Mulakonzya Kusyoma Nyika ya Paradaiso

KUZWA kaindi, bantu banji bali kusyoma kuti kumbele baya kuzwa munyika akuunka kujulu. Bamwi bayeeya kuti Mulengi wesu tanaakayandide kuti nyika ibe yesu yakukkala lyoonse. Balo ibaciinga cabantu baliimya balaciindizya. Kubanabunji, nyika alimwi azintu zyakumubili bazibona kuti nzibi—zyibasinkilila kukkutila kumuuya alimwi akuba acilongwe cibotu a Leza.

Aabo bakatalisya mizeezo njitwazwaa kubandika balakonzya kuti tiibakazyi ncaakaamba Leza kujatikizya nyika yaparadaiso naa bakasala kutasyoma acaali. Mubwini, mazubaano banji tabatondezyi luyandisisyo mukulingaula ncobakalemba baalumi mbaakasololela Leza amuuya wakwe kulemba zili mu Jwi lyakwe, Ibbaibbele kujatikizya makani aaya. (2 Timoteo 3:16, 17) Pele sena tacili camaano kusyoma Jwi lya Leza muciindi cakutobela njiisyo zyabantu? (Ba-Roma 3:4) Masimpe kulayandika kuti tucite obo, mbwaanga Ibbaibbele litucenjezya kuti cilenge cibi cimwi canguzu alimwi citalibonyi cawofwaazya bantu kumuuya alimwi lino cili “[mukwe]ena bantu boonse baansi.”—Ciyubunuzyo 12:9; 2 Ba-Korinto 4:4.

Nkaambo nzi Ncokuli Kwiimpana?

Kwiimpana kwamizeezo ikujatikizya buumi kwapa kuti bantu banyongane kujatikizya makanze aa Leza kunyika. Banji basyoma kuti tujisi buumi butafwi—cintu cimwi citajateni amubili wamuntu alimwi citafwi. Bamwi basyoma kuti buumi bwakaliko kale mubili wamuntu kautanalengwa. Kweelana acaamba bbuku limwi, syaabusongo muna Giliki Plato wakayeeya kuti buumi “bwakabikkwa mumubili kacili cisubulo cazibi ncobwakacita nobwakali kujulu.” Mbubwenya buyo awalo sikwiiya zyabukombi wamumwaanda wamyaka watatu Origen wakaamba kuti “buumi bwakabisya [kujulu] kabutanajatana amubili” alimwi “bwakabikkwa [mumubili anyika] kacili cisubulo cazibi.” Alimwi bantu banji basyoma kuti nyika mbusena buyo bwakusunkilwa nobali mulweendo lwabo lwakuunka kujulu.

Alimwi kuli mizeezo yiindene-indene kujatikizya cicitika kubuumi ciindi muntu nafwa. Kweelana abbuku lyakuti, History of Western Philosophy, bana Egepita bakatalisya muzeezo wakuti “buumi bwabantu bafwide buunka kucikkalilo cabafwu.” Basyaabusongo kumbele bakazyi kukazya kuti buumi tiibwakali kuunka kucikkalilo cabafwu cibyaabi pele bwakali kuzwa buya kubusena oobo kuya kumbi kusumpukide mubusena bwamuuya. Syaabusongo muna Giliki Socrates waambwa kuti wakali kusyoma kuti muntu afwa buumi bwakwe “buunka kubusena butalibonyi . . . alimwi ooko bulakkala abaleza lyoonse.”

Ino Ibbaibbele Lyaamba Nzi?

Ibbaibbele, Ijwi lya Leza lyakasololelwa amuuya, kunyina nolyaamba kuti kuli cibeela cimwi citalibonyi bantu ncobajisi icitafwi. Amulibalile cilembedwe ku Matalikilo 2:7. Kwaambwa kuti: “Jehova Leza wakabumba muntu. Wakamubumbya bulongo bwaansi, wamufulida mumpemu zyakwe muuya wabuumi, nkabela mpawo muntu wakaba muumi.” Eeci cilisalede alimwi cilamvwika. Ciindi Leza naakalenga muntu wakusaanguna Adamu, tanaakabikka cintu cimwi camuuya mulinguwe. Peepe, nkaambo Ibbaibbele lyaamba kuti “mpawo muntu wakaba muumi.” Muntu tanaakajisi buya buumi. Walo wakali muumi.

 Naakalenga nyika abantu boonse, Jehova kunyina naakali kuyanda kuti bantu kabafwa. Makanze aa Leza akali akuti bantu kabakkala anyika kukabe kutamani mubukkale bubotu bwa Paradaiso. Adamu wakafwa akaambo kakutatobela mulawo wa Leza. (Matalikilo 2:8, 15-17; 3:1-6; Isaya 45:18) Ciindi muntu wakusaanguna naakafwa, sena wakaunka kubusena bwamuuya? Peepe! Walo—muntu Adamu—wakapiluka kubulongo butaponi nkwaakalengelwa.—Matalikilo 3:17-19.

Toonse twakakona cibi alimwi alufwu kuzwa kumuzyali wesu Adamu. (Ba-Roma 5:12) Lufwu oolu caamba kucileka kupona, mbuli mbucakabede kuli Adamu. (Intembauzyo 146:3, 4) Mumabbuku oonse aali 66, Ibbaibbele kunyina nolitondezya kuti cintu cimwi cili mumuntu tacifwi. Mukwiimpana, Magwalo alaamba cakusalazya kuti buumi bwamuntu bulagola naafwa. Buumi bulafwa.—Mukambausi 9:5, 10.

Sena Zintu Zilibonya Zyakalengwa Kazili Zibi?

Ino mbuti muzeezo wakuti zintu zilibonya, kubikkilizya anyika, nzibi? Muzeezo ooyo wakali kusyomwa aankamu yacikombelo yaku Persia mumwaanda wamyaka watatu C.E. wakatalisyigwa amuntu wazina lyakuti Mani. Ibbuku litegwa The New Encyclopædia Britannica lyaamba kuti: “Imuzeezo ooyo wakatalika akaambo kamapenzi ngobazyalwa aangawo bantunsi.” Mani wakali kusyoma kuti kuba muntunsi cakali “ceenzu, citakonzyeki kuliyumya alimwi cibi kapati.” Alimwi wakali kusyoma kuti nzila yelikke buyo yakuzwa “mupenzi” eeli njakuti buumi buzwe mumubili, bwiisiye nyika akucikonzya kukkala munyika yamuuya.

Mukwiimpana, Ibbaibbele litwaambila kuti kuli Leza “zintu zyoonse nzyaakacita” naakali kulenga nyika alimwi abantu ‘zyakabota loko.’ (Matalikilo 1:31) Ciindi eeco, kwakanyina cakali kusinkilila akati kabantu a Leza. Ba Adamu a Eva bakali acilongwe cibotu kapati a Jehova, mbuli cakajisi mwaalumi uulondokede Jesu Kristo a Bausyi bakujulu.—Matayo 3:17.

Ikuti bazyali besu bakutaanguna, ba Adamu a Eva nibatakabisya nibakazumanana acilongwe cibotu a Jehova Leza citamani muparadaiso anyika. Bakatalika bukkale bwabo mu Paradaiso, mbwaanga Magwalo atwaambila kuti: “Jehova Leza wakalima muunda kujwe ku-Edeni, nkabela mpempawo mpaakabika oyo muntu ngwaakabumba.” (Matalikilo 2:8) Mmwakali mumuunda ooyo waparadaiso mwaakabumbilwa Eva. Ikuti ba Adamu a Eva nibatakabisya, balo abana babo balondokede nibakabelekela antoomwe kabakkomene kusikila nyika yoonse yaba paradaiso. (Matalikilo 2:21; 3:23, 24) Paradaiso anyika niyakaba munzi wabantu kukabe kutamani.

Nkaambo nzi Bamwi Ncobaunka Kujulu?

Mulakonzya kubuzya kuti: ‘Ede kayi Ibbaibbele lilaamba kuti bantu balaunka kujulu?’ Inzya. Adamu naakabisya, Jehova wakakanza kutalisya Bwami bwakujulu oomo bamwi akati kabana ba Adamu mubakali ‘kuyooendelezya nyika kabali bami’ antoomwe a Jesu Kristo. (Ciyubunuzyo 5:10; Ba-Roma 8:17) Bakeelede kubusyilwa kubuumi bwakutafwa kujulu. Mweelwe wabo woonse ngu 144,000, alimwi bakusaanguna akati kabo bakali basikwiiya ba Jesu basyomeka bamumwaanda wamyaka wakusaanguna.—Luka 12:32; 1 Ba-Korinto 15:42-44; Ciyubunuzyo 14:1-5.

Nokuba boobo, tanaakali makanze aa Leza aakusaanguna kuti bantu baluleme bazwe anyika akuunka kujulu. Masimpe ngakuti, ciindi Jesu naakali anyika, wakaamba kuti: “Takukwe muntu uwakatanta kujulu, pele oyo uwakazwa kujulu, nguwenya Mwana a-Muntu.” (Johane 3:13) Kwiinda mu “Mwana a-Muntu,” Jesu Kristo, Leza wakapa cinunuzyo kuti aabo basyoma mucituuzyo ca Jesu bakajane buumi butamani. (Ba-Roma 5:8) Pele ino nkuli tuluunzuma twabantu aabo nkotuyookkala kukabe kutamani?

 Makanze aa Leza Aakusaanguna Ayakuzuzikizyigwa

Nokuba kuti Leza wakayanda kubweza bamwi akati kabantu kuti bakabe basikulelanyina a Jesu Kristo mu Bwami bwakujulu, eeci tacaambi kuti bantu boonse baluleme baunka kujulu. Jehova wakalenga nyika kuti ube munzi wa Paradaiso kubantunsi boonse. Ino-ino aawa, Leza uyakuzuzikizya makanze aakwe aayo aakusaanguna.—Matayo 6:9, 10.

Mubulelo bwa Jesu Kristo alimwi abasikulelanyina bakujulu, kunooli luumuno alimwi alukkomano munyika yoonse mboizulwa. (Intembauzyo 37:9-11) Aabo bali mumizeezo ya Leza bayoobuka akuba abuumi bubotu kapati. (Incito 24:15) Akaambo kakusyomeka kwabo kuli Leza, ibantu bamumvwida bayakupegwa ceeco bazyali besu bakusaanguna ncobakasowa—ibuumi butamani kabalondokede anyika yaparadaiso.—Ciyubunuzyo 21:3, 4.

Jehova Leza taalilwi kuzuzikizya nzyakanza kucita. Kwiinda mumusinsimi wakwe Isaya, wakaamba kuti: “Mbubonya mbuli imvula acivulamabwe mbuziloka kuzwa kujulu, alimwi tazipiluki nkuko, pele zilatilaila nyika akwiizyazya akwiisyusya, kuti ipe imbuto zyakubyala ansima yakulya, mbubonya obo mbuliyooba ijwi lyangu lizwa kumulomo wangu. Talikooyooboola kulindime cabuyo pe, liyoozuzikizya makanze aangu akucita kabotu makani ngendalitumina.”—Isaya 55:10, 11.

Mubbuku lyamu Bbaibbele lya Isaya, tubala makani aatondezya mbobunoobede buumi munyika ya Paradaiso. Kunyina muntu uunooli mu Paradaiso uuyakwaamba kuti, “Ndaciswa.” (Isaya 33:24) Banyama tabani kubayoosyi bantu. (Isaya 11:6-9) Bantu bayooyaka maanda mabotu akukkala mulingawo alimwi bayoobyala zyakulya akulya nzyobalima akukkuta. (Isaya 65:21-25) Kunze lyaboobo, Leza “lufu [uyoo]lumenenena mane kukabe kutamani. Mwami Jehova uyoosindula misozi kumasyu oonse.”—Isaya 25:8.

Ino-ino, bantu bamvwa bayookkala mubukkale butaliboteli oobo. ‘Baya kulubulwa kubuzike bwabubozi, akuba abulubulo bulemu bwabana ba-Leza.’ (Ba-Roma 8:21) Elo ciya kubota kaka kupona kukabe kutamani munyika iisyomezyedwe ya Paradaiso! (Luka 23:43) Mulakonzya kuyoojanika ikuti mwabweza ntaamu lino kweelana aluzibo lwini-lwini lwamu Magwalo akuba alusyomo muli Jehova Leza alimwi a Jesu Kristo. Alimwi mulakonzya kusinizya lino kuti ncamaano kusyoma nyika yaparadaiso.

[Cifwanikiso icili apeeji 5]

Ba Adamu a Eva bakalengelwa kuti bakkale kutamani anyika yaparadaiso

 [Zifwanikiso izili apeeji 6]

Munyika ya Paradaiso . . .

bayooyaka maanda

bayoobyala myuunda yamisaansa

bayoolongezyegwa a Jehova

Nkotwakajana cifwanikiso icili apeeji 3]

U.S. Fish & Wildlife Service, Washington, D. C./NASA