Añadi na Boso Conocemento, Dominio Propio

“Añadi . . . na boso conocemento, dominio propio.”—2 PEDRO 1:5-8.

1. Kico hende no por haci y pesei ta haya nan cu hopi problema?

DURANTE un campaña grandi contra uzo di droga, nan tawata anima hobennan na Merca: “Djis bisa no.” E situacion djawe lo tawata hopi mas miho si tur hende lo a djis bisa no, no solamente na droga sino tambe na bebemento di mas, na estilonan di bida imprudente of inmoral, na practicanan deshonesto di negoshi y na ‘e mal deseonan di carni’! (Romanonan 13:14) Sinembargo, tur hende sa cu no ta semper facil pa bisa no.

2. (a) Menciona algun ehempel di Bijbel cu ta mustra cu e dificultad pa bisa no, no ta algo nobo. (b) Kico e ehempelnan aki mester stimula nos pa haci?

² Siendo cu tur hende imperfecto tin dificultad pa eherce dominio propio, nos mester ta interesa pa sa con nos por vence cualkier bicio of debilidad personal cu nos tin. Bijbel ta conta nos tocante hende di antes cu a haci esfuerso pa sirbi Dios pero cu tin biaha tawatin dificultad pa bisa no. Por ehempel, corda riba David y su pica di adulterio cu Bat-seba (Betsabe). Esei a hiba na morto di dos persona inocente: e yiu cu nan a consebi den adulterio y e esposo di Bat-seba. (2 Samuel 11:1-27; 12:15-18) Of corda riba apostel Pablo, kende a confesa abiertamente: “Pasobra e bon cu mi ta desea di haci, mi no ta haci; ma mi ta practica exactamente e maldad cu mi no ta desea di haci.” (Romanonan 7:19) Abo tambe sa sinti e frustracion ei? Pablo a sigui bisa: “Segun e hende interior mi ta deleita mi mes den e lei di Dios, ma den e miembronan di mi curpa mi ta mira un otro lei cu ta bataya contra e lei di mi mente y ta haci mi preso di e lei di pica, cual ta den mi miembronan. Hende miserabel cu mi ta! Ken lo libra mi di e curpa di morto aki?” (Romanonan 7:22-24) E ehempelnan di Bijbel mester fortalece nos determinacion pa nunca entrega den nos lucha pa alcansa mayor dominio propio.

Nos Mester Siña Eherce Dominio Propio

3. Splica dicon nos no por spera cu ta facil pa desplega dominio propio.

³ Dominio propio, locual ta inclui e capasidad di bisa no, ta ser menciona na 2 Pedro 1:5-7 hunto cu fe, birtud, conocemento, perseverancia, santidad, cariño fraternal y amor. Ningun di e otro cualidadnan deseabel aki no ta cos cu nos tin completamente di naturalesa. Nos mester cultiva nan. Pa nos por desplega nan na un midi significativo ta exigi determinacion y esfuerso. Siendo asina, nos por spera cu dominio propio lo ta mas facil pa desplega?

4. Dicon hopi hende ta haya cu nan no tin problema cu dominio propio, pero kico esaki ta indica?

⁴ Miyones di hende kisas ta haya cu nan no tin problema cu dominio propio. Nan ta hiba nan bida manera nan kier. Anto concientemente of inconcientemente nan ta comporta nan mes di acuerdo cu loke nan carni imperfecto ta dicta y nan ta presta masha tiki atencion na e consecuencianan, sea pa nan mes of pa otro hende. (Hudas 10) Awor mas cu nunca ta bisto cu hende no por—y no kier—bisa no. Esei ta un indicacion cu nos di berdad ta bibando den e “ultimo dianan” cu Pablo a papia di dje ora el a predeci: “Temponan trabahoso lo bin. Pasobra hende lo ta stimado di nan mes, stimado di placa, gabado, arogante, blasfemado, . . . sin dominio propio.”—2 Timoteo 3:1-3.

5. Dicon Testigonan di Yehova ta interesa den e topico di dominio propio, y ki conseho ainda ta valido?

 ⁵ Testigonan di Yehova si ta conciente cu ta dificil pa eherce dominio propio. Mescos cu Pablo, nan ta conciente di e lucha entre e deseo pa agrada Dios door di biba segun su normanan y e rumbo cu nan carni imperfecto kisas ta urgi nan pa sigui. Pa e motibo aki, for di hopi tempo caba nan ta interesa pa sa con nan por vence e bataya aki. Na aña 1916, un edicion di e revista aki cu bo ta lesando a papia di “e proceder apropiado cu nos mester sigui pa siña controla nos mes, nos pensamentonan, nos palabranan y nos conducta.” E revista a sugeri pa tene Filipensenan 4:8 na mente. E conseho dibino den e texto biblico ei ainda ta valido, maske cu originalmente el a ser duna casi 2.000 aña pasa y awor probablemente ta mas dificil pa aplic’e cu e tempo aya of cu na 1916. No obstante, cristiannan ta traha duro pa bisa no na deseonan di mundo, sabiendo cu door di haci esei nan ta bisando si na nan Creador.

6. Dicon nos no mester desespera ora nos ta cultivando dominio propio?

⁶ Galationan 5:22 y 23 ta menciona dominio propio como parti di e “fruta di e spirito [santo].” Si nos desplega e cualidad aki hunto cu “amor, goso, pas, pasenshi, cariño, bondad, fieldad [y] mansedumbre”, nos lo saca masha hopi beneficio. Pasobra manera Pedro a splica, door di haci esei nos ta evita cu nos sirbishi na Dios ta bira ‘inutil y sin fruta.’ (2 Pedro 1:8) Pero nos no mester desespera of condena nos mes si nos no logra desplega e cualidadnan aki lihe y plenamente manera nos lo a desea. Probablemente bo a ripara cu na scol tin alumno ta siña mas lihe cu otronan. Of cu na trabou tin un persona ta siña un tarea nobo mas lihe cu otro coleganan. Asina tambe, tin hende ta siña desplega cualidadnan cristian mas lihe cu otronan. E cos importante ta pa sigui cultiva e cualidadnan cu ta agrada Dios lo miho cu nos por. Nos por haci esaki door di saca pleno probecho di e yudansa cu Yehova ta percura via su Palabra y congregacion. Loke ta mas importante ta e esfuerso y determinacion pa sigui haci progreso y no simplemente alcansa nos meta rapidamente.

7. Kico ta demostra cu dominio propio ta importante?

⁷ Apesar cu dominio propio ta ser menciona ultimo den e lista di cualidadnan produci door di spirito, definitivamente e no ta menos importante cu e otronan. Al contrario. Nos mester tene na mente cu si nos por a eherce dominio propio perfectamente, nos lo por a evita tur “e obranan di carni.” Sinembargo, hende imperfecto ta inclina na entrega na un of otro forma di “e obranan di carni . . . [manera] inmoralidad, impuresa, sensualidad, idolatria, bruheria, hostilidad, bringamento, yalursheid, rabiamento, pleitamento, desacuerdo, doctrina falso.” (Galationan 5:19, 20) Pesei constantemente nos tin cu hiba un lucha, dicidido pa elimina tendencianan negativo for di nos curason y nos mente.

Pa Algun Hende Ta Mas Dificil pa Eherce Dominio Propio

8. Ki factor ta pone cu pa algun hende ta mas dificil pa eherce dominio propio?

⁸ Algun cristian tin mas dificultad pa eherce dominio propio cu otro. Dicon? Kisas e manera cu nan mayornan a cria nan of experencianan di pasado ta contribui na esei. Nos mester ta contento si aparentemente nos no tin problema pa cultiva y desplega dominio propio. Pero siguramente nos lo mester demostra compasion y comprension ora nos ta trata cu esnan cu tin mas dificultad pa eherc’e, asta si nan falta di dominio propio ta causa algun problema personal pa nos. En bista di nos propio imperfeccion, cua di nos tin cualkier motibo pa desplega e actitud cu nos ta mas husto cu otro hende?—Romanonan 3:23; Efesionan 4:2.

9. Ki debilidad algun ruman tin, y na ki tempo nan lo vence nan completamente?

⁹ Algun ehempel: Podise nos sa cu algun ruman cristian cu antes tawata uza tabaco of droga kisas ainda sa tin un deseo fuerte pa nan. Of pa algun ruman ta un reto pa limita nan consumo  di cuminda y alcohol. Otronan tin problema pa domina nan lenga, pesei hopi bes nan ta peca cu nan boca. Pa trata cu e faltanan ei nan tin cu haci esfuerso diligente pa cultiva dominio propio. Dicon? Santiago 3:2 ta admiti realisticamente: “Nos tur ta trompica na hopi manera. Si un hende no ta trompica den loke e ta bisa, e ta un hende perfecto, capas pa frena henter e curpa tambe.” Tin otro rumannan cu ta sinti un deseo fuerte pa hunga wega di placa. Of kisas nan tin dificultad pa controla nan mes pa no rabia lihe. Podise ta tuma tempo pa nan siña trata cu exito cu e debilidadnan aki of cu otronan similar. Aunke nos por haci hopi progreso awor, ta te ora nos alcansa perfeccion, mal deseonan lo ser elimina permanentemente. Mientrastanto, door di haci esfuerso pa eherce dominio propio nos lo por evita di cai bek den un patronchi di bida pecaminoso. Tanten cu e lucha ta sigui, laga nos yuda otro pa no entrega.—Echonan 14:21, 22.

10. (a) Dicon ta masha dificil pa algun cristian eherce dominio propio den asuntonan sexual? (b) Ki cambio grandi un ruman homber a haci? (Wak e cuadro na pagina 16.)

¹⁰ Un otro tereno cu ta dificil pa algun cristian eherce dominio propio ta den asunto di sexualidad. Riba su mes, sexualidad humano ta parti di e manera cu Yehova Dios a traha nos. Sinembargo, pa algun hende ta masha dificil pa mantene sex na su debido luga, na harmonia cu e normanan di Dios. Loke kisas ta hacie mas dificil pa nan ta cu nan impulsonan sexual ta excepcionalmente fuerte. Nos ta biba den un mundo loco pa sex y cu ta inclina na stimula pasion den hopi manera. Esaki por crea basta problema pa cristiannan cu kier keda soltero—por lo menos pa un tempo—ya asina nan por sirbi Dios sin cu matrimonio ta distrae nan. (1 Corintionan 7:32, 33, 37, 38, NW) Pero na harmonia cu e mandamento biblico cu “ta miho casa cu kima di pasion”, nan lo por dicidi di casa, locual sigur ta algo honorabel. Na mesun tempo nan ta keda determina pa casa “basta ta den Señor”, manera e Scritura ta conseha. (1 Corintionan 7:9, 39) Nos por tin sigur cu Yehova ta alegra ora e ta mira nan interes pa sostene su principionan husto. Y nan rumannan cristian ta contento cu nan por asocia cu adoradonan berdadero cu ta personanan integro cu ta sigui normanan moral halto.

11. Con nos por yuda un ruman cu ta interesa pa casa pero cu no a haya e oportunidad?

 ¹¹ Kico si un ruman no por haya un casa apropiado? Imagina bo e frustracion cu un persona lo por sinti ora cu e ta desea di casa pero no por hacie! Kisas e ta mira con su amistadnan ta casa y logra un grado di felicidad, mientras cu e mes keto bai ta buscando un casa apropiado. Pa algun hende den e situacion ei, e custumber sushi di masturbacion kisas ta un problema continuo. En todo caso, ningun cristian lo kier ta esun cu inconcientemente ta desanima un otro cu ta luchando pa keda puro. Nos lo por causa desanimacion inintencionalmente si nos ta expresa comentarionan cu falta consideracion manera: “Bon, nada di casamento ainda?” Kisas nos no ta bis’e cu mal intencion, pero lo ta hopi mas miho si nos desplega dominio propio den e sentido di domina nos lenga! (Salmo 39:1) E rumannan soltero meimei di nos cu ta kedando puro den e condicion ei, merece nos mas sinsero elogio. En bes di bisa cos cu lo por desanima nan, nos mester haci esfuerso pa ta un animacion pa nan. Por ehempel, nos lo por purba inclui personanan soltero ora un grupo di ruman maduro ta reuni hunto pa un comemento of pa asociacion cristian edificante.

Dominio Propio den Matrimonio

12. Dicon asta esnan cu ta casa tin mester di un midi di dominio propio?

¹² E echo cu un hende ta casa no ta elimina automaticamente e necesidad di dominio propio relaciona cu sex. Por ehempel, kisas e necesidadnan sexual di e esposo ta masha distinto for di esnan di e esposa. Of e condicion fisico di un casa tin biaha por pone cu relacion sexual normal ta dificil of asta imposibel. Tambe por sosode cu debi na experencianan di pasado, ta dificil pa un casa obedece e mandamento: “Laga e esposo cumpli cu su deber di matrimonio pa cu su esposa, y mescos tambe e esposa pa cu su esposo.” Den tal situacion, e otro casa tin cu eherce mas dominio propio. Pero tur dos por tene na mente e conseho amoroso cu Pablo a duna cristiannan casa: “Stop di nenga otro, si no ta pa un  tempo, cu consentimento di otro, pa boso por dedica boso mes na oracion; y bin hunto atrobe, pa Satanas no tenta boso pa motibo di boso falta di dominio propio.”—1 Corintionan 7:3, 5.

13. Kico nos por haci na fabor di esnan cu ta luchando pa eherce dominio propio?

¹³ Parehanan casa por ta masha gradicido si nan tur dos a siña eherce e debido dominio propio den e relacion sumamente intimo aki. A la bes nan lo mester mustra comprension na rumannan den fe cu ainda ta luchando pa desplega dominio propio riba e tereno aki. Nos no mester lubida nunca di pidi Yehova den oracion pa duna nos rumannan spiritual e perspicasia, curashi y determinacion pa sigui lucha pa desplega dominio propio y pa nan dal pasonan pa vence deseonan cu no ta bon.—Filipensenan 4:6, 7.

Sigui Yuda Otro

14. Dicon nos mester trata nos rumannan cristian cu compasion y comprension?

¹⁴ Tin biaha kisas ta dificil pa nos mustra comprension na rumannan cristian cu ta luchando pa mustra dominio propio riba un tereno cu nos no tin problema cu ne. Pero di naturalesa hende ta diferente for di otro. Tin hende facilmente ta laga emocion domina nan; otronan no. Pa algun hende ta facil pa nan controla nan mes, y dominio propio no ta un gran problema. Otronan tin mas dificultad. Sinembargo, corda cu un persona cu ta luchando pa eherce dominio propio no ta un mal hende. Nos rumannan cristian tin mester di nos comprension y compasion. For di e palabranan di Hesus cu tin para skirbi na Mateo 5:7, nos por mira cu nos propio felicidad ta depende di e grado cu nos ta sigui demostra misericordia na esnan cu ainda ta lucha pa manifesta mas dominio propio.

15. Dicon e palabranan di Salmo 130:3 ta un consuelo den e asunto di dominio propio?

¹⁵ Nunca nos lo kier husga un ruman cristian robes, un ruman cu kisas de bes en cuando no ta logra manifesta e personalidad cristian. Ta un animacion grandi pa sa cu Yehova, fuera di mira esun biaha cu kisas nos a faya, ta mira tambe e tantisimo biahanan cu nos no a faya, asta si otro rumannan cristian si no a tuma nota di nan. Ta un gran consuelo pa tene na mente e palabranan di Salmo 130:3: “Si abo, SEÑOR, tuma inikidadnan na cuenta, o Señor, ken lo por a keda para?”

16, 17. (a) Con nos por aplica Galationan 6:2 y 5 relaciona cu dominio propio? (b) Kico nos lo considera a continuacion tocante dominio propio?

¹⁶ Pa nos agrada Yehova, cada un di nos tin cu cultiva dominio propio, pero nos por tin sigur cu nos rumannan cristian lo yuda nos. Aunke nos cada un tin cu carga nos propio carga di responsabilidad, Bijbel no obstante ta urgi nos pa yuda otro trata cu debilidad. (Galationan 6:2, 5) Pesei nos mester tin gran aprecio pa e mayor, casa, amigo of amiga cu ta stop nos di bai luganan cu eigenlijk nos lo no mester bai, di mira cosnan cu eigenlijk nos lo no mester mira of di haci cosnan cu eigenlijk nos lo no mester haci. E ta yuda nos pa desplega dominio propio, pa por bisa no y meen e!

17 Hopi cristian kisas ta di acuerdo cu loke nos a considera te cu awor tocante dominio propio, pero podise nan ta sinti cu personalmente nan tin cu mehora hopi den esei. Nan lo tin gana di desplega dominio propio mas plenamente, te na e grado cu nan ta kere ta rasonabel pa hende imperfecto. Abo tambe ta sinti asina? Kico bo por haci anto pa cultiva e aspecto aki di e fruta di spirito di Dios? Y con door di haci esei, lo bo por alcansa bo metanan di largo plaso como cristian? Laga nos wak den e siguiente articulo.

Bo Ta Corda?

• Pakico ta importante pa cristiannan cultiva dominio propio?

• Pakico pa algun cristian ta masha dificil pa cultiva dominio propio?

• Pakico dominio propio ta necesario den matrimonio?

• Dicon dominio propio ta un cualidad cu nos por yuda otro cultiva?

[Preguntanan di Estudio]

[Cuadro/Plachi na pagina 16]

El A Siña Bisa No

Tawatin un Testigo di Yehova cu ta biba na Alemania y cu a traha como tecnico di comunicacion. Su trabou a inclui tene bista riba un 30 programa di radio y television. Ora presenta un storing, e mester wak e programa pa saca afo kico ta e problema. El a conta: “Casi semper ta manera cos cu storing ta presenta net na mal momento, precis ora esenanan di violencia of di sex ta pasa. E mal esenanan ei tawata keda manera graba den mi cabes pa dianan, tin biaha pa simannan largo.” El a admiti cu esaki tawatin un mal efecto riba su spiritualidad: “Mi ta un hende cu ta irita basta lihe, y pesei e esenanan di violencia a pone cu tawata dificil pa mi eherce dominio propio. E esenanan di sex a causa tension entre ami cu mi esposa. Tur dia mi tawatin un lucha. Pa mi no perde e lucha, mi a dicidi di busca un otro trabou, maske esei lo por a nifica menos entrada. Poco tempo pasa mi a logra haya un otro trabou. Mi deseo a cumpli.”

[Plachi na pagina 15]

E conocemento cu nos ta haya door di studia Bijbel ta yuda nos eherce dominio propio