Puede Kamong Magtubod sa Sarong Paraisong Daga

SA BILOG na kasaysayan, dakol na tawo an naniwala na pag-abot nin panahon babayaan ninda an daga asin masakat sinda sa langit. May mga nagsasaboot na nungkang intension kan satong Kaglalang na an daga magin permanente niatong erokan. An mga ascetiko luminabi pa dian. Para sa dakol sa sainda, an daga asin an gabos na materyal na bagay maraot​—sarong olang sa tunay na espirituwal na satispaksion asin kadayupotan sa Dios.

An mga nagkaigwa nin mga ideya na nasambitan sa enotan magsalang daing pakaaram sa sinabi nin Dios manongod sa sarong paraisong daga o tuyong dai iniintindi iyan. Sa katunayan, dakol ngonyan an dai interesadong siyasaton an ipinasabong nin Dios na isurat nin mga tawo manongod sa temang ini sa saiyang Tataramon, an Biblia. (2 Timoteo 3:​16, 17) Alagad bako daw na madonong na magtiwala sa Tataramon nin Dios imbes na akoon an mga teoriya nin mga tawo? (Roma 3:4) Sa katunayan, mahalagang marhay na gibohon niato iyan, huling pinatatanidan kita kan Biblia na an mga tawo binuta sa espirituwal nin sarong makapangyarihan alagad dai naheheling na maraot na linalang asin ngonyan saiyang “ilinalagalag an bilog na ineerokan na daga.”​—Kapahayagan 12:9; 2 Corinto 4:4.

Taano ta May Karibarawan?

An nagkokorontrahan na mga ideya manongod sa kalag an nagin dahelan na an mga tawo maribaraw manongod sa katuyohan nin Dios para sa daga. Dakol an naniniwala na kita igwang inmortal na kalag​—sarong bagay na suway sa hawak nin tawo asin na nagdadanay na buhay pagkagadan. An iba pa naniniwala na an kalag nag-eeksister na bago pa lalangon an hawak. Oyon sa sarong reperensia, an Griegong pilosopo na si Plato nagsaboot na an kalag “nalalaom sa hawak bilang padusa sa mga kasalan na nakomiter kaiyan kan iyan yaon pa sa langit.” Kaagid kaiyan, an teologo kan ikatolong siglo na si Origen nagsabi na “an mga kalag nagkasala [sa langit] bago sinda isaro sa hawak” asin “ibinilanggo [sa hawak na iyan digdi sa daga] bilang padusa sa saindang mga kasalan.” Asin dakol an naniniwala na an daga saro sanang klase nin lugar nin pagbalo sa pagbiahe nin tawo pasiring sa langit.

Igwa man nin manlaenlaen na ideya sa kun ano an nangyayari sa kalag kun magadan an sarong tawo. Oyon sa librong History of Western Philosophy, an mga Egipcio nagkaigwa kan opinyon na “an kalag kan mga gadan minababa sa kinaban kan mga gadan.” An mga pilosopo nakidiskutir kan huri na an kalag kan mga gadan dai minababa sa madiklom na kinaban kan mga gadan kundi sa katunayan minasakat sa mas halangkaw na rona nin mga espiritu. An Griegong pilosopo na si Socrates naniwala daa na pagkagadan an kalag “minahale pasiring sa [sarong] dai naheheling na rona . . . asin duman na nagdadanay sa bilog niang pag-eksister kaiba kan mga dios.”

Ano an Sinasabi kan Biblia?

Mayong sinasabi sa ipinasabong na Tataramon nin Dios, an Biblia, na an mga tawo may inmortal na kalag. Basahon mismo nindo an pagkasaysay sa Genesis 2:7. Sinasabi kaiyan: “Pinorma ni Jehova Dios an tawo hale sa kabokabo kan daga asin hinangosan sia sa saiyang dongo kan hinangos nin buhay, asin an tawo nagin buhay na kalag.” Iyan klaro asin dai puedeng mamisinterpretar. Kan lalangon nin Dios an enot na tawo, si Adan, dai Nia sia binugtakan nin espiritung kabtang. Dai, huli ta sinasabi kan Biblia na “an tawo nagin buhay na kalag.” An tawo dai linagan nin kalag. Sia sarong kalag.

Sa paglalang kan daga asin kan pamilya nin tawo, nungkang intension ni Jehova na an tawo magadan. An katuyohan nin Dios iyo na an mga tawo mabuhay sa daga sagkod lamang sa tahaw  nin Paraisong kamugtakan. Si Adan nagadan sana huli ta nakisuway sia sa ley nin Dios. (Genesis 2:​8, 15-17; 3:1-6; Isaias 45:18) Kan magadan an enot na tawo, nagpasiring daw sia sa sarong rona nin mga espiritu? Dai! Sia​—an kalag na si Adan​—nagbalik sa daing buhay na kabokabo na hale dian sia linalang.​—Genesis 3:17-19.

Kita gabos nagmana nin kasalan asin kagadanan sa satong apoon na si Adan. (Roma 5:12) An kagadanan na ini pagpondong mag-eksister, arog kan nangyari ki Adan. (Salmo 146:​3, 4) Sa katunayan, sa bilog na 66 na libro kaiyan, nungkang ikinokonektar kan Biblia an terminong “inmortal” o “daing katapusan” sa terminong “kalag.” Al kontraryo, malinaw na sinasabi kan Kasuratan na an kalag​—an tawo​—magagadanon. An kalag nagagadan.​—Eclesiastes 9:​5, 10; Ezequiel 18:4.

An Materyal na mga Bagay daw Natural Nang Maraot?

Kumusta man an ideya na an materyal na mga bagay, pati an daga, maraot? Siring an opinyon kan mga parasunod kan Manikismo, sarong relihiosong mobimiento na inestablisar sa Persia durante kan ikatolong siglo C.E. nin sarong indibiduwal na an ngaran Mani. An sabi kan The New Encyclopædia Britannica: “Naglataw an Manikismo huli sa labi-labing kamondoan na natural nang nangyayari sa tawo.” Naniniwala si Mani na an pagigin tawo “bakong natural, dai kayang tioson, asin biyong maraot.” Naniniwala man sia na an solamenteng paagi na makabutas sa “labi-labing kamondoan” na ini iyo an pagluwas kan kalag sa hawak, paghale sa daga, asin pakaabot sa espirituwal na pag-eksister sa kinaban nin mga espiritu.

Sa kabaliktaran, sinasabi sa sato kan Biblia na sa pagheling nin Dios “an gabos niang ginibo” kan linalalang nia an daga asin katawohan “marahayon.” (Genesis 1:31) Kan panahon na iyan, mayo nin olang sa pag-oltanan nin mga tawo asin nin Dios. Si Adan asin Eva may dayupot na relasyon ki Jehova, kun paanong an sangkap na tawong si Jesu-Cristo may dayupot na relasyon sa saiyang langitnon na Ama.​—Mateo 3:17.

Kun an enot niatong mga magurang, si Adan asin Eva, dai nagsunod sa dalan nin kasalan, igwa kutana sinda nin daing sagkod na dayupot na relasyon ki Jehova Dios sa sarong paraisong daga. Pinonan ninda an buhay sa Paraiso, huli ta sinasabi sa sato kan Kasuratan: “Si Jehova Dios nagtanom nin hardin sa Eden, sa sirangan, asin duman nia ibinugtak an tawo na saiyang hinaman.” (Genesis 2:8) Si Eva linalang sa paraisong hardin na iyan. Kun si Adan asin Eva dai nagkasala, sinda asin an saindang sangkap na mga gikan  maogma kutanang nakapagtarabangan sagkod na an bilog na daga nagin sarong paraiso. (Genesis 2:21; 3:​23, 24) An Paraiso digdi sa daga nagin kutanang daing sagkod na erokan nin katawohan.

Taano daw ta May mga Mapalangit?

‘Alagad,’ tibaad sabihon nindo, ‘bako daw na may sinasabi an Biblia manongod sa mga tawong mapalangit?’ Iyo. Pagkatapos magkasala si Adan, nagin katuyohan ni Jehova na magpatindog nin sarong langitnon na Kahadean kun saen an nagkapira sa mga gikan ni Adan “mamamahala bilang mga hade sa daga” kaiba ni Jesu-Cristo. (Kapahayagan 5:10; Roma 8:17) Sinda bubuhayon liwat sa inmortal na buhay sa langit. An ultimong bilang ninda 144,000, asin an nagkaerenot sa sainda iyo an fiel na mga disipulo ni Jesus kan enot na siglo.​—Lucas 12:32; 1 Corinto 15:42-44; Kapahayagan 14:1-5.

Minsan siring, bakong orihinal na katuyohan nin Dios na an tanos na mga tawo bayaan an daga asin magsakat sa langit. Sa katunayan, kan nasa daga si Jesus, sia nagsabi: “Mayo nin tawo na nagsakat sa langit kundi idtong naghilig hale sa langit, an Aki nin tawo.” (Juan 3:13) Paagi sa “Aki nin tawo,” si Jesu-Cristo, nagtao an Dios nin pantubos na pinagin posible an buhay na daing katapusan para sa mga nagtutubod sa atang ni Jesus. (Roma 5:8) Alagad saen mabubuhay nin daing sagkod an minilyon na arog kaiyan na tawo?

Maootob an Orihinal na Katuyohan nin Dios

Minsan ngani katuyohan nin Dios na magkua nin nagkapira sa pamilya nin tawo na maglilingkod bilang kairibang namamahala ni Jesu-Cristo sa langitnon na Kahadean, dai iyan nangangahulogan na mapalangit an gabos na tawong marahay. Linalang ni Jehova an daga na magin Paraisong erokan kan pamilya nin tawo. Dai na nanggad mahahaloy, ootobon na nin Dios an orihinal na katuyohan na iyan.​—Mateo 6:​9, 10.

Sa pamamahala ni Jesu-Cristo asin kan saiyang langitnon na kairibang namamahala, an katoninongan asin kaogmahan mangingibabaw sa bilog na daga. (Salmo 37:9-11) An mga nasa girumdoman nin Dios mabubuhay liwat asin magkakamit nin sangkap na salud. (Gibo 24:15) Paagi sa pagigin fiel ninda sa Dios, itatao sa makinuyog na katawohan an iwinara kan satong orihinal na mga magurang​—an buhay na daing katapusan na may pagkasangkap bilang tawo sa sarong paraisong daga.​—Kapahayagan 21:​3, 4.

Si Jehova Dios nungkang nasusudya sa pag-otob kan saiyang katuyohan na gibohon. Paagi sa saiyang propetang si Isaias, ipinahayag nia: “Kun paanong an oran minaibaba, asin an niebe, hale sa kalangitan asin dai na minabalik dian, sagkod na dai kaiyan masagom an daga asin papagbungahon saka patuboon iyan, asin tawan nin banhi an parasabwag asin nin tinapay an makakan, magigin siring man an sakong tataramon na magluwas sa sakong ngoso. Dai iyan mabalik sa sako na mayong nahaman, kundi gigibohon nanggad kaiyan an ikinaoogma kong marhay, asin iyan siertong magigin mapanggana sa sakuyang sinobolan kaiyan.”​—Isaias 55:​10, 11.

Sa libro sa Biblia na Isaias, tinatawan kita nin preliminaryong paheling kun ano an klase nin buhay sa Paraisong daga. Mayo nin nag-eerok sa Paraiso na masabi, “Naghehelang ako.” (Isaias 33:24) An tawo dai na mamemeligro sa mga hayop. (Isaias 11:6-9) An mga tawo matogdok nin magagayon na harong asin maistar dian saka matanom nin mga pananom asin makakan sagkod na makontento. (Isaias 65:21-25) Dugang pa, “totoong hahalonon [nin Dios] an kagadanan sagkod lamang, asin papahidon nanggad kan Soberanong Kagurangnan na Jehova an mga luha sa gabos na lalauogon.”​—Isaias 25:8.

Dai na mahahaloy, an makinuyog na katawohan mamumuhay sa siring na marahayon na mga kamugtakan. Sinda “patatalingkason sa pagkaoripon sa kalapaan asin magkakaigwa kan mamuraway na katalingkasan kan mga aki nin Dios.” (Roma 8:21) Marahayon nanggad na mabuhay sagkod lamang sa ipinanugang Paraiso digdi sa daga! (Lucas 23:43) Mapapaduman kamo kun kamo mahiro kaoyon kan tamang kaaraman sa Kasuratan asin matubod ki Jehova Dios saka ki Jesu-Cristo. Asin makasasarig kamo na talagang rasonable na magtubod sa sarong paraisong daga.

[Ritrato sa pahina 5]

Si Adan asin Eva dinisenyo na mabuhay sagkod lamang sa sarong paraisong daga

 [Ritrato sa pahina 7]

Sa Paraiso digdi sa daga . . .

sinda matogdok nin mga harong

sinda matanom nin mga ubasan

sinda bebendisyonan ni Jehova

[Picture Credit Line sa pahina 4]

U.S. Fish & Wildlife Service, Washington, D.C./NASA