ba lokologile ditšhitišong tša lenyalo. (1 Ba-Korinthe 7:32, 33, 37, 38) Eupša ka go dumelelana le keletšo ya Mangwalo ya gore “xo tšea xo kaone, xo phala xo fišêxa,” ba ka kgetha go tsena lenyalong, seo ka ntle le pelaelo e lego selo se sebotse. Ka nako e swanago, ba ikemišeditše go nyala “feela Moreneng,” bjalo ka ge Mangwalo a eletša. (1 Ba-Korinthe 7:9, 39, NW) Re ka kgonthišega gore Jehofa o thabela go kgahlegela ga bona go kgomarela melao ya gagwe ya motheo ya go loka. Bakriste-gotee le bona ba thabela go kopanela le barapedi ba therešo bao ba nago le ditekanyetšo tše bjalo tše phagamego tša boitshwaro le potego.
11. Re ka thuša bjang ngwanabo rena goba kgaetšedi yoo a ka ratago go tsena lenyalong eupša e le yo a sa tšwago a hwetša sebaka sa go dira bjalo?
11 Go thwe’ng ge e ba molekane yo a swanetšego a sa hwetšagale? Nagana ka tlalelo yeo e ka bago gona ya motho yoo a kganyogago go tsena lenyalong eupša a sa kgone go dira bjalo! A ka bona bagwera ba gagwe ba tsena lenyalong gomme ba fihlelela tekanyo e itšego ya lethabo, mola a sa dutše a tsoma molekane yo a swanetšego. Go ba bangwe bao ba lego boemong bjo bjalo, mokgwa o sa hlwekago wa go tsoša ditho tša pelego o ka fetoga bothata bjo bo sa kgaotšego. Go ba gona, ga go na Mokriste yoo ka boomo a nyakago go nyamiša yo mongwe yoo a katanelago go dula a hlwekile. Re ka nyamiša motho e se ka boomo ge e ba re ka botšiša dipotšišo tša go se naganele tše bjalo ka, “O tlo nyala neng? goba o tlo nyalwa neng?” Seo se ka bolelwa ka maikemišetšo a mabotse, eupša go ka ba kaone gakaakang gore re bontšhe boitshwaro tabeng ya go diša maleme a rena! (Psalme 39:1) Bao gare ga rena ba dutšego ba hlwekile mola ba se lenyalong ba swanelwa ke theto ya rena e borutho. Go e na le go bolela seo e ka bago se se nyamišago, re ka katanela go ba bao ba kgothatšago. Ka mohlala, re ka dira boiteko bja go laletša batho bao ba sego lenyalong ge sehlopha se senyenyane sa bao ba godilego tsebong se bokana bakeng sa dijo goba bogwera bjo bo agago bja Bokriste.
Boitshwaro Lenyalong
12. Ke ka baka la’ng tekanyo ya boitshwaro e nyakega gaešita le go bao ba lego lenyalong?
12 Go ba lenyalong ga go fediše ka mohlolo go nyakega ga boitshwaro tabeng ya dikopano tša botona le botshadi. Ka mohlala, dinyakwa tša dikopano tša botona le botshadi tša monna le tša mosadi e ka ba tšeo di fapanego kudu. Goba boemo bja mmele bja molekane yo mongwe ka dinako tše dingwe bo ka dira gore dikopano tša botona le botshadi tšeo di tlwaelegilego di be thata goba di se ke tša kgonega. Mohlomongwe ka baka la diphihlelo tša nakong e fetilego, molekane yo mongwe a ka hwetša go le thata go kwa keletšo e rego: “Monna a neê mosadi tše di mo swanetšexo ka thokô ya leratô; le mosadi a dirê monna wa xaxwe ka mokxwa woo.” Boemong bjo bjalo, molekane yo mongwe a ka swanelwa ke go bontšha boitshwaro ka tekanyo e oketšegilego. Eupša bobedi ba ka dula ba gopola keletšo e lerato ya Paulo go Bakriste ba lego lenyalong yeo e rego: “Le se kê la hlôkana, xe e se ka xo kwana ka mabaka a xore Le bônê lebaka la xo rapêla, la tseb’o boêlana, xore Sathane a se kê a Le leka ka xe Le sa kxone xo ithswara.”—1 Ba-Korinthe 7:3, 5.
13. Re ka direla’ng bao ba katanelago go bontšha boitshwaro?
13 Banyalani ba ka thaba gakaakang ge e ba bobedi bja bona ba ithutile go bontša boitshwaro bjo bo swanetšego tswalanong ye ya kgaufsi-ufsi. Ka nako e swanago, ba dira gabotse ge ba bontšha kwešišo go barapedi-gotee le bona bao ba sa dutšego ba katanela go bontšha boitshwaro tabeng yeo. Le ka mohla ga se ra swanela go lebala go rapela Jehofa gore a nee bana babo rena ba moya temogo, sebete le boikemišetšo tša go tšwela pele ka ntwa ya bona ya go bontšha boitshwaro le go gata megato ya go fenya dikganyogo tše di fošagetšego.—Ba-Filipi 4:6, 7.
Tšwelang Pele le Thušana
14. Ke ka baka la’ng re swanetše go dirišana le Bakriste-gotee le rena ka kwelobohloko le ka kwešišo?
14 Ka dinako tše dingwe re ka hwetša go le thata go kwešiša Bakriste-gotee le rena bao ba katanelago go bontšha boitshwaro karolong yeo go yona rena re se nago bothata. Eupša ka tlhago batho ga ba swane. Ba bangwe ba tšewa ke maikwelo gabonolo; ba bangwe ga ba bjalo. Ba bangwe ba hwetša go le bonolo kudu go itshwara, boitshwaro ga se bothata le gatee go bona. Ba bangwe ba na le bothata bjo bogolo. Lega go le bjalo, gopola gore motho yo a gogago ka kgara go bontšheng boitshwaro ga se motho yo mobe. Bakriste-gotee le rena ba nyaka kwešišo ya rena le kwelobohloko. Lethabo la rena le a akaretšwa ge re dutše re tšwela pele re bontšha kgaugelo go bao ba sa dutšego ba katanela go kaonefatša go bontšha ga bona boitshwaro. Re ka bona seo go tšwa mantšung a Jesu ao a begilwego go Mateo 5:7.
15. Ke ka baka la’ng mantšu a Psalme 130:3 e le a kgothatšago tabeng ya boitshwaro?
15 Le ka mohla ga re nyake go ahlola Bakriste-gotee le rena ka mo go fošagetšego bao ka dinako tše dingwe ba palelwago ke go bontšha semelo sa Bokriste. Ke mo go kgothatšago gakaakang go tseba gore Jehofa ga a bone feela lekga letee leo re ka bago re paletšwe ke go bontšha boitshwaro, eupša o bona le makga a mangwe a mantši ao ka ona re kgonnego go bo bontšha, gaešita le ge makga a ka moka Bakriste-gotee le rena ba se ba a lemoga. Ke mo go kgothatšago kudu go dula re gopola mantšu a Psalme 130:3 ao a rego: “Xe Wene Morêna Ò latiša molato, xôna xo ka êma mang?”
16, 17. (a) Re ka diriša bjang Ba-Galatia 6:2, 5 tabeng ya boitshwaro? (b) Ke’ng se se latelago seo re tlago go se ahla-ahla mabapi le boitshwaro?
16 E le gore re kgahliše Jehofa, yo mongwe le yo mongwe wa rena o swanetše go hlagolela boitshwaro, eupša re ka kgonthišega gore bana babo rena ba Bakriste ba tla re thuša. Gaešita le ge yo mongwe le yo mongwe wa rena a swanetše go rwala morwalo wa gagwe wa boikarabelo, re kgothaletšwa go thušana go lebeletšana ka katlego le mafokodi. (Ba-Galatia 6:2, 5) Re ka leboga motswadi, molekane goba mogwera yoo a re thibelago go ya mafelong ao re sa swanelago go ya go ona, go bona dilo tšeo re sa swanelago go di bona goba go dira dilo tšeo re sa swanelago go di dira. Ba re thuša go bontšha boitshwaro, bokgoni bja go gana gomme re dira bjalo e le ka kgonthe!
17 Bakriste ba bantši ba ka ba ba dumelelana le seo re se ahla-ahlilego go fihla ntlheng ye tabeng ya boitshwaro, eupša ba ka nagana gore bona ka noši ba na le mo gontši moo ba ka kaonefatšago. Ba ka rata go bontšha boitshwaro ka tekanyo e tletšego, go fihla bokgoleng bjoo ba dumelago gore batho ba sa phethagalago ba letetšwe go bo bontšha. Na o ikwa ka tsela yeo? Ka gona, o ka dira’ng e le go hlagolela sebopego se sa dienywa tša moya wa Modimo? Le gona ke bjang go dira ga gago bjalo go ka go thušago go fihlelela maikemišetšo a gago a nako e telele bjalo ka Mokriste? Anke re boneng seo sehlogong se se latelago.
O Ile a Ithuta go Gana
Yo mongwe wa Dihlatse tša Jehofa yo a dulago kua Jeremane o be a šoma bjalo ka mohlokomedi wa kgokagano ya megala ya thekinolotši. Mošomo wa gagwe o be o akaretša go hlokomela mananeo a ka bago 30 a thelebišene le a radio. Ge go be go e ba le ditšhitišo, o be a swanetše go lebiša tlhokomelo lenaneong e le gore a kgone go bona bothata. O re: “Mo e ka bago ka mehla go be go bonagala ditšhitišo di direga ka nako e fošagetšego, nakong ya ge go bontšhwa ditiragalo tša bošoro goba tša dikopano tša botona le botshadi. Go be go bonagala ditiragalo tša boitshwaro bjo bo gobogilego di be di dula ka monaganong wa-ka ka matšatši a mantši ge e ba e se ka dibeke, bjalo ka ge eka di be di ngwadilwe ka mo go sa phumolegego ka bjokong bja-ka.” O dumela ka gore se se bile le mafelelo a mabe boemong bja gagwe bja moya: “Ke ile ka ba le tshekamelo ya go galefa ka lebelo, ka gona dipontšho tša bosenyi di ile tša dira gore ke thatafalelwe ke go bontšha boitshwaro. Dipontšho tša dikopano tša botona le botshadi di ile tša baka dikgohlano magareng ga-ka le mosadi wa-ka. Ke be ke e-lwa ntwa ya ka mehla. E le gore ke se ke ka fenywa ntweng, ke ile ka dira phetho ya go nyaka mošomo o mongwe, gaešita le ge se se be se bolela gore ke tla hwetša mogolo o monyenyane. Malobanyana mo ke ile ka atlega go hwetša mošomo o mongwe. Kganyogo ya-ka e phethagaditšwe.”
Tsebo yeo e hweditšwego thutong ya Beibele e re thuša go bontšha boitshwaro
Na o a Gopola?
Ke ka Baka La’ng Boitshwaro . . .
• e le bja bohlokwa gore Bakriste ba bo hlagolele?
• bo le thata kudu go ba bangwe?
• bo le bohlokwa lenyalong?
• e le seka seo re ka thušanago go se hlagolela?