Me Dua Sara na Lawa Vakaivolatabu mo Qai Vakatulewa?

RAU a rairai dau vakasalataki iko na nomu itubutubu ena levu na ka ni o se gone. O vakila nodrau dau kauaitaki iko dina ena nomu tubu cake tiko. Ni o sa tamata uabula, o rairai se bulataka tiko ga na ivakavuvuli rau a tuberi iko kina, dina ga ni rau sa sega ni lewai iko tale tiko.

E vakaroti keda na Tamada vakalomalagi o Jiova ena vica vata na ivakaro matata ena nona Vosa na iVolatabu. Kena ivakaraitaki, e vakatabuya na qaravi matakau, veidauci, kei na butako. (Lako Yani 20:​1-​17; Cakacaka 15:​28, 29) Nida “tubu cake” vakayalo “e na ka kece ga,” eda vakavinavinakataki Jiova ni kauaitaki keda dina qai sega ni veivakasaurarataki na nona ivakaro.​—Efeso 4:​15; Aisea 48:​17, 18; 54:13.

Ia e levu tale na ka e dau sega na kena ivakaro matata. E so gona era nanuma ni tu vei ira na galala mera cakava ga na ka era vinakata baleta ni sega ni dua na ivakaro matata e vauca na ka era via kitaka. Era kaya ke raica na Kalou ni dodonu me soli e dua na ivakaro, ena tukuna sara ga.

O ira na dau vakasama vaka oya era sega ni dau vakatulewa vinaka, ra qai veivutuni kina e muri. Era lecava ni sega wale ga ni tiko ena iVolatabu na lawa ni Kalou, ia na ivakarau tale ga ni nona vakasama. Nida vulica na iVolatabu da qai kila na rai i Jiova, sa vakavulici tiko kina na noda lewaeloma me rawa nida vakatulewataka na ka me salasalavata kei na nona rai. Nida cakava oqori, ena marau kina o koya, eda na vakila tale ga na yaga ni noda vakatulewa vakayalomatua.​—Efeso 5:1.

iVakaraitaki Vinaka Vakaivolatabu

Nida dikeva ena iVolatabu na kedra itukutuku na dauveiqaravi ni Kalou ena gauna makawa, eda na raica kina nira dau kauaitaka na rai ni Kalou, dina ga ni sega ni dua na ivakaro e soli. Vakasamataki Josefa mada. Ena gauna a temaki koya tiko kina na wati Potifa, a se sega ni lavetaki kina e dua na lawa mai vua na Kalou me baleta na veibutakoci. Ia ke sega mada ga ni dua na kena lawa, e raica rawa o Josefa ni na sega wale ga ni vakaleqa nona lewaeloma ke veibutakoci, ena valavala ca tale ga “vua na Kalou.” (Vakatekivu 39:9) E kila o Josefa ni veibutakoci e veisaqasaqa kei na rai ni Kalou kei na nona inaki me vaka a vakatakilai mai Iteni.​—Vakatekivu 2:​24.

Dikeva mada e dua tale na ivakaraitaki. Ena Cakacaka 16:​3, a cilivi Timoci o Paula ni bera ni qai kauti koya ena cakacaka vakaulotu. Ia, eda wilika ena tikina e 4 na nodrau lai tukuna yani ena veikoro “nai vakaro ka lesia ko ira nai apositolo kei ira na qase sa tiko mai Jerusalemi.” E dua vei ira na ivakaro oqori na nodra sa sega tale ni qai vauci ena lawa na lotu Vakarisito mera cilivi! (Cakacaka 15:​5, 6, 28, 29) Na cava e nanuma kina o Paula ni dodonu me cilivi o Timoci? “E na vukudra na Jiu era sa tiko e na yasana ko ya; ni ra sa kila kecega sa kai matanitu tani na tamana.” E sega ni via veivakacudrui o Paula se me vakatarabetaka e dua. E kauaitaka ga ni dodonu vei ira na lotu Vakarisito mera kua ni vakaleqa na “nodra lewa e loma [na tamata] e na mata ni Kalou.”​—2 Korinica 4:​2, VV; 1 Korinica 9:​19-​23.

E dau laurai na vakasama oqori vei Paula kei  Timoci. Wilika mada na Roma 14:​15, 20, 21 kei na 1 Korinica 8:​9-​13; 10:​23-​33, qai raica kina na nona kauai vakalevu o Paula ena kedra ituvaki vakayalo na tamata, vakauasivi nodra na tarabe beka e so ena ka e sega ni cala. A vola o Paula me baleti Timoci: “Ni sa sega e dua sa tiko vei au sa yalovata kaya, me daunanuma na nomudou ka e na lomana dina. Ni ra sa vakasaqara na nodra ka ko ira kecega, ka segai na ka nei Jisu Karisito. Ia dou sa kilai koya ni sa vakatovolei, ni sa vaka na gone vei tamana, sa daucakacaka vata kei au e nai tukutuku-vinaka.” (Filipai 2:​20-​22) Rau ivakaraitaki vinaka dina vei keda edaidai na rua na lotu vakarisito oqo! Ke sega mada ga ni dua na ivakaro vakalou e tu, rau na sega ni nanuma ga na ka erau vinakata se taleitaka, ia rau na vakatotomuria na loloma i Jiova kei Luvena ena nodrau kauaitaka na kena cakayaco vakayalo vei ira e so tale na nodrau vakatulewa.

E ivakaraitaki uasivi kina o Jisu Karisito. Ena nona Vunau ena Ulunivanua, e vakamatatataka ni o ira na taura rawa na vakasama dina ni lawa ni Kalou era na talairawarawa kina, ena sega ni yalani wale ga na nodra talairawarawa ena veika sa matata vinaka tu na kena ivakaro se na kena vakatabui. (Maciu 5:​21, 22, 27, 28) Ratou vakabauta o Jisu, Paula, Timoci, kei Josefa ni sega ni tu na dodonu vua e dua me cakava ga na ka e vinakata baleta ni sega na ivakaro matata vakalou me vakatabuya na ka oya. Na nodratou vakatotomuria na rai ni Kalou, eratou bulataka sara ga kina o iratou na lewe va oqo e rua na ivakaro bibi a tukuna o Jisu​—mo lomana na Kalou kei ira na tamata kece ga.​—Maciu 22:​36-​40.

Na Lotu Vakarisito Edaidai

E sega ni dodonu meda raica na iVolatabu me vaka tu e dua na ivola ni lawa​—e volai tu kina vakamatata na ka kece me caka. Eda na vakamarautaki Jiova ga vakalevu nida cakava na ka e salavata kei na nona rai, ke sega mada ga ni vakamatatataki tu ena dua na lawa me idusidusi tiko vei keda. Me kua gona ni dua sara na lawa vakaivolatabu meda qai vakatulewa, eda rawa ni saga meda ‘vaqara na ka e vinakata o Jiova.’ (Efeso 5:​17, VV; Roma 12:2) Na cava ena vakamarautaki Jiova kina oqori? E vakaraitaka ni sega soti ni bibi na ka eda dui taleitaka se na noda dui dodonu, ia e bibi cake meda vakamarautaki koya. E vakaraitaka nida taleitaka nona loloma da qai vakatotomuria me igu sara ga e uqeti keda tiko. (Vosa Vakaibalebale 23:15; 27:11) Kena ikuri, noda cakava na ka e tukuni tu ena iVolatabu ena vakabulabulataki keda vakayalo vaka kina vakayago.

Da raica mada se rawa ni vakayagataki vakacava na ivakavuvuli oqo ena ka eda dau cakava.

Ka ni Veivakamarautaki

Raica mada na nona ivakaraitaki e dua na cauravou e via rogoca e dua na ivakatagi mani lai volia sara mai na kena kaseti. E taleitaka na ka e rogoca ia mai na ka e raica ena waqa ni kaseti, e kila kina ni vakasisila qai veivagarogaroi na qaqanisere. E kila tale ga ni iwase levu ni nona ivakatagi na dau lagasere oya e karakaravisa qai vavadugudugu. Ni lomani Jiova, e kauaitaka na cauravou oqo na nona rai kei na nona nanuma. E kila vakacava o koya na loma ni Kalou me baleta na ka oqori?

Ena nona ivola vei ira mai Kalatia, a tuva na yapositolo o Paula na itovo vakayago kei na vua ni yalo tabu ni Kalou. O sa na rairai kila tu se cava e okati ena vua ni yalo tabu ni Kalou: na loloma, na reki, na vakacegu, na vosota  vakadede, na yalomalua, na yalololoma, na vakabauta, na yalomalumalumu kei na ivalavala malua. Ia na ivalavala cava e vakaraitaki kina na itovo vakayago? E vola o Paula: “Ia sa votu na cakacaka ni tovo vakayago, ka sa vakaoqo: A dauveibutakoci, na daudara, nai valavala tawa-savasava, na daugarogaro, na dausoro ki na veimatakau, na daucakaisausau, na dauveicati, na dauveileti, na veiqati, na daucudrucudru, na dauveiba, na veisei vakavuravura, na veisei ni lotu, na dauvuvu, na daumateni, na daumarau vakalialia, kei na veika sa vakakina: a veika oqo au sa tukuna vei kemudou, me vaka ka’u a tukuna makawa talega ni na sega ni rawata na matanitu ni Kalou ko ira era sa kitaka na veika vakaoqo.”​—Kalatia 5:​19-​23.

Raica tale mada na iotioti ni vosa ena tikina oya​—“na veika vakaoqo.” E sega ni tukuna kece sara o Paula na veika e dau laurai me itovo vakayago. Ena sega ni rawa gona kina vua e dua me kaya, ‘Au rawa ni vakaitovotaki au ena itovo vakayago e sega ni cavuta ena tikina oya o Paula.’ E gadrevi ga mera vakayagataka na dauwiliwili na nodra lewaeloma e vakavulici me rawa kina nira kila na itovo vakayago e sega ni cavuta o Paula, ia e okati vata tiko kei na “veika vakaoqo.” Era sega ni rawata na veivakalougatataki ni Matanitu ni Kalou o ira era sega ni veivutunitaka na cakava tiko na itovo e sega ni cavuta o Paula ia era okati me “veika vakaoqo.”

O koya gona e dodonu meda saga meda kila na ka e cata o Jiova. E dredre beka oqori? Ke vakasalataki iko nomu vuniwai mo kania vakalevu na kakana draudrau ia me kua na pai, ice cream, kei na kakana era vaka oya. Ena dredre beka mo kila se e vei e okati kina na keke? Ia, raica tale mada na vua ni yalo tabu ni Kalou kei na itovo vakayago, e vei beka ena wili kina na kaseti ni ivakatagi a tukuni toka mai cake? E sega sara ga ni kune kina na loloma, yalomalua, lewai koya vakamatau, kei na vua ni yalo tabu ni Kalou. Ena sega gona ni gadrevi kina me dua sara na lawa matata me qai kilai na mataqali ivakatagi e sega ni salavata kei na rai ni Kalou. E wili tale ga ena ivakavuvuli oqori na ivola e dau wiliki, na iyaloyalo yavala, na porokaramu ena retioyaloyalo, na qito era tu ena kompiuta, na Web site kei na so tale.

iSulusulu kei na Sasauni e Rakorako

E vakarautaka tale ga na iVolatabu na ivakavuvuli me baleta na isulusulu kei na sasauni. Oqo ena rawa kina vei ira na lotu Vakarisito mera lewa vinaka nodra isulusulu kei na sasauni. Ke ra lomani Jiova era na sega ni cakava na ka ga era taleitaka, ia era na raica ni sala vinaka oya mera vakamarautaki Tamadra vakalomalagi kina. Me vaka eda sa dikeva oti, nona sega ni vakamatailalaitaka sara na ivakaro o Jiova e sega ni kena ibalebale ni sega ni kauaitaka tiko na ka era cakava na nona tamata. E duidui na isulusulu e veivanua, era rawa sara mada ga ni vuki veisau tiko ga ena dua na vanua. Ia, sa vakarautaka tu na Kalou na ivakavuvuli rawarawa sara mera vukei kina nona tamata ena veivanua kei na veigauna kece.

Kena ivakaraitaki, e kaya na 1 Timoci 2:​9, 10: “Me vakaisulu vaka talega kina ko ira na yalewa e nai sulu e kilikili, ni ra sa lokomi ka yalomatua: me kakua ni tali na drau ni uludra, me kakua ni vakoula, se vakamata-ni-civa, se vakai sulu talei: ia (me vaka ga sa kilikili kei ira na yalewa era kaya era sa lotu) e nai valavala vinaka.” O ira gona na yalewa lotu Vakarisito​—vaka kina na tagane​—e dodonu mera vakasamataka sara vakavinaka na mataqali isulusulu se sasauni era na namaka vei ira o ira na tiko veivolekati, baleta nira ‘kaya nira sa lotu.’ E dodonu mera vakasamataka vakabibi na lotu Vakarisito na nodra isulusulu ni na okati kina na nodra rai na tamata me baleta na itukutuku vakaivolatabu era kauta tiko. (2 Korinica 6:3) Ena sega ni kauaitaka vakasivia na lotu Vakarisito na ka ga e taleitaka se na ka e donu vua, ia me qarauna ga me kua ni vu ni veivakacalai se veivakatarabetaki vei ira tale e so.​—Maciu 18:6; Filipai 1:​10.

Ke raica na lotu Vakarisito ni dau vakacudruya se vakacaraka nodra rai e so tale na nona isulusulu kei na sasauni, ena vakatotomuria na  yapositolo o Paula ena nona kauaitaka cake na nodra rai na tacina vakayalo mai na nona via nanumi koya ga. E kaya o Paula: “Dou vakadamurimuri au, me vaka ka’u sa muri Karisito.” (1 Korinica 11:1) E vola o Paula me baleti Jisu: “Ia na Karisito talega sa sega ni kitaka na ka sa vinakata ga ko koya.” E matata sara ga na tikina e via vakabibitaka o Paula vei ira na lotu Vakarisito kece: “O i keda sa kaukauwa na noda vakabauta me da vukei ira na malumalumu me ra colata na nodra i colacola. Me da kakua ni cakava na ka e vinaka ga vei keda. Ia sa dodonu me da cakava na ka mera vinaka ka vakatataki cake kina e na vakabauta ko ira na tani.”​—Roma 15:​1-3, VV.

Vakavulica na Lomada me Vakaduiduitaka na Ka

Eda na vakavulica vakacava na lomada meda rawa ni vakamarautaki Jiova tiko ga ena ka beka eda cakava, dina ga ni sega ni solia tu e dua na kena ivakaro matata? Ke da wilika nona Vosa e veisiga, da vakasamataka vakatitobu, ena qai vakavulici vinaka ga kina na lomada meda vakaduiduitaka na ka. Ia, ena taura na gauna. Na tubu vakayalo e vaka ga na nona tubu cake e dua na gonelailai, e vakamalua qai taura na gauna. E gadrevi gona me tiko na yalovosovoso, da kua tale ga ni rarawataka na kena sega ni vakilai totolo na veisau. Ena yasana adua, na toso wale ga ni gauna ena sega ni vakatau tiko kina na noda rawa ni vakaduiduitaka na ka. Me vakayagataki gona na gauna oqori me vulici wasoma kina na Vosa ni Kalou me vaka sa tukuni oti, meda qai saga ena noda igu taucoko meda bulataka.​—Iperiu 5:​14.

De na vakatovolei na noda talairawarawa ena lawa ni Kalou, ia na nona ivakavuvuli ena kilai kina na titobu ni noda rai vakayalo kei na levu ni noda via vakamarautaka koya. Nida toso tiko vakayalo, eda sa na vakabibitaka ga na noda vakatotomuri Jiova kei na Luvena. Eda na guta me salavata na ka eda vakatulewataka kei na rai ni Kalou e kune ena iVolatabu. Nida vakamarautaka na Tamada vakalomalagi ena veika kece eda cakava, eda na marau tale ga kina vakalevu.

[iYaloyalo ena tabana e 23]

E duidui na isulusulu ena veivanua, ia na noda digidigi me salavata kei na ivakavuvuli vakaivolatabu