OI matamata neganai emu tama sina ese taravatu momo idia atoa. Oi tubu daekau neganai oi laloparara emu namo idia laloa bada. Ena be oi bada vadaeni bona edia siahu henunai oi noho lasi to oi dekenai idia hadibaia hereva haida oi do badinaia noho.

Iseda guba Tamana Iehova ese iena Hereva Baibel amo ita dekenai iena taravatu haida ia henia. Hegeregere kaivakuku tomadiho henia karana, sihari kava karana, heudahanai bona henaohenao karana ia taravatua. (Esodo 20:1-17; Kara 15:28, 29) Ita be “gau ibounai dekenai lo taudia ai ita lao” neganai, ita laloparara Iehova ese iseda namo ia laloa bada bona iena taravatu be ita ia koua lasi.​—Efeso 4:15; Isaia 48:17, 18; 54:13.

To, mauri ai gau momo dekenai Baibel ese taravatu ta ia gwauraia lasi. Unai dainai haida idia laloa sibona edia ura idia karaia diba. Idia gwau bema Dirava ia ura, iena Hereva lalonai unai taravatu do ia atoa.

Unai bamona taudia be nega momo abia hidi kererena idia karaia bona gabeai idia lalohisihisi. Idia laloparara lasi Baibel lalonai be taravatu sibona idia noho lasi, to Dirava ena laloa dalana ia hahedinaraia danu. Baibel ita stadilaia bona Iehova ena lalohadai ita dibaia neganai, iseda lalomamina be Baibel ena hakaua hereva hegeregerena ita hadibaia bona unai ese ita ia durua ena ura hegeregerena abia hidi ita karaia totona. Unai ita karaia neganai, Iehova ena kudouna ita hamoalea bona abia hidi maorodia ita karaia dainai namo ita davaria.​—Efeso 5:1.

Baibel ai Idia Noho Haheitalai Namodia

Baibel ai Dirava ena idaunegai hesiai taudia edia sivarai ita itaia neganai, idia ese Iehova ena lalohadai idia tahua ena be taravatu ia noho lasi. Mani Iosepa ena haheitalai oi laloa. Potifara ena adavana ese Iosepa ia doria idia mahuta hebou totona neganai, unai nega ai heudahanai karana dekenai Dirava ena taravatu ta ia noho lasi. To, Iosepa ia laloparara heudahanai karana be kara dikana, iena lalomamina dekenai sibona lasi to “Dirava vairanai” danu do ia kerere. (Genese 39:9) Iosepa ia diba, Eden umana ai Dirava ese ia hahedinaraia, heudahanai karana be ena lalohadai bona ura ida ia hegeregere lasi.​—Genese 2:24.

Haheitalai ma ta ita laloa. Kara 16:3 ai ita itaia Paulo be ena Keristani loaloa ai Timoteo ia do abia lao lasi neganai, Timoteo ena kopina ia utua guna. To, siri 4 ai ita itaia, unai murinai Paulo bona Timoteo be siti ta ta dekenai idia loaloa, “Ierusalema ai idia noho aposetolo taudia bona tau badadia ese idia abia hidi taravatu be tadikaka bona taihu dekenai idia hadibaia.” (Kara 15:5, 6, 28, 29) Dahaka dainai Paulo ia laloa Timoteo ena kopina ia utua be namo? “Badina unai gabudia ai idia noho Iuda taudia ibounai idia diba [Timoteo] ena tamana be Grik tauna.” Paulo ia ura lasi ma haida ia hahekwakwanaia. Ia laloa namona be Keristani taudia be ‘Dirava vairanai idia hahedinaraia, idia be haheitalai namona taunimanima ibounai dekenai.’​—2 Korinto 4:2; 1 Korinto 9:19-23.

Paulo bona Timoteo be idia ura lasi ma haida idia hahekwakwanaia. Roma 14:15, 20, 21 bona 1 Korinto 8:​9-​13; 10:23-​33 oi duahia, bona Paulo ese ma haida edia namo ia laloa bada karana do oi itaia. Hegeregere, reana idia dekenai gau haida be kerere lasi, to unai be ma haida ia hahekwakwanaia diba dainai, Paulo ese unai ia laloa danu. Paulo be Timoteo totona inai hereva ia gwauraia: “Lau dekenai ta ia noho lasi Timoteo hegeregerena, ia ese umui do ia durua momokani. Badina ma haida be sibodia edia ura idia tahua noho, to Iesu Keriso ena ura idia tahua lasi. To umui diba Timoteo ia hamomokania ia be ia hegeregere. Natuna ta be tamana ida ia gaukara hebou bamona, ia be lau ida ia gaukara goada sivarai namona harorolaia gaukarana ai habadaia totona.” (Filipi 2:20-22) Unai Keristani tatau rua ese ita totona haheitalai namona idia hahedinaraia! Dirava ena taravatu ia noho lasi neganai, sibona edia lalohadai idia badinaia lasi to edia abia hidi idia karaia neganai ma haida edia namo idia laloa guna, unai amo Iehova bona iena Natuna edia lalokau idia tohotohoa.

Mani Iesu Keriso ita laloa, ia be iseda haheitalai hereadaena. Iena Ororo Harorona ai, ia hahedinaraia bema ta ese Dirava ena taravatu ena anina ia lalopararalaia, ia be Dirava do ia badinaia namonamo diba, ena be Baibel ese unai taravatu haida ia gwauraia lasi. (Mataio 5:21, 22, 27, 28) Iesu, Paulo, Timoteo bona Iosepa be idia laloa lasi, bema gau ta totona taravatu ta ia noho lasi, ta be iena ura hegergerena ia kara diba. Idia be Dirava ena lalohadai hegeregerena idia kara totona, Iesu ese ia gwauraia mai anina bada taravatu rua idia badinaia, unai be Dirava lalokau henia bona dekena tauna lalokau henia.​—Mataio 22:36-40.

Keristani Taudia Hari Inai Negai be Edena Bamona?

Unai ese ia hahedinaraia, namo lasi ita ese Baibel be taravatu pepa ta bamona ita laloa, unai pepa lalonai gau ibounai totona taravatu idia torea be namo. Ita ese Iehova ena lalona ita hamoalea bema ita ese ena lalohadai hegeregerena ita kara, ena be Baibel ese gau haida dekenai taravatu ia gwauraia lasi. Baibel ena taravatu hegeregerena ita kara sibona lasi, to ita ese nega ibounai ‘Iehova ena ura ita laloa’ be gau badana. (Efeso 5:17; Roma 12:2) Dahaka dainai unai ese Iehova ia hamoalea? Badina ita be sibona iseda ura bona maoro ita laloa lasi, to ita ura ia ita hamoalea. Danu, iena lalokau ita dekenai ita laloa bada dainai ita ura ia ita tohotohoa. (Aonega Herevadia 23:15; 27:11) Ma danu, Baibel ese ia gwauraia gaudia ita badinaia neganai, iseda hetura karana Dirava ida ia goada bona tauanina dalanai ita ia durua.

Iseda mauri ai unai hakaua herevana badinaia dalana do ita itaia.

Ita Abia Hidi Moale Karadia

Mani tau matamata ta ita laloa, ia be miusiki kaseti ta ia ura ia hoia. Unai kaseti ai ia kamonai anedia ia ura henia, to ia lalohekwarahi badina unai kaseti ena murina kahana ia itaia neganai, ane edia hereva be mahuta hebou karadia bona kara mirodia ma haida idia herevalaia. Danu, ia itaia ane momo be badu bona dagedage lalohadaina idia hahedinaraia. Unai tau matamata be Iehova ia lalokau henia dainai, Iehova ena lalohadai bona hemami ia laloa bada. Edena dala ai ia ese Dirava ena ura ia lalohadailaia diba?

Aposetolo Paulo ese Galatia taudia ia tore henia neganai, tauanina ena kara bona lauma helaga ena huahua edia lista ia torea. Reana oi be Dirava ena lauma helaga ena huahua oi diba: lalokau, moale, maino, haheauka, hebogahisi, kara namo, abidadama, manau, sibona biagua karana. To tauanina ena kara idauidau be dahaka? Paulo ia gwau: “Tauanina ena kara dikadia be idia hedinarai goevagoeva, idia be matabodaga karadia, kara mirodia, gwau-edeede hemarai karadia, kaivakuku tomadiho henia karana, meamea, inai heheni karadia, heai, mama, badu momo, heiriheiri, hapararaia karana, taunimanima badinaia karana, laloa dikadia, kekero, regerege bada pati karadia, bona unai bamona karadia. Umui lau hadibaia unai gaudia dainai do umui naria namonamo, guna umui lau hadibaia hegeregerena, unai gaudia idia karaia taudia be Dirava ena Basileia do idia abia lasi.”​—Galatia 5:19-23.

Unai lista ena dokona ai ia noho hereva oi laloa, ia gwau, “unai bamona karadia.” Paulo ese ia torea tauanina ena kara ena lista ai, gau ibounai ia torea lasi. To namo lasi ta ia gwau, ‘Lau be mai egu maoro tauanina ena kara ena lista ai idia noho lasi karana ta lau karaia totona.’ To duahia taudia be edia lalona o darana idia gaukaralaia be namo, unai amo do idia diba dahaka gaudia be lista ai Paulo ese ia gwauraia lasi eiava ia gwau “unai bamona karadia.” Bema haida be lista ai idia noho lasi karadia, “unai bamona karadia” unai, idia karaia bona idia helalo-kerehai lasi, idia be Dirava ena Basileia ena hahenamo do idia abia lasi.

Namona be ita laloa namonamo Iehova ena matana ai dahaka gaudia be idia maoro lasi. Unai be auka, a? Bema emu doketa be oi ia hadibaia frut bona uma aniani momo do oi ania, to pie, ice cream, bona unai bamona gaudia do oi ania lasi. Do ia auka oi diba totona keke be edena lista henunai ia noho, a? Mani lauma helaga ena huahua bona tauanina ena kara dikadia edia lista oi itaia lou. Paragraf ginigunana ai ita herevalaia miusiki kaseti be edena lista ai do ia noho? Ia be lalokau, kara namo, sibona biagua karana, eiava lauma helaga ena huahua ena kara ma haida ia hahedinaraia lasi. Ia be unai miusiki ena taravatu ta ia tahua be anina lasi. Unai hakaua hereva be ita duahia gaudia, muvi, TV program, kompiuta gadara, Websait, unai bamona gaudia totona danu.

Iseda Dabua Bona Tauanina Toana

Danu Baibel ai dabua bona tauanina ena toana totona hakaua herevadia idia noho. Unai hakaua herevadia ese Keristani tauna do ia durua dabua toana namona ia abia hidi bona iena toana ia naria totona. Dabua bona toana dekenai Iehova lalokau henia tauna ese ia hahedinaraia diba, ia be iena guba Tamana ia ura hamoalea, to sibona ena ura lasi. Ataiai ita herevalaia bamona, Iehova ese gau haida edia taravatu ia henia lasi, to unai ese ia hahedinaraia lasi Ia be ena taunimanima idia karaia gaudia ia laloa lasi. Tano ta ta ai, ita noho gabu danu, be mai edia hegoeva daladia, bona unai be nega ta ta ia senisi. To, Dirava ena hakaua herevadia be nega ibounai bona gabu idauidau ai iena taunimanima ia gimaia.

Hegeregere, 1 Timoteo 2:​9, 10 ia gwau: “Bona lau ura hahine be mai hemataurai bona mai laloa maoromaoro ida dabua namona do idia karaia, namo lasi huina be sitaelo idauidau ai idia pania bona golo eiava pel nadi eiava dava bada dabua idia atoa. To bema idia gwau idia be Dirava tomadiho henia hahinedia, sibodia idia hahairaia dalana amo unai do idia hamomokania. Namona be gaukara namodia idia karaia, bona unai be idia ia hahairaia gauna.” Unai dainai, Keristani hahine bona tatau ese edia gabu ai idia noho taudia edia lalohadai, “Dirava tomadiho henia” taudia edia dabua karaia dalana dekenai idia laloa be namo. Namona be Keristani tauna ese ia laloa gauna be inai, iena toana dainai haida ese ia harorolaia Baibel ena sivarai be edena bamona do idia laloa. (2 Korinto 6:3) Keristani tauna namona be sibona ena ura eiava maoro do ia laloa bada lasi, badina ia ura lasi ma haida do ia hahekwakwanaia.​—Mataio 18:6; Filipi 1:10.

Bema Keristani tauna ta ia diba ena dabua toana ese ma haida ia hahekwakwanaia, ia ese Paulo ia tohotohoa be namo. Ma haida edia hetura karana Iehova ida ia laloa bona sibona ena ura ia dadaraia. Paulo ia gwau: “Namona be lau umui tohotohoa, lau ese Keriso lau tohotohoa bamona.” (1 Korinto 11:1) Paulo be Iesu ia herevalaia neganai ia gwau: “Keriso danu ese sibona ia hamoalea lasi.” Paulo ena hereva badana Keristani taudia ibounai dekenai be inai: “Namona be ita abidadama goada taudia ese abidadama manoka taudia do ita durua, idia ia tohoa gaudia idia haheaukalaia totona. Bona ita sibona hamoalea karadia ita karaia lasi. Namona be ita ta ta ese iseda dekena tauna ita hamoalea bona kara namodia do ita karaia ia ita hagoadaia totona.”​—Roma 15:1-3.

Iseda Darana Ita Treinia

Ena be Baibel ai gau haida edia taravatu be idia noho lasi, to Iehova ita hamoalea dalana ita diba totona, edena dala ai iseda darana ita treinia diba? Dina ta ta ai iena Hereva ita duahia, stadilaia hanaihanai bona ita duahia gaudia ita laloa dobu neganai, iseda darana ita treinia diba. Unai be do ia vara haraga lasi. Natuna ta ia tubu daekau hegeregerena, Dirava tura henia karana danu be metairametaira ia goada ia lao bona ia hedinarai haraga lasi. Unai dainai haheauka karana be mai anina bada. Bona ita lalomanoka lasi bema iseda hekwarahi ena anina ita itaia haraga lasi. Ena be nega bada ia hanaia, unai ese ia hahedinaraia lasi ita ese iseda darana treinia karana ita hanamoa. To unai nega ita gaukaralaia Dirava ena Hereva ita stadilaia totona bona ena Hereva be iseda mauri ai ita badinaia be namo.​—Heberu 5:14.

Ita gwau diba Dirava ena taravatu ese iseda kamonai karana ia tohoa diba, bona iena hakaua herevadia ese iseda Dirava tura henia karana bona Ia ita hamoalea karana ia tohoa danu. Iseda hetura karana Dirava ida ia goada ia lao neganai, do ita ura Iehova bona iena Natuna ita tohotohoa. Mai iseda ura bada ida Baibel ai Dirava ena lalohadai hegeregerena abia hidi ita karaia. Bema ita karaia gaudia ibounai lalonai iseda guba Tamana ita hamoalea, unai ese iseda moale do ia habadaia.

 [Rau 23 ena laulau]

Gabu ta ta ai dabua ena sitaelo be idauidau, to Baibel ena hakaua herevadia hegeregerena iseda abia hidi ita karaia be namo