“Le Alii e, ia E Aʻoaʻo Mai iā te i Matou i Tatalo”

“Ona fai mai lea iā te ia o le tasi o lona ʻau soo, ‘Le Alii e, ia e aʻoaʻo mai iā te i matou i tatalo.’”—LUKA 11:1.

1. Aiseā na talosaga atu ai se tasi o soo iā Iesu e aʻoaʻoina i latou i le tatalo?

A O TATALO Iesu i se tasi aso i le 32 T.A., na mātauina ai o ia e se tasi o ona soo. Na lē mafai ona ia lagonaina mea o fetalai atu ai Iesu i lona Tamā, auā atonu o se tatalo lē leoa. E ui i lea, na faapea atu le soo iā Iesu ina ua māeʻa lana tatalo: “Le Alii e, ia e aʻoaʻo mai iā te i matou i tatalo.” (Luka 11:1) Aiseā na talosaga atu ai faapena? O le tatalo o se vaega masani o le soifuaga o tagata Iutaia atoa foʻi ma la latou tapuaʻiga. E anoanoaʻi tatalo o loo maua i tusi o le Salamo atoa foʻi ma isi tusi o Tusi Paia Eperu. O lea la, e leʻi talosaga atu le soo ina ia aʻoaʻoina o ia i se mea e na te leʻi iloaina po o se mea e na te leʻi faia muamua. E lē taumatea na masani foʻi o ia i tatalo na fai faatauloto e taʻitaʻi lotu o le lotu Iutaia. Ae ina ua ia mataʻituina Iesu a o tatalo, e lē taumatea na ia iloa le telē o le eseesega o tatalo faafiaamiotonu a le ʻaufailotu, ma le auala na tatalo ai Iesu.—Mataio 6:5-8.

2. (a) O le ā e iloa ai e leʻi finagalo Iesu e tatou te taulotoina upu uma o le tatalo faaaʻoaʻo? (e) Aiseā tatou te naunau ai ina ia iloa le auala e tatalo ai?

² Pe tusa ma le 18 masina muamua atu, na saunia ai e Iesu i lana lauga i le Mauga, se tatalo faaaʻoaʻo mo ona soo. (Mataio 6:9-13) Atonu e leʻi iai lenei soo i le taimi lenā, o lea la, na toe taʻua ai ma le agalelei e Iesu manatu autū o lenā tatalo faaaʻoaʻo. O le mea e mataʻina i inei, e leʻi toe taʻua e Iesu upu uma o le tatalo, lea e faailoa ai e leʻi saunia e Iesu se tatalo faalelotu ina ia aʻo faatauloto. (Luka 11:1-4) E pei lava i tatou o le soo lea e lē o mailoa lona suafa, tatou te naunau foʻi e aʻoaʻoina i tatou i le tatalo ina ia tatou vavalalata atu ai iā Ieova i a tatou tatalo. Seʻi o tatou iloiloina totoʻa la le tatalo faaaʻoaʻo na faamauina e le aposetolo o Mataio. E aofia ai ni talosaga e fitu ma o le tolu o na talosaga, e faaautū atu i fuafuaga a le Atua, o isi talosaga e fā e faaautū atu i o tatou manaʻoga faaletino ma faaleagaga. O le a tatou auʻiliʻilia uluaʻi talosaga e tolu i le suʻesuʻega lenei.

O le Tamā Alofa

3, 4. O le ā le uiga o lo tatou faalupeina o Ieova o lo “matou Tamā”?

³ Muamua lava, na faaalia e Iesu e tatau ona atagia atu i a tatou tatalo la tatou faiā lelei ma le faaaloalogia ma Ieova. A o taulaʻi faapitoa atu ana fetalaiga i ona soo na potopoto ane iā te ia i le mauga, na taʻu atu e Iesu pe a latou tatalo iā Ieova, e ao ona faalupe o ia o “lo matou Tamā e, o i le lagi.” (Mataio 6:9) Na taʻua e se tasi tagata poto e faapea, pe na fetalai Iesu i le faa-Eperu e masani ai po o le faa-Arama, a o le upu na ia faaaogāina mo le “Tamā,” e tutusa lona uiga ma faaupuga agaalofa e faaaogā e se tamaitiiti. O lo tatou faalupeina o Ieova o “lo matou Tamā e,” e faaalia ai se faiā māfana maufaatuatuaina.

 ⁴ O le faapea atu “lo matou Tamā,” tatou te amanaʻia ai foʻi o i tatou o se vaega o se ʻauaiga toʻatele o tane ma fafine o ē e talitonu o Ieova o Lē Foaʻi Ola. (Isaia 64:8; Galuega 17:24, 28) Ua avea Kerisiano faauuagagaina ma tamafai “o atalii i latou o le Atua,” ma latou te “valaau atu ai, ‘Ava, le Tamā e!’” (Roma 8:14, 15) E faitau miliona tagata ua avea ma a latou aumea faamaoni. O i latou na, ua tuuina atu o latou soifua iā Ieova ma faailoga lo latou tuuina atu e ala i le papatisoina i le vai. O i latou uma nei o loo avea o “isi mamoe,” e mafai foʻi ona latou faalatalata atu iā Ieova i le suafa o Iesu, ma taʻua o Ia o “lo matou Tamā.” (Ioane 10:16; 14:6) E mafai ona tatou talanoa e lē aunoa i lo tatou Tamā i le lagi i le tatalo e avatu le faaneetaga iā te ia, faafetai atu iā te ia ona o mea lelei uma ua ia faia mo i tatou, ma lafo atu o tatou popolega iā te ia ma le mautinoa, o loo manatu mai o ia iā i tatou.—Filipi 4:6, 7; 1 Peteru 5:6, 7.

Ava i le Suafa o Ieova

5. O le ā le uluaʻi talosaga o le tatalo faaaʻoaʻo, ma aiseā ua talafeagai ai?

⁵ O le uluaʻi talosaga o loo faatulaga mai ai mea e ao ona faamuamua. Ua faapea mai: “Ia paia lou suafa.” (Mataio 6:9) Ioe, e ao ona aupito i tāua iā i tatou le faapaiaina o le suafa o Ieova auā tatou te alolofa iā te ia, ma tatou te lē fiafia i mea uma ua faalumaina ai lona suafa. O le fouvale a Satani ma lona faapogaia o le uluaʻi ulugalii ia lē usiusitai iā Ieova le Atua, na faaleagaina ai le suafa o le Atua e ala i le fesiligia o le tonu o le auala o loo faatinoina ai e le Atua lana pule silisili ese. (Kenese 3:1-6) E lē gata i lea, i le faagasologa mai o le faitau afe o tausaga, ua faalumaina le suafa o Ieova ona o amioga ma aʻoaʻoga matagā a ē ua faapea mai e auauna iā te ia.

6. O le ā tatou te lē faia pe a tatou tatalo ia paia le suafa o Ieova?

⁶ O la tatou tatalo mo le faapaiaina o le suafa o Ieova e faaalia ai la tatou vaaiga agaʻi i le finauga o le pule silisili ese—o loo tatou lagolagoina malosi le aiā a Ieova e pule ai i le lagi ma le lalolagi. E finagalo Ieova ina ia nofoia le lagi ma le lalolagi, e foafoaga o ē e lotomalilie ma fiafia e gauaʻi i lana pule silisili ese amiotonu, ona o le alofa mo ia ma ava i mea uma e fesootaʻi atu i lona suafa. (1 Nofoaiga a Tupu 29:10-13; Salamo 8:1; 148:13) O lo tatou ava i le suafa o Ieova, e fesoasoani lea iā i tatou e faamamao ese ai mai so o se mea e faaluma ai lenā suafa paia. (Esekielu 36:20, 21; Roma 2:21-24) E faalagolago le filemu o i latou uma i le lagi ma le lalolagi, i le faapaiaina o le suafa o Ieova ma le gauaʻi atu ona o le alofa i lana pule silisili ese. O lea la, o la tatou tatalo “ia paia lou suafa,” o se taʻutinoga lenā o lo tatou mautinoa e faapea, o le a faataunuuina le finagalo o Ieova ma iʻu ina viia ai o ia.—Esekielu 38:23.

 Le Malo o Loo Tatou Tatalo i Ai

7, 8. (a) O le ā le Malo na aʻoaʻoina i tatou e Iesu e tatalo i ai? (e) O le ā ua tatou iloa e uiga i lenei Malo mai tusi o Tanielu ma le Faaaliga?

⁷ O le talosaga lona lua i le tatalo faaaʻoaʻo e faapea: “Ia oo mai lou malo.” (Mataio 6:10) E iai se sootaga vavalalata o lenei talosaga ma le uluaʻi talosaga. Ina ia faapaiaina lona suafa mamalu, o le a faaaogā e Ieova le Malo Faa-Mesia po o lona malo i le lagi, lea ua tofia i ai lona Alo o Iesu Keriso e fai ma Tupu. (Salamo 2:1-9) O loo faaata mai e le valoaga a Tanielu, le Malo Faa-Mesia e faapea o se “maa” na tofia i le “mauga.” (Tanielu 2:34, 35, 44, 45) O loo faaata mai e le mauga le pule silisili ese a Ieova, o lea la, o le maa o loo faaata mai ai le Malo, o se faatinoga fou lea o le pule silisili ese a Ieova. E pei ona taʻua e le valoaga, ua iʻu ina avea le maa ma ‘mauga tele ma tumu ai le lalolagi uma,’ e faaalia ai o le a avea le Malo Faa-Mesia ma faailoga o le pule silisili ese a le Atua pe a pulea le lalolagi.

⁸ E toʻa 144,000 “ē ua faatauina nai tagata” e pule faatasi ma Keriso i lenei Malo faalelagi, e avea ma tupu ma ositaulaga. (Faaaliga 5:9, 10; 14:1-4; 20:6) Na taʻua i latou e Tanielu o “le ʻau paia a lē Silisili ese” ma o le a latou mauaina faatasi ma Keriso lē ua avea ma o latou Ulu, “le malo, ma le pule, atoa ma le mamalu o le malo i lalo ifo o le lagi uma, . . . O [lo latou] malo, o le malo e faavavau lea, e auauna ma usiusitai iā te [i latou] o pule uma lava.” (Tanielu 7:13, 14, 18, 27) O le malo faalelagi lenā na aʻoaʻo e Iesu ona soo e tatalo i ai.

Aiseā e Tatalo ai Pea ia Oo Mai le Malo?

9. Aiseā e talafeagai ai ona tatou tatalo ia oo mai le Malo o le Atua?

⁹ I lana tatalo faaaʻoaʻo, na aʻoaʻoina ai i tatou e Keriso e tatalo ia oo mai le Malo o le Atua. Ua faailoa mai e faataunuuga o valoaga o le Tusi Paia e faapea, na faavaeina le Malo Faa-Mesia i le lagi i le 1914. * Pe e talafeagai ea ona faaauau ona tatou tatalo ia “oo mai” le Malo? Ioe. Auā foʻi i le valoaga a Tanielu, o le Malo Faa-Mesia lea e faaata mai e le maa, o loo taavale mai e taia pulega faapolotiki a tagata lea e faaata mai e le tupua tele. O loo taavale mai pea le maa e taia le tupua ma matuā nutililii. Ua faapea mai le valoaga a Tanielu: “E lē tuuina atu ia i se tasi nuu, na te tuʻimomomoina ma faaumatia ia malo uma lava, a o ia e tumau lava e faavavau.”—Tanielu 2:44.

10. Aiseā tatou te matuā moomoo ai ina ia oo mai le Malo o le Atua?

¹⁰ Tatou te matuā moomoo i le taimi o le a faaumatia ai e le Malo o le Atua le faiga o mea leaga a Satani, ona o le a faapaiaina ai le suafa mamalu o Ieova ma tafiesea ai i latou uma e tetee i le pule silisili ese a le Atua. Tatou te tatalo faatauanau e faapea: “Ia oo mai lou malo,” ma tatou te fai atu faatasi ma le aposetolo o Ioane: “Amene. O lea lava le Alii e Iesu, ia e afio mai!” (Faaaliga 22:20) Ioe, tau ina ia afio mai Iesu e faapaia le suafa o Ieova ma faamaonia le tonu o Lana pule silisili ese, ma  faataunuu ai upu a le faisalamo: “Ina ia iloa e i latou, o oe, e ou le suafa o Ieova, na o oe lava o le Silisili ese i le lalolagi uma.”—Salamo 83:18.

“Ia Faia Lou Finagalo”

11, 12. (a) O le ā o loo tatou talosaga i ai pe a tatou tatalo ia faia le finagalo o le Atua “i le lalolagi e pei ona faia i le lagi”? (e) O le ā se isi uiga o lo tatou tatalo ina ia faia le finagalo o Ieova?

¹¹ O le isi talosaga na sosoo ai, lea na aʻoaʻo atu e Iesu i ona soo: “Ia faia lou finagalo, I le lalolagi e pei ona faia i le lagi.” (Mataio 6:10) Na ala ona iai le lagi ma le lalolagi ona o le finagalo o Ieova. Ua alalaga atu foafoaga malolosi i le lagi e faapea: “Lo matou Alii e, ma lo matou Atua, e tatau lava oe ina ia tuuina atu iā te oe le viiga, ma le faaneeneega, ma le mana; auā na e faia mea uma lava, ona o lou finagalo foʻi e i ai i latou ma ua faia.” (Faaaliga 4:11) E iai le fuafuaga a Ieova mo “mea uma lava o i le lagi, atoa ma mea o i le lalolagi.” (Efeso 1:8-10) Pe a tatou tatalo ia faia le finagalo o le Atua, o lona uiga o loo tatou talosaga atu iā Ieova ina ia faataunuu lana fuafuaga. E lē gata i lea, e faaalia ai foʻi o loo tatou moomoo e vaai i le faatinoina o le finagalo o Ieova i le lagi ma le lalolagi.

¹² E faaalia foʻi i lenei tatalo, lo tatou naunau e faaōgatusa o tatou olaga ma le finagalo o Ieova. Na fetalai Iesu: “O laʻu mea e ʻai, ia ou faia le finagalo o lē na auina mai aʻu, ma faaiʻu lana galuega.” (Ioane 4:34) Ona o i tatou o Kerisiano tuuina atu, tatou te fiafia e faia le finagalo o le Atua e pei foʻi o Iesu. O lo tatou alofa mo Ieova ma lona Alo, ua uunaʻia ai i tatou e lē toe usiusitai “i tuʻinanau o tagata, . . . a ia usiusitai i le finagalo o le Atua.” (1 Peteru 4:1, 2; 2 Korinito 5:14, 15) Tatou te finafinau e ʻalofia gaoioiga tatou te iloa e feteenaʻi ma le finagalo o Ieova. (1 Tesalonia 4:3-5) E ala i le faaaogāina o le taimi e faitau ma suʻesuʻeina ai le Tusi Paia, o le a tatou ‘iloaina ai le finagalo o Ieova,’ lea e aofia ai lo tatou maelega i le talaʻiina o “lenei tala lelei o le malo.”—Efeso 5:15-17; Mataio 24:14.

Le Finagalo o Ieova i le Lagi

13. Na faapefea ona faia le finagalo o le Atua a o leʻi taitai fouvale Satani?

¹³ Ua leva ona faia le finagalo o Ieova i le lagi, a o leʻi fouvale se tasi o ona atalii agaga ma avea o ia o Satani. O loo taʻua e le tusi o Faataoto le alo ulumatua o le Atua e faapea, o lē e atamai. O loo faaalia ai, i le lē mafaitaulia o le tele o tausaga, ‘sa olioli ai i ona luma i aso uma lava,’ le Alo pele e toʻatasi o le Atua ma fiafia e faia le finagalo o lona Tamā. Mulimuli ane, na fai o ia ma “tufuga” sili a Ieova i le foafoaina o mea uma lava, “o mea i le lagi ma mea i le lalolagi, o mea o vaaia ma mea e lē o vaaia.” (Faataoto 8:22-31; Kolose 1:15-17) Na finagalo Ieova e fai Iesu ma ana Upu, po o lana Fofoga Fetalai.—Ioane 1:1-3.

14. O le ā tatou te iloa mai le Salamo 103 i le auala e faia ai e agelu le finagalo o Ieova i le lagi?

¹⁴ O loo faaalia e le faisalamo, e silisili ese le pule a Ieova i mea uma lava ma e faalogo le ʻauagelu e toʻatele i ana faatonuga ma poloaʻiga. Tatou te faitau ai e faapea: “Ua faatumauina e Ieova o lona nofoālii i le lagi; ua pule aoao foʻi lona malo. Faamanū atu ia iā Ieova outou ana agelu o ē malolosi tele, o ē faia lana afioga, o loo faalogo i lona siʻufofoga. Faamanū atu ia iā Ieova outou ana ʻau uma lava, o outou ana auauna, o ē faia lona finagalo. Faamanū atu ia iā Ieova o mea uma na ia faia i mea uma lava ua pule i ai o ia.”—Salamo 103:19-22.

15. O le ā le aafiaga na iai i le faia o le finagalo o Ieova i le lagi ina ua maua e Iesu le pule o le Malo?

¹⁵ Ina ua māeʻa lana fouvalega, na mafai pea ona alu atu Satani i le lagi, e pei ona faailoa mai e le tusi o Iopu. (Iopu 1:6-12; 2:1-7) Peitaʻi, na valoia e le tusi o Faaaliga o le a iai le taimi e tuliesea ai Satani ma ana temoni mai le lagi. E aliali mai na taunuu lenā tulaga e leʻi leva talu ona maua e Iesu Keriso le pule o le Malo i le 1914. Talu mai lenā taimi, ua faasā  ona toe ō i le lagi na agelu fouvale. Ua taofiofia i latou i le lalolagi. (Faaaliga 12:7-12) Ua lē o toe lagonaina leo o ē finau i le lagi, ae na o leo o i latou e faaneenee i “le Tamaʻi Mamoe” o Iesu Keriso lea, ma o loo latou avatu ma le usiusitai le viiga iā Ieova. (Faaaliga 4:9-11) Ioe, ua faataunuuina le finagalo o Ieova i le lagi.

Le Finagalo o Ieova mo le Lalolagi

16. E faapefea ona feteenaʻi le tatalo faaaʻoaʻo ma le aʻoaʻoga a lotu ua taʻua o lotu Kerisiano e uiga i le faamoemoe o tagata?

¹⁶ E lē o faaaofia e lotu ua taʻua o lotu Kerisiano, le lalolagi i fuafuaga a le Atua auā latou te faapea mai o tagata lelei uma e ō i le lagi. Ae na aʻoaʻoina i tatou e Iesu e tatalo: “Ia oo mai lou malo, Ia faia lou finagalo, I le lalolagi e pei ona faia i le lagi.” (Mataio 6:10) Pe e mafai ea ona faapea atu, ua faia moni le finagalo o Ieova i aso nei i se lalolagi o loo tumu i faiga sauā ma faiga lē tonu, o maʻi ma le oti? E mautinoa lava e leai! O lea la, e tatau ona tatou tatalo faatauanau ina ia faia le finagalo o Ieova i le lalolagi, e ōgatusa ma le folafolaga a le aposetolo o Peteru: “E faatalitali i tatou i le lagi fou [le Malo Faa-Mesia e ala iā Keriso] ma le lalolagi fou [o tagata amiotonu], pei o lana na folafola mai, e mau ai le amiotonu.”—2 Peteru 3:13.

17. O le ā le fuafuaga a Ieova mo le lalolagi?

¹⁷ E iai le fuafuaga a Ieova na ala ai ona faia le lalolagi. Na ia faagaeeina le perofeta o Isaia e tusi e faapea: “O loo faapea ona fetalai mai o Ieova, o lē na faia le lagi; o ia lava o le Atua; o le tufuga o lē na faia le lalolagi; o ia na faatumauina; na ia lē faia fua, na ia faia ina ia ainā, o aʻu o Ieova, a e leai se tasi.” (Isaia 45:18) Na tuuina e le Atua le uluaʻi ulugalii i le faatoʻaga parataiso ma faatonuina i laʻua: “Ia fanafanau ia, ma ia uluola, ma ia tumu ai le lalolagi, ia faatoʻilalo i ai.” (Kenese 1:27, 28; 2:15) E manino mai la, o le fuafuaga a Lē na Faia Mea, ia aināina le lalolagi e tagata lelei atoatoa amiotonu, o ē o le a gauaʻi ma le fiafia i le pule silisili ese a Ieova ma ola e faavavau i le Parataiso lea na folafolaina e Keriso.—Salamo 37:11, 29; Luka 23:43.

18, 19. (a) O le ā e tatau ona fai muamua a o leʻi faia atoatoa le finagalo o le Atua i le lalolagi? (e) O ā isi vala o le tatalo faaaʻoaʻo a Iesu o le a iloiloina i le mataupu o sosoo mai?

¹⁸ E lē mafai ona faataunuuina atoatoa le finagalo o Ieova mo le lalolagi, a o aināina le lalolagi e tagata e teena lana pule silisili ese. O le a faaaogā e le Atua se ʻautau agaga malosi i lalo o le taʻitaʻiga a Iesu, ina ia “fano ai foʻi i latou o ē na fano ai le lalolagi.” O le a tafiesea e faavavau le faiga o mea leaga a Satani lea e aofia ai lotu sesē, faiga faapolotiki faapiʻopiʻo, faiga faapisinisi lē faamaoni ma ʻautau malolosi. (Faaaliga 11:18; 18:21; 19:1, 2, 11-18) O le a faamaonia le tonu o le pule silisili ese a Ieova ma faapaiaina lona suafa. O mea uma na o loo tatou tatalo i ai, pe a tatou faapea atu: “Lo matou Tamā e, o i le lagi, Ia paia lou suafa. Ia oo mai lou malo, Ia faia lou finagalo, I le lalolagi e pei ona faia i le lagi.”—Mataio 6:9, 10.

¹⁹ Ae na faaalia e Iesu i lana tatalo faaaʻoaʻo, e mafai foʻi ona tatou tatalo i mea e fitoitonu i le tagata lava ia. O le a iloiloina i le mataupu o sosoo mai, vala nei o ana faatonuga e uiga i le tatalo.

[Faamatalaga pito i lalo]

O se Autaluga

• Aiseā e talafeagai ai ona tatou faalupeina Ieova, “lo matou Tamā e”?

• Aiseā e aupito i tāua ai ona tatou tatalo mo le faapaiaina o le suafa o Ieova?

• Aiseā tatou te tatalo ai ina ia oo mai le Malo o le Atua?

• O le ā o loo uiga i ai pe a tatou tatalo ia faia le finagalo o le Atua i le lalolagi e pei ona faia i le lagi?

[Fesili mo le Suʻesuʻega]

[Ata i le itulau 9]

Na matuā eseese tatalo a Iesu ma tatalo faafiaamiotonu a le ʻau Faresaio

[Ata i le itulau 10]

E tatalo Kerisiano ina ia oo mai le Malo o le Atua, ia paia lona suafa, ma ia faia lona finagalo