Wafandun Ker Parenta Ḇesnaibos ro Refo ya Ke?

FAFISU ḇe romawa kaker ya, sinan ḇesu imbude subuk parenta naḇore. Waba muryas ido, insape na wafawi kaku snar sinan ḇesuya sumarisen wakenem pyum syadi. Fyor waba kwar, ma ḇarekus sinan ḇesu werḇa yo, na waso kakero anun ḇeḇeso subuk ḇe Au na.

Kma koḇedi ro nanggi, Yahwe I, byuk beri parenta ḇesnaibos ro Refo ya. Imnis raris, imewer kosyom amfyanir, kofrur fararur farḇuk famfnom, kofrur farḇuk ḇese, ma karawraw. (Keluaran 20:​1-​17; Farfyar [Kisah] 15:28, 29) Fafisu koisya kosur ro rur ro ”roi ḇeḇor kam”, nari kofawi kaku snar Yahwe imarisen ifrur roi ḇepyum faro ko ma parenta byuk na kako nari nun payamyum faro ko.​—Efesus 4:​15; Yesaya 48:17, 18; 54:13.

Imbape, ro fafisu ono komam ido rya parenta ḇesnaibos naisya ḇa. Iso ḇefnai fa, sino skara sasoser ḇesnaibos naisya ro Refo ḇa ido, na simkei fa sifrur marisen manggun sena. Skara ḇo soḇe, Allah myam roi ine ḇyefandun ido na ikofen beri na ro Wos Ḇyena, Refo ya.

Snonggaku ḇekara ker radirya na sifrur ker snemuk ḇesasar ḇarpur mura sfafko kaku na. Sifawi ḇa Refo ya naser sasoser monda ḇa, ḇape naser kako akurfasnai ḇefnoḇek ko fa kofawi Allah nyan kakara Ḇyena. Fyor kofarkor Refo ma kofawi Yahwe mamam Ḇyena faro roi nayafa kam ido, koisya kobuk Refo ya fa fyarkin sneuser koḇena insama nafnoḇek ko fa kofrur snemuk raris marisen Ḇyena. Kofrur rarirya ido, nari Yahwe Imarisen ma nari kosmai payamyum snar snemuk ḇepyum kofrur na.​—Efesus 5:1.

Fawar Ḇepyum Kaku ro Refo ya

Fafisu kowasya fawar ro Refo ḇekuro manfamyan Allah Ḇyesi ro ḇepondiwara, komam ido skarauser kaku Yahwe mamam Ḇyena, ḇesyadi fyor sasoser ḇesnaibos naisya ḇa. Komam fawar ro Yusuf i. Fyor anya sasoser ḇedwarek snonggaku sya fa sifrur farḇuk famfnom naisya ḇa. Imboi fyor Potifar swari dembuk i fa denfusi, ifawi ine syasar kukro nakyaren sneuser ḇyedi monda ḇa ḇape ifrur sasar faro Allah kako. (Kejadian 39:9) Yusuf ifawi kaku farḇakḇuk famfnom iḇesebur Allah nyan kakara ma marisen Ḇyena, raris ikofen ḇepon kwar ro Yaf Eden anya.​—Kejadian 2:​24.

Komam fawar ḇese wer. Ro Farfyar 16:3, ro dine kofarkor fyor Paulus dor Timotius i ḇaim fa dakso ro marandan Kristen ḇyedi, Paulus dun i fa sisofuk i. Ḇape kowasya ro mnuk 4 ya kada Paulus ma Timotius sufrur marandan ro mnu ḇe mnu fa sukofenḇairo roi manwawan sya kuker penatua-penatua ḇero Yerusalem sap kwar na. Ro snemuk sun anane isya ḇekofen snar snonggaku Kristen sya sisouser faro sasoser ḇekur sofakfuk ya wer ḇa! (Farfyar 15:​5, 6, 28, 29) Sai ḇefnai fa Paulus kyara fandun fa Timotius i ḇyesofuk? ”Snar kawasa Yahudi ro sup ani, snar sikam oser-oser ifawi [Timotius] kmari snon Yunani rirya.” Paulus imewer ifrur snonggaku sya skarkar ḇaido sfafko ri. Imarisen insama snonggaku Kristen sya ’sḇuk faro snonkaku kam faskara si ro sisnesna ro Allah ḇarpon ḇyedi’.​—2 Korintus 4:2; 1 Korintus 9:​19-​23.

Kakara ḇeradiryama Paulus ma Timotius moḇ sukenem rirya. Kowasya mnuk-mnuk ro Roma 14:15, 20, 21, ma 1 Korintus 8:9-13; 10:23-33, ma na komam Paulus fyasnai fandun kaku snonggaku ḇesesya sna kakyar ḇesambraḇ, ḇesyadi faro snonggaku ḇekarkar faro roi ḇesasar risya ḇa. Ma Paulus fyasḇair ḇekur Timotius i ḇo doḇe, ”Snar snonkaku oso isya ro dine ḇa, ḇena sne ma kakara oser kukeri ma ḇekara kaku ḇeri ḇaḇefandun mkoḇena; snar sikam ssewar ḇaḇefandun mankunsi sena, mboi ḇaḇefandun ro Yesus Kristus ḇa. Mboi mkofawi ḇaḇeuser ḇyena neḇemnasen kwar ma ifnoḇek aya kwar ro afuffarmyan ro Ankankinem Ḇeḇyeya imnis romawa oso ifnoḇek kmari.” (Filipi 2:​20-​22) Snon Kristen ri suru suine sufasnai nyan ḇepyum kaku faro ko ro baboine fa koso na! Rofyor susmai parenta ḇesnaibos ro Allah ḇa, sukara fa suso marisen manggun suḇena ḇa, mboi suso Yahwe ma Roma Ḇyedi saswar suḇena kuker sukara pyum kaku moḇsariso snemuk suḇena nsambraḇser kakyar snonggaku ḇesesya.

Mgorama komam nyan ḇepyum kaku Yesus Kristus fyasnai na. Rofyor dawos Faya ro Urek anya, ikofen snai kaku snonggaku ḇefawi roi ḇeknam kaku ro Allah sasoser Ḇyedi inari sisouser faro sasoser ani, ḇesyadi fyor roi sifrur na sfasbos na ḇa ḇaido sidwarek na ḇa. (Matius 5:​21, 22, 27, 28) Yesus, Paulus, Timotius, ma Yusuf i, sikame skara ḇaberi fa sifrur roi simarisen na fyor sismai sasoser ḇesnaibos ro Allah ḇa. Snar sifrur raris Allah nyan kakara Ḇyena, snon ansine sikenem imnis rosai Yesus ikofen ḇekur sasoser ri suru ḇeba syadi isoine saswar faro Allah ma saswar faro min ḇese.​—Matius 22:36-40.

Rariso kuker Snonggaku Kristen ḇero Baboine Sya?

Nasnai kaku, komam awer Refo anine imnis moḇ snonggaku oso myam syap ḇeser sasoser ma kyara syap ani na ikofenḇair mnis moḇsa sisouser sasoser anna raya. Inari kofrur Yahwe imarisen fyor kokinfir fa kofrur roi ḇepyum imnis nyan kakara Ḇyedi, ḇesyadi fyor sasoser ḇesnaibos naisya ḇa ḇekur roi kofrur na. Ḇaido, fandun fa ’kofawi Manseren marisen ḇyedi’, ḇardiburo sikofen ker ḇe ko rosai Allah imarisen kaku fa kofrur na. (Efesus 5:17; Roma 12:2) Sai ḇefnai fa roi nane nafrur Yahwe Imarisen? Kukro ine nfasnaiḇairo komarisen kokara roi ḇefrur Yahwe Imarisen ḇardibur marisen manggun koḇena. Ine kako nfasnaiḇair snar koḇesyowi saswar fyasnai ḇekonya, ma komarisen fa kakso nyan Ḇyena fa kofasnai saswar ya. (Amsal 23:15;27:11) Rofyor koso akurfasnai Ḇyena ro roi kofrur na ido, nari nun payamyum ḇe ko ma koprei ḇesya kwar.

Mgorama komam rariso ananun anna kofrur na ro kenem koḇena rai.

Hiburan Kokinfir na

Komam roma babo oso ḇemarisen ḇekowes album musik oso. Doya ryower anna rya ndrok pyum kero, mboi ḇyeḇirḇar kukro ro album ani kif ḇyedi ḇero barpur nḇairo dow ani iser wos ḇepyum ḇa ma wos fanfadak. Osower ido, fyawi kako snar ḇedisen dow ani idisen ker dow ḇefasnai masasor ma rarmomen. Snar roma babo ani iswar Yahwe I, inja imarisen fa kyara faroyo sneḇaḇir ma Yahwe kakara Ḇyedi kuker roi ine. Rariso fyawi Allah marisen Ḇyena faro hiburan kyinfir ya rai?

Ro syapram fyarem ḇe sidang jemaat ro Galatia, manwawan Paulus fyas fararur kraf ya ma bon ro Allah rur ḇesren Ḇyedi isoine: saswar, raryaḇ, aski, ḇaḇekaḇaḇaḇ, ḇaḇenaḇye, ḇaḇeuser, ḇaḇesyowi, ḇaḇerandun sne, ḇaḇefarmku manggun. Ḇape rariso kuker fararur kraf ya? Paulus fyas, ”Fararur krafya isna kwar, isoine: farbuk, mamas, rmomen, ḇaḇesyom amfyanir, mon, mbroḇ, fadḇan, masasor ro sne, msor, fandun mankun, rakrakrok, rur-makakok, ayin, masaser, munara marares, ma [roi ḇerarirya]. Nane kam yaḇuk swarepen faro mko imnis yaḇuk swarepen ro ḇepon kwar mboi mansei ḇefrur roi ḇerarirya, nari isma rarwas ro Allah Ḇaḇesasoser ḇyedi ḇa.”​—Galatia 5:​19-​23.

Komam wos ḇepupes ro sasyos ani ​—”roi ḇerarirya”. Paulus fyasepen kam ḇa roi nakam ḇesero fararur kraf ya. Roi nane nafrur awer kokara radine, ’Refo ikofen yamkei fa yafrur sairirya monda ḇeyap ro mnuk Paulus fyas nane ḇa ḇekur fararur krafya.’ Imboi ḇewasya sya fandun fa sbuk fawawi sena fa sbukimamḇir sai ḇefas ro dine ḇa mboi ḇesun ro wos ”roi ḇerarirya”. Snonggaku ḇemḇror ḇa bo sifrur ker roi ḇeyap ḇa ro wos ”roi berarirya” nari sipok sismai barakas ro Karajan Allah ḇa.

Iso befnai fandun fa kofawi pyum, ḇaido kokara, rosai Yahwe imewer na. Roi ine syamswen ke? Imnis raris dokter oso ikofen ḇe Au fa wan awero kukis, es krim, ma ḇesena fama wano roḇean ḇekaku isoine aibon ma wei na fa nabore. Na samswen fa kofawi ine kyur ḇe roti kako ke? Injariso, mgorama koswarepen kaḇer mura ḇe bon rur ro Allah ma fararur kraf ya. Songger ro album ani daksun ro sasyos sairiri? Nasnai kaku doya ḇero album ani nfasnaiḇair ḇa saswar, ḇaḇenaḇye, ḇaḇefarmku manggun, ḇaido rari-rari ḇese ro rur Allah bon Ḇyena. Snonggaku oso fyandun sasoser ḇesnaibos ḇa fa fyawi doya ani imnis kuker Yahwe nyan kakara Ḇyena ke roḇa. Wos farkin ine kako nafnoḇek ko fa kokinfir pyum fasfas, filem, roi komam ro tv, farfnak ro komputer, situs web, ma ḇesena.

Komam Pyum Moḇ Kosnai Raya

Refo ya kako isero wos farkin ḇekur moḇ kosansun ma moḇ kosnai raya. Ine nfarkin snonggaku Kristen oser-oser fa smam insama sisnai pyum ma nun marisen. Snonggaku ḇeswar Yahwe I sya smam roi ine ḇe swaf fa sifrur roi simarisen na ḇa, mboi samaido sifrur Yahwe, Kma sedi ro nanggi, imarisen. Komam kwar fyor Yahwe byuk akurfasna ḇesnaibos ima nfasnai ḇa fyandun faro roi kawasa Ḇyesi sifrur na ḇa. Ifawi moḇ kosansun ko raya na iḇese kuker snonggaku ḇero moḇ ḇese moḇ sisansun si raya. Ro moḇ koḇedi kako moḇ snonggaku sisansun si raya nefadwer ker. Rarya boi Allah byuk wos farkin ḇeknam kaku ro Refo fa nfarkin manfamyan Ḇyesi ro fafisu ma ro moḇ sarirya monda.

Imnis raris 1 Timotius 2:​9, 10 ikofen, ”Rarirya kako binsya. Bin ansi sḇemaris faḇaḇye si mboi kuker syowi, ma snonburyam sena nbekapyai kapyai awer, semaris awer si kuker karamas brawen roḇa mustika roḇa kako sansun ḇekakur, ḇape ḇyemaris i kuker fararur ḇeḇye, imnis bin ḇesyus faro ḇaḇeariya.” Inja, snon ma bin Kristen sya fandun fa skara pyum snonggaku ḇero moḇ sḇarek ro ya kakara sena ḇekur moḇ sisansun si ”ḇesyus faro ḇaḇeariya”. Ḇefandun syadi faro snonggaku Kristen iso kyara pyum moḇ isnai raya na nafnai fa snonggaku ḇese sesyowi anun ro Refo byaryas na ke roḇa. (2 Korintus 6:3) Snonggaku Kristen ḇefasnai nyan ḇepyum nari kyara ker roi imarisen na ḇa ḇaido rosai myam ḇe hak manggun ḇyedi ḇa, mboi kyara rariso insama roi ifrur na nafrur awer snonggaku ḇese skarkar ḇaido smam i monda.​—Matius 18:6; Filipi 1:​10.

Rofyor snonggaku Kristen oso myam boi snonggaku ḇese spapum kuker moḇ syansun i raya ido, iḇye kada iso raris Paulus i kuker myam ḇepon faro fandandun songgaku ḇese ro fandun manggun ḇyedi. Paulus ikofen, ”Mkoso nyan ayedi, imnis aya yaso nyan Kristus.” (1 Korintus 11:1) Paulus fyas ḇekur Yesus i bo doḇe, ”Snar Kristus kako kyara raryaḇ faro mankundi ḇardiḇa.” Knam ro wos anun Paulus fyas nane nfasnai kaku, ”Ḇesma kakyar ḇesambraḇ koya faro Allah, nari kokḇaḇser sano-sano ro snonkaku kakyar ḇesambraḇ ḇasya. Ma kofrur marisen mankunko ḇardi awer. Inja kono oser-oser ifrur marisen naek srar koḇesi faro ḇaḇye sena.”​—Roma 15:​1-3.

Kosewar Kaku fa Kosmai Fawawi Ḇekaku

Rariso kosmai fawawi ḇekaku insama kofawi nyan fa kofrur Yahwe Imarisen fyor byuk sasoser besnaibos ḇa faro samswen kobena? Kona fawawi ḇekaku nabor syadi rofyor kowasya Refo ras ḇe ras, kofarkor pyum na, ma kokarauser sai kowasya na. Mboi roi inema roi ḇepyan risyaḇa. Roma mgun oso fyandun oras fa iba muryase ma sarsur ḇyeja neḇemambos ḇa, rarirya kako kosur ro ḇaḇerur ya. Inja kofandun kaḇaḇaḇ, ma rofyor komam ḇeri sarsur koḇena ḇa ido, kofafko awer. Ḇape, oras ḇeḇor ḇenande na nafrur ko fa kona fawawi ḇekaku ke? Oroḇa. Raris kawos kwar, fandun fa kobuk swaf ani fa kofarkor Refo ro fafisu nakam, ma kofrur ḇeri na ro kenem koḇena.​—Ibrani 5:​14.

Imbe kokofen ido Allah sasoser Ḇyena nfasnai komarisen kosouser ke roḇa, mboi wos farkin Ḇyena nfasnai kona wis ḇepyum kuker I ma komarisen kofrur I fa imarisen ke roḇa. Koswar syadi Yahwe I ido, nari kosewar kaku fa koso Yahwe ma Yesus nyan suḇena. Inari komam pyum insama snemuk koḇenakam kofrur na imnis Yahwe marisen Ḇyena ḇefas ro Refo ya. Rofyor kosewar fa kofrur Kma koḇedi ro nanggi imarisen faro roi kofrur nakam, nari kosmai aski syadi wer.

 [Sonin]

Moḇ kosansun ko raya na iḇese kuker snonggaku ḇero moḇ ḇese moḇ sisansun si raya, boi Allah wos farkin ḇeknam ro Refo na nfarkin ko fa kokinfir pyum