¿Wersa yom ba jumpʼejl mandar chaʼan tiʼ pejtelel chuqui la com lac mel?

JIÑI lac tatob cabʌl chuqui tiʼ subeyoñobla chaʼan mach bʌ yomic mi lac mel cheʼ bʌ woli laj colel majlel. Xucʼu xucʼul tsaʼ lac chʼʌmbe i sujm chaʼan tsiʼ meleyob jiñi come yomob chaʼan wen mi la cajñel. I tajol, anquese ñucoñixla i maʼañoñixla tiʼ wentajob muʼto lac bej chʼʌm ti ñuc jiñi tsaʼ bʌ i subeyoñobla.

Jehová, jiñi lac Tat am bʌ ti panchan, miʼ cʼʌn jiñi Biblia chaʼan miʼ yʌqʼueñonla mandar tac jamʌ tsiquil bʌ. Jumpʼejl ejemplo, mach yomic chaʼan mi lac chʼujutesan jiñi melbil tac jach bʌ Dios, miʼ tsʼaʼlen jiñi tsʼiʼlel yicʼot jiñi xujchʼ (Éxodo 20:1-17; Hechos 15:28, 29). Cheʼ bʌ miʼ pʼʌtʼan majlel lac ñopoñel «tiʼ pejtelel chuqui an», miʼ cʼotel lac chʼʌmben i sujm chaʼan Jehová yom lac wenlel yicʼot chaʼan mach ñoj wocolic jiñi i mandar tac (Efesios 4:15; Isaías 48:17, 18; 54:13).

Pero cabʌl baqui maʼañic jumpʼejl mandar baqui miʼ yʌl chuqui yom miʼ mejlel. Jin chaʼan, an muʼ bʌ i ñaʼtañob chaʼan miʼ mejlel i melob chuqui jach yomob come maʼañic jumpʼejl mandar, i miʼ yʌlob chaʼan cheʼ cheʼic yom Dios, tsiʼ yʌcʼʌ jumpʼejl mandar chaʼan chuqui miʼ mulan.

Jiñi muʼ bʌ i ñaʼtañob bajcheʼ jiñi an i tajol mach wen tojic chuqui miʼ melob i ti wiʼil miʼ chaʼ ñaʼtañob i bʌ. Maʼañic miʼ qʼuelob chaʼan jiñi i Tʼan Dios mach cojic jach miʼ chʼʌm tilel mandar tac, miʼ yʌl jaʼel chuqui tac miʼ ñaʼtan Dios. Cheʼ mi lac pejcan jiñi Biblia i mi laj cʌn chuqui miʼ ñaʼtan Jehová miʼ cʌntesan laj conciencia i miʼ coltañonla chaʼan mi lac yajcan lac mel chuqui tac miʼ mulan. Jiñi miʼ tijicñesʌben i pusicʼal Jehová i cheʼ mi lac yajcan chuqui wen miʼ yʌqʼueñonla lac wenlel (Efesios 5:1).

Wem bʌ ejemplo tac am bʌ ti Biblia

Cheʼ bʌ mi lac pejcan jiñi relato tac tiʼ tojlel jiñi i wiñicob Dios ti wajali, mi laj qʼuel chaʼan an i tajol tsiʼ qʼueleyob ti ñuc chuqui miʼ ñaʼtan Jehová anquese maʼañic miʼ jamʌ ajlel chuqui yom miʼ mejlel. Jumpʼejl ejemplo jiñʌch José. Cheʼ bʌ jiñi i yijñam Potifar tiʼ sube chaʼan miʼ piʼlen, Dios maʼañic acʼbil i chaʼan jumpʼejl mandar baqui miʼ yʌl chaʼan mach weñic jiñi tsʼiʼlel. Pero anquese maʼañic jumpʼejl mandar, José tsiʼ qʼuele chaʼan mach cojic jach mi caj i chaʼlen mulil tiʼ tojlel i conciencia yicʼotʌch tiʼ «contra Dios» (Génesis 39:9). José tsiʼ chʼʌmbe i sujm chaʼan jiñi tsʼiʼlel miʼ ñusan ti pʼis chuqui miʼ mulan Dios yicʼot jiñi tsaʼ bʌ ajli ti Edén (Génesis 2:24).

Laʼ laj qʼuel yambʌ ejemplo. Ti Hechos 16:3 miʼ yʌl chaʼan Timoteo tsaʼ ñaxan tsepbenti i pʌchʌlel chaʼan miʼ majlel yicʼot Pablo i julaʼtan jiñi congregación tac. Pero ti jiñi versículo 4 mi lac pejcan chaʼan tsaʼ majliyob ti tejclum tac i «tsiʼ yʌqʼueyob i cʌn jiñi hermanojob chuqui tac tsiʼ yʌlʌyob jiñi apóstolob yicʼot ancianojob ti Jerusalén chaʼan miʼ jacʼob». Pero ti jiñi mandar tac miʼ yʌl chaʼan jiñi xñoptʼañob mach xicʼbilobix chaʼan miʼ melob jiñi tsep pʌchʌlel (Hechos 15:5, 6, 28, 29). Yubil cheʼ jiñi, ¿chucoch tsiʼ ñaʼta Pablo chaʼan Timoteo yom miʼ tsepbentel i pʌchʌlel? «Tiʼ caj jiñi judíojob añoʼ bʌ ti jiñi tejclum tac come laj yujilob chaʼan griego jiñi i tat». Pablo mach yomic chaʼan miʼ michʼañob o miʼ yajlelob. Yom chaʼan jiñi xñoptʼañob miʼ bej pʌsob tiʼ wut Dios chaʼan woliʼ melob chuqui toj «chaʼan jiñi i conciencia lac piʼʌlob miʼ cʌñob» (2 Corintios 4:2; 1 Corintios 9:19-23).

Ili pensar tsiʼ chʌn pʌsʌyob Pablo yicʼot Timoteo. Texto tac bajcheʼ Romanos 14:15, 20, 21 yicʼot 1 Corintios 8:9-13; 10:23-33, miʼ pʌs chaʼan Pablo tsiʼ mulaj chaʼan jiñi yambʌlob wen miʼ yajñelob yicʼot Dios, ñumento tiʼ tojlel jiñi muʼ bʌ i mejlelob ti yajlel anquese mach mulilic chuqui miʼ mejlel. Cheʼ jaʼel, Pablo tiʼ tsʼijbu tiʼ tojlel Timoteo: «Maʼañic yambʌ cheʼ bʌ yilal bajcheʼ Timoteo, ti jumpʼejl bʌ i pusicʼal miʼ ñaʼtañetla. Come jiñi yambʌlob miʼ bajñel sʌclañob i wenlel i mach jiñic i chaʼan Jesucristo. Jatetla laʼ wujil chaʼan tsaʼix i pʌsʌ wem bʌ i melbal, come tsiʼ chaʼle eʼtel yicʼoton bajcheʼ xyaj eʼtel tiʼ subol jiñi wen tʼan, cheʼ bajcheʼ juntiquil alob yicʼot i tat». (Filipenses 2:20-22). ¡Ili chaʼtiquil xñoptʼañob tsiʼ yʌqʼueyoñobla wem bʌ ejemplo! Maʼañic tsiʼ bajñel sʌclayob i wenlel anquese maʼañic jumpʼejl mandar jamʌ tsiquil bʌ, tsiʼ lajibeyob i cʼuxbiya Jehová yicʼot i Yalobil i tsiʼ chʼʌmʌyob ti ñuc bajcheʼ miʼ mejlel i ticʼlan yambʌlob jiñi muʼ bʌ i yajcañob i mel.

Laʼcu lac ñaʼtan tiʼ tojlel Jesucristo, jiñi tsaʼ bʌ i yʌqʼueyonla jiñi ñumen wem bʌ ejemplo. Ti jiñi Cʌntesa yaʼ ti wits tsiʼ jamʌ alʌ chaʼan jiñi muʼ bʌ i chʼʌmben i sujm jiñi i mandar tac Dios mach cojic jach miʼ chʼʌm ti ñuc jiñi muʼ bʌ i subentel chaʼan yomʌch miʼ mel o mach bʌ yomic miʼ mel (Mateo 5:21, 22, 27, 28). Mi jiñicto José, Pablo, Timoteo yicʼot Jesús tsiʼ ñaʼtayob chaʼan miʼ mejlel i melob chuqui jach yomob come maʼañic jumpʼejl mandar muʼ bʌ i jamʌ al chuqui mach bʌ yomic miʼ melob, tsiʼ chʼʌmʌyob ti ñuc chuqui miʼ ñaʼtan Dios i tsiʼ chucuyob i bʌ ti jiñi mandar tac ñumen ñuc bʌ i cʼʌjñibal tsiʼ yʌlʌ Jesús: Chaʼan yom mi laj cʼuxbin Dios yicʼot mi laj cʼuxbin lac piʼʌlob (Mateo 22:36-40).

Jiñi xñoptʼañob ti ili ora

Tsiquil chaʼan mach yomic mi laj qʼuel jiñi Biblia bajcheʼ jumpʼejl libro chaʼan jach bʌ mandar, i mach yomic mi lac pijtan chaʼan miʼ luʼ al chuqui yom mi lac mel. Anquese maʼañic jumpʼejl mandar muʼ bʌ i jamʌ al chuqui yom mi lac mel, Jehová miʼ mulan chaʼan mi lac mel muʼ bʌ i pʌs chaʼan mucʼʌch lac chʼʌm ti ñuc chuqui miʼ ñaʼtan, ili yom i yʌl chaʼan mi lac chʼʌmben i sujm chuqui yom bʌ Jehová, i mach mucʼ jach lac pijtan chaʼan tiʼ pejtelel ora mi lac subentel chuqui yom mi lac mel (Efesios 5:17; Romanos 12:2). ¿Chucoch miʼ tijicñesan Jehová iliyi? Come mi lac pʌs chaʼan jiñi ñumen ñuc bʌ i cʼʌjñibal jiñʌch cheʼ mi lac tijicñesan i mach jiñic cheʼ mi lac mel chuqui mi lac mulan, yicʼot chaʼan mi laj qʼuel ti ñuc jiñi i cʼuxbiya i la com lac lajin, cheʼ bajcheʼ jiñi woli la cʌcʼ chaʼan jiñi cʼuxbiya jiñʌch muʼ bʌ i ñijcañonla (Proverbios 23:15; 27:11). Yom mi laj cʼajtesan jaʼel chaʼan cheʼ mi lac jacʼ muʼ bʌ i yʌl jiñi Biblia miʼ coltañonla chaʼan lʌcʼʌl mi la cajñel tiʼ tojlel Dios i an i tajol muʼto i coltañonla jaʼel chaʼan maʼañic mi laj cʼamʼan.

Laʼ laj qʼuel bajcheʼ miʼ mejlel lac jacʼ ili principio ti laj cuxtʌlel.

Cheʼ bʌ mi lac yajcan jiñi ñusaqʼuin tac

Laʼcu lac ñaʼtan chaʼan juntiquil xcolel woliʼ ñaʼtan i mʌn jumpʼejl disco chaʼan bʌ música. Miʼ mulan jiñi am bʌ i yubi ti ajlel chaʼan bʌ jiñi música, pero tiʼ pat jiñi disco miʼ yʌl chaʼan jiñi cʼay tac miʼ chʼʌm tilel tsucu tʼan yicʼot miʼ yʌl chaʼan bʌ tsʼiʼlel. Cheʼ jaʼel, yujil chaʼan jiñi xcʼay miʼ yʌcʼ ti cʌjñel chaʼan bʌ michʼlel yicʼot jontolil. Jiñi xcolel miʼ cʼuxbin Jehová, jin chaʼan miʼ chʼʌm ti ñuc chuqui miʼ ñaʼtan yicʼot bajcheʼ yubil miʼ yubin jiñi i Tat am bʌ ti panchan. Cheʼ jiñi, ¿bajcheʼ miʼ mejlel i ñaʼtan chuqui yom Dios chaʼan miʼ mel?

Ti jiñi carta tsaʼ bʌ i choco majlel jiñi apóstol Pablo tiʼ tojlel jiñi añoʼ bʌ ti Galacia, tsiʼ yʌlʌ baqui bʌ jiñi i melbal tac lac bʌcʼtal yicʼot jiñi melbalʌl tac muʼ bʌ i yʌcʼ jiñi espíritu. Tajol la cujilix chuqui tac ochem ti jiñi melbalʌl tac muʼ bʌ i yʌcʼ jiñi i yespíritu Dios: Cʼuxbiya, tijicñʌyel, ñʌchʼtʌlel, pijt, wem bʌ lac pusicʼal, la cutslel, lac ñopoñel, cheʼ xucʼulon jachla yicʼot i ticʼol lac bʌ. Pero ¿chuqui tac ochem ti jiñi i melbal tac lac bʌcʼtal? Pablo tiʼ tsʼijbu: «Weno, tsiquilʌch jiñi i melbal tac lac bʌcʼtal, jiñʌch jiñi tsʼiʼlel, jiñi bibiʼlel, jiñi quisintic jax bʌ melbalʌl tac, jiñi i chʼujutesʌntel melbil tac jach bʌ dios, jiñi espiritismo, i contrajintel yambʌlob, leto, michʼ pusicʼal, michʼ, tech wocol, tʼox bʌ, i tsajcʌntel i cʌntesa wiñicob, i tsʌytsʌyñiyel lac pusicʼal, yʌcʼʌjel, qʼuiñijel tac ñumeñix bʌ ti pʼis yicʼot yan tac bʌ cheʼ bʌ bajcheʼ iliyi. Mic subeñetla, cheʼ bajcheʼ tsaʼix c wʌn subeyetla, chaʼan jiñi muʼ bʌ i melob tac iliyi maʼañic mi caj i yʌqʼuentelob jiñi i Yumʌntel Dios» (Gálatas 5:19-23).

Laʼ lac chaʼ qʼuel jiñi tʼan: «Yan tac bʌ cheʼ bʌ bajcheʼ iliyi». Pablo maʼañic tsiʼ luʼ alʌ pejtelel chuqui tac ochem ti jiñi i melbal lac bʌcʼtal. Jin chaʼan maʼañic miʼ mejlel la cʌl: «Jiñi Tsʼijbujel miʼ yʌqʼueñon c mel chuqui jach com mach bʌ yaʼic ochem ti jiñi i melbal lac bʌcʼtal tsaʼ bʌ i yʌlʌ Pablo». Tsiquil chaʼan jiñi xpejcaya juñob yom miʼ cʼʌñob i ñaʼtʌbal chaʼan miʼ qʼuelob chuqui jiñi yan tac bʌ «cheʼ bʌ bajcheʼ iliyi», anquese maʼañic miʼ tilel ti jiñi tsaʼ bʌ ajli. Jiñi muʼ bʌ i wen mulañob i mel jiñi maʼañic bʌ miʼ yʌjlel ilayi, pero ochemʌch ti jiñi yan tac bʌ «cheʼ bʌ bajcheʼ iliyi», maʼañic mi caj i tajob jiñi bendición tac muʼ bʌ caj i yʌcʼ jiñi i Yumʌntel Dios.

Jin chaʼan, yom mi laj cʌn chuqui tac maʼañic miʼ mulan Jehová. ¿Wocol ba chaʼan mi lac mel jiñi? Laʼcu lac ñaʼtan chaʼan jiñi doctor miʼ subeñet chaʼan maʼ ñumen cʼux fruta yicʼot verdura, pero mach yomic maʼ cʼux pastel, helado yicʼot yan tac bʌ cheʼ bʌ bajcheʼ iliyi. ¿Wocol ba chaʼan mi lac ñaʼtan baqui ochem jiñi pan? Laʼ lac chaʼ taj ti tʼan jiñi melbalʌl tac muʼ bʌ i yʌcʼ jiñi espíritu yicʼot jiñi i melbal tac lac bʌcʼtal: ¿Baqui ochem jiñi disco chaʼan bʌ música tsaʼ bʌ lac taja ti tʼan ti ñaxan? Maʼañic miʼ pʌs jiñi cʼuxbiya, utslel, chaʼan yom mi lac ticʼ lac bʌ, mi jiñicto jiñi yambʌ melbalʌl tac muʼ bʌ i yʌcʼ jiñi i yespíritu Dios. Jin chaʼan, mach wersajic jumpʼejl mandar muʼ bʌ i yʌl chaʼan ili música maʼañic miʼ taj i bʌ yicʼot jiñi i pensar Dios. Ili principio tac miʼ coltañonla jaʼel cheʼ bʌ an chuqui mi lac pejcan, cheʼ bʌ mi laj qʼuel película, programa tac chaʼan televisión, videojuego tac, página tac chaʼan Internet yicʼot yan tac bʌ.

Jiñi bajcheʼ mi lac chʼʌl lac bʌ

Cheʼ jaʼel, jiñi Biblia miʼ yʌcʼ principio tac chaʼan bajcheʼ yom mi lac chʼʌl lac bʌ yicʼot mi lac lʌp lac pislel. Ili principio tac miʼ coltan jiñi xñoptʼan chaʼan wen bajcheʼ miʼ chʼʌl i bʌ yicʼot bajcheʼ yom miʼ lʌp i pislel. Jiñi muʼ bʌ i cʼuxbin Jehová miʼ qʼuel chaʼan ilayi jiñʌch junchajp baqui miʼ mejlel i tijicñesan jiñi i Tat am bʌ ti panchan i mach chaʼañic miʼ mel chuqui jach yom. Cheʼ bajcheʼ tsaʼix laj qʼuele, anquese Jehová maʼañic tsiʼ yʌcʼʌ mandar tac chaʼan jujunchajp yom bʌ mi lac mel, mach yomic i yʌl chaʼan mach i wentajic chuqui miʼ mel jiñi i wiñicob. Ti jujumpʼejl tejclum miʼ qʼuextʌyel bajcheʼ yilal miʼ chʼʌlob i bʌ jiñi lac piʼʌlob yicʼot bajcheʼ miʼ lʌpob i pislel. Pero Dios miʼ yʌcʼ principio tac muʼ bʌ i coltan jiñi i tejclum tiʼ pejtelel ora yicʼot ti baqui jach añob.

Jumpʼejl ejemplo, 1 Timoteo 2:9, 10 miʼ yʌl: «Cheʼ jaʼel, jiñi xʼixicob yom miʼ lʌpob wem bʌ i pislel, pʼisbil jach yom miʼ chʼʌlob i bʌ i yom miʼ pʌsob i ñaʼtʌbal, mach yicʼotic jalbiloʼ bʌ i jol, oro, perla o wen lets bʌ i tojolob i pislel, yom bʌ añob i chaʼan jiñʌch jiñi wem bʌ i melbalob, cheʼ bajcheʼ yom tiʼ tojlel jiñi xʼixicob muʼ bʌ i yʌlob chaʼan miʼ chʼujutesañob Dios». Jin chaʼan, jiñi xñoptʼañob yom miʼ wen qʼuelob bajcheʼ yilal yomob jiñi lac piʼʌlob chaʼan miʼ chʼʌlob i bʌ jiñi muʼ bʌ i yʌlob chaʼan «miʼ chʼujutesañob Dios». Ñuc i cʼʌjñibal cheʼ jiñi xñoptʼan miʼ wen ñaʼtan chuqui mi caj i yʌlob jiñi lac piʼʌlob tiʼ tojlel jiñi wen tʼan tiʼ caj bajcheʼ miʼ lʌpob i pislel yicʼot miʼ chʼʌlob i bʌ (2 Corintios 6:3). Jiñi wem bʌ xñoptʼan mach jiñic mi caj i cʌlʌx ñaʼtan chuqui bajñel yom o chuqui muʼ bʌ i mejlel i mel, muʼ bʌ caj i ñaʼtan jiñʌch chaʼan maʼañic miʼ yʌcʼ ti yajlel yañoʼ bʌ (Mateo 18:6; Filipenses 1:10).

Mi jiñi xñoptʼan miʼ qʼuel chaʼan lecoj miʼ qʼuejlel o miʼ yʌcʼ ti yajlel yambʌlob tiʼ caj bajcheʼ miʼ chʼʌl i bʌ o miʼ lʌp i pislel, yom miʼ lajin jiñi apóstol Pablo i miʼ sʌclʌben i wenlel yambʌlob, mach i chaʼañic. Pablo tsiʼ yʌlʌ: «Lajiñonla, cheʼ bajcheʼ joñon mic lajin Cristo» (1 Corintios 11:1). I tiʼ tojlel Jesús, tiʼ tsʼijbu: «Mi jiñicto Cristo tsiʼ bajñel sʌcla i wenlel». Tsiquil chuqui yom miʼ melob jiñi xñoptʼañob: «Pero joñonla, pʼʌtʌlonbʌla, yom mi laj cuchben i cʼunlel jiñi mach bʌ pʼʌtʌlobic, i mach lac mel muʼ bʌ i bajñel aqʼueñonla lac wenlel. Ti jujuntiquilonla laʼ lac mel muʼ bʌ i yʌqʼuen i wenlel lac piʼʌl i laʼ lac mel chuqui wen chaʼan mi lac pʼʌtʼesan» (Romanos 15:1-3).

Laʼ lac ñumen cʼʌn lac ñaʼtʌbal

¿Bajcheʼ miʼ mejlel lac taj majlel lac ñaʼtʌbal chaʼan mi lac ñaʼtan chuqui miʼ mulan Jehová anquese maʼañic jumpʼejl mandar muʼ bʌ i yʌl chuqui yom mi lac mel? Mi caj lac ñumen taj lac ñaʼtʌbal mi mucʼʌch lac pejcan jiñi i Tʼan Dios ti jujumpʼejl qʼuin, mi lac wen tsajin yicʼot mi lac wen ñaʼtan chuqui mi lac pejcan. Mach ti orajic mi caj lac waʼ taj lac ñaʼtʌbal. Cheʼ bajcheʼ juntiquil alʌl maʼañic miʼ colel ti ora, cʼunteʼ cʼunteʼ miʼ pʼʌtʼan majlel lac ñopoñel i mach ti orajic mi lac taj laj qʼuel. Jin chaʼan, yom mi lac pʌs lac pijt i mach yomic mi lac michʼan o mi la cubin lac chʼijyemlel mi maʼañic mi lac tojʼan ti ora. Cheʼ jaʼel maʼañic mi lac toʼol taj lac ñaʼtʌbal. Cheʼ bajcheʼ tsaʼix laj qʼuele, yom mi laj cʼʌn lac tiempo chaʼan mi lac wen qʼuel jiñi i Tʼan Dios i mi lac jacʼ jiñi muʼ bʌ lac pejcan cheʼ bajcheʼ cʼamel mi lac mejlel (Hebreos 5:14).

Miʼ mejlel la cʌl chaʼan jiñi i mandar tac Dios miʼ pʌs mi xjacʼtʼañoñʌchla, pero jiñi principio tac miʼ pʌs bajcheʼ cʼamel lac ñopoñel yicʼot mi la com lac tijicñesan. Cheʼ bʌ miʼ ñumen pʼʌtʼan lac ñopoñel, mi caj lac ñumen mulan lac lajin Jehová yicʼot i Yalobil, i mi caj lac mulan chaʼan jiñi muʼ bʌ lac yajcan yaʼʌch chucul tiʼ ñaʼtʌbal Dios am bʌ yaʼ ti Biblia. Cheʼ bʌ mi la cʌqʼuen i tijicñʌyel Jehová tiʼ pejtelel chuqui mi lac mel, mi caj lac ñumen ubin lac tijicñʌyel jaʼel.

[Foto tac]

Anquese miʼ qʼuextʌyel bajcheʼ miʼ lʌpob i pislel ti jujumpʼejl tejclum, yomʌch mi lac jacʼ jiñi principio tac am bʌ ti Biblia cheʼ bʌ mi lac yajcan lac pislel