¿Á ndiʼi tiempo xíniñúʼu ka̱ʼa̱n ña̱ Biblia xa̱ʼa̱ ña̱ keʼéyó?

SANA, tá ni̱xi̱yo válíyó na̱ yiváyó xi̱ka̱ʼa̱nna xíʼinyó ndáaña kúú ña̱ va̱ʼa keʼéyó ta ndáaña kúú ña̱ va̱ása va̱ʼa. Soo tá xa̱a̱ xa̱ʼnuyó ku̱ndaa̱-iniyó ña̱ xi̱keʼéna ña̱yóʼo xa̱ʼa̱ ña̱ kúni̱na ña̱ va̱ʼa kooyó. Soo ni xa̱a̱ xa̱ʼnuyó ta va̱ása káʼa̱nkana xíʼinyó ndáaña keʼéyó ndíku̱nkavayó ña̱ xi̱ka̱ʼa̱nna xíʼinyó tá ni̱xi̱yo válíyó.

Yiváyó Jehová ta̱ íyo chí ndiví saátu ta̱yóʼo káʼa̱nra xíʼinyó ndáaña xíniñúʼu keʼéyó nu̱ú tu̱ʼunra ña̱ Biblia. Tá kúú, ña̱ kǒo ndasakáʼnuna inka Ndióxi̱, ña̱ ki̱ʼvina ku̱a̱chi kini, ña̱ ku̱su̱nna xíʼin na̱ kǒo ní tíndaʼa̱ xíʼinna ta saátu ña̱ ixakuíʼnána (Éxodo 20:​1-​17; Hechos 15:​28, 29). Tá xa̱a̱ xáʼnuyó xíʼin tu̱ʼun Ndióxi̱ xáa̱yó kúnda̱a̱-iniyó jehová kúni̱ra ña̱ va̱ʼa ná kundooyó ta chiñu ña̱ xáʼndara nu̱úyó va̱ása yo̱ʼvi̱ña (Efesios 4:​15; Isaías 48:​17, 18; 54:13).

Íyo ku̱a̱ʼání ña̱ʼa ña̱ kǒo káʼa̱n káxi Biblia xíʼinyó ña̱ xíniñúʼu keʼéyó. Íyo sava na̱ ndákanixi̱ní xa̱ʼa̱ ña̱ kǒo káʼa̱n káxi ley ña̱ va̱xi nu̱ú Biblia, kivi keʼéyó nda̱a̱ ndáaka ña̱ kúni̱ miívayó, chi tá mií Ndióxi̱ kúú ta̱ ta̱xi ley yóʼo ndaʼa̱yó kiviva ka̱ʼa̱nra xíʼinyó ndáaña keʼéyó ta ndáaña va̱ása xíniñúʼu keʼéyó.

Na̱ ndákanixi̱ní saá xáa̱na ndáka̱xinna ña̱ʼa ña̱ va̱ása va̱ʼa kéʼéna ta tá yáʼa tiempo kíxi tu̱ndóʼo nu̱úna. Xáa̱na nándósó-inina ña̱ su̱ví iin ley kuití kúú ña̱ níka̱ʼyi̱ nu̱úña, chi saátu ña̱ ndákanixi̱ní Ndióxi̱ xa̱ʼa̱ ña̱yóʼo. Ña̱ kaʼviyó Biblia ta kunda̱a̱-iniyó ña̱ ndákanixi̱ní Jehová chindeétáʼanña xíʼinyó ña̱ vií koo ña̱ xínitúni̱yó ta chíndeétáʼanña xíʼinyó ña̱ vií koo ña̱ ndaka̱xinyó keʼéyó nda̱a̱ táki̱ʼva kúni̱ miíra. Kúsi̱í-inira xíʼin ña̱yóʼo ta saátu miíyó ndákiʼinyó ña̱ va̱ʼa xa̱ʼa̱ ña̱ vií ndáka̱xinyó ña̱ kéʼéyó (Efesios 5:1).

Ejemplo ña̱ va̱xi nu̱ú Biblia

Tá káʼviyó xa̱ʼa̱ na̱ xi̱ndasakáʼnu Ndióxi̱ tiempo xi̱naʼá, kíʼinyó kuenta ña̱ viíní nda̱ka̱xin na̱yóʼo ña̱ ke̱ʼéna nda̱a̱ táki̱ʼva kúni̱ mií Jehová ni kǒo ña̱ xi̱ka̱ʼa̱n káxi xíʼinna ndáaña xi̱xiniñúʼu keʼéna. Tá kúú ta̱ José. Tá xi̱kuni̱ ñá síʼi ta̱ Potifar ku̱sunñá xíʼin ta̱ José, tiempo saá kǒo ní táxi Jehová iin ley ña̱ ka̱ʼa̱n ña̱ kǒo ki̱ʼvina ku̱a̱chi kini. Ni kǒo ley níxi̱ka̱ʼa̱n xa̱ʼa̱ ña̱yóʼo, soo ta̱ José xi̱kunda̱a̱-inira ña̱ tá ná ki̱ʼvira ku̱a̱chi kini sándi̱ʼi̱ña ña̱ xínitúni̱ra ta saátu ki̱ʼvira ku̱a̱chi nu̱ú Ndióxi̱ (Génesis 39:9). Ta̱ José xi̱kunda̱a̱-inira ña̱ tá ná keʼéra ña̱yóʼo ya̱ʼandosóra ña̱ ni̱ka̱ʼa̱n Jehová (Génesis 2:​24).

Ná kotoyó inka ejemplo. Nu̱ú Hechos 16:3 káʼa̱nña, tá kúma̱níka ku̱ʼu̱n ta̱ Timoteo xíʼin ta̱ Pablo kotora na̱ congregación, ta̱ Pablo nda̱kiʼinrara ku̱a̱ʼa̱n xíʼinra ña̱ ta̱ʼnda̱ nu̱ú yi̱i̱ra. Ta versículo 4 káʼa̱nña ña̱ tá xi̱xa̱ʼa̱nna “ñuu tá ñuu, xi̱ka̱ʼa̱nna xíʼin na̱ hermano ña̱ xíniñúʼu kundiku̱nna ña̱ nda̱kaxin na̱ apóstol xíʼin na̱ anciano na̱ ni̱xi̱yo chí ñuu Jerusalén”. Soo ña̱ nda̱kaxinna ke̱ʼéna kán xi̱ka̱ʼa̱ntuña ña̱ va̱ása xíniñúʼu ixandúxana xíʼin na̱ cristiano ña̱ ta̱ʼnda̱ nu̱ú yi̱i̱na (Hechos 15:​5, 6, 28, 29). Tásaá, ¿nda̱chun nda̱kani xi̱ní ta̱ Pablo ña̱ xíniñúʼu ta̱ʼnda̱ nu̱ú yi̱i̱ ta̱ Timoteo? “Ña̱ va̱ʼa kuniso̱ʼo na̱ judío ña̱ natúʼunna xíʼinna, saáchi ndiʼina xi̱xini̱ ña̱ yivára ta̱ griego xi̱kuura.” Ta̱ Pablo va̱ása níxikuni̱ra sandákavara inina. Ta̱ Pablo xi̱kuni̱ra ña̱ ndiʼi na̱ cristiano ná na̱ʼa̱na nu̱ú na̱ yiví ña̱ kéʼéna ña̱ va̱ʼa (2 Corintios 4:2; 1 Corintios 9:​19-​23).

Xíʼin ña̱yóʼo xi̱na̱ʼa̱ ta̱ Pablo xíʼin ta̱ Timoteo ndáaña xi̱ndakanixi̱nína. Tá kúú texto Romanos 14:​15, 20, 21 xíʼin 1 Corintios 8:​9-​13; 10:​23-​33, náʼa̱ña nu̱úyó ta̱ Pablo xi̱ndi̱ʼi̱ní-inira xa̱ʼa̱ ña̱ kitáʼan va̱ʼa na̱ hermano xíʼin Jehová, ta na̱ xi̱kiʼinníra kuenta xíʼin kúú na̱ i̱yo ndakava, xíʼin ña̱ xi̱keʼé inkana ni ña̱ va̱ʼava xi̱kuu ña̱ xi̱keʼéna. Soo, ta̱ Pablo ka̱ʼyíra ña̱yóʼo tá ni̱ka̱ʼa̱nra xa̱ʼa̱ ta̱ Timoteo: “Saáchi kǒo nda̱a̱ ni iinna íyo nda̱a̱ táki̱ʼva íyo ta̱yóʼo, chi ta̱yóʼo ndixaní ndíʼi̱-inira xa̱ʼa̱ndó. Saáchi ndiʼika na̱ sava xa̱ʼa̱ chiñu miína ndíʼi̱-inina, ta va̱ása ndíʼi̱-inina xa̱ʼa̱ chiñu ta̱ Jesucristo. Ndóʼó xa̱a̱ kúnda̱a̱va-inindó ña̱ ni̱na̱ʼa̱ra ña̱ va̱ʼaní chiñu kéʼéra, chi nda̱a̱ táki̱ʼva íyo iin esclavo saá íyora ña̱ chi̱ndeétáʼanra xíʼi̱n ña̱ na̱túʼunndi̱ xa̱ʼa̱ tu̱ʼun va̱ʼa, nda̱a̱ táki̱ʼva kéʼé iin ta̱ loʼo xíʼin yivára” (Filipenses 2:​20-​22). Va̱ʼaní yi̱chi̱ sa̱ndákoo u̱vi̱ saá na̱yóʼo nu̱úyó, tu̱ʼun Ndióxi̱ va̱ása níxi̱ka̱ʼa̱n káxiña xíʼinyó xa̱ʼa̱ ña̱yóʼo soo nisaá na̱yóʼo kǒo níxi̱keʼéna ña̱ kúni̱ mií kuitína, chi ña̱ xi̱keʼéna kúú ña̱ xi̱kuʼvi̱-inina xi̱xinina na̱ hermano nda̱a̱ táki̱ʼva kéʼé Jehová xíʼin se̱ʼera ta̱ Jesús, xa̱ʼa̱ ña̱kán tá xi̱ndaka̱xinna keʼéna iin ña̱ʼa xi̱ndakanixi̱nína ña̱ ná kǒo ndakava inkana xíʼin ña̱ xi̱keʼéna.

Vitin ná ndakanixi̱níyó xa̱ʼa̱ ta̱ Jesucristo ta̱ sandákoo yi̱chi̱ va̱ʼa nu̱úyó. Ña̱ ni̱ka̱ʼa̱n ta̱ Jesús nu̱ú yu̱ku̱ ni̱ka̱ʼa̱n káxira tá iinna kúnda̱a̱-ini xíʼin ley Ndióxi̱ su̱ví iin ña̱yóʼo kuití kéʼéna chi kéʼékana ndiʼi ña̱ kítáʼan xíʼin ley yóʼo (Mateo 5:​21, 22, 27, 28). Ni iin na̱ xi̱ka̱ʼa̱nyó xa̱ʼa̱ táki̱ʼva ta̱ José, ta̱ Pablo, ta̱ Timoteo xíʼin ta̱ Jesús, kǒo níndákanixi̱nína ña̱ tá kǒo káʼa̱n ley xa̱ʼa̱ iin ña̱ʼa va̱ʼa keʼéna ña̱ kúni̱ miína, chi ña̱ ke̱ʼéna kúú ña̱ nda̱kanixi̱nína ndáaña ndákanixi̱ní Ndióxi̱ xa̱ʼa̱ iin ña̱ʼa ta xi̱ndiku̱nna ña̱ ni̱ka̱ʼa̱n ta̱ Jesús ña̱ ndáyáʼviní ña̱ ku̱ʼvi-inina kunina Ndióxi̱ xíʼin na̱ yiví (Mateo 22:​36-​40).

Na̱ cristiano na̱ íyo tiempo vitin

Kúnda̱a̱ káxi iniyó ña̱ va̱ása xíniñúʼu kotoyó Biblia nda̱a̱ táki̱ʼva íyo iin tutu ña̱ káʼa̱n iin tá iin ña̱ xíniñúʼu keʼéyó. Ni kǒo iin ley ña̱ káʼa̱n xíʼinyó ndáaña xíniñúʼu keʼéyó, ña̱ íxaa si̱í-ini Jehová kúú ña̱ ná keʼéyó ña̱ kúni̱ra, ta su̱ví ña̱ ka̱ʼa̱nra xíʼinyó ndiʼi tiempo ndáaña kúni̱ra ná keʼéyó (Efesios 5:​17; Romanos 12:⁠2). ¿Nda̱chun kúsi̱í-ini Jehová ná keʼéyó ña̱yóʼo? Chi saá na̱ʼa̱yó ña̱ ndáyáʼvika nu̱úyó kúú ña̱ ndasasi̱íyó ini Jehová ta su̱víka ña̱ keʼéyó ña̱ kúni̱ miíyó, ta táxiníyó tíxa̱ʼvi ndaʼa̱ra xa̱ʼa̱ ña̱ kúʼvi̱-inira xínira miíyó ta kúni̱yó na̱ʼa̱yó ña̱yóʼo xíʼin ndiʼi ña̱ ndáka̱xinyó keʼéyó (Proverbios 23:15; 27:11). Ta va̱ása nandósóyó ndiʼi ña̱ va̱xi nu̱ú tu̱ʼun Ndióxi̱ chíndeétáʼanña xíʼinyó ña̱ va̱ʼa kitáʼanyó xíʼinra xíʼin ña̱ va̱ása ki̱ʼin kue̱ʼe̱ miíyó.

Kotoyó ndáa ki̱ʼva keʼé iin tá iinyó ña̱ ni̱ka̱ʼa̱nyó xa̱ʼa̱ yóʼo.

Ña̱ ndaka̱xinyó keʼéyó ña̱ sakúsi̱í-iniyó

Ná ka̱ʼa̱nyó xa̱ʼa̱ iin ta̱ loʼo ta̱ kúni̱ sa̱tá iin disco ña̱ kuniso̱ʼora yaa. Yaa ña̱ va̱xi nu̱ú ña̱yóʼo kútóniraña, soo va̱xi sava yaa ña̱ káʼa̱n xa̱ʼa̱ tu̱ʼun kini ta saátu ña̱ káʼa̱n xa̱ʼa̱ ña̱ kíʼvina ku̱a̱chi kini ta ña̱yóʼo kúú ña̱ sándi̱ʼi̱-inira. Ta kúnda̱a̱-inira ku̱a̱ʼání yaa ña̱ va̱xi yóʼo ku̱a̱ʼání ña̱ kini káʼa̱nña. Xa̱ʼa̱ ña̱ kúʼvi̱-ini ta̱ loʼo yóʼo xínira Jehová ndíʼi-inira ndáaña ndákanixi̱ní Jehová xa̱ʼa̱ ña̱ ndóʼora. Ta, ¿ndáa ki̱ʼva kunda̱a̱-inira ndáaña kúni̱ Jehová ná keʼéra?

Tutu ña̱ ka̱ʼyí ta̱ Pablo nu̱ú na̱ Gálatas, ni̱ka̱ʼa̱nra xa̱ʼa̱ ña̱ kivi ndakavayó xíʼin ta saátu ña̱ va̱ʼa ña̱ kúúmií Ndióxi̱. Á sana xa̱a̱ kúnda̱a̱va-iniyó ndáaña kúú ña̱yóʼo, ña̱ ku̱ʼvi̱-iniyó kunitáʼanyó, si̱í koo iniyó, táxi̱n koo iniyó kúee koo iniyó, vií koo iniyó, va̱ʼa koo iniyó, kandíxayó Ndióxi̱, vitá koo iniyó xíʼin ña̱ ka̱ʼnu̱ iniyó. Soo ¿ndáaña kivi ndakavayó xíʼin? ta̱ Pablo ka̱ʼyíra ña̱yóʼo: “Va̱ása yo̱ʼvi̱ví ndakuniyó ña̱ kéʼé na̱ yiví ku̱a̱chi, chi kíʼvina ku̱a̱chi kini, kéʼéna ña̱ yaku̱a̱, kéʼéna ña̱ va̱ása kúkaʼan nu̱úna xíʼin, ndásakáʼnuna ndiʼi ña̱ʼa, nátúʼunna xíʼin na̱ ta̱chí ndi̱va̱ʼa, sáa̱-inina xínitáʼanna, kánitáʼanna, sáa̱-inina xínina inkana xa̱ʼa̱ ña̱ kúúmiína á xa̱ʼa̱ ña̱ kéʼéna, kamaní sáa̱na, kútóonína ku̱a̱chi, ndátaʼví-táʼanna, ndátaʼví-táʼanna ña̱ kundiku̱nna ña̱ sánáʼa̱ na̱ yiví, kúini̱-inina, xíʼina nda̱a̱ xíniina, kéʼéna vikó nu̱ú kininí kéʼéna xíʼin ndiʼika ña̱ íyo nda̱a̱ táki̱ʼva íyo ña̱yóʼo. Káʼi̱n xíʼinndó nda̱a̱ táki̱ʼva xa̱a̱ ni̱ka̱ʼi̱n xíʼinndó, na̱ kéʼé ndiʼi ña̱yóʼo va̱ása koona ti̱xin Reino Ndióxi̱” (Gálatas 5:​19-​23).

Ná kotoyó tu̱ʼun ña̱ nu̱ú ndíʼi ña̱ va̱xi yóʼo: xíʼin ndiʼika ña̱ íyo “táki̱ʼva íyo ña̱yóʼo”. Ta̱ Pablo kǒo nítaxira iin lista ña̱ʼa ña̱ kǒo xíniñúʼu keʼéyó. Sana iinna kivi ndakanixi̱ní: “Va̱ʼa keʼíi̱ ndiʼi ña̱ʼa ña̱ kǒo va̱xi nu̱ú lista ña̱ ni̱ka̱ʼa̱n ta̱ Pablo xa̱ʼa̱”. Na̱ káʼvi va̱ʼa tu̱ʼun Ndióxi̱ kivi kuniñúʼu va̱ʼana ña̱ ndákanixi̱nína ña̱ va̱ʼa kunda̱a̱-inina ndáa ña̱ʼa kúú ña̱ kǒo xíniñúʼu keʼéna, ni kǒo ña̱yóʼo va̱xi nu̱ú lista ña̱ ni̱ka̱ʼa̱n ta̱ Pablo xa̱ʼa̱. Ndiʼi na̱ kéʼé ña̱ kini ña̱ kǒo va̱xi nu̱ú lista yóʼo soo kítáʼanña xíʼin ña̱ ni̱ka̱ʼa̱n ta̱ Pablo xa̱ʼa̱, va̱ása ndakiʼinna bendición ti̱xin reino Ndióxi̱.

Xíniñúʼu ndakuniyó ndáa ña̱ʼa kúú ña̱ va̱ása kutóo Jehová. ¿Á ña̱ yo̱ʼvi̱ní kúú ña̱yóʼo? Ná ndakanixi̱níyó iin ta̱ Doctor káʼa̱nra xíʼún ná kaxíún ku̱a̱ʼání ku̱i̱ʼi xíʼin verdura, soo káʼa̱nra xíʼún ña̱ ná kǒo kaxíún pastel, helado xíʼin inkaka ña̱ kítáʼan xíʼin ña̱yóʼo. ¿Á ixayo̱ʼvi̱ña xíʼinyó kunda̱a̱-iniyó ndáa ña̱ʼa kúú ña̱ taxi kue̱ʼe̱ ndaʼa̱yó? Ná ka̱ʼa̱n loʼo tukuyó xa̱ʼa̱ ña̱ʼa ña̱ va̱ʼa ña̱ kúúmií Ndióxi̱ xíʼin xa̱ʼa̱ ña̱ʼa ña̱ sandákava miíyó: yaa ña̱ ni̱ka̱ʼa̱nyó xa̱ʼa̱ ¿á chindeétáʼanña xíʼinyó ña̱ kitáʼan va̱ʼakayó xíʼin Ndióxi̱? Va̱ása chi kǒo náʼa̱ña ña̱ʼa ña̱ va̱ʼa ña̱ kúúmií Ndióxi̱, ña̱ ku̱ʼvi̱-iniyó kuniyó inkana ña̱ va̱ʼa koo iniyó, ña̱ ka̱ʼnu̱-iniyó xíʼin inkaka ña̱ va̱ʼa ña̱ kúúmií Ndióxi̱. Va̱ása xíniñúʼu kooví iin ley ña̱ ka̱ʼa̱n xíʼinyó ña̱ va̱ása xíniñúʼu kuniso̱ʼoyó yaa yóʼo chi va̱ása kítáʼanña xíʼin ña̱ ndákanixi̱ní Ndióxi̱. Ta saátu kǒo ña̱ káʼa̱n káxi xíʼinyó ndáa tutu kúú ña̱ xíniñúʼu kaʼviyó, ndáa película á programa xíniñúʼu kotoyó, ndáa videojuego xíniñúʼu kusíkíyó á ndáa página internet kotoyó.

Ki̱ʼva ña̱ ndíxiyó

Biblia táxiña yi̱chi̱ nu̱úyó ndáa ki̱ʼva ndasaviíyó miíyó ta saátu ña̱ kundixiyó. Ña̱ va̱xi nu̱ú Biblia chíndeétáʼanña xíʼin na̱ ndásakáʼnu Ndióxi̱ ña̱ vií ndaka̱xinna ti̱ko̱to̱ ña̱ kundixina tasaá vií kuna̱ʼa̱na. Na̱ kúni̱ xíni Jehová ndiʼi tiempo kúni̱na ndasaa si̱ína-inira su̱víka ña̱ keʼéna ña̱ kúni̱ miína. Nda̱a̱ táki̱ʼva xa̱a̱ ku̱ndaa̱-iniyó, xa̱ʼa̱ ña̱ kǒo ley táxi Jehová ndaʼa̱yó ndáa ña̱ʼa kúú ña̱ kǒo xíniñúʼu keʼéyó va̱ása kúni kachiña ña̱ kǒo ndíʼi inira xa̱ʼa̱yó ta va̱ʼa keʼéyó ña̱ kúni̱ miíyó. Xa̱a̱ síín síín ndíxina iin iin lugar ta ndiʼi tiempo násamaña. Soo Ndióxi̱ táxira yichi̱ ña̱ níʼi nu̱ú na̱ ñuura ña̱ va̱ʼa ndaka̱xinna ndáaña keʼéna.

Tá kúú 1 Timoteo 2:​9, 10 káchiña: “Saátu ná ñaʼá, ña̱ va̱ʼa livi kuna̱ʼa̱ná va̱ása xíniñúʼu kundi̱ʼi̱ní-ininá xa̱ʼa̱ ndáa ki̱ʼva koo lazo ña̱ katúnná xi̱níná, ni ña̱ kuniñúʼuná oro á perla, ni ña̱ kundixiná ti̱ko̱to̱ ña̱ yaʼviní, nda̱a̱ táki̱ʼva kéʼé ná ñaʼá ná ndásakáʼnu Ndióxi̱ xíʼin ndinuʼu-ininá”. Na̱ ndásakáʼnu Ndióxi̱ kúúna ta̱a á ñaʼá xíniñúʼu kiʼin va̱ʼana kuenta ndáa ki̱ʼva kundixina ta saá na̱ʼa̱na ña̱ ndásakáʼnuna miíra, chi na̱ yiví kíʼinna kuenta xíʼin ki̱ʼva ña̱ ndíxina. Na̱ ndásakáʼnu Ndióxi̱ xíniñúʼu kiʼin va̱ʼana kuenta ndáa ki̱ʼva ndíxina chi saá náʼa̱na ña̱ ndásakáʼnunara (2 Corintios 6:3). Na̱ ndixa ndásakáʼnu Ndióxi̱ va̱ása ndíʼi̱ví-inina ña̱ keʼéna ña̱ kúni̱ miína chi ña̱ ndíʼi̱ní-inina kúu ña̱ ná kǒo sandákavana inkana (Mateo 18:6; Filipenses 1:​10).

Tá iin na̱ ndásakáʼnu Ndióxi̱ kíʼinna kuenta ña̱ va̱ása vií íyo ña̱ ndíxina ta sandákavana ini inkana xíʼin ña̱yóʼo va̱ʼaníka ña̱ ná kundiku̱nna yichi̱ ta̱ apóstol Pablo, ta saá chindeétáʼanna xíʼin inkana ña̱ ndasakáʼnuna Ndióxi̱ ta kǒo keʼéna ña̱ kúni̱ miína. ta̱ Pablo ni̱ka̱ʼa̱nra ña̱yóʼo: “Keʼéndó táki̱ʼva kéʼé yi̱ʼi̱, chi yi̱ʼi̱ kéʼíi̱ táki̱ʼva kéʼé ta̱ Cristo” (1 Corintios 11:1). Ka̱ʼyíra ña̱yóʼo xa̱ʼa̱ ta̱ Jesús: “Saáchi nda̱a̱ ta̱ Cristo va̱ása níkeʼéra ña̱ sákusi̱í-ini miíra”. Káxiníva káʼa̱n ña̱yóʼo xíʼin na̱ ndásakáʼnu Ndióxi̱: “Miíyó na̱ xa̱a̱ xu̱xa-ini xíʼin tu̱ʼun Ndióxi̱ ná chindeétáʼanyó xíʼin na̱ kúma̱ní kuxa-ini xíʼin tu̱ʼun Ndióxi̱ ta ná kǒo kundi̱ʼi̱-iniyó xa̱ʼa̱ mií kuitíyó. Iin tá iin miíyó ná keʼéyó ña̱ʼa ña̱ sákusi̱í-ini na̱ táʼanyó ta saá va̱ʼa chindeétáʼanyó xíʼinna” (Romanos 15:​1-3).

Vií ndakanixi̱níyó

¿Ndáa ki̱ʼva sakúaʼayó ndakani vií xi̱níyó ta saá keʼéyó ña̱ ndasaa si̱í-ini Jehová tá kǒo iin ley káʼa̱n xíʼinyó xa̱ʼa̱ ña̱yóʼo? Ña̱ va̱ʼa kunda̱a̱-iniyó ndáaña xíniñúʼu keʼéyó xíniñúʼu kaʼvi va̱ʼayó tu̱ʼun Ndióxi̱, ta ndakani va̱ʼa xi̱níyó xa̱ʼa̱ ña̱ káʼviyó. Soo kúee kúeeva sakúaʼayó keʼéyó ña̱ va̱ʼa. Nda̱a̱ táki̱ʼva xáʼnu na̱ lée válí saá xáʼnuyó xíʼin tu̱ʼun Ndióxi̱ chi kúee kúeeva xáʼnuyó xíʼin ña̱yóʼo. Xa̱ʼa̱ ña̱kán xíniñúʼu kúee koo iniyó ta va̱ása ndi̱ʼi-iniyó tá túviyó va̱ása va̱ʼa kéʼéyó ña̱ kúni̱ Ndióxi̱. Soo ná ndakaʼányó chi tiempo va̱ása chindeéña miíyó ña̱ xíniñúʼu keʼéyó kúú ña̱ ka̱ʼviyó tu̱ʼun Ndióxi̱ tasaá vií xa̱a̱yó ndakanixi̱níyó (Hebreos 5:​14).

Ley Ndióxi̱ náʼa̱ña á ndixa kándíxayó Ndióxi̱, ta yichi̱ ña̱ táxira ndaʼa̱yó náʼa̱ña á ndixa xáʼnuyó xíʼin tu̱ʼunra ta á ndixa kúniyó ndasaa si̱íyó inira. Tá xa̱a̱ xáʼnuyó xíʼin tu̱ʼunra ña̱ ndáyáʼvika nu̱úyó kúú ña̱ kundiku̱nyó yichi̱ra xíʼin se̱ʼera, ta ndiʼi ña̱ ndáka̱xinyó keʼéyó náʼa̱yó ña̱ ndíku̱nyó ña̱ ndákanixi̱ní Jehová ña̱ va̱xi nu̱ú tu̱ʼunra. Tá sákusi̱íyó ini yiváyó xíʼin ndiʼi ña̱ kéʼéyó saátu ña̱yóʼo sákusi̱íña ini miíyó.

[Na̱ʼná]

Ni xa̱a̱ síín síín ndíxina iin tá iin lugar ña̱ xíniñúʼu kundiku̱nyó kúú yichi̱ ña̱ táxi Jehová ndaʼa̱yó