“E te Atu, e Apii Mai ia Matou nei i te Pure”

“Kua tuatua maira kiaia tetai pipi nana, E te Atu, e apii mai ia matou nei i te pure.”​—LUKA 11:1.

1. Eaa ra tetai au pipi a Iesu i pati ei kia Iesu e kia apii mai ia ratou e ka akapeea me pure?

I ROTO i tetai atianga i te 32 T.N., kua akara atu tetai pipi a Iesu Iaia e pure ra. Kare aia e rongo ana e eaa ta Iesu e tuatua ra ki tona Metua, no te mea penei paa e pure muteki ua. Noatu rai, te oti ua anga a Iesu i te pure, kua karanga atura te pipi kiaia e: “E te Atu, e apii mai ia matou nei i te pure.” (Luka 11:1) Na teaa i akakeu i teia patianga? E tuanga rave putuputuia te pure i roto i te oraanga e te akamori anga a te ngati Iuda. Te vaira i roto i te au Tuatua Tapu Epera te au pure e manganui i roto i te puka o Salamo e i roto i tetai ua atu ngai. No reira kare te pipi e pati maira kia apiiia mai tetai apinga kare aia i kite ana no runga me kore kare roa aia i rave ana. Kare ekoko anga e, kua matau aia i te au pure e akono uaia ana e te au arataki akonoanga o te Akonoanga ngati Iuda. Inara i teianei kua akara atura aia ia Iesu i te pure anga, e penei te manako ra aia e e tuke tikai te au pure akatutu ua a te au rapi i te tu o ta Iesu e pure ra.​—Mataio 6:5-8.

2. (a) Eaa te akaariia maira e kare a Iesu i karanga ana e kia tuatua taokioki ua tatou i te pure akaraanga? (e) Eaa tatou i inangaro ei kia kite e ka akapeea me pure?

² I etai 18 marama i mua atu, i roto i tana Tuatua i te Maunga, kua oronga a Iesu ki tana au pipi i tetai akaraanga ka rauka i te akatumu i ta ratou au pure. (Mataio 6:9-13) Penei paa e kare teia pipi nei i piri atu ana i taua tuatau ra, no reira kua ripiti ma te aroa a Iesu i te au tumu manako puapinga maata o taua pure akaraanga ra. Tei kitea meitakiia koia oki te tika e kare aia i ripiti i te reira ma taua tuatua rai, i te akaari anga e kare aia e oronga ra i tetai pure ei peu kia tuatua taokioki ua. (Luka 11:1-4) Mei taua pipi kare i akakiteia mai te ingoa ra, ka inangaro katoa tatou kia apiiia e akapeea me pure kia rauka oki i ta tatou au pure i te akavaitata atu ia tatou kia Iehova. E teianei ka akara matatio ana tatou i te katoa anga o te tuatua no te pure akaraanga ra, tei tataia e te apotetoro ko Mataio. Te vaira e itu patianga i roto i reira, e toru no runga i te au akakoroanga o te Atua e e a no runga i to tatou au anoano pae kopapa e te pae vaerua. I roto i teia atikara, ka akamanako ana tatou i nga patianga mua e toru.

Tetai Metua Aroa

3, 4. Eaa te aiteanga me tuatua tatou kia Iehova e “to matou Metua” ra?

³ Mei te akamataanga mai, kua akaari mai a Iesu e kia akaata ta tatou au pure i tetai pirianga vaitata ma te ngateitei kia Iehova. I te tuatua maata anga no te puapinga o tana au pipi tei akaputu vaitata mai kiaia ra i runga i tetai tua o taua maunga ra, kua akakite atu a Iesu kia ratou kia tuatua kia Iehova e “to matou Metua i te ao ra.” (Mataio 6:9) Kia tau ki tetai tangata apiipii, me te tuatua ra a Iesu na roto i tetai tu rongonui o te Epera me kore i roto i te reo Arama, te tuatua tana e taangaanga ra no te “Metua” e pirianga ki te au tuatua pirianga no tetai pepe, ‘e tuatua na te tamaiti.’ I te tuatua anga kia Iehova e “to matou Metua” te akakite ra i tetai pirianga maana e te irinaki anga.

 ⁴ Na te karanga anga e “to matou Metua,” te akakite katoa ra tatou e e tuanga tatou no tetai pamiri maatamaata o te au tane e te au vaine tei kite ia Iehova ko tei Oronga Ora ra. (Isaia 64:8; Angaanga 17:24, 28) Kua akatamarikiia te au Kerititiano tei anauia i te vaerua ei ‘tamariki na te Atua,’ e nona ra e ‘karangaʼi oki ratou e, e Aba, e taku Metua.’ (Roma 8:14, 15) E mirioni ua atu tei riro mai ei au oa tiratiratu no ratou. Kua akatapu teia aronga nei i to ratou oraanga kia Iehova e kua akatutu i ta ratou akatapuanga na te papetito anga ki te vai. Pouroa teia “mamoe ke atu” ka rauka katoa i te pure atu kia Iehova na roto i te ingoa o Iesu e te kapiki anga Iaia e ko “to matou Metua.” (Ioane 10:16; 14:6) Ka rauka ia tatou i te aere putuputu atu ki to tatou Metua i te rangi ra na roto i te pure i te akapaapaa iaia, kia akameitaki iaia no tana akakite mai anga no te tu meitaki kia tatou, e kia tuku atu i ta tatou au apainga kiaia ra, ma te papu e e te manako maira aia ia tatou.​—Philipi 4:6, 7; 1 Petero 5:6, 7.

Aroa no to Iehova Ingoa

5. Eaa te patianga akamata anga no te pure akaraanga, e eaa ra teia i tau ei?

⁵ Te tuku viviki ra te patianga akamata anga i te au mea mua na mua. Te karanga te reira e: “Kia tapu toou ingoa.” (Mataio 6:9) Ae, te akatapuanga i te ingoa o Iehova ko te manako maataia na tatou no to tatou aroa iaia e te makitakita anga i te kite pouroa anga i te akakino anga tei tukunaia mai ki runga i tona ra ingoa. I to Satani meameaau anga e te akakeu anga aia i nga tokorua mua kia akarongo kore ki te Atua ra ko Iehova i te akakino anga i Tona ingoa ra na te akakite anga i te manako ekoko i te mataara e akono ra te Atua i tona tu ngateitei e pini ua ake. (Genese 3:1-6) Pera katoa, i roto i te au anere mataiti, kua akakinoia te ingoa o Iehova na te au ravenga akama e te au apii anga a te aronga tei karanga ra e te akamori ra iaia.

6. Eaa ta tatou kare e rave me pure tatou kia akatapuia to Iehova ingoa?

⁶ Ta tatou pure no te akatapuanga i to Iehova ingoa te akaari maira te tu nei tatou no te maro anga o te tu ngateitei e pini ua ake​—te turu tikai ra i to Iehova tika anga kia akatere i te ao e pini ua ake. Te inangaro ra a Iehova i te ao e pini ua ake kia nooia e te au mea ora kite tei kauraro puareinga ua e te rekareka ki tona tu ngateitei tuatua tika ra no to ratou aroa iaia e te aroa katoatoa ra i ta tona ingoa e akatutu maira. (1 Paraleipomeno 29:10-13; Salamo 8:1; 148:13) To tatou aroa no to Iehova ingoa ra e tauturu mai ei ia tatou kia kopae ke mei te rave anga i te au mea te ka apai mai i te akakino anga ki runga i taua ingoa tapu ra. (Ezekiela 36:20, 21; Roma 2:21-24) I te mea e te vaira te au o te ao e pini ua ake e o tona iti tangata ra ki runga i te akatapuanga i to Iehova ra ingoa e te kauraro aroa anga ki tona tu ngateitei, ta tatou pure “kia tapu toou ingoa” e akakite anga ia i to tatou irinaki anga i ta Iehova akakoroanga e ka akatupuia ki tona akapaapaa anga.​—Ezekiela 38:23.

Te Patireia ta Tatou ka Pure

7, 8. (a) Eaa te Patireia ta Iesu i apii mai ana kia tatou kia pure ra? (e) Eaa ta tatou i kite no runga i teia Patireia i roto i nga puka a Daniela e Apokalupo?

⁷ Te rua o te pati anga i roto i te pure akaraanga koia oki: “Kia tae toou basileia.” (Mataio  6:10) Te piri vaitata ra teia patianga ki to mua ake nei. Ta Iehova ravenga angaanga no te akatapuanga i tona ingoa tapu ra koia oki te Patireia o te Mesia, tona kavamani i te rangi ra, koi iki tauia ai tana Tamaiti, ko Iesu Karaiti, ei Ariki. (Salamo 2:1-9) Te akataka maira te totou a Daniela i te Patireia o te Mesia e ko “tetai toka” tei kokotiia mei roto mai i tetai “maunga.” (Daniela 2:34, 35, 44, 45) Te akatutu maira te maunga i to Iehova tu ngateitei i te ao e pini ua ake, no reira e tuatua ou te toka Patireia o to Iehova taoonga tutara i te ao e pini ua ake. I roto i te totou, ko te toka, i reira, kua ‘riro atura ei maunga maata, e kapi roa akera te ao katoa nei,’ i te akakite mai anga e te akatutu maira te Patireia o te Mesia i te tu ngateitei tu-Atua i te tutara anga i te enua nei.

⁸ Taokotai atu ma Karaiti i roto i teia kavamani o te Patireia nei ko tetai o te 144,000, ‘okoia ïa no roto i te tangata nei’ kia tutara ma ia ei ui ariki e te kau taunga. (Apokalupo 5:9, 10; 14:1-4; 20:6) Kua taiku a Daniela ki teia aronga nei ko “te aronga tapu ra no Tei Teitei ra,” tei, kapiti ra ma Karaiti to ratou Upoko, te ka rave mai “te basileia e te mana, e te maata katoa o te basileia i raro ake i te rangi katoa nei . . . tona basileia e basileia mutu kore ïa, e ope oki te au tutara katoa i te tavini mai e te akarongo iaia.” (Daniela 7:13, 14, 18, 27) E akataka anga tau teia no te kavamani i te rangi ra ko ta Karaiti i apii ana i tana au pipi kia pure.

Eaa ra ka Pure Ua Atu ei kia Tae Mai te Patireia?

9. Eaa ra i tau ei no tatou kia pure e kia tae mai te Patireia o te Atua?

⁹ I roto i tana pure akaraanga, kua apii mai a Karaiti ia tatou kia pure no te taenga mai o te Patireia o te Atua. Te akakite maira te akatupu anga o te totou Pipiria e kua akanooia te Patireia o te Mesia i te rangi ra i te 1914. * E teianei, e mea tau ainei kia pure tatou no taua Patireia ra kia “tae mai”? E tikai. I roto i ta Daniela totou, te akatutuia maira te Patireia o te Mesia, e tetai toka, te aere maira e ka u ki runga i te au kavamani poritiki a te tangata ra, tei akatutuia mai e tetai tiki maatamaata. Ka tae mai taua toka ra kia tamaki atu i taua tiki ra, i te tutuki anga i te reira na te akapueurikiriki anga i te reira ki roto i te karakaraea. Te karanga ra ta Daniela totou e: “Kare oki taua basileia ra e riro i etai ke, e riro na te reira e akapueurikiriki e e akapou i taua au basileia katoa ra, e ka vai rai te reira e tuatau ua atu.”​—Daniela 2:44.

10. Eaa tatou i anoano roa ai kia tae mai te Patireia o te Atua?

¹⁰ Te inangaro nei tatou i te kite i te tae anga mai te Patireia o te Atua i te akapou anga i te akatereanga o te au mea kino a Satani no te mea te aiteanga o teia ra te akatapuanga i te ingoa tapu o Iehova e te akaatea anga i te aronga patoi katoatoa i te tu ngateitei tu-Atua. Te pure akatenga nei tatou e: “Kia tae toou basileia,” e ma te apotetoro ko Ioane ra, te karanga nei tatou e: “Amene. Koia ïa, ka aere mai, e te Atu, e Iesu e.” (Apokalupo 22:20) Ae, kia tae mai oki a Iesu i te akatapu i to Iehova ra ingoa e te akatika anga i Tona tu ngateitei, e rauka ai kia tika te au tuatua a te tata taramo ra e: “Kia kite ratou e, ko Iehova toou ingoa, e ko koe anake Tei Teitei i te enua katoa nei.”​—Salamo 83:18.

 “Kia Akonoia Toou Anoano”

11, 12. (a) Eaa ta tatou e pati ra me pure tatou no to te Atua ra anoano kia ‘akonoia i te enua nei, mei tei te ao katoa na’? (e) Eaa atu ei te aite anga o ta tatou pure kia raveia to Iehova ra anoano?

¹¹ Aru mai kua apii a Iesu i tana au pipi kia pure e: “Kia akonoia toou anoano i te enua nei, mei tei te ao katoa na.” (Mataio 6:10) Kua vai mai te ao e pini ua ake no te mea no to Iehova ra anoano. Kua kapiki nui te au mea ora ririnui o te rangi ra e: “E tau te kakā ia koe, e te Atu, e te akangateitei, e te mana: naau oki i anga i te au mea ravarai nei, e no toou inangaro i mou ei e i angaiaʼi ratou.” (Apokalupo 4:11) E akakoroanga to Iehova no te ‘au mea katoatoa, to te rangi, e to te ao katoa nei.’ (Ephesia 1:8-10) Na te pureanga e kia raveia to te Atua ra anoano, te tika anga, te pati ra tatou, kia akono a Iehova i tana akakoroanga. Pera katoa, te akaari ra i reira tatou e te inangaro ra tatou i te kite i te rave angaia te anoano tu-Atua i roto katoa i te ao e pini ua ake.

¹² Na roto i teianei pure te akaari katoa ra tatou i te ariki puareinga anga tatou kia akatano i to tatou oraanga ki to Iehova anoano. Kua tuatua a Iesu e: “Teia taku kai, ko te akono i tona anoano, to tei tono mai iaku ra, ma te akaoti i tana angaanga.” (Ioane 4:34) Mei ia Iesu rai, ei au Kerititiano akatapuia, te rekareka nei tatou i te rave anga i to te Atua ra anoano. No to tatou aroa ia Iehova e no tana Tamaiti te akakeu ra ia tatou ‘kia kore e akono i te anoano o te tangata, ma te akono ra i te inangaro o te Atua,’ i roto i to tatou oraanga. (1 Petero 4:1, 2; 2 Korinetia 5:14, 15) Te aruaru ra tatou i te kopae ke i te rave anga i te au mea ta tatou i kite te patoi ra i to Iehova ra anoano. (1 Tesalonia 4:3-5) Na te taporoporo anga i te tuatau no te tatau anga e te apiianga i te Pipiria, ‘kia kite ra tatou i to [“Iehova,” NW] ra anoano,’ te kapiti maira ia i to tatou piri maroiroi anga ki roto i te tutu anga i “te evangelia o te basileia nei.”​—Ephesia 5:15-17; Mataio 24:14.

To Iehova Anoano i te Rangi

13. I akapeea ra to te Atua anoano i te rave angaia i mua ake ka tupu ei ta Satani meameaau anga?

¹³ Kua akatupuia to Iehova ra anoano i te au rangi i mua roa ake ka meameaau ei tetai o tana au tamariki vaerua e te riro mai anga ko Satani. Te akatutu maira te puka a Maseli i te Tamaiti anau tai a te Atua ei pakari tutu tangata. Te akaari maira te reira kua tere atu te tuatau roa kare i akakiteia mai, e ko te Tamaiti anau tai a te Atua ra kua ‘rekareka ua i mua iaia i te au taime ravarai,’ te rave mataora anga i te anoano o tona Metua. I te openga ra, kua riro mai aia ei “pu rave angaanga” na Iehova i roto i te au mea ravarai i angaia “ko to te rangi, e to te enua nei, ko tei akaraia nei e te kore e akaraia.” (Maseli 8:22-31, NW; Kolosa 1:15-17) Kua taangaanga a Iehova ia Iesu ei Logo, me kore e Vaa Tuatua nana.​—Ioane 1:1-3.

14. Eaa ta tatou ka kite mei ia Salamo 103 e akapeea te au angera i te akatupu anga i to Iehova ra anoano i te au rangi ra?

¹⁴ Kua akaari mai te tata taramo e tei runga ravao atu te tu ngateitei o Iehova e te akarongo maira te au angera tini ki tana au tuatua no te ikuikuanga e ki tana au akauenga. Ka tatau tatou: “Kua akamou a Iehova i tona ra terono ki runga i te au rangi; e kua kauraro te au mea katoa nei i tona ra basileia. E akameitaki ia Iehova, e te au angela nana e, ko tei maata i te ririnui, e kua akono i tana akauenga, i te akarongo anga i tona reo kia tuatua. E akameitaki ia Iehova e tona katoa ra au nuku; te au tavini nona ra, ko tei rave i tana i inangaro ra. E akameitaki ia Iehova, e tana katoa ra au angaanga, i te au ngai katoa ra i tona ra au [me kore, “tu ngateitei,” tataanga i raro ake, NW].”​—Salamo 103:19-22.

15. I akapeea te rauka mai anga ia Iesu ra te mana Patireia i te akakeu anga i te rave anga i te anoano o te Atua ra i te rangi?

¹⁵ I muri ake i tona meameaau anga, te rauka ra rai ia Satani i te aaere ki te au paepae o te rangi, mei tei akakiteia mai i roto i te puka a Iobu. (Iobu 1:6-12; 2:1-7) Inara, kua totou mai te puka a Apokalupo e ka tae mai te tuatau ka uriia mai a Satani e tana au temoni mei te rangi mai. I te akaraanga kua tae mai taua tuatau i muri poto ua ake i te rauka anga ia Iesu Karaiti te mana Patireia i te 1914. Mei reira mai, kare rava e ngai no taua au meameaau ra i roto  i te rangi. Kua kotingaia ratou ki te tuanga o te enua nei. (Apokalupo 12:7-12) Kare e rongo akaouia te reo taumaro anga i roto i te rangi, ko te au reo anake ua tei piri mai i te maeva anga ki “te Punua-mamoe,” ko Iesu Karaiti, e te akapaapaa anga ma te kauraro kia Iehova. (Apokalupo 4:9-11) Kua akatupu tikaiia to Iehova anoano i te rangi.

To Iehova Anoano no te Enua Nei

16. Akapeea te pure akaraanga i te patoi anga i te apiianga a Kerititome no runga i te manakonako anga o te tangata?

¹⁶ Kua akaatea mai te au ekaretia o Kerititome i te enua nei mei ta te Atua ra au akakoroanga, i te karanga anga e ka aere pouroa te au tangata meitaki ki te rangi. Inara kua apii mai a Iesu kia pure tatou e: “Kia tae toou basileia. Kia akonoia toou anoano i te enua nei, mei tei te ao katoa na.” (Mataio 6:10) Ka rauka ainei kia karangaia e, na tetai ua atu manako anga, i te katoa anga e ka akatupuia to Iehova anoano i teia tuatau i runga nei i tetai enua te ki ra i te kino, te tu tau kore, te maki, e te mate? Kare rava! No reira ka pure akatenga tatou kia raveia to te Atua ra anoano i te enua nei, te rotai ra ki te taputou tei tataia e te apotetoro ko Petero e: “Te tatari nei ra tatou i te rangi ou [te kavamani Patireia o te Mesia na Karaiti] e te enua ou [tetai taiate tangata tuatua tika] tana i tuatua maira, i te vai tika anga o te tuatua-tika ra.”​—2 Petero 3:13.

17. Eaa to Iehova akakoroanga no te enua nei?

¹⁷ E akakoroanga to Iehova i te anga anga i te enua. Kua akauru aia i te peroveta ko Isaia kia tata e: “Te na ko maira oki a Iehova, ko tei anga i te au rangi ra; koia te Atua, ko tei akaaite i te enua e nana i anga; nana i akatinamou, kare ra aia i anga ei mea puapinga kore ua; kua anga ra aia kia tangataia: Ko au ko Iehova, e kare atu.” (Isaia 45:18) Kua tuku te Atua i nga tokorua mua i roto i tetai kainga parataito e kua ikuiku atura ia raua: “Kia anau korua, e kia maata roa, e e akaki i te enua nei, e e akavi.” (Genese 1:27, 28; 2:15) Papu tikai, ko te akakoroanga o Tei Anga ra kia tangataia te enua nei e tetai iti tangata tiama no te au tangata tuatua tika te kauraro mataora ra ki to Iehova tu ngateitei e kia noo e tuatau ua atu i roto i te Parataito tei taputouia mai e Karaiti.​—Salamo 37:11, 29; Luka 23:43.

18, 19. (a) Eaa te ka raveia i mua ake ka raveia ai to te Atua anoano i runga i te enua nei? (e) Eaa ua atu tetai au tu o ta Iesu pure akaraanga te ka akara matatioia i roto i te atikara te aru maira?

¹⁸ To Iehova ra anoano no te enua nei kare rava e akatupu ki katoaia me te tangataia nei te enua ma te au tane e te au vaine te patoi ra i tona tu ngateitei. I te taangaanga anga i te au mana ririnui vaerua i raro ake i ta Karaiti arataki anga, ko to te Atua ra anoano kia ‘takoreia te aronga e takore ra i te enua.’ Te akatereanga kino o te au mea katoa a Satani, ma tana akonoanga pikikaa, te au poritiki kino, te ngai okooko noinoi e te tiratiratu kore, e te vaeau kino tikai, ka takoreia atu e tuatau ua atu. (Apokalupo 11:18,  NW; 18:21; 19:1, 2, 11-18) Ka akatikaia to Iehova tu ngateitei e kia akatapuia tona ra ingoa. Pouroa teia ta tatou e pure nei i to tatou tuatua anga e: “E to matou Metua i te ao ra, Kia tapu toou ingoa. Kia tae toou basileia. Kia akonoia toou anoano i te enua nei, mei tei te ao katoa na.”​—Mataio 6:9, 10.

¹⁹ Inara, i roto i tana pure akaraanga, kua akaari mai a Iesu e ka rauka ia tatou i te pure katoa no runga i te au tumu manako uaorai. Ka akara matatioia teia au tu o tana ikuiku anga no runga i te pure i roto i te atikara te aru mai nei.

[Tataanga Rikiriki i Raro]

Na te Akamanako Akaou Anga

• Eaa ra i tau ei kia tuatua tatou kia Iehova “to matou Metua” ra?

• Eaa ra i puapinga maata roa ai kia pure tatou e kia akatapuia te ingoa o Iehova?

• Eaa ra tatou ka pure ei kia tae mai te Patireia o te Atua ra?

• Eaa te aiteanga me pure tatou e kia raveia to te Atua ra anoano i runga i te enua nei mei to te rangi?

[Au Uianga Apii]

[Tutu i te kapi 9]

E tuke maata tikai ta Iesu pure i te au pure akatutu ua a te au Pharisea

[Tutu i te kapi 10]

Te pure ra te au Kerititiano kia tae mai te Patireia o te Atua, kia akatapuia tona ingoa, e kia raveia tona ra anoano