„Masra, leri wi fa fu begi”

„Wan fu den disipel fu en ben taigi en: ’Masra, leri wi fa fu begi.’”—LUKAS 11:1.

1. Fu san ede wan fu den disipel fu Yesus ben aksi en fu leri den fa fu begi?

WAN leisi na ini 32 G.T., wan disipel fu Yesus ben luku fa a ben e begi. A no ben man yere san Yesus ben e taigi en Tata, fu di a kan taki Yesus ben e begi na ini en ati. Ma awinsi fa a no fa, di Yesus ben kaba begi, a disipel aksi en: „Masra, leri wi fa fu begi” (Lukas 11:1). San meki a aksi a sani disi? Begi ben de wan aladei sani na ini a libi èn na ini na anbegi fu den Dyu. Furu begi de fu feni na ini den Hebrew Buku fu Bijbel, soleki na ini Psalm nanga tra buku. Sobun, a disipel no ben aksi Yesus fu leri en wan sani di a no ben sabi, noso wan sani di a no ben du noiti ete. A no de fu taki dati a ben sabi den begi di den kerki fesiman fu a Dyu bribi ben gwenti fu taki ibri tron baka. Ma now di a si fa Yesus ben e begi, dan a kon si krin taki wan bigi difrenti ben de na mindri den begi fu den rabi di ben e du leki den ben santa srefisrefi, nanga a fasi fa Yesus ben e begi.—Mateyus 6:5-8.

2. (a) San e sori taki Yesus no ben wani taki wi gebroiki den srefi wortu fu a begi di a ben gi wi leki eksempre? (b) Fu san ede wi wani sabi fa fu begi?

² Na ini a Bergitaki di Yesus ben hori sowan 18 mun na fesi, a ben gi den disipel fu en wan eksempre fu san den ben kan taki na ini den begi fu den (Mateyus 6:9-13). A kan taki a disipel di ben poti na aksi gi en, no ben de drape di Yesus ben e hori a taki fu en; sobun nanga switifasi, Yesus fruteri en den prenspari pisi fu a begi di a ben leri den sma. A moi fu si taki a no ben gebroiki den srefi wortu, èn disi e sori taki Yesus no ben e leri sma wan begi di den ben musu taki ibri tron baka (Lukas 11:1-4). Neleki a disipel dati di Bijbel no e kari na en nen, na so wi sosrefi wani leri fa wi musu begi, so taki den begi fu wi kan meki wi kon moro krosibei na Yehovah. Fu dati ede, meki wi go luku a begi fu Yesus finifini, soleki fa na apostel Mateyus ben skrifi dati. Seibi aksi de na ini a begi dati; dri fu den abi fu du nanga san Gado abi na prakseri fu du, èn fo fu den abi fu du nanga san wi abi fanowdu na skin fasi èn na yeye fasi. Na ini na artikel disi, wi sa luku den fosi dri aksi.

Wan lobi-ati Tata

3, 4. San a wani taki te wi e kari Yehovah „wi Tata”?

³ Na a bigin fu a begi, Yesus bigin sori kaba taki den begi fu wi musu sori taki wi abi wan krosibei banti nanga Yehovah, aladi wi e tan lespeki en. Fu di Yesus ben wani taki sani waka bun nanga den disipel fu en di ben kon leti na en sei na tapu a bergi, meki a taigi den taki den musu kari Yehovah, „wi Tata na hemel” (Mateyus 6:9). Soleki fa wan sabiman sori, dan a kan taki Yesus ben taki a sani disi na ini a Hebrewtongo soleki fa furu sma ben e taki en, noso na ini Arameisitongo. Awinsi fa a no fa, a wortu di Yesus ben gebroiki dyaso gi „Tata”, ben de a srefi leki den wortu di wan nyofi pikin e gebroiki  te a e kari en papa di a lobi srefisrefi. Te wi e kari Yehovah, „wi Tata”, dan wi e sori taki wi abi wan bun èn krosibei banti nanga en fu di wi e frutrow en.

⁴ Te wi e taki „wi Tata”, dan wi e sori sosrefi taki wi de wan pisi fu wan bigi famiri fu man nanga uma di e si Yehovah leki a Sma di e gi libi (Yesaya 64:8; Tori fu den Apostel 17:24, 28). Kresten di salfu nanga santa yeye e kon tron „manpikin fu Gado”, èn te den wani kari en, den kan „bari taki: ’Abba, Tata!’” (Romesma 8:14, 15). Milyunmilyun sma kon tron getrow kompe fu den. Den sma disi gi den libi abra na Yehovah èn den teki dopu na ini watra. Ala den „tra skapu” disi kan taki sosrefi nanga Yehovah na ini a nen fu Yesus èn den kan kari En „wi Tata” (Yohanes 10:16; 14:6). Nanga yepi fu begi, wi kan taki nanga wi hemel Tata doronomo fu prèise en, fu taki en tangi gi ala den bun di a du gi wi, èn fu fruteri en fu den sani di e gi wi broko-ede, aladi wi abi a frutrow taki a e sorgu gi wi.—Filipisma 4:6, 7; 1 Petrus 5:6, 7.

Lobi gi a nen fu Yehovah

5. San na a fosi aksi na ini a begi di Yesus ben leri sma, èn fu san ede disi fiti?

⁵ A fosi sani di Yesus ben aksi na ini a begi e sori kaba sortu sani de moro prenspari. A ben e begi: „Meki yu nen kon santa” (Mateyus 6:9). Iya, a musu de wan tumusi prenspari sani gi wi fu santa a nen fu Yehovah, bika wi lobi en èn wi no man si kwetikweti fa sma pori en nen na ala sortu fasi. Di Satan opo ensrefi teige Yehovah Gado èn di a kori a fosi libisma trowpaar fu trangayesi Gado, dan Gado kisi porinen fu di Satan ben tyari tweifri kon fu a fasi fa Gado ben e tiri hemel nanga grontapu (Genesis 3:1-6). Boiti dati, na ini den hondrohondro yari di pasa, Yehovah kisi porinen tu fu di sma e du èn e leri sani di e gi en syen, aladi den e taki dati den e bribi na ini en.

6. Sortu sani wi no sa du efu wi e begi taki a nen fu Yehovah musu kon santa?

⁶ Te wi e begi taki a nen fu Yehovah musu kon santa, dan disi e sori sortu sei wi teki na ini a strei di abi fu du nanga suma abi a reti fu tiri hemel nanga grontapu. Iya, wi e sori taki wi e horibaka dorodoro gi Yehovah leki a Sma di abi a reti fu tiri. Yehovah wani taki hemel nanga grontapu musu furu nanga engel èn nanga libisma di de klariklari fu saka densrefi na ondro a regtfardiki tirimakti fu en. A wani taki den du disi nanga prisiri fu di den lobi en èn fu di den lobi ala san a nen fu en wani taki (1 Kroniki 29:10-13; Psalm 8:1; 148:13). A lobi di wi abi gi a nen fu Yehovah, sa yepi wi fu no du nowan sani di kan gi Yehovah porinen (Esekièl 36:20, 21; Romesma 2:21-24). Fu kan meki vrede kon de na hemel nanga grontapu, dan a nen fu Yehovah musu kon santa èn ala sma musu saka densrefi na ondro a tiri fu en fu di den lobi en. Fu dati ede, te wi e begi „meki yu nen kon santa”, dan wi e sori taki wi de seiker taki Yehovah sa du san a abi na prakseri, èn taki den sani dati sa meki a kisi bigi glori.—Esekièl 38:23.

 A Kownukondre fu san wi e begi

7, 8. (a) San na a Kownukondre fu san Yesus ben leri wi fu begi? (b) San den buku Danièl nanga Openbaring e leri wi fu a Kownukondre disi?

⁷ A di fu tu sani di Yesus ben aksi na ini a begi di a ben leri sma, na: „Meki yu kownukondre kon” (Mateyus 6:10). Na aksi disi abi furu fu du nanga a fosiwan. A sani di Yehovah e gebroiki fu santa en nen, na a Mesias Kownukondre, a hemel tirimakti fu en, èn a gi en Manpikin, Yesus Krestes, a reti fu tiri leki Kownu (Psalm 2:1-9). A profeititori fu Danièl e agersi a Mesias Kownukondre nanga „wan ston” di koti puru fu wan „bergi” (Danièl 2:34, 35, 44, 45). A „bergi”, na a tirimakti fu Yehovah na hemel nanga grontapu. Sobun a Kownukondre, noso a „ston”, na wan nyun sani di Yehovah e gebroiki fu sori taki a abi ala tirimakti. Na ini a profeititori, a ston ’e tron wan bigi bergi èn a e furu heri grontapu’. Disi wani taki dati a Mesias Kownukondre na a sani di o sori taki Gado na a Moro Hei Tiriman fu grontapu.

⁸ Krestes na a tiriman fu a Kownukondre disi, makandra nanga 144.000 tra sma, di „ben bai puru na mindri libisma” fu tiri nanga en leki kownu nanga priester (Openbaring 5:9, 10; 14:1-4; 20:6). Danièl e kari den „den santawan fu a Moro Heiwan”. Makandra nanga Krestes, na Edeman fu den, den e kisi „a kownukondre nanga a tirimakti nanga a grani fu den kownukondre na ondro a heri hemel . . . A kownukondre fu den na wan kownukondre di e tan te ten di no skotu, èn ala den tirimakti sa dini den èn gi den yesi” (Danièl 7:13, 14, 18, 27). Disi na wan moi fasi fu sori fa a tirimakti sa de fu san Yesus ben leri en bakaman fu begi.

Fu san ede wi musu begi ete taki a Kownukondre musu kon?

9. Fu san ede a fiti fu begi taki Gado Kownukondre musu kon?

⁹ Na ini a begi fu en, Krestes leri wi fu begi taki Gado Kownukondre musu kon. Bijbel profeititori e sori taki a Mesias Kownukondre ben seti na ini hemel na ini 1914. * Ma now di a seti kaba, dan a fiti ete fu begi taki a Kownukondre dati musu „kon”? Iya, bika na ini a profeititori fu Danièl, a Mesias Kownukondre di a e agersi nanga wan ston, e tuka nanga den libisma politiek tirimakti di a e agersi nanga wan bun bigi popki. A ston musu tuka nanga a popki ete, èn a o naki a popki so tranga taki a o tron puiri. A profeititori fu Danièl e taki: „A kownukondre srefi no sa gi na nowan tra pipel. A sa broko ala den kownukondre disi na pisipisi èn tyari wan kaba kon na den, èn ensrefi sa tan te ten di no skotu.”—Danièl 2:44.

10. Fu san ede wi e angri fu si Gado Kownukondre kon?

¹⁰ Wi e angri fu si fa Gado Kownukondre o feti teige na ogri sistema fu Satan, bika disi sa wani taki dati a nen fu Yehovah sa kon santa èn ala sma di e opo densrefi teige a tirimakti fu Gado sa wai puru. Wi e begi fayafaya: „Meki yu kownukondre kon”, èn neleki na apostel Yohanes, wi e taki: „Amen! Kon, Masra Yesus” (Openbaring 22:20). Iya, meki Yesus kon fu santa a nen fu Yehovah èn fu sori taki Yehovah abi a reti fu tiri hemel nanga grontapu, bika na  so fasi den wortu fu a psalm skrifiman kan kon tru, namku: „So taki sma kan sabi taki yu, di nen na Yehovah, yu wawan na a Moro Heiwan na heri grontapu.”—Psalm 83:18.

„Meki yu wani pasa”

11, 12. (a) San wi e aksi te wi e begi taki a wani fu Gado musu „pasa na grontapu leki fa a e pasa na hemel”? (b) San a wani taki moro te wi e begi taki a wani fu Yehovah musu pasa?

¹¹ Baka dati, Yesus ben leri den disipel fu en fu begi: „Meki yu wani pasa na grontapu leki fa a e pasa na hemel” (Mateyus 6:10). Hemel nanga grontapu kon de fu di Yehovah ben wani dati. Den makti yeye di Gado meki na hemel, e bari: „Yu, Yehovah, iya wi Gado, warti fu kisi a glori nanga a grani nanga a makti, bika yu ben meki ala sani, èn fu yu wani ede den ben de èn fu yu wani ede yu ben meki den” (Openbaring 4:11). Yehovah no meki „den sani na hemel èn den sani na grontapu” fu soso; a abi na prakseri fu du wan sani nanga den (Efeisesma 1:8-10). Te wi e begi taki a wani fu Gado musu pasa, dan fu taki en leti, wi e aksi Yehovah fu du san a abi na prakseri. Boiti dati, wi e sori na a fasi dati, taki wi e angri fu si taki a wani fu Gado e pasa na hemel èn na grontapu.

¹² Nanga a begi disi, wi e sori tu taki wi de klariklari fu libi soleki fa Yehovah wani. Yesus ben taki: „Mi nyanyan de, fu mi du a wani fu en di ben seni mi kon èn fu kaba a wroko fu en” (Yohanes 4:34). Neleki Yesus, wi leki Kresten di gi densrefi abra na Gado, e prisiri fu du a wani fu en. A lobi di wi abi gi Yehovah èn gi a Manpikin fu en e meki taki wi kenki wi libi, so taki wi ’no e libi moro gi den lostu fu libisma, ma gi a wani fu Gado’ (1 Petrus 4:1, 2; 2 Korentesma 5:14, 15). Wi e meki muiti fu wai pasi gi sani di wi sabi taki den de teige a wani fu Yehovah (1 Tesalonikasma 4:3-5). Te wi e meki ten fu leisi èn studeri Bijbel, dan wi e „tan si krin san na a wani fu Yehovah”, èn a wani taki wi musu de fayafaya fu preiki „a bun nyunsu disi fu a kownukondre”.—Efeisesma 5:15-17; Mateyus 24:14.

A wani fu Yehovah na ini hemel

13. Fa a wani fu Gado ben e pasa kaba langa ten bifo Satan opo ensrefi teige En?

¹³ A wani fu Yehovah ben e pasa kaba na ini hemel, langa ten bifo wan fu en yeye manpikin opo ensrefi teige en èn kon tron Satan. A buku Odo e agersi a fosi gebore Manpikin fu Gado nanga koni. A e sori taki someni milyardmilyard yari langa, a wan-enkri gebore Manpikin fu Gado, ben „breiti na fesi en ala ten” fu di a ben prisiri fu du a wani fu en Tata. Te fu kaba, a ben tron a „tumusi bun wrokoman” fu Yehovah di den ben e meki ala sani ’na ini hemel èn na grontapu, den sani di libisma ai kan si nanga den sani di libisma ai no kan si’ (Odo 8:22-31; Kolosesma 1:15-17). Yehovah ben gebroiki Yesus leki en Wortu, noso en Takiman.—Yohanes 1:1-3.

14. San wi kan leri na ini Psalm 103 fu a fasi fa den engel e du a wani fu Yehovah na ini hemel?

¹⁴ A psalm skrifiman e sori taki Yehovah na a Moro Hei Tiriman di de, èn taki den milyardmilyard engel e arki te a e taigi den san den musu du èn fa den musu du den sani dati. Wi e leisi: „Yehovah srefi poti en kownusturu steifi na hemel; èn en eigi kownumakti tiri na tapu ala sani. Blesi Yehovah, un engel fu en, di tranga srefisrefi, di e du san a e taki, te unu e arki en wortu. Blesi Yehovah, ala un legre fu en, un dinari fu en, di e du a wani fu en. Blesi Yehovah, ala den wroko fu en, na ala den presi pe a e tiri [noso, pe a abi kownumakti].”—Psalm 103:19-22.

15. Fa a wani fu Gado pasa na ini hemel sensi Yesus kisi Kownukondre makti?

¹⁵ Soleki fa a buku Yob e sori, dan baka di Satan opo ensrefi teige Gado, a ben man go na hemel ete (Yob 1:6-12; 2:1-7). Ma a buku Openbaring ben taki na fesi taki a ten ben o kon pe Yesus ben o yagi Satan nanga den ogri yeye fu en komoto fu hemel. Soleki fa a sori, dan a sani disi ben pasa syatu baka di Yesus Krestes kisi Kownukondre makti na ini 1914. Sensi a ten dati, nowan presi no de moro na ini hemel gi den trangayesi engel disi. Soso na ini a birti fu  grontapu den kan tan now (Openbaring 12:7-12). Nowan sten no de fu yere moro fu sma di e opo densrefi teige a tirimakti fu Yehovah, ma soso den sten fu den wan di e prèise „a Pikin Skapu”, Krestes Yesus, èn sosrefi Yehovah fu di den e saka densrefi na En ondro (Openbaring 4:9-11). Iya, a wani fu Yehovah e pasa na ini hemel trutru.

San Yehovah wani du nanga grontapu

16. Fa a begi di Yesus leri wi, de kontrari fu san Krestenhèit e leri sma fu a howpu di libisma abi?

¹⁶ Den kerki fu Krestenhèit e sori taki Gado no abi nowan prakseri nanga grontapu, bika den e taki dati ala bun sma e go na hemel. Ma Yesus ben leri wi fu begi: „Meki yu kownukondre kon. Meki yu wani pasa na grontapu leki fa a e pasa na hemel” (Mateyus 6:10). Prakseri pikinso, yu denki taki na ini a ten disi, a wani fu Yehovah e pasa dorodoro na ini wan grontapu di lai nanga ogridu, kruktudu, siki, nanga dede? Kwetikweti! Fu dati ede, wi musu begi fayafaya taki a wani fu Gado musu pasa na grontapu, akruderi a pramisi di na apostel Petrus ben skrifi, namku: „Nyun hemel [a Mesias Kownukondre ondro a tirimakti fu Krestes] nanga wan nyun grontapu [wan regtfardiki libisma libimakandra] de di wi e fruwakti akruderi en pramisi, èn na ini den disi, regtfardikifasi sa de.”—2 Petrus 3:13.

17. San Yehovah abi na prakseri nanga grontapu?

¹⁷ Yehovah no ben meki grontapu fu soso, ma a ben abi wan prakseri nanga en. A ben meki a profeiti Yesaya skrifi: „Disi na san Yehovah taki, a Mekiman fu hemel, En a tru Gado, a Sma di seti grontapu èn a Mekiman fu en, a Sma, di poti en steifi, di no meki en fu soso, di ben seti en fu sma libi na tapu: ’Mi na Yehovah, èn nowan trawan de’” (Yesaya 45:18). Gado ben poti a fosi libisma trowpaar na ini wan paradijs dyari, èn a ben taigi den: „Un meki pikin èn un kon furu èn un furu grontapu èn un poti en na un ondro” (Genesis 1:27, 28; 2:15). A de krin fu si taki Gado wani taki volmaakti regtfardiki libisma e libi na grontapu, di de klariklari fu saka densrefi ondro a tirimakti fu Yehovah. A wani taki den sma disi libi fu têgo na ini a Paradijs di Krestes ben pramisi.—Psalm 37:11, 29; Lukas 23:43.

18, 19. (a) San musu pasa bifo a wani fu Gado e pasa dorodoro na grontapu? (b) Sortu tra sani na ini a begi di Yesus ben leri sma, wi sa luku na ini na artikel di e kon?

¹⁸ A wani fu Yehovah noiti no man pasa dorodoro, solanga grontapu lai nanga man nanga uma di e opo densrefi teige a tirimakti fu en. Gado sa gebroiki makti yeye legre di de ondro a tiri fu Krestes, fu „pori den wan di e pori grontapu”. A heri ogri seti fu sani fu Satan, nanga den falsi kerki fu en, den kruka politiek tirimakti, den gridi èn bedrigi bisnisman, nanga den srudati di e tyari pori kon, sa figi puru fu têgo (Openbaring 11:18; 18:21; 19:1, 2, 11-18). A sa de krin fu si taki Yehovah abi a reti fu tiri hemel nanga grontapu, èn en nen sa kon santa. Wi e begi fu ala den sani disi te wi e taki: „Wi Tata na hemel, meki yu nen kon santa. Meki yu kownukondre kon. Meki yu wani pasa na grontapu leki fa a e pasa na hemel.”—Mateyus 6:9, 10.

¹⁹ Ma di Yesus ben leri sma fa fu begi, dan a ben sori tu taki wi kan begi fu sani di abi fu du nanga wisrefi. Na ini na artikel di e kon, wi sa luku den sani disi di a kari na ini a begi di a ben leri sma.

[Futuwortu]

Luku baka san wi leri

• Fu san ede a fiti taki wi e kari Yehovah „wi Tata”?

• Fu san ede a de tumusi prenspari gi wi fu begi taki a nen fu Yehovah kon santa?

• Fu san ede wi e begi taki Gado Kownukondre musu kon?

• San a wani taki te wi e begi taki a wani fu Gado musu pasa na grontapu leki fa a e pasa na hemel?

[Aksi fu a tori disi]

[Prenki na tapu bladzijde 9]

Den begi fu Yesus ben de heri tra fasi leki den sokari santa begi fu den Fariseiman

[Prenki na tapu bladzijde 10]

Kresten e begi fu Gado Kownukondre kon, fu en nen kon santa, èn fu en wani pasa