Kasin Kaukolan Mon Naynay so Ganggan na Biblia?

SANEN ugaw ka ni, saray ateng mo so nayarin angiter ed sika na dakdakel a totontonen. Diad itatakken mo, natetebek mo ya interesado ra ed pankaabigan mo. Bilang wala la’d edad, nayarin iyaaplikam nin siansia iray prinsipyon impurek da ed sika, anggaman anggapo ka la ed pudir da.

Say mangatatawen ya Ama tayo, si Jehova, so mangiiter ed sikatayo na pigaran direktan ganggan panamegley na Salita to, say Biblia. Alimbawa, isesebel to so idolatriya, pilalawanan, pikakalugoran, tan panagtakew. (Exodo 20:1-17; Gawa 15:28, 29) Legan itayon ‘ombabaleg ed amin a bengatla’ diad espiritual, natetebek tayo a si Jehova so interesadon maong ed pankaabigan tayo tan saray ganggan to so aliwan mapegpeget.​—Efeso 4:15; Isaias 48:17, 18; 54:13.

Anggaman ontan, dakel iray situasyon ya anggapo so direktan ganggan. Kanian, iisipen na arum a lapud ta anggapo so direktan ganggan na Biblia, sikaray bulos lan manggawa na labay da. Ikakatunongan da a no momoriaen na Dios a nakaukolan itan, impaamta to la komon so panlabayan to panamegley na direktan ganggan.

Saramay walaan na onian kaisipan so mabetbet ya agmakapandedesisyon na duga a pagbabawian dan tuloy diad kaunoran. Agda namomoria ya aliwa labat a saray ganggan so lugan na Biblia, noagta pati saray pakapatnagan na paraan na panag-isip na Dios. Legan tayon aaralen so Biblia tan naaamtaan so panmoria nen Jehova ed saray pamaakaran, nawalaan itayo na konsiensian nipasal ed Biblia tan natutulongan itayon mandesisyon a mangipatnag ed saray paraan to. Sano gagawaen tayo itan, napaliket tayo so puso to tan nagamoran tayo iray gunggona ed makabat a panagdesisyon tayo.​—Efeso 5:1.

Matalonggaring Iran Ehemplo ed Biblia

Sano imanoen tayo iray salaysay na Biblia nipaakar ed saray lingkor na Dios nensaman, naromog tayo iray situasyon ya inkonsidera da so panag-isip nen Jehova anggaman ag-ira nisilong ed sakey a direktan ganggan. Konsideraen so alimbawa nen Jose. Sanen sikatoy nipaarap ed imoral a pananagyat na asawa nen Potifar, anggapo ni so impuyan na Dios a nisulat a ganggan sumpad pikakalugoran. Ingen, anggaman anggapo so direktan ganggan, atebek nen Jose a kasalanan so pikakalugoran, aliwa labat a sumpad dilin konsiensia to noagta ‘sumpa ed Dios.’ (Genesis 39:9) Mapatnag a binidbir nen Jose a say pikakalugoran et sumlang ed panag-isip tan linawa na Dios, unong a nibalikas diad Eden.​—Genesis 2:24.

Imanoen so sananey nin alimbawa. Diad Gawa 16:3, naaralan tayo ya antis ya impila nen Pablo si Timoteo diad saray Makristianon panagbaroy to, sikato so ginalsiman to. Ingen, diad bersikulo 4 et nabasa tayo a kayari na saman et niliber nen Pablo tan si Timoteo so interon syudad pian ipasabi ‘iray ganggan a pinaabig na saray apostoles, tan saray mamasiken a wala ed Jerusalem.’ Kabiangan ed saratan a ganggan so desisyon ya agla obligadon manpagalsim iray Kristiano! (Gawa 15:5, 6, 28, 29) Akin a minoria nen Pablo a kaukolan a nagalsiman ni si Timoteo? “Lapu ed saray Judio a wala ed saraman a pasen, ta amin kabat da a say ama [nen Timoteo et] taga-Gresya.” Aglabay nen Pablo a niwala so agnakaukolan a pakagapolan. Sikatoy interesado a saray Kristiano et mantultuloy dan “imatalek [so inkasikaran dili] ed konsiensia na balang too ed imaton na Dios.”​—2 Corinto 4:2; 1 Corinto 9:19-23.

Sipor lan onia so panag-isip nen Pablo tan si  Timoteo. Pibasam pa iray teksto a singa say Roma 14:15, 20, 21 tan 1 Corinto 8:9-13; 10:23-33, tan imanoen so pirmin impanpaga nen Pablo ed espiritual a pankaabigan na arum, nagkalalo la ed saraman so nayarin nigapol ed bengatla a diad tua et aliwa a lingo. Tan oniay insulat nen Pablo nipaakar ed si Timoteo: “Anggapo so took a kaparay kalakal ko, a mangisakit a peteg ed kipapasen yo. Ta sikaran amin anapen da so kayarian dan dili; ya aliwan saray bengatlan kayarian nen Jesu-Kristo. Et kabat yo a say impakasalsali la ed sikato, a, singa sakey ya ugaw a manlingkor ed ama, ontan so impiulop to ed siak a nanlingkor ed kikayat na ebanghelyo.” (Filipos 2:20-22) Agaylan abig ya ehemplo iyan duaran Kristianon lalaki parad sikatayo natan! Imbes a pilien da so pankaabigan odino panlabayan dan dili sanen anggapo so espesipikon ganggan a nanlapud Dios, sikaray angalig ed panangaro nen Jehova tan say Anak to a ninonot da no panon a saray dilin desisyon da so mangapekta ed espiritualidad na arum.

Konsideraen si Jesu-Kristo, say manunan ehemplo tayo. Diad Sermon to ed Palandey, impalinew ton maong a say sakey a makatalos ed prinsipyo na saray ganggan na Dios so mangunor ed saratan anggano saray kiwas to so agdirektan igaganggan odino isesebel. (Mateo 5:21, 22, 27, 28) Ag-inkatunongan nen Jesus, Pablo, Timoteo, tan anggan si Jose a lapud anggapo so espesipikon ganggan na Dios et nayarian lan gawaen na sakey a too so labay to. Pian makapitunosan ira ed paraan na panag-isip na Dios, sarayan lalaki so angiyaplika ed indatak nen Jesus a duaran sankabalgan ed amin a ganggan​—aroen so Dios tan aroen so kaparan too.​—Mateo 22:36-40.

Komusta Iray Kristiano Natan?

Malinew ya agtayo kaukolan a moriaen so Biblia a singa ed panmoria na sakey a too ed legal a dokumento​—ya iilaloan ton nepeg a nidatak a detalyado so amin ya obligasyon. Napaliket tayo so puso nen Jehova sano gawaen tayo so bengatlan mangipapatnag ed kanonotan to, anggaman anggapo so espesipikon ganggan a mangitotonton ed kurang tayo. Diad arum a panangibaga, imbes a kaukolan nin bagaan itayo a naynay no anto so kaliktan na Dios a gawaen tayo, nayarian tayo lan ‘talosan no anto so linawa na Katawan.’ (Roma 5:17; Roma 12:2) Akin a makapaliket iya ed si Jehova? Lapud ipapatnag na satan a mas pampapagaan tayo so pamaliket ed sikato nen saray dilin panlabayan tan kanepegan tayo. Ipapatnag met na satan ya aapresyaen tayon maong so panangaro to tan labay tayon aligen itan, a magmamaliw itan a puersan mamapakiwas ed sikatayo. (Uliran 23:15; 27:11) Niarum ni, saray kiwas a mitunosan ed impabitar na Kasulatan so makapabunigas ed espiritual tan mabetbet ed pisikal.

Imanoen tayo no panon a sayan prinsipyo so niyaplika ed personal iran pamaakaran.

Panagpili na Panagligliwaan

Konsideraen so kaso na sakey a kalangweran a laki a labay toy manaliw na sakey ya album na musika. Makapasagyat so nadngel to ed album, balet sikatoy napapagaan lapud ipapatnag na apis ed beneg a saray liriko so mangipabitar na mabanbanday ya agamil ed sekso. Tan kabat to met a maslak ed saratan a nirekord a musika so walaan na tonon masanok tan agresibo. Bilang mangaaro ed si Jehova, sayan kalangweran so interesado ed saray kanonotan tan liknaan nen Jehova ed pamaakaran. Panon ton natebek no anto so linawa na Dios nipaakar ed satan?

Diad sulat nen apostol Pablo ed saray taga-Galacia, inlista to iray gawa na laman tan saray bunga na espiritu na Dios. Maseguron amta yo no  anto so kabiangan ed saray bunga na espiritu na Dios: aro, liket, deen, kasungdoan, kauyamoan, kaabigan, sisia, tayadno, dangka. Balet antoran aktibidad so kabiangan ed saray gawa na laman? Oniay insulat nen Pablo: “Natan sankapatnagan so saray gawa na laman, a sikara ya: pikakalugoran, karutakan, kaalakan na laman. Pididios ed saray talintao, panag-anito, pambubusolan, pankokolkol, imon, sanok, pansesepakan, inkaapag-apag, saray pamipikewet ed pananisia. Saray sibletan, pampapateyan, panagbuanges, panduroypo, tan saray miulibay ed saraya; a sikara so ipasakbay ko ed sikayo: unong ya impasakbay ko la, a saray manggawa ed sarayan nengneng agda natawir so nanarian na Dios.”​—Galacia 5:19-23.

Imanoen so mismon unor a balikas diad listaan​—“saray miulibay ed saraya.” Ag-intarya nen Pablo so kompleton listaan na amin a bengatlan ipapasen a gawa na laman. Agkabaliksan na satan a nayarian lan ikatunongan na sakey a too a, ‘Siak so aabuloyan na Biblia a mibiang ed antokaman ya aktibidad ya anggapo ed listaan nen Pablo nipaakar ed saray gawa na laman.’ Imbes, kaukolan ya usaren na saray managbasa so pakayari ran manebek ta pian nabidbir da iray bengatla a nayarin anggapo ed listaan balet “miulibay ed saraya.” Saraman so agmagbabawin mangaagamil ed saray ag-asalambit balet “miulibay ed saraya” so agmakatawir ed saray bendisyon na Panarian na Dios.

Kanian, kaukolan tayon talosan, odino tebeken, no anto so agmakapaliket ed imaton nen Jehova. Kasin mairap itan? No bilang ta imbaga na doktor a mangan ka na dakel a prutas tan pising tan paliisan so pie, ice cream, tan saray miulibay ed saraya. Kasin mairap a nadetermina no dinan ed listaan a kabiangan so cake? Natan et imanoen lamet iray bunga na espiritu na Dios tan saray gawa na laman. Dinan ed listaan a kabiangan so album na musika ya asalambit ed tagey? Seguradon ag-itan miulibay ed aro, kaabigan, dangka, odino arum niran kalidad a misiglaotan ed saray bunga na espiritu na Dios. Agla kaukolan na sakey a too so direktan ganggan pian natebek a sayan klase na musika so agmitunosan ed paraan na panagnonot na Dios. Onaplika met so parehon prinsipyo diad babasaen a materyal, saray pelikula, saray programa ed telebisyon, computer games, Web sites, tan arum nira.

Say Makapaliket a Personal ya Itsura

Say Biblia so mangitatarya met na saray prinsipyo a makana ed pamaakaran na panangawes tan panag-ayos. Saraya so makapangigiya ed kada Kristiano pian napansiansia so matukoy tan makapaliket a personal ya itsura. Diad saya lamet a pamaakaran et moriaen na sakey a mangaaro ed si Jehova a saya so pankanawnawa pian gawaen so makapaliket ed mangatatawen ya Ama to, aliwan pian gawaen so antokaman a panliketan ton dili. Unong a naimano tayo la, say katuaan a si Jehova so ag-angiter na saray espesipikon totontonen diad sakey a pamaakaran et agmankabaliksan ya agto iyaansakit iray totoo to. Manduruma iray estilo ed nanduruman pasen, tan anggan diad parehon pasen et saratan so manguuman a panapanaon. Balet, say Dios so mangitatarya na manuna iran prinsipyo a nepeg a mangigiya ed saray totoo to diad amin a panaon tan inerman a pasen.

Alimbawa, oniay ibabaga na 1 Timoteo 2:9, 10: “Ontan met so saray bibii a manpales ira na masimpit, a manparakep ira na mabinta tan madangka; aleg ed saray buek a nilaga, tan balitok odino perlas odino kawes ya angkabli; noag ingen dia ed saray maabig a gawa (a sikato so matukoy ed saray bibii a labay da so mansimpit).” Kanian, nepeg a nonoten a maong na saray Kristianon bibii​—tan lalaki​—no anton nengneng na itsura so iilaloan na totoo ed lugar da nipaakar ed saramay “labay da so mansimpit [“ipapasen day laman dan dili a manisia ra’d Dios,” Maong a Balita Biblia].” Nagkalautlan matukoy a nonoten na sakey a Kristiano no antoy itsura to a mamakiwas ed arum a mannonot nipaakar ed mensahe na Biblia ya aakbibiten to. (2 Corinto 6:3) Say napanuliranan a Kristiano so aliwan alabas a mapaga ed saray dilin panlabayan to odino saray ipapasen a kanepegan to noagta, imbes, manpaga a sikatoy agpansengegan na kisuawi odino kigapolan na arum.​—Mateo 18:6; Filipos 1:10.

Sano namoria na sakey a Kristiano a makapagapol ed arum so sakey ya estilo na personal ya  itsura, naalig to si apostol Pablo diad pampaga to a nagkalalo ed espiritual a pankaabigan na arum nen saray personal a panlabayan to. Oniay inkuan nen Pablo: “Mialig kayo komon ed siak, singa siak met ed Kristo.” (1 Corinto 11:1) Tan nipaakar ed si Jesus, oniay insulat nen Pablo: “Si Kristo met agto pinaliket so inkasikaton dili.” Malinew so instruksion nen Pablo ed amin a Kristiano: “Kanian, sikatayo a mabiskeg nepeg tayo a sungdoan so kaleteyan na makapuy, tan aleg a paliketan tayo so inkasikatayo a dili. Balang sakey ed sikatayo paliketen to komon so kapara ton too ed kaabigan to ed kipaalagey.”​—Roma 15:1-3.

Paaligwasen so Pakayari Tayon Manebek

Panon tayon napaaligwas so pakayari tayon manebek pian naamtaan tayo no panon a napaliket si Jehova anggaman anggapo so inter ton espesipikon totontonen ed pamaakaran? No basaen tayo so Salita to ed inagew-agew, aralen itan a regular, tan dalepdepen so binasa tayo, onaligwas so pakayari tayon manebek. Satan ya iyaaligwas so agnagawa a tampol. Singa say pisikal ya ibabaleg na sakey ya ugaw, say iyaaligwas ed espiritual so kalkalna tan agnatebek a tampol. Kanian nakaukolan so pan-anos, tan ag-itayo nepeg a nadismaya no agtayo naimanon tampol so iyaaligwas. Diad biek a dapag, say basta ilalabas na dakel a panaon so agmamaaligwas ed pakayari tayon manebek. Satan a panaon so nepeg ya usaren a sigpot diad pangusisa ed Salitay Dios unong a nipaimano ed tagey, tan nepeg ya iyaplika tayo itan a Salita ed kabibilay tayo diad anggaan na nayarian tayo.​—Hebreos 5:14.

Nayarin nibaga a bangta saray ganggan na Dios so manusubok ed inkamatulok tayo, saray prinsipyo to so manusukat ed kinaaralem na espiritualidad tayo tan say pilalek tayon mamaliket ed sikato. Legan na iyaaligwas tayo ed espiritual, sikatayoy lalon mansagpot a mangalig ed si Jehova tan say Anak to. Manggunaet tayon ibase iray desisyon tayo ed kanonotan na Dios ed saray pamaakaran unong ya impabitar na Kasulatan. No sikatayoy mamapaliket ed mangatatawen ya Ama tayo ed amin a gagawaen tayo, sikatayon mismo so lalon manliket met.

[Saray litrato ed pahina 23]

Nandudumaan so estilo ed panangawes diad nanduruman pasen, balet saray prinsipyo na Biblia so nepeg a mangigiya ed saray desisyon tayo