Lipuzo Ze Zwa kwa Babali

Jehova n’a ambota mañi ha n’a bulezi kwa Genese 3:22 kuli “yo muñwi wa luna”?

Ku bonahala kuli Jehova Mulimu n’a bulela ku yena muñi ni Mwan’a hae wa libanda ha n’a bulezi kuli: “Mutu s’a fetuhile sina yo muñwi wa luna bakeñisa ku ziba bunde ni bumaswe.” (Genese 3:22) Ha lu boneñi libaka.

Jehova n’a bulezi manzwi ao hamulaho wa ku atula bosinyalana ba pili. Ba bañwi se b’a ngile pulelo ya “yo muñwi wa luna” kuli i ama ku bulela sika mwa buñata ka mulelo wa ku bonisa situlo, sina mulena h’a kana a bulela kuli “ha lu si ka tabela” hailif’o u ama ku yena a nosi. Kono ka za Genese 1:26 ni 3:22, caziba wa Bibele Donald E. Gowan u li: “Mwa [Testamente ya Kale] ha ku na bupaki bo bu yemela buñata bwa litaluso ze akalelizwe, ze cwale ka za: ‘luna’ ye yemela bulena, ‘luna’ ye yemela sicaba, ku bulela sika mwa buñata ka mulelo wa ku bonisa ku kwana kwa sona, kamba ku bonisa batu ba ba mwa Mulimu wa Silalu. . . . Litaluso zeo kaufela ha li utwahali ku lumelelana ni 3:22 ye bulela za ‘yo muñwi wa luna.’”

Kana Jehova n’a bulela ku Satani Diabulosi ya na s’a kalile ku ikezeza katulo ya “bunde ni bumaswe” mi ili yo n’a susuelize batu ba pili ku eza nto ye swana? Ha ku lukeli ku ba cwalo. Jehova n’a itusisize pulelo ya ‘yo muñwi wa luna.’ Satani na s’a zwile mwa kopano ya mangeloi a’ sepahala a Jehova, kacwalo n’a si ke a balelwa ku be ne ba li kwa lineku la Jehova.

Kana Mulimu n’a bulela kwa mangeloi a’ sepahala? Ha lu koni ku ziba hande. Kono ku swana kwa lipulelo ze kwa Genese 1:26 ni 3:22 kwa kona ku lu fumanisa kalabo. Kwa Genese 1:26, lu bala kuli Jehova n’a ize: ‘A lu eze mutu ka siswaniso sa luna.’ N’a bulelela mañi manzwi ao? Ka ku ama sibupiwa sa moya se ne si til’o ba mutu ya petehile Jesu, muapositola Paulusi na ize: “Jesu ki siswaniso sa Mulimu Ya sa bonwi, mweli ku ze bupilwe kamukana. Kakuli linto kamukana li ezizwe ka yena, ze kwa lihalimu, ni ze mwa lifasi.” (Makolose 1:15, 16) Ee, kwa swanela kuli kwa Genese 1:26, Jehova n’a bulelezi Mwan’a hae wa libanda, yena “mubeleki ya pahami,” ya n’a li ni yena ka nako ya n’a bupa lihalimu ni lifasi. (Liproverbia 8:22-31, NW) Ku swana kwa pulelo ye kwa Genese 3:22 ku kana kwa bonisa kuli Jehova hape n’a bulela ku ya n’a utwana hahulu ni yena, ili Mwan’a hae wa libanda.

Ku bonahala kuli Mwan’a Mulimu wa libanda n’a ziba za “bunde ni bumaswe.” Ka ku sebelisana nako ye telele ni Jehova, kaniti n’a itutile hande mihupulo, likuka, ni lipimo za Ndat’ahe. Ka ku kolwa kuli Mwan’a hae u zibile lika zeo mi w’a li mamela, Jehova mwendi u mu file tukuluho ye ñwi ya ku talima litaba ku si na ku tusiwa ki Yena. Kacwalo, Mwana ka ku fiwa m’ata n’a ka kona ku ziba ze nde ni ze maswe. Kono ka ku sa swana ni Satani, Adama, ni Eva, Jesu n’a si ka toma lipimo ze n’e lwanisana ni za Jehova.