Ov, Ukwet Kuswir kwa Chijil cha Bibil mu Yom Yawonsu?

PIWADING nsand, chakin kamu anch anvajey akutekinang mbil jivud. Piwading uyila mu kupam, washikena kwijik anch asalang mwamu mulong ading akimbin uwamp wey. Mulong katat wapam kal, udandamedin kusadin mbil jimwing jakulejau anvajey, ap anch udiap ku chikumbu chau.

Tatukwetu wa mwiur, Yehova, utwinkish muruz wa mbil jovikena patok kusutil Dizu diend, Bibil. Chilakej, ujidikin kwifukwil akish, yisal ya masandj, makaj ni wij. (Kubudik 20:1-17; Midimu 15:28, 29) Pituyila mu “kukul . . . mu mitapu yawonsu” mu spiritu, tukat kushiken kwijik anch Yehova wij nawamp maswir metu ni anch yijil yend yitutekidinap mimbu yikash.​—Efes 4:15; Isay 48:17, 18; 54:13.

Pakwez, kud milong yikwau yivud yakad kwikal ni mbil yovikena nawamp. Mwamu, antu amwing akat kutong anch mulong kwikil chijil cha Bibil, akutwish kwau kusal mud mukatinau. Akat kulond anch ang Nzamb wamana anch chid cha usey, ing walejana rusot rend mu mutapu wovikena patok.

Antu akata kutong mu mutapu winou yisu yivud akat kukwat mipak yakad manangu yikata kuyinenganesh mu machuku ma kurutu. Akat kukangany kuman anch Bibil kakwetap kwend ching yijil, pakwez ulejen kand yitongijok ya Nzamb. Pitudandamedina kwilej Bibil ni kushiken kwijik yitongijok ya Yehova pa milong kanang, tukat kwikal nich kom kafumbinau kud Bibil kakata kutukwash kukwat mipak yikwatijadina ni yitongijok ya Nzamb. Chisu tukata kusal mwamu, tukat kusangaresh muchim wend ni tukat kwikal ni yiyukish yidiokila ku kukwat mipak ya manangu.​—Efes 5:1.

Yilakej Yiwamp ya mu Bibil

Anch twatal jinsangu jidia mu Bibil ja atushalapol a pasak a Nzamb, tukat kuman anch asala yom kukwatijan ni yitongijok ya Yehova ap anch kwadingap chijil chovikena patok kamu. Shinshikin bil chikalej cha Josef. Pa chisu chading chilikinay yom yading yimulejinau kud mband a Potifar mulong wa kusal nend masandj, kwadingap chijil cha kufund chapepilau kud Nzamb chading chijidikina makaj. Pakwez ap anch kwadingap chijil chovikena patok, Josef wamana anch masandj chading chitil, kadiap kwau ching mulong wa kom kend amwinend, pakwez kand “kurutu kwa Nzamb.” (Disambishil 39:9) Chakin kamu, Josef wijika anch masandj makwatijadinap ni yitongijok ni rusot ra Nzamb, mud mwalejanay mu Eden.​—Disambishil 2:24.

Shinshikin kand chilakej chikwau. Mu Midimu 16:3, atulejin anch kurutu kwa kumusend Timote mulong wa kuya nend mu weny wa umishoner, Paul wamutwala ku mukand. Pakwez mu verse wa 4, tutangin anch Paul ni Timote asutina mu misumbu mulong wa kupan “yijil yatenchikau kudi atwimbuy a Yesu ni kudi amakurump mu Yerusalem.” Pakach pa yijil yiney, pading mupak ulondina anch in Kristu kayishindilap kand kuyitwal ku mukand! (Midimu 15:5, 6, 28, 29) Mulong wak Paul wamana anch chading cha usey kumutwal Timote ku mukand? “Mulong in Yuda ading ashicha mu jindond jinija ading amwij tatukwend wa Timote anch udi mwin Grek.” Paul kakatap kuyipwakesh antu akwau. Wading usadin usu anch in Kristu adandamena ‘kwiyingish [ayinau] kurutu kwa Nzamb kudi kom ka antu awonsu.’​—2 Korint 4:2; 1 Korint 9:19-23.

Winou wawiy mutapu wamanangay Paul ni Timote yom. Tang maverse mud Rom 14:15, 20, 21 ni 1 Korint 8:9-13; 10:23-33, ni man mutapu wading wiyakamishinay Paul piur pa ukash wa mu spirutu wa antu akwau, pakampwil wa antu afanyina kwipwakal mulong wa chom kanang chakad kwau kwikal chiyimp. Ni Paul wafunda piur pa Timote anch: “Kinikwetap muntu mukwau nichingejina mwin kutal ku yom ya mwom wenen mudi am amwinam. Antu awonsu akwau akat kutal ching kusu ku yom ya mwom wau ayinau, katadilap ku rusot ra Yesu Kristu bwat. En ayinen wijany kal mudi mudiay Timote muntu wa usey. Nasala nend mudimu mudi mukat kusalay mwan ni tatukwend mulong wa kwambat rusangu ruwamp.” (Filip 2:20-22) Chinech chid chilakej chiwamp nakash chatushilau kud in Kristu inay aad! Pa ndond pa kutond yom yikatinau ni yimenau ayinau anch yiwapin, ap anch mulong kwadingap chijil cha Nzamb chovikena patok, imburija rukat ra Yehova ni Mwanend kusutil kutongin mutapu mipak yau yafanyina kwikal nich usu pa mwikadil wa mu spiritu wa antu akwau.

Shinshikin chilakej chiwamp nakash cha Yesu Kristu. Mu Mafundish mend ma pa Mukandu, warumburila patok anch muntu ukutesha chitongijok cha yijil ya Nzamb ukuyiziyin nakash kusutamu mutapu uyilejenau ap kuyijidik. (Mateu 5:21, 22, 27, 28) Chikala Yesu, ap Paul, Timote ni Josef katongap anch kuburen kwa chijil chovikena patok cha Nzamb kwadingap kumwinkishina muntu mbil ya kusal yom yikatinay. Mulong wa kushakam kukwatijan ni yitongijok ya Nzamb, amakundj inay alimisha mu yishiken yawonsu yom yatazukay Yesu anch yijil yaad yijim nakash—kumukat Nzamb ni kuyikat akwetu​—Mateu 22:36-40.

Chid Nchik kud in Kristu Nlel Unou?

Chid chakin anch tufanyidinap kumukwat Bibil mud buku wa yijil—ni kuchingejin anch tukutanamu kachom kin kawonsu tufanyidina kusal. Tukat kusangaresh muchim wa Yehova anch twatond kusal yom yikwatijadina ni yitongijok yend, ap anch kwikil chijil chitulejina yom tufanyidina kusal. Kwawiy kulond anch, pa ndond pa kutulej chisu chawonsu yom yikatinay Nzamb anch tusal, tukutwish ‘kwijik risu ridia rusot ra Yehova.’ (Efes 5:17; Rom 12:2) Mulong wak chom chinech chimusangareshin Yehova? Mulong tumekeshin anch tukatin kumusangaresh ndiy kusutamu kwisangaresh ayinetu ni kusal yom tukatina. Kumekeshin kand anch tujikitishin mulong wa rukat rend chawiy tukatin kurimburij, ni rukat riner rawiy rikata kutubachik kusal yom. (Jinswir 23:15; 27:11) Chikwau kand, kusal yom kukwatijan ni Mifund kukat kukasikesh ukash uwamp wa mu spiritu ni wa ku mujimbu.

El tumanany mutapu tukutwisha kusadin mbil jiney pa milong yetu ayinetu.

Kutond Mitapu ya Kwipuwangej

Shinshikin chilakej cha nsand wading usotina kuland maband ma mizik. Antu akwau amuleja anch mizik yiney yading kamu yiwamp, pakwez wading widjidjekinaku, mulong chibur cha band winou chading chimekeshin anch mizik yilondin piur pa yom ya masandj ni yom yiyimp. Kupwa, wading wij kand anch mwin kuwang winou uwangining yom ya ujim ni ya chisum. Mulong wading umukatin Yehova, nsand winou wakata kwijik yitongijok ni yovil ya Yehova pa mulong winou. Mutapu ik ukutwisha kwijik rusot ra Nzamb pa mulong winou?

Mu mukand wend wayifundinay in Galatia, kambuy Paul wajimbula yisalijok ya wuntu ni dibuj dia spiritu wa Nzamb. Wij nawamp mikadil yidia mu dibuj dia spiritu wa Nzamb: rukat, musangar, chisambu, kushimpish muchim, kudimuk, kuwap, ritiy, kwitudish, ni kwilam. Pakwez midimu ik yidia mu yisalijok ya wuntu? Paul wafunda anch: “Chawiy yisalijok ya wuntu yimeken patok. Yom yiney yidi usund, ni kwimik dis, ni upwepu ni kwifukwil akish, ni ulaj, ni rukuny, ni matend, ni mukau, ni ujim, ni ris, ni kwaurok, ni kupompatijan, ni kukisan, ni kukwachik maruvu, ni kwipep, ni yom yikwau yiyimp mudi yiney. Nakubabeshany kal mudi nakubabeshanya pakusambish anch, muntu mwawonsu ukata kusal yom yiney kakez kuswanap Want wa Nzamb.”​—Galatia 5:19-23.

Tal mazu ma nsudiel madia ku list wa yom yijimbwilay Paul—“yom yikwau yiyimp mudi yiney.” Paul kapanap list wa chom chin chawonsu tufanyidina kuman anch chid pakach pa yisalijok ya wuntu. Chidiap mud muntu ukutwisha kwend kutong anch: ‘Mifund yikangeshinap kwamu kusal chom chin chawonsu chakad kwikal pa list wa yisalijok ya wuntu yajimbulay Paul.’ Chinyim ni chinech, in kutang afanyidin kusadin ukaliweny wau wa kutong mulong wa kujingunin yom yakad kwikal mu list winou, pakwez yidia pakach pa yom “mudi yiney.” Antu akata kusal yom “mudi yiney” yakad kujimbulau mu list winou ni akad kukarumuk, kakezap kuswan yiyukish ya mu Want wa Nzamb.

Chawiy, tufanyidin kusal usu wa kwijik ap kushinshikin yom yikumusangaresha Yehova. Ov, chikasiken kusal mwamu? Tong bil anch dokter wey wakulej kudia mabuj mavud ni yom ya yifukis nakash, pakwez wakulej kwipuk yitumbul, ma gato ni yom mud yiney. Ov, chikukukasiken kwijik yitumbul ni ma gato ma mutapu ik ufanyidina kwipuk? Katat el tumanany bil kand dibuj dia spiritu wa Nzamb ni yisalijok ya wuntu. Band wa mizik twajimbulang kwiur oku ud pa list ik? Ov, ulejen mikadil mud rukat, uwamp, kwilam ap mikadil yikwau yikwatijadina ni dibuj dia spiritu wa Nzamb? Kwikil muntu ukweta kuswir kwa chijil chovikena patok mulong wa kuman anch mizik yiney yikwatijadinap ni yitongijok ya Nzamb. Mbil yiney tukutwish kand kuyisadin piur pa yom tutangina, mafilim tutadina, ma program ma ku televizion, masengan madia pa ordinater, tupend twa web ni yom yikwau kand.

Kudjal ni Kwileng

Bibil upanin kand mbil yitadina milong ya kudjal ni ya kwileng. Mbil jinej jikat kumukwash mwin Kristu mwawonsu chakwel amekana mu mutapu uwamp ni usangareshina. Pinap kand, muntu umukatina Yehova ukat kuman anch winou ud mutapu wa, kadiap kwau ching wa kusal yom yimusangareshina ndiy, pakwez wa kusal yom yikumusangaresha Tatukwend udia mwiur. Mud mutapu twamana kal, Yehova katwinkishinap mbil jovikena patok pa milong yawonsu ni chinech chimekeshinap anch kabangidinap kwend yom tusadina. Mitapu ya kudjal ni ya kwileng yishalijadin ndond yimwing ni yikwau, ni ap mwi ndond yimwing, yikat kuswimp kukwatijan ni yirung. Pakwez, Nzamb watwinkishin kal mbil ja pa dishin jikutwisha kutukwash pa chisu chin chawonsu ni mwi ndond yin yawonsu.

Chilakej, 1 Timote 2:9, 10 ulondin anch: “Nisotil amband niyau adjala maswin mawanyidina nawamp wakad kwishimek. Kangal arijek nswich jau, ap kudjal yileng ya utad wa or, ap usang, ap maswin makweta usey ukash. Pakwez irijek nich yisalijok yiwamp, mudi muchifanyidina kudi amband akata kwijimbul anch, amwitiyijina Nzamb.” Chawiy, amband ni amakundj in Kristu—afanyidin kushinshikin nawamp mutapu wau wa kudjal ni kwileng umenau antu adia kwi ndond yishichau anch kuyiwanyidin antu “amwitiyijina Nzamb.” Chid cha usey kud mwin Kristu kutong piur pa mutapu ukutwisha kwileng ni kudjal kwend kuyibachik antu akwau kutong piur pa uruu wa Bibil ulejenay. (2 Korint 6:3) Mwin Kristu ukweta chilakej chiwamp kakushinshikinap kwend nakash ching pa yom yikatinay ndiy ap yimenay anch yiwapin, pakwez ukushinshikin chakwel ipuka kwikal musul wa kampuw ap kuyipwakesh antu akwau.​—Mateu 18:6; Filip 1:10.

Anch mwin Kristu wajingunin anch mutapu wend wa kudajl ni wa kwileng ukat kuyiletin antu akwau kampuw ap kuyipwakesh, ukutwish kumwimburij kambuy Paul kusutil kutek ukash wa mu spiritu wa antu akwau pa ndond ya kusambish kusutamu yom yikatinay ndiy. Paul walonda anch: “Ngilakejany am mudi niyam munikata kumwilakej Kristu.” (1 Korint 11:1) Ni Paul wafunda piur pa Yesu anch: “Kristu kisangarishap amwinend.” Mbil ja Paul jiyitadina in Kristu awonsu jovaken patok: “Chifanyidin etu tukasikena mu ritiy tuyikwash aziyila mu ritiy kusend yisend yau. Kangal twisangarish ching kusu ayinetu, bwat. Pakwez etu awonsu tufanyidin muntu ni muntu kumusangarish mwanamwakwend mwin Kristu mu yom yiwamp, mulong wa kumukasikesh kukul mu ritiy.”​—Rom 15:1-3.

Mutapu wa Kuwapish Ukaliweny Wetu wa Kutong

Mutapu ik tukutwisha kukudish ukaliweny wetu wa kutong mulong wa kwijik mutapu wa kumusangaresh Yehova, ap anch katwinkishinap chijil chilejena patok yom tufanyidina kusal pa mulong kanang? Anch twatang Dizu diend dichuku diawonsu, twadilej pakad kujing, twatongijokin pa yom tutangina, tukukudish ukaliweny wetu wa kutong. Kukul kwinoku kukatap kwez kapamp kamwing. Mud mukatay mwan kupam, kukul kwa mu spiritu niyau kukat kwezang pakemp pakemp, kadiap kapamp kamwing. Chawiy chitin kushimpish muchim, ni tufanyidinap kuziy anch twaman anch kukul kwinoku kwezinap mau mau. Ku mutambu ukwau, chisu achinach chikutwishap kwau kuwapish ap kukudish ukaliweny wetu wa kutong. Mud mulejenau kwiur oku, tufanyidin kusutish chisu chinech mu kushinshikin chisu chawonsu pa Dizu dia Nzamb, ni tufanyidin kusadin yom yiney mu mwom wetu.​—Hebereu 5:14.

Tukutwish kulond anch ang yijil ya Nzamb yikat kupak kuziyin kwetu, mbil jend jikat kupak mwikadil wetu wa mu spiritu ni maswir metu ma kumusangaresh Nzamb. Pitudandamedina kukul mu spiritu, tukusambish kukimb nakash kumwimburij Yehova ni Mwanend. Tukusanger kamu nakash kukwat mipak yikwatijadina ni yitongijok ya Nzamb yilejenau mu Mifund. Pitusadina usu wa kumusangaresh Tatukwetu wa mwiur mu yom yin yawonsu tusadina, tukuman anch musangar wetu ukuvul nakash.

 [Chipich chidia pa paj]

Mitapu ya kudjal yishalijadin mwi ndond yimwing ni yikwau, pakwez mbil ja Bibil jawiy jifanyidina kutakel mipak yetu.