Namumunga an Maogmang Bareta  sa São Tomé Asin Príncipe

TIBAAD nungka pang nadangog kan kadaklan na tawo an São Tomé asin Príncipe. Sa parate an mga islang ini dai ibinubugtak sa mga brosyur na nagpapaisi manongod sa mga bakasyonan. Sa mapa kan kinaban, garo iyan saradit na tuldok na yaon sa Golpo nin Guinea sa may solnopan na baybayon nin Aprika, na an São Tomé haros yaon na sa ekwador asin an Príncipe medyo yaon na sa amihanan-sirangan. An maoran, basa-basang klima nagpangyaring magkaigwa nin marambong na mga kadlagan, na minatakop sa mga bakilid kan kabukidan na may langkaw na labing 2,000 metros.

An mga islang ini sa tropiko, na napalilibotan nin asul na katubigan asin mga baybayon na may mga palma, iniistaran nin mainamigo, karinyosong mga tawo, na huli sa magkasalak na Aprikano asin Europeong ginikanan nagkaigwa nin nakagagayagayang kombinasyon nin mga kultura. An okupasyon kan populasyon na 170,000 may koneksion sa pangenot na produktong pan-eksportar, an kakaw, o pag-oma asin paninira. Sa nakaagi pa sanang mga taon, dawa an pakakua nin kakanon sa kada aldaw nagin depisil.

Minsan siring, naheling sa huring dekada kan ika-20 siglo an sarong pangyayari na nakaapektar na marhay sa buhay nin nagdadakol na tawo sa mga islang ini. Kan Hunyo 1993, an Mga Saksi ni Jehova legal na irinehistro sa gobyerno nin São Tomé asin Príncipe, sa siring tinatapos an halaba asin sa parate masakit na peryodo sa kasaysayan kan Mga Saksi ni Jehova sa mga islang ini.

Isinabwag an mga Banhi sa Irarom nin Kasakitan

Minalataw na an enot na Saksi nag-abot sa nasyon na ini kan enot na mga taon nin 1950 kan an mga bilanggo hale sa ibang kolonya nin Portugal sa Aprika ipinadara tanganing magtrabaho sa mga kampo nin puersahan na pagtrabaho sa mga islang ini. An Saksi, sarong Aprikanong payunir, o pambilog na panahon na ministro, idineportar hale sa Mozambique huli ta naghulit sia kan maogmang bareta kan Kahadean nin Dios sa nasyon na iyan. An nagsosolong Saksi nagpadagos na sibot, asin sa laog nin anom na bulan, igwa na nin 13 iba pa na nakikabtang sa pagpalakop kan maogmang bareta. Paghaloyhaloy, an iba pang Saksi na arog man kaiyan an kamugtakan nag-abot hale sa Angola. Durante kan saindang pagkabilanggo, inaprobetsaran ninda an lambang oportunidad na ipaabot an maogmang bareta sa lokal na mga habitante.

Kan 1966 an gabos na tugang na nakatapos na kan sentensia sa São Tomé nagpuruli na sa kontinente nin Aprika. An sadit na grupo nin mga parahayag kan Kahadean na nawalat may kosog nin boot na nagpadagos. Sinda pinaglamag, binugbog, asin ibinilanggo huli ta nagtiripon sinda tanganing mag-adal kan Biblia, asin mayo nin nagdalaw sainda o nagparigon kan boot ninda. Nakua kan nasyon an independensia hale sa Portugal kan 1975, asin luway-luway na nagkabunga an mga banhi kan katotoohan kan Kahadean.

Pagpahiwas Asin Pagtogdok

Kan mismong bulan kan legal na pagrehistro kan 1993, nagkaigwa nin pinakahalangkaw na kabilangan na 100 na parahayag kan Kahadean. Kan taon man sanang idto, nag-abot an mga espesyal payunir hale sa Portugal. Napamahal sinda sa mga taga duman huli sa mga paghihingoa ninda na makanood nin Criollo Portugues. Dangan nagin prioridad an paghanap nin daga na totogdokan nin Kingdom Hall. Kan maaraman an pangangaipong ini, idinonar nin sarong tugang na babae na an ngaran Maria an kabanga kan daga na natotogdokan nia kan saiyang sadit na harong. An lote igo an hiwas para sa dakulang Kingdom Hall. Dai aram ni Maria na huling mayo na siang natatadang mga paryente, an loteng ini pinagkakainteresan nin ambisyosong mga nagpapakarhay nin daga. Sarong aldaw uminabot an sarong prominenteng negosyante tanganing kaolayon si Maria.

“Bakong marahay an nababaretaan ko dapit saimo!” an patanid kaini sa saiya. “Nabaretaan ko na idinonar mo an saimong daga. Dai mo daw naaaraman na dakulaon an kantidad kaini huli ta yaon mismo ini sa siudad?”

“Kun ialok ko an daga saimo, gurano an ibabayad mo sako?” an hapot ni Maria. Kan dai magsimbag an lalaki, si Maria nagpadagos: “Dawa itao mo sako an gabos na kuarta sa kinaban, dai  magigin igo iyan huli ta dai kayang bakalon nin kuarta an buhay.”

“Mayo kang mga aki, bako daw?” an hapot kan lalaki.

Tanganing taposon na an orolay, si Maria nagsabi: “An dagang ini ki Jehova. Ipinasubli nia ini sa sako sa laog nin kadakol na taon, asin ngonyan ibinalik ko ini sa saiya. Inaantisipar ko na mabuhay sagkod lamang.” Dangan hinapot nia an lalaki: “Mayo kang ikaaalok na buhay na daing katapusan, bako daw?” Mayo nang itinaram, ini tuminalikod asin huminale.

An resulta iyo na itinogdok an sarong magayon na duwang eskalon na edipisyo sa tabang kan kualipikadong mga tugang hale sa Portugal. Iyan may sirong, sarong mahiwas na Kingdom Hall, asin mga istaran. Igwa man iyan nin mga kuarto kan klase para sa paadalan nin mga magurang sa kongregasyon, ministeryal na lingkod, asin payunir. Duwang kongregasyon ngonyan an nagtitiripon dian, na ginigibo iyan na marahay na sentro nin edukasyon para sa dalisay na pagsamba sa kabisera.

Sa Mé-Zochi, may sarong kongregasyon na igwa nin 60 maigot na parahayag. Huling ginigibo an mga pagtiripon sa temporaryong Kingdom Hall sa kababatagan, naheling an pangangaipo nin angay na Kingdom Hall. Ipinaaram ini sa munisipyo kan siudad, asin an maboot na mga opisyal nagtao nin pinakapiling lote sa mayor na kalye. Sarong magayon na Kingdom Hall an itinogdok sa laog nin duwang bulan sa tabang kan mga tugang hale sa Portugal, na ginagamit an marikas na paagi nin pagtogdok. Haros dai makatubod an mga taga duman sa naheling ninda. Napangalas an sarong Suecong inhenyero na imbuelto sa sarong proyekto nin pagtogdok sa siudad kan maheling an mga tugang na lalaki asin babae na nagtatrabaho. “Pambihirang marhay ini!” an komento nia. “Mga Saksi ni Jehova, digdi sa Mé-Zochi, na ginagamit an marikas na paagi nin pagtogdok! Maninigo na arog kaini an paagi nin pag-organisar niato sa satong proyekto.” An Kingdom Hall idinedikar kan Hunyo 12, 1999, na may nag-atender na 232. An Kingdom Hall nagin mayor na pasyaran nin mga turista sa siudad nin Mé-Zochi.

Sarong Makasaysayan na Kombension

Sarong makasaysayan na pangyayari para sa Mga Saksi ni Jehova sa São Tomé asin Príncipe an tolong aldaw na “Banal na Pagtotokdo” na Pandistritong Kombension kan Enero 1994​—an kaenot-enote sa mga islang ini. Ginibo iyan sa pinakamagayon na air-conditioned na auditoryum sa nasyon. Maiimahinar daw nindo an kagayagayahan  kan 116 na parahayag kan Kahadean sa pakaheling sa 405 nag-atender asin sa kaenot-enote pagdalan nin mga drama sa Biblia saka pag-ako nin mga publikasyon na ilinuwas sa kombension? Sa sarong dagat sa tropiko ginibo an pagbautismo sa 20 nagdusay na tawo.

An sarong bagong bagay na nakakua sa atension kan publiko iyo an napapalaen na mga lapel badge na ginamit kan mga delegado. An presensia kan 25 bisita hale sa Portugal asin Angola nakadagdag sa pagigin internasyonal kan kombension. Tolos na tuminalubo an bogkos nin mainit na Kristianong pagkamoot, asin dakol an nagluluha sa huring sesyon kan sinda magpaaram.​—Juan 13:35.

An mga peryodista hale sa Radyo Nasyonal uminabot asin ininterbio an paraataman kan kombension. Ibrinodkast man ninda an haralipot na kabtang kan nagkapira sa mga diskurso. Iyan tunay nanggad na makasaysayan na okasyon, asin sa haloy nang napasuway na fiel na mga Saksing ini, nakatabang iyan tanganing an naheheling na organisasyon ni Jehova magin garo baga mas haraning marhay.

Pamumunga Para sa Kaomawan ni Jehova

Kun an mensahe kan Kahadean mamunga, nagpapaluwas iyan nin marahay na gawe-gawe na nagtatao nin pag-omaw asin onra ki Jehova. (Tito 2:10) Ikinaogma nin sarong daragita an saiyang nanonodan sa semanal na pag-adal nia sa Biblia. Minsan siring, ibinawal kan saiyang ama an pag-atender nia sa mga pagtiripon kan kongregasyon. Kan magalang niang ipinaliwanag sa saiyang ama an kahalagahan kan Kristianong mga pagtiripon asin an pagmawot nia na makaatender, tolos-tolos siang pinalayas kaini sa harong. Minalataw na an paghona kan ama gigibohon kan aki nia an ginigibo kan dakol na ibang hoben​—tolos na makikisaro sa sarong lalaki na masustento sa saiya. Kan maaraman kan ama na an saiyang aki may arogan asin mabining pamumuhay bilang sarong Kristiano, napahiro siang akoon liwat ini asin itao digdi an lubos na katalingkasan na maglingkod ki Jehova.

An saro pang halimbawa iyo an sa nangengenot sa sarong grupo nin mga musikero. Nadesganar sia sa inmoral na pamumuhay nia. Mantang hinahanap an katuyohan nin buhay, nakaolay sia kan mga Saksi. Kan ponan niang mamuhay kaoyon kan mga pamantayan kan Biblia sa moral, sia an nagin tema kan pag-orolay-olay nin gabos. Dai nahaloy nasabotan nia na kaipuhan niang putolon an gabos na nakararaot na mga pakikiasosyar. (1 Corinto 15:33) Dangan ginibo nia an mahalagang marhay na lakdang na pagpabautismo bilang simbolo kan saiyang pagdusay ki Jehova.

May nagkapirang hoben na naghahanap kan tunay na relihion. Sa saindang paghanap nakipag-olay sinda sa mga pastor nin nagkapirang grupo ebangheliko, alagad nagbunga ini nin dugang pang pagkaribaraw asin pagkadesganar. Bilang resulta, sinda nagin madahas na mga naglalagawlagaw asin nagtutuyatuya sa ano man na manongod sa relihion.

Sarong aldaw, an saro sa Mga Saksi ni Jehova, na sarong misyonero, pasiring sa pinamamayohan nia nin pag-adal sa Biblia asin nakaagi sa lugar na yaon an mga hoben na ini. Gusto kan grupo na simbagon kan misyonero an nagkapirang hapot kaya iiniba sia sa sarong libod asin pinatukaw sia sa sarong bangkito. An suminunod iyo an pagpaoran saiya nin mga hapot sa mga tema na arog kan dapit sa kalag, kalayo sa impierno, buhay sa langit, asin katapusan kan kinaban. Sinimbag kan Saksi an gabos na hapot ninda hale sa Biblia na ipinasubli sa saiya kan lider kan gang. Pakalihis nin sarong oras, an lider, na an ngaran Law, nagsabi sa misyonero: “Kan kaolayon mi ika na umiba asin simbagon an mga hapot, an samong intension pag-olog-ologon ka, arog kan ginibo mi sa mga tawo sa ibang relihion. Nagsasaboot kami na mayo nin makakasimbag sa mga hapot na iyan. Alagad nasimbag mo iyan, asin ginibo mo iyan na Biblia sana an ginagamit! Sabihon mo sako, paano ako makakanood nin orog pa manongod sa Biblia?” Naponan an sarong pag-adal sa Biblia ki Law, asin dai nahaloy nagpoon na siang mag-atender sa mga pagtiripon. Dai nahaloy pagkatapos kaiyan, binayaan nia an grupo asin pinondo an saiyang madahas na pamumuhay. Sa laog nin sangtaon, idinusay nia an saiyang buhay ki Jehova asin nabautismohan sia. Sia naglilingkod ngonyan bilang sarong ministeryal na lingkod.

An sarong lokal na kaugalean na marigon nang nakaestablisar iyo na an mga magkailusyon nagsasaro na sana na dai ikinakasal nin legal. Dakol an nagsasaro sa laog na nin dakol na taon, asin sinda may mga aki na. Nadedepisilan sindang akoon an  pagmansay nin Dios sa bagay na ini. Nakaoogmang maheling kun paanong natabangan kan Tataramon nin Dios an sarong tawo na mapangganahan an olang na ini.​—2 Corinto 10:4-6; Hebreo 4:12.

Nasabotan ni Antonio na maninigo niang legalisaron an saiyang pag-agom asin nagplano sia na gibohon ini pagkatapos kan aranihan nin mais na sa panahon na iyan magkakaigwa sia nin kuarta para sa punsion sa kasal. Sarong banggi kan madali na an aranihan, uminabot an mga parahabon asin hinabon an saiyang mga aanihon. Nagdesisyon siang maghalat sa aanihon sa masunod na taon, asin sa giraray hinabon iyan. Kan maprakaso giraray an saro pang pagprobar na makakua nin pondo para sa saiyang kasal, narealisar ni Antonio kun siisay an tunay na nagkokontra sa saiya. “Dai ko na totogotan na lokohon ako ni Satanas,” an sabi nia. “Ikakasal kami pakalihis nin saro may kabangang bulan, may punsion man o mayo!” Kaya nagpakasal sinda, asin sinda nasorpresa ta an saindang mga katood nagtao nin mga manok, mga pato, asin sarong kanding para sa punsion sa kasal. Pagkatapos na makasal, si Antonio asin an saiyang agom​—kaiba an saindang anom na aki​—nabautismohan bilang simbolo kan saindang pagdusay ki Jehova.

Duman Naman sa Isla nin Príncipe

Ginibo an paminsanminsan na pagdalaw sa 6,000 na nag-iistar sa Príncipe kan paraataman sa sirkito asin kan mga payunir na hale sa São Tomé kan nakaagi pa sanang mga taon. An mga taga isla mapag-istimar na marhay asin gustong-gusto na magdangog sa sasabihon kan mga Saksi. Pakabasaha kan sarong pulyeto na iwinalat sa saiya, hinanap nin sarong lalaki an mga payunir kan sumunod na aldaw asin nag-alok na matabang sainda sa pagdistribwir pa nin mga pulyeto. Ipinaliwanag kan mga payunir na sinda an maninigong gumibo kan gibohon na ini, alagad nag-insistir an lalaki na iibanan nia sinda sa mga pinto tanganing ikaintrodusir nia sinda sa mga kagharong kaiba an rekomendasyon na maingat na maghinanyog. Sa katapustapusi an lalaki huminale, alagad pagkatapos sanang matawan nin komendasyon an mga payunir sa importanteng gibohon na ginigibo ninda.

Kan 1998 duwang payunir hale sa São Tomé an nagbalyo sa Príncipe, asin dai nahaloy pinamamayohan na ninda an 17 pag-adal sa Biblia. An gibohon padagos na huminiwas, asin dai nahaloy an Pag-adal sa Libro kan Kongregasyon may promedyo nang 16 na nag-aatender, asin labing 30 an nag-aatender sa pampublikong pahayag. Iprinesentar sa munisipyo kan siudad an pangangaipo para sa lugar na tiriponan, asin nakaoogma ta may itinaong daga na totogdokan kan Kingdom Hall. Nagboluntaryo an mga tugang hale sa São Tomé na magtogdok nin sarong sadit na Kingdom Hall na igwa man nin istaran para sa duwang espesyal payunir.

Daing duda na an maogmang bareta namumunga nin dakol asin nagtatalubo sa harayong mga islang ini. (Colosas 1:​5, 6) Kan Enero 1990 igwa nin 46 na parahayag sa São Tomé asin Príncipe. Durante kan 2002 na taon nin paglilingkod, naabot an pinakahalangkaw na kabilangan na 388 parabalangibog kan Kahadean! Labing 20 porsiento kan mga parahayag an yaon sa pambilog na panahon na paglilingkod, asin mga 1,400 na pag-adal sa Biblia an pinamamayohan. Nakaabot sa pinakahalangkaw kasuarin pa man na kabilangan na 1,907 an nag-atender sa Memorial kan 2001. Iyo, sa mga islang ini sa tropiko, an tataramon ni Jehova marikas na naglalakop asin pinamumuraway.​—2 Tesalonica 3:1.

[Kahon/Ritrato sa pahina 12]

Popular na mga Brodkast sa Radyo

An sarong publikasyon na inaapresyar na marhay sa mga islang ini iyo an Questions Young People Ask​—Answers That Work. * Kada ikaduwang semana, sarong 15 minutos na programa na iyan an titulo an ipinepresentar sa Radyo Nasyonal. Nakakapalukso nanggad sa puso na madangog an parabareta sa radyo na maghapot, “Mga hoben, paano nindo naaaraman kun iyan tunay na pagkamoot o pagkabangkag sana?” asin iyan susundan nin pagbasa nin sarong kabtang sa libro! (Helingon an kapitulo 31.) Ipinepresentar kan sarong kaagid na brodkast an piniling mga kabtang sa librong An Sekreto sa Kaogmahan nin Pamilya. *

[Mga Nota sa Ibaba]

[Ritrato sa pahina 9]

An enot na Kingdom Hall sa São Tomé kan 1994

[Mga Ritrato sa pahina 10]

1. An marikas an pagkatogdok na Kingdom Hall sa Mé-Zochi

2. An sarong makasaysayan na pandistritong kombension ginibo sa auditoryum na ini

3. Maogmang mga kandidato sa bautismo sa kombension

[Picture Credit Line sa pahina 8]

Globo: Mountain High Maps® Copyright © 1997 Digital Wisdom, Inc.