“Kagurangnan, Tokdoi Kami Kun Paano Mamibi”

“An saro sa saiyang mga disipulo nagsabi sa saiya: ‘Kagurangnan, tokdoi kami kun paano mamibi.’”​—LUCAS 11:1.

1. Taano an saro kan mga disipulo ni Jesus ta nakiolay ki Jesus na tokdoan sinda kun paano mamibi?

SARONG beses kaidtong 32 C.E., an sarong disipulo ni Jesus inobserbaran Sia na namimibi. Dai nia nadadangog kun ano an sinasabi ni Jesus sa saiyang Ama, ta posibleng silensiong pamibi idto. Minsan siring, kan matapos si Jesus, an disipulo nagsabi sa saiya: “Kagurangnan, tokdoi kami kun paano mamibi.” (Lucas 11:1) Ano an dahelan kan pakiolay na ini? An pamibi sarong regular na kabtang kan buhay asin pagsamba nin mga Judio. An Hebreong Kasuratan igwa nin dakol na pamibi sa libro nin Salmo asin sa iba pang kabtang. Kaya dai hinahagad kan disipulo na tokdoan sia nin sarong bagay na dai nia aram o dai pa nia noarin man ginibo. Daing duwa-duwa na pamilyar sia sa pormalistikong mga pamibi kan mga namomoon sa relihion nin Judaismo. Alagad ngonyan naobserbaran nia si Jesus na namimibi, asin posibleng marhay na narisa nia na igwa nin dakulang kalaenan an sagin banal na mga pamibi kan mga rabi asin an paagi nin pagpamibi ni Jesus.​—Mateo 6:5-8.

2. (a) Ano an nagpaparisa na dai boot sabihon ni Jesus na otrohon niato nin termino por termino an modelong pamibi? (b) Taano ta interesado kitang maaraman kun paano mamibi?

² Mga 18 bulan bago kaini, sa saiyang Sermon sa Bukid, tinawan ni Jesus an saiyang mga disipulo nin sarong modelo na pagbabasaran kan mga pamibi ninda. (Mateo 6:9-13) Posible na an partikular na disipulong ini mayo kan panahon na idto, kaya may kabootan na inotro ni Jesus an mahalagang marhay na mga punto kan modelong pamibi na iyan. Risang-risa an bagay na dai nia iyan inotro nin termino por termino, na nagpaparisa na dai sia nagtatao nin pamibi sa liturhiya tanganing tuomon. (Lucas 11:1-4) Arog kan dai nginaranan na disipulong iyan, boot man niatong matokdoan kun paano mamibi tanganing an satong mga pamibi orog na irani kita ki Jehova. Kun siring, siyasaton niato an mas kompletong bersion kan modelong pamibi, na isinurat ni apostol Mateo. Igwa iyan nin pitong kahagadan, na an tolo may koneksion sa mga katuyohan nin Dios asin an apat may koneksion sa satong materyal asin espirituwal na mga pangangaipo. Sa artikulong ini, totokaron niato an enot na tolong kahagadan.

Sarong Mamomoton na Ama

3, 4. Ano an ipinapakahulogan kan pag-apod niato ki Jehova na “Ama niamo”?

³ Sa kapinonan, ipinaheling ni Jesus na an satong mga pamibi maninigo na magpabanaag nin dayupot pero may paggalang na relasyon ki Jehova. Nagtataram sa pangenot para sa kapakinabangan kan saiyang mga disipulo na nagtiripon harani sa saiya sa gilid kan bukid na idto, sinabi sa sainda ni Jesus na apodon si Jehova na “Ama niamo na nasa langit.” (Mateo 6:9) Segun sa sarong nag-espesyalisar, baga man si Jesus nagtaram sa sarong popular na porma nin Hebreo o sa Aramaiko, an terminong ginamit nia para sa “Ama” kapareho kan dayupot na ekspresyon nin sarong omboy, ‘tataramon nin sarong aki.’ An pag-apod ki Jehova na “Ama niamo” nangangahulogan nin mamomoton asin may pagtitiwalang relasyon.

 ⁴ Sa pagsabing “Ama niamo,” minimidbid man niato na kita kabtang nin sarong dakulang pamilya nin mga lalaki asin babae na rinerekonoser si Jehova bilang Paratao nin Buhay. (Isaias 64:8; Gibo 17:​24, 28) An mga Kristianong pinaniaki sa espiritu inaampon bilang “mga aki nin Dios,” asin sa saiya puede sindang ‘kumurahaw: “Abba, Ama!”’ (Roma 8:​14, 15) Minilyon an nagin maimbod na kairiba ninda. Idinusay kan mga ini an saindang buhay ki Jehova asin sinimbolisaran an saindang pagdusay paagi sa bautismo sa tubig. An gabos na “ibang karnero” na ini puede man na dumolok ki Jehova sa ngaran ni Jesus asin apodon Sia na “Ama niamo.” (Juan 10:16; 14:6) Puede kitang dayaday na dumolok sa satuyang langitnon na Ama paagi sa pamibi tanganing omawon sia, pasalamatan sia sa gabos niang kapahayagan nin karahayan sa sato, asin itao sa saiya an mga pagabat sa sato, na nagsasarig na sia may pagmakolog sa sato.​—Filipos 4:​6, 7; 1 Pedro 5:​6, 7.

Pagkamoot sa Ngaran ni Jehova

5. Ano an enot na kahagadan sa modelong pamibi, asin taano ta angay ini?

⁵ Maheheling tolos sa enot na kahagadan an dapat na enoton. Iyan nagsasabi: “Santipikaron logod an saimong ngaran.” (Mateo 6:9) Iyo, an pagsantipikar sa ngaran ni Jehova maninigo na magin pangenot sa sato huli ta namomotan niato sia asin naoongis kita na maheling an gabos na katuyawan na ginibo sa saiyang ngaran. An pagrebelde ni Satanas asin an pagsutsut nia sa enot na tawong mag-agom na makisuway ki Jehova Dios nagin pagbalobagi sa Saiyang ngaran paagi sa pagkuestion sa paagi nin pagkapot nin Dios kan saiyang unibersal na soberaniya. (Genesis 3:1-6) Dugang pa, sa nag-aging mga siglo, nagdara nin katuyawan sa ngaran ni Jehova an makasusupog na mga gibo asin katokdoan kan mga naghihingakong nagrerepresentar sa saiya.

6. Ano an dai niato gigibohon kun namimibi kita na santipikaron logod an ngaran ni Jehova?

⁶ An pamibi niato na santipikaron logod an ngaran ni Jehova nagpapaheling kun ano an paninindogan niato sa isyu kan unibersal na soberaniya​—lubos niatong sinusuportaran an deretso ni Jehova na mamahala sa bilog na uniberso. Boot ni Jehova na an uniberso pag-erokan nin intelihenteng mga linalang na gikan sa boot asin magayagayang nagpapasakop sa saiyang matanos na soberaniya huli ta namomotan ninda sia asin namomotan an gabos na irinerepresentar kan saiyang ngaran. (1 Cronica 29:10-13; Salmo 8:1; 148:13) An pagkamoot niato sa ngaran ni Jehova matabang sa sato na likayan an paggibo nin ano man na puedeng magdara nin katuyawan sa banal na ngaran na iyan. (Ezequiel 36:​20, 21; Roma 2:21-24) Huling an katoninongan kan uniberso asin kan mga nag-eerok dian nakadepende sa pagsantipikar kan ngaran ni Jehova asin sa mamomoton na pagpasakop sa saiyang soberaniya, an pamibi niato na “santipikaron logod an saimong ngaran” sarong kapahayagan kan satong pagsarig na an katuyohan ni Jehova maootob sa ikamumuraway nia.​—Ezequiel 38:23.

An Kahadean na Ipinamimibi Niato

7, 8. (a) Ano an Kahadean na itinokdo sa sato ni Jesus na ipamibi? (b) Ano an manonodan niato manongod sa Kahadean na ini sa libro nin Daniel asin Kapahayagan?

⁷ An ikaduwang kahagadan sa modelong  pamibi iyo ini: “Dumatong logod an kahadean mo.” (Mateo 6:10) An kahagadan na ini konektadong marhay sa naenot. An instrumento ni Jehova para sa pagsantipikar kan saiyang banal na ngaran iyo an Mesiyanikong Kahadean, an saiyang langitnon na gobyerno, na an saiyang Aki, si Jesu-Cristo, an lehitimong ninombrahan na Hade. (Salmo 2:1-9) Ilinaladawan kan hula ni Daniel an Mesiyanikong Kahadean bilang “sarong gapo” na tinipak hale sa sarong “bukid.” (Daniel 2:​34, 35, 44, 45) An bukid nagrerepresentar sa unibersal na soberaniya ni Jehova, kaya an Kahadean na irinerepresentar kan gapo sarong bagong kapahayagan kan unibersal na pamamahala ni Jehova. Sa hula, an gapo ‘magigin man dakulang bukid asin makakapano sa bilog na daga,’ na nagpaparisa na an Mesiyanikong Kahadean marepresentar sa soberaniya nin Dios sa pamamahala sa daga.

⁸ Kaiba ni Cristo sa gobyernong Kahadean na ini an 144,000 na iba pa, na “binakal hale sa katawohan” tanganing mamahala kaiba nia bilang mga hade asin saserdote. (Kapahayagan 5:​9, 10; 14:1-4; 20:6) An mga ini inaapod ni Daniel na “an mga banal kan Supremo,” na, kaiba ni Cristo bilang saindang Payo, maako kan ‘kahadean asin kan pamamahala patin kan kadakulaan kan mga kahadean sa sirong kan bilog na kalangitan. An saindang kahadean sarong kahadean na daing talaan an pagdadanay, asin an gabos na pamamahala maglilingkod asin magkukuyog sa sainda.’ (Daniel 7:​13, 14, 18, 27) Siring kaiyan an langitnon na gobyerno na itinokdo ni Cristo sa mga parasunod nia na ipamibi.

Taano ta Mamimibi Pa Man Giraray na Dumatong Logod an Kahadean?

9. Taano ta angay na kita mamibi na dumatong logod an Kahadean nin Dios?

⁹ Sa saiyang modelong pamibi, tinokdoan kita ni Cristo na mamibi para sa pagdatong kan Kahadean nin Dios. An kaotoban kan hula sa Biblia nagpaparisa na an Mesiyanikong Kahadean naestablisar na sa langit kan 1914. * Kun siring, angay pa man daw giraray na kita mamibi na “dumatong” logod an Kahadean na iyan? Iyo nanggad. Ta sa hula ni Daniel, an Mesiyanikong Kahadean, na isinisimbolisar nin sarong gapo, nasa direksion na makakabangga an politikal na mga gobyerno nin tawo, na isinisimbolisar nin sarong dakulaon na imahen. An gapo sa ngapit pa matama sa imahen na iyan, na roronoton iyan. An hula ni Daniel nagsasabi: “An kahadean mismo dai itatao sa arin man na ibang banwaan. Iyan an maronot asin matapos kan gabos na ining kahadean, asin iyan mismo magdadanay sagkod sa mga panahon na daing talaan.”​—Daniel 2:44.

10. Taano ta hinihimuyawot niato an pagdatong kan Kahadean nin Dios?

¹⁰ Hinihimuyawot niatong maheling an pagdatong kan Kahadean nin Dios tumang sa maraot na sistema nin mga bagay ni Satanas huli ta mangangahulogan ini kan pagkasantipikar kan banal na ngaran ni Jehova asin pagkahale kan gabos na nagtutumang sa soberaniya nin Dios. Odok niatong ipinamimibi: “Dumatong logod an kahadean mo,” asin kapareho ni apostol Juan, nagsasabi kita: “Amen! Madia, Kagurangnan na Jesus.” (Kapahayagan 22:20) Iyo, dumatong logod si Jesus tanganing santipikaron an ngaran ni Jehova asin ibindikar an Saiyang soberaniya, tanganing maotob an mga tataramon kan salmista: “Tanganing an mga tawo makaaram na ika, na an ngaran Jehova, ika sana an Kaharohalangkawe sa bilog na daga.”​—Salmo 83:18.

 “Gibohon Logod an Boot Mo”

11, 12. (a) Ano an hinahagad niato kun kita namimibi na “gibohon logod [an boot nin Dios], kun paano sa langit, siring man sa daga”? (b) Ano pa an kahulogan kan satong pamibi na mangyari logod an boot ni Jehova?

¹¹ Sunod tinokdoan ni Jesus an saiyang mga disipulo na mamibi: “Gibohon logod an boot mo, kun paano sa langit, siring man sa daga.” (Mateo 6:10) An uniberso nag-eksister dahel sa kabotan ni Jehova. An makapangyarihan na mga linalang sa langit nagkukurahaw: “Maninigo ka, Jehova, na samong Dios, na mag-ako kan kamurawayan asin kan onra patin kan kapangyarihan, huli ta linalang mo an gabos na bagay, asin huli sa saimong kabotan an mga iyan naglataw asin nalalang.” (Kapahayagan 4:11) May katuyohan si Jehova para sa ‘mga bagay sa kalangitan asin mga bagay sa daga.’ (Efeso 1:8-10) Paagi sa pagpamibi na gibohon logod an boot nin Dios, an totoo hinahagad niato ki Jehova na gibohon an saiyang katuyohan. Dugang pa, sa siring na paagi ipinaheheling niato na hinihimuyawot niatong maheling na mangyari an boot nin Dios sa bilog na uniberso.

¹² Paagi sa pamibi na ini ipinahahayag man niato an satong pagigin andam na ioyon an satong buhay sa kabotan ni Jehova. Si Jesus nagsabi: “An sakong kakanon iyo an sakong paggibo kan kabotan nia na nagsugo sa sako asin pagtapos kan saiyang gibohon.” (Juan 4:34) Arog ki Jesus, bilang nagdusay na mga Kristiano, naoogma kitang marhay na gibohon an kabotan nin Dios. An pagkamoot niato ki Jehova asin sa saiyang Aki nagpapahiro sa sato na mamuhay “bako nang huli sa mga mawot nin tawo, kundi huli sa kabotan nin Dios.” (1 Pedro 4:​1, 2; 2 Corinto 5:​14, 15) Pinagmamaigotan niatong likayan an paggibo nin mga bagay na aram niatong kontra sa kabotan ni Jehova. (1 Tesalonica 4:3-5) Paagi sa pagtubos nin panahon para sa pagbasa asin pag-adal sa Biblia, ‘padagos niatong sinasabot kun ano an kabotan ni Jehova,’ na kabale an aktibong pakikikabtang niato sa paghuhulit kan “maogmang baretang ini kan kahadean.”​—Efeso 5:15-17; Mateo 24:14.

An Kabotan ni Jehova sa Langit

13. Paanong ginigibo na kaidto an kabotan nin Dios haloy pa bago nangyari an pagrebelde ni Satanas?

¹³ An kabotan ni Jehova ginigibo na kaidto sa kalangitan haloy pa bago an saro sa saiyang mga aking espiritu nagrebelde asin nagin Satanas. Ilinaladawan kan libro nin Talinhaga an panganay na Aki nin Dios bilang personipikadong kadonongan. Ipinaheheling kaiyan na sa laog nin dai masokol na lawig nin panahon, an bugtong na Aki nin Dios “maogma sa atubangan nia sa gabos na panahon,” na naoogmang gibohon an kabotan kan saiyang Ama. Pag-abot nin panahon, sia an nagin “pangenot na trabahador” ni Jehova sa paglalang kan gabos na bagay “sa kalangitan asin sa daga, an mga bagay na naheheling asin an mga bagay na dai naheheling.” (Talinhaga 8:22-31; Colosas 1:15-17) Ginamit ni Jehova si Jesus bilang saiyang Tataramon, o Representante sa pagtaram.​—Juan 1:1-3.

14. Ano an manonodan niato sa Salmo 103 manongod sa kun paano ginigibo kan mga anghel an kabotan ni Jehova sa kalangitan?

¹⁴ Ipinaheheling kan salmista na an soberaniya ni Jehova nakalalabi sa gabos asin na an mga hukbo nin mga anghel naghihinanyog sa saiyang mga itinotokdo asin sa saiyang mga ipinagboboot. Mababasa niato: “Si Jehova mismo nagparigon kan saiyang trono sa mismong kalangitan; asin an saiyang sadiring pagkahade nagsakop sa gabos na bagay. Omawa nindo si Jehova, O kamong mga anghel nia, makakamhan sa kapangyarihan, na nag-ootob kan saiyang tataramon, paagi sa paghinanyog sa tingog kan saiyang tataramon. Omawa nindo si Jehova, kamo gabos na hukbo nia, kamo gabos na ministro nia, na naggigibo kan saiyang kabotan. Omawa nindo si Jehova, kamo gabos na saiyang ginibo, sa gabos na lugar kan saiyang sakop [o, “soberaniya,” nota sa ibaba].”​—Salmo 103:19-22.

15. Paanong an pag-ako ni Jesus nin kapangyarihan sa Kahadean nakaapektar sa paggibo kan kabotan nin Dios sa langit?

¹⁵ Pagkatapos kan saiyang pagrebelde, si Satanas nakakasakat pa man giraray kaidto sa langit, siring kan ipinaheheling sa libro nin Job. (Job 1:6-12; 2:1-7) Minsan siring, an libro nin Kapahayagan naghula na maabot an panahon na si Satanas asin an saiyang mga demonyo pahahaleon sa langit. An panahon na iyan minalataw na nagdatong dai nahaloy pagkatapos na akoon ni Jesu-Cristo an kapangyarihan sa Kahadean kan 1914. Poon kaidto,  mayo na nin lugar sa langit an mga rebeldeng idto. Linaom sinda sa palibot kan daga. (Kapahayagan 12:7-12) Mayo nang tingog nin pakikidiskutir na madadangog sa langit, solamente mga tingog na pinagsararo sa pag-omaw sa “Kordero,” si Cristo Jesus, asin sa mapagpasakop na pag-omaw ki Jehova. (Kapahayagan 4:9-11) An kabotan ni Jehova tunay nanggad na ginigibo na sa langit.

An Kabotan ni Jehova Para sa Daga

16. Paano pinahihimutikan kan modelong pamibi an katokdoan kan Kakristianohan may labot sa paglaom kan katawohan?

¹⁶ An mga iglesia nin Kakristianohan ipinupuera an daga sa mga katuyohan nin Dios, na naghihingako na an gabos na marahay na tawo mapalangit. Alagad tinokdoan kita ni Jesus na mamibi: “Dumatong logod an kahadean mo. Gibohon logod an boot mo, kun paano sa langit, siring man sa daga.” (Mateo 6:10) Masasabi daw talaga na sa pankagabsan an kabotan ni Jehova ginigibo na ngonyan digdi sa daga na dinadamat nin kadahasan, inhustisya, helang, asin kagadanan? Dai nanggad! Kun siring, maninigo na odok niatong ipamibi na gibohon logod an boot nin Dios sa daga, kaoyon kan panuga na isinurat ni apostol Pedro: “Igwa nin bagong kalangitan [an gobyerno kan Mesiyanikong Kahadean ni Cristo] asin sarong bagong daga [sarong matanos na sosyedad nin tawo] na satong hinahalat segun sa saiyang panuga, asin sa mga ini magdadanay an katanosan.”​—2 Pedro 3:13.

17. Ano an katuyohan ni Jehova para sa daga?

¹⁷ May katuyohan si Jehova sa paglalang kan daga. Pinasabngan nia si propeta Isaias na sumurat: “Ini an isinabi ni Jehova, an Kaglalang kan kalangitan, Sia na totoong Dios, an Naghaman kan daga asin an Naggibo kaiyan, Sia an Saro na masarig na nagbugtak kaiyan, na dai iyan linalang na dai nin kapakanan, na naghaman kaiyan tanganing pag-istaran: ‘Ako si Jehova, asin mayo na nin iba.’” (Isaias 45:18) Ibinugtak nin Dios an enot na tawong mag-agom sa sarong paraisong hardin asin pinagbotan sinda: “Pangagbunga asin pangagdakol kamo asin panoa nindo an daga patin sakopa nindo iyan.” (Genesis 1:​27, 28; 2:15) Malinaw nanggad, katuyohan kan Kaglalang na an daga pag-erokan nin sangkap na rasa nin matanos na mga tawo na maogmang nagpapasakop sa soberaniya ni Jehova asin nabubuhay sagkod lamang sa Paraisong ipinanuga ni Cristo.​—Salmo 37:​11, 29; Lucas 23:43.

18, 19. (a) Ano an dapat na gibohon bago lubos na gibohon an boot nin Dios sa daga? (b) Ano pang ibang aspekto kan modelong pamibi ni Jesus an sisiyasaton sa minasunod na artikulo?

¹⁸ An kabotan ni Jehova mapadapit sa daga dai noarin man lubos na maootob mantang an daga ineerokan nin mga lalaki asin babae na dai nag-iintindi sa saiyang soberaniya. Ginagamit an makakamhan na espiritung mga hukbo, na pangengenotan ni Cristo, ‘lalaglagon nin Dios an mga naglalaglag kan daga.’ Paparaon sagkod lamang an enterong maraot na sistema nin mga bagay ni Satanas, kaiba an falsong relihion kaiyan, an maraot na politika, mahanab asin madayang komersio, asin mapanlaglag na militar. (Kapahayagan 11:18; 18:21; 19:​1, 2, 11-18) Mabibindikar an soberaniya ni Jehova asin masasantipikar an saiyang ngaran. An gabos na ini an ipinamimibi niato kun sinasabi niato na: “Ama niamo na nasa langit, santipikaron logod an saimong ngaran. Dumatong logod an kahadean mo. Gibohon logod an boot mo, kun paano sa langit, siring man sa daga.”​—Mateo 6:​9, 10.

¹⁹ Minsan siring, sa saiyang modelong pamibi, ipinaheling ni Jesus na puede kitang mamibi manongod man sa personal na mga bagay. Sisiyasaton sa minasunod na artikulo an mga aspektong ini kan saiyang instruksion dapit sa pamibi.

[Nota sa Ibaba]

Bilang Repaso

• Taano ta angay na apodon niato si Jehova na “Ama niamo”?

• Taano ta may pangenot na importansia sa sato an mamibi na santipikaron logod an ngaran ni Jehova?

• Taano ta ipinamimibi niato na dumatong logod an Kahadean nin Dios?

• Ano an ipinapakahulogan kun kita namimibi na gibohon logod an boot nin Dios sa daga kun paano sa langit?

[Mga Hapot Para sa Pag-adal]

[Ritrato sa pahina 9]

An mga pamibi ni Jesus dakula an kalaenan sa sagin banal na mga pamibi kan mga Fariseo

[Ritrato sa pahina 10]

An mga Kristiano namimibi na dumatong logod an Kahadean nin Dios, santipikaron logod an saiyang ngaran, asin gibohon logod an boot nia