Necesita Ba Tu Pirmi un Mandamiento na Biblia?

CUANDO bata tu, posible manada ley ya dale contigo el de tuyu mayores. Mientras ta engranda tu, ya sabe tu que ya hace se sila cay ta ama sila y quierre protege contigo. Mientras ta queda tu grande, posible ta obedece pa tu siempre con el de tuyu mayores maskin gendeh ya tu bajo na diila autoridad.

El diaton Tata na cielo, si Jehova, ya dale kanaton manada directa maga mandamiento por medio na de suyu Palabra, el Biblia. Por ejemplo, ya prohibi le con el idolatria, sexual imoralidad, adulterio y robo. (Exodo 20:1-17; Maga Actividad 15:28, 29) Mientras ta “crici” kita na espiritual, ya sabe kita que ya dale si Jehova este maga ley cay ta ama le kanaton y este maga ley hay protege kanaton.​—Efeso 4:15; Isaias 48:17, 18; 54:13.

Pero, tiene manada situacion que nuay directa mandamiento. Poreso, el cuanto ta pensa que puede lang sila hace con el maskin cosa sila quierre. Ta habla sila, “Si importante gayot este con Dios, hay dale le kanaton ley.”

Aquellos quien ta pensa ansina ta hace maga gendeh justo decision que ta arripinti gayot sila na uliji. Gendeh sila ta entende que puede kita aprende na Biblia si cosa quierre el Dios que hace kita maskin nuay ley. Si ta estudia kita con el Biblia, puede kita sabe si cosa el bueno y malo asegun con Jehova. Tan train este con el diaton conciencia y puede este ayuda kanaton para hace maga buen decision. Si hace kita se, puede kita hace alegre con el de suyu corazon y beneficia kita cay ya hace kita maga justo decision.​—Efeso 5:1.

Maga Buen Ejemplo na Biblia

Na Biblia, puede kita sabe acerca na manada maga siervo de Jehova quien ya hace maga buen decision que ya hace con ele alegre maskin pa nuay kanila dale ley acerca si cosa sila debe hace. Considera con el ejemplo de Jose. Cuando el mujer de Potifar ya pricura convinci que man sexo con ele, nuay ley estaba con Jehova que ta habla que malo el adulterio. Pero maskin pa nuay un directa ley, sabe si Jose que un pecado el adulterio gendeh lang contra na de suyu conciencia sino contra tambien “con Dios.” (Genesis 39:9) Claro que sabe si Jose que el adulterio contra na proposito del Dios, como cosa le ya habla na Eden.​—Genesis 2:24.

Considera con el otro ejemplo. Na Maga Actividad 16:3, puede kita sabe que antes lleva si Pablo con Timoteo na de suyu viaje como un misionario, ya capa le con ele. Despues, na versiculo 4 puede kita le que si Pablo y Timoteo ya anda na manada lugar y ya habla con el maga hermano y hermana acerca “el maga decision que ya hace el maga Apostol y maga Anciano na Jerusalem.” Uno na ese maga decision amo que gendeh mas necesita capa con el maga Cristiano! (Maga Actividad 15:5, 6, 28, 29) Poreso, porque si Pablo ya capa con Timoteo? “Por causa del maga Judio de aquel lugar, cay todo sila sabe cay su [de Timoteo] tata un Griego.” No quierre si Pablo que hay causa este para man tisut el otro. Ta pensa le que el maga Cristiano necesita continua ‘recomenda con el diila cuerpo con todo el gente quien tiene conciencia.’​—2 Corinto 4:2; 1 Corinto 9:19-23.

Si Pablo y Timoteo ya hace manada maga semejante decision. Si le kita con el maga texto igual con el Roma 14:15, 20, 21 y 1 Corinto 8:9-13; 10:23-33, puede kita mira que preparao si Pablo descanza hace con el maga cosas maskin pa gendeh este malo para gendeh le hace tisut con otro y hace kanila dificil para sirvi con Jehova. Si Pablo ya escribi acerca con Timoteo: “Deverasan noay otro persona aqui conmigo igual con ele de interesao para busca con todo corazon el de ustedes buen estar. El los demas ta busca lang el diila mismo maga interes, gendeh el maga interes de Jesucristo. Pero sabe ya ustedes si paquemodo ele ya dale mira el disuyo valor, cay ele ya trabaja junto conmigo por causa del Buen Noticia igual como un anak que ta ayuda con su tata.” (Filipo 2:20-22) Un buen ejemplo gayot este dos Cristiano hombre para kanaton ahora! Si nuay ley, gendeh sila ta hace el maskin cosa sila quierre sino ta hace sila maga decision que puede ayuda con otro gente para sirvi con Jehova.

Considera con Jesucristo, el diaton de con todo buen ejemplo. Na de suyu Sermon na Monte, claro le ya explica que gendeh lang kita basta obedece con el maga ley de Jehova, debe kita pensa con el razon si porque si Jehova ya dale kanaton ese ley. Despues, puede kita hace con el decision acerca na maga cosas que semejante con ese. (Mateo 5:21, 22, 27, 28) Si Jesus, Pablo, Timoteo y Jose nuay pensa que puede sila hace con el maskin cosa sila quierre si nuay un especifico ley. Sabe sila que el dos de con todo importante ley amo que ama con Dios y con otro maga gente. Poreso, ya hace sila maga decision que ta dale mira que ta obedece sila con ese maga ley.​—Mateo 22:36-40.

Paquemodo Kita Hace Maga Buen Decision?

Claro que gendeh kita debe mira con el Biblia como un legal documento​—gendeh expecta que el todo mandamiento escribido alli. Ta hace kita alegre con Jehova si ta pricura kita hace con el maga cosas que quierre le maskin pa nuay un especifico ley. En vez de pirmi habla kanaton si cosa quierre el Dios que hace kita, puede kita “precura discubri si cosa ba el querer del Dios.” (Efeso 5:17; Roma 12:2) Porque este ta hace alegre con Jehova? Cay ta dale este mira que gendeh kita quierre hace el cosa lang ta hace alegre kanaton sino el cosa ta hace alegre con ele. Ta dale tambien este mira que ta aprecia kita con el de suyu amor y quierre kita dale mira el igual amor na otro maga gente. (Proverbio 23:15; 27:11) Omento pa, si actua kita base na cosa ta habla el Escritura, hay beneficia kita na espiritual y na fisical.

Mira kita si paquemodo este principio puede aplica na diaton personal vida.

Decision Acerca na Entretenimiento

Imagina que el un joven hermano quierre cumpra un music album. Ya gusta le con el musica pero ya sabe le que el lyrics de este tan cuento acerca na imoral cosas y ta usa maga mal palabra. Sabe tambien le que manada del musica de este singer agresivo el maga tono. Cay ta ama le con Jehova, este joven hermano interesao si cosa ta pensa y ta sinti si Jehova acerca con este maga cosas. Paquemodo le sabe el proposito de Jehova acerca con este?

Na de suyu carta para na maga de Galacia, si Pablo ya escribi con el maga trabajo de laman y con el fruta del espiritu del Dios. Posible sabe tu si cosa el incluido na fruta del espiritu del Dios: amor, alegria, paz, paciencia, hacida de bueno con otro, pagka-bueno, fe, pagka-calmao y control na cuerpo. Pero, cosa maga calidad el trabajo de laman? Si Pablo ya escribi: “Puede dayun mira con el maga trabajo de laman y este amo el sexual imoralidad, cuchinadas, nuay verguenza conducta, idolatria, espiritismo, odio, peleajan, celos, sobra de rabia, purpiajan, division, secta, envidia, burracherias, nuay control de alegria y maga cosas que semejante con ese. Ta dale yo con ustedes aviso acerca con este maga cosas, como ya habla ya yo con ustedes de antes, que aquellos quien ta hace con ese gendeh hay hereda con el Reino del Dios.”​—Galacia 5:19-23, NWT.

Nota con el ultimo expresion na ese lista​—“maga cosas que semejante con ese.” Nuay menciona si Pablo con el todo cosas que puede considera como trabajo de laman. Gendeh este quierre decir que puede man razon el un persona, ‘Puede yo hace con el maskin cosa actividad que nuay na lista de Pablo como trabajo de laman.’ Sino, necesita kita pensa para identifica con el maga cosas que nuay na lista pero “semejante con ese.” Aquellos quien gendeh ta arripinti hace con ese maga cosas que nuay menciona pero “semejante con ese” gendeh hay hereda con el maga bendicion del Reino del Dios.

Poreso, necesita kita pensa acerca si cosa el gendeh ta hace alegre con Jehova. Dificil ba se? Pone kita que ya habla el de tuyu doctor que necesita tu come mas manada fruta y gulay pero necesita tu evita con el pie, ice cream y maga cosas que semejante con este. Dificil ba determina si na cosa lista incluido el cake? Ahora, mira kita otravez con el fruta del espiritu del Dios y con el trabajo de laman. Na cosa lista incluido el music album que ya menciona enante? Asigurao, gendeh ese ta reflecta con el maga calidad igual na amor, pagka-bueno, control na cuerpo o otro maga calidad que tiene coneccion na fruta del espiritu del Dios. Gendeh necesita un directa ley el un persona para pensa si cosa clase de musica el gendeh harmonia na pensamiento del Dios. El igual maga principio puede aplica na libro, salida, programa na television, juego na computer, Web site y otro pa.

Decision Acerca na Mudada

El Biblia ta dale tambien maga principio acerca na ropa y mudada. Ta ayuda este con el maga Cristiano que muda na justo manera. Si acerca na mudada, aquellos quien ta ama con Jehova gendeh ta pensa si cosa lang sila quierre visti sino si cosa hay hace alegre con el diila Tata na cielo. Como cosa ya kita ya discuti, maskin nuay dale si Jehova maga especifico ley na cuanto maga cosas, gendeh este quierre decir que nuay le queber na cosa hace el de suyu maga siervo. El maga estilo diferente na otro-otro lugar y maskin na igual lugar, ta cambia se si ta pasa el tiempo. Pero, ya dale principio el Dios con el de suyu maga siervo que puede guia na todo tiempo y na todo lugar.

Por ejemplo, el 1 Timoteo 2:9, 10 ta habla: “Ta manda tamen yo con el maga mujer usa camisa decente y bisti na un manera humilde y modesto, y no hace trenzas el pelo, no usa maga oro, o alajas, o maga camisa caro. El diila adorno amo hace maga bueno trabajo que amo conviene para con el mujer religioso.” Poreso, el maga hermano y hermana necesita pensa si cosa el maga gente na diila lugar ta considera que justo mudada. Bien importante este cay el manera del diaton mudada puede cambia si cosa ta pensa el maga gente acerca na Biblia. (2 Corinto 6:3) El un buen ejemplo Cristiano gendeh ta pensa si cosa lang le quierre hace o pensa que tiene le derecho para hace con el un cosa, sino si cosa le hace para gendeh man tisut el otro.​—Mateo 18:6; Filipo 1:10.

Si el un Cristiano ya sabe que el cosa le quierre visti puede causa para man tisut el otro, puede le imita con apostol Pablo y hace maga necesita cambio para ayuda con otro maga gente sirvi con Jehova. Si Pablo ya habla: “Imita ustedes conmigo como yo ta imita con Cristo.” (1 Corinto 11:1) Y si acerca con Jesus, si Pablo ya escribi: “Si Cristo noay pensa del disuyo mismo cuerpo lang.” Claro el instruccion de Pablo para na todo Cristiano: “Kita, maga ma-fuerza na fe, necesita ayuda con el maga maluya na fe na diila maga duda, y no pensa para del diaton mismo cuerpo lang. Pensa cada uno diaton hace alegre con su maga vicinos y ayuda canila para ay queda sila mas fuerte na diila fe.”​—Roma 15:1-3.

Paquemodo Kita Aprende Hace Maga Buen Decision?

Paquemodo kita puede hace maga buen decision que ta hace alegre con Jehova maskin nuay un especifico ley acerca na un cosa? Si le kita con el de suyu Palabra todo el dia, regular estudia con ese y medita con el cosa kita ta le, hay aprende kita si paquemodo hace maga buen decision. Pero, gendeh este dayun-dayun ta sucede. Igual con el un bata que hinay-hinay ta queda grande, el espiritual progreso necesita tiempo y gendeh con este dayun ta puede mira. Poreso, necesita kita man paciencia y gendeh man luya si gendeh kita dayun ta puede mira con el progreso. Pero, gendeh kita progresa por causa lang cay ta queda kita de edad. Necesita kita estudia con el Biblia y pricura hace el diaton de con todo bueno para hace alegre con Jehova.​—Maga Hebreo 5:14.

Si ya dale si Jehova kanaton un ley y ya obedece kita con ese, ta dale kita mira que quierre kita obedece con ele. Pero si nuay ley y ta pricura kita hace maga decision que ta hace alegre con ele, ta dale kita mira que ta ama gayot kita con ele y quierre kita con ele hace alegre. Mientras ta progresa kita na espiritual, mas quierre kita imita con Jehova y con el de suyu Anak. Quierre kita usa con el Biblia para ayuda kanaton hace maga decision que ta hace alegre con Dios. Mientras ta hace kita alegre con el diaton Tata na cielo na todo cosa kita ta hace, puede kita mira que mas ta queda tambien kita alegre.

[Maga letrato]

El estilo de mudada diferente na otro-otro maga lugar pero el principio na Biblia debe guia kanaton na diaton maga decision