Au Uianga a te Aronga Tatau

Te tuatua ra a Iehova kiaai e ‘mei tetai o taua’ ia Genese 3:22?

I te akaraanga te tuatua ra te Atua ko Iehova kiaia uaorai e tana Tamaiti anau tai i tona karanga anga: ‘Te tangata nei, kua riro aia mei tetai o taua nei, i te kite i te meitaki e te kino.’ (Genese 3:22) Ka akara ana tatou i te tumu.

Kua tuatua a Iehova i teia au tuatua i muri mai i te tukuanga i te utunga ki rungao i nga tokorua mua. Kua manako etai i te tuatua ‘mei tetai o taua’ e ko te tu tere atu o te tuatua teitei, mei ta tetai ariki tangata ka tuatua e “kare matou i mareka” te taiku anga kiaia uaorai. Inara, no runga ia Genese 1:26 e 3:22, te karanga ra te tangata apii Pipiria ko Donald E. Gowan e: “Kare e turuanga i roto i te [K]oreromotu [T]aito no te maata anga o te au akatakaanga tei taikuia mai: te tuatua ‘matou’ i te tua ariki, te tuatua akakoro ‘matou,’ te tuatua tere atu o te ki anga, me kare te akatakaanga o te tuatua tere atu o te au peretana i roto i te tu o te Atua. . . . Kare e tano ana etai o teia au akamaramaanga i roto ia 3:22, te akakite maira no ‘tetai o taua.’”

Te taiku ra ainei a Iehova kia Satani te Tiaporo, tei akamata i te iki i te “meitaki e te kino” koia ua e tei akakeu i nga tangata mua kia rave akapera? Kare i tau te reira. I konei kua taiku a Iehova i te tuatua ‘tetai o taua.’ Kare a Satani e ko tetai o te au angera tiratiratu a Iehova, no reira kare aia i kapitiia mai ki te aronga i te tua o Iehova.

Te taiku ra ainei te Atua ki te au angera tiratiratu? Kare i papu meitaki ia matou. Inara, te tu aiteite o nga tuatua ia Genese 1:26 e 3:22 te oronga maira kia tatou i tetai akatakaanga. Ia Genese 1:26, ka tatau tatou e kua tuatua a Iehova: ‘E anga taua i te tangata i to taua uaorai tu, kia aite ki to taua uaorai tu.’ Te tuatua ra aia i teia au tuatua kiaai? Te tuatua anga no runga i te vaerua ora tei riro mai ei tangata tiama ko Iesu, kua akakite te apotetoro ko Paulo: “Ko te tu tikai aia o te Atua akara koreia, ko te Tama mua aia o te au mea ravarai i angaia ra: E nana oki i anga i te apinga tini ravarai nei, ko to te rangi, e to te enua nei.” (Kolosa 1:15, 16) Ae, kua akaraanga tau e ia Genese 1:26, te tuatua ra a Iehova ki tana Tamaiti anau tai, te “pu rave angaanga,” tei tona tua i te tuatau o te anga mai anga o te au rangi ra e te enua. (Maseli 8:22-31, NW) Te taiku maira te aiteite o te tuatua ia Genese 3:22 e te tuatua atura a Iehova ki tei vaitata roa mai kiaia, ko tana Tamaiti anau tai.

I te akaraanga kua kite te Tamaiti anau tai a te Atua i te “meitaki e te kino.” Mei tona tupuanga roa e te pirianga vaitata kia Iehova, papu e kua apii meitaki mai aia i te manako o tona Metua, te au kaveinga, e te au turanga. Kua papu tikai e kua kite meitaki tana Tamaiti i teia e kua vai tiratiratu kiaia, penei kua oronga atu a Iehova i te tu rangatira kiaia kia akonokono i tetai au mea ma te kore e ui tika atu Kiaia i te au taime ravarai. No reira ka rauka i te Tamaiti e kua tikaia e tae mai ki teianei i te akataka i tei meitaki e te kino. Inara, kare mei ia Satani, Adamu, e Eva rai, kare aia i akanoo ana i tetai turanga tuke atu ki ta Iehova.