En “Lesklav” ki Fidel e anmenmtan pridan
En “Lesklav” ki Fidel e anmenmtan pridan
“Lekel vreman sa lesklav fidel e pridan ki son met in met li ansarz tou lezot lesklav?”—MATYE 24:45, NW.
1, 2. Akoz i enportan pour nou ozordi ganny nouritir spirityel regilyerman?
MARDI apremidi le 11 Nizan, lannen 33 N.L., bann disip Zezi ti demann li en kestyon ki vreman enportan pour nou ozordi. Zot ti demann li: “Ki siny ki pou endik ou prezans ek konklizyon sa sistenm?” Pour reponn sa kestyon, Zezi ti donn en profesi remarkab. I ti koz lo en peryod letan boulverse avek lager, lafamin, tranbleman-de-ter, ek maladi. Me sa ti pou zis “parey bann premye douler ki en madanm ansent i gannyen avan lakousman.” Sitiasyon ti pou vin pli pir. Pa sa i fer per!—Matye 24:3, NW, 7, 8, 15-22; Lik 21:10, 11.
2 Depi 1914, preski tou sa ki Zezi ti dir dan son profesi in ganny akonpli. Limanite pe santi sa bann “douler” dan tou son profonder. Kantmenm sa, bann vre Kretyen pa devret per. Zezi ti promet ki i pou nouri zot avek nouritir spirityel ki nourisan. Vi ki Zezi i aprezan dan lesyel, ki laranzman i’n fer pour nou isi lo later ganny nouri spirityelman?
3. Ki laranzman Zezi in fer pour nou ganny “manze kan i ler”?
3 Zezi li menm ti reponn sa kestyon. Kan i ti pe donn son fame profesi, i ti demande: “Lekel vreman sa lesklav fidel e pridan ki son met in met li ansarz tou lezot lesklav, pour donn zot zot manze kan i ler?” Apre i ti dir: “Ere sa serviter ki son met i war li pe fer son devwar ler i arive! An verite mon dir zot, son met pou met li ansarz tou son byen.” (Matye 24:45, NW, 46, 47) Wi, ti pou annan en “lesklav” ki ti pou ganny apwente pour fourni manze spirityel. Sa lesklav ti pou fidel e anmenmtan pridan. Eski sa lesklav ti pou en dimoun, en dimoun ek son bann sikseser, oubyen i ti pou en lot keksoz? Vi ki sa lesklav fidel i fourni nouritir spirityel ki nou byen bezwen, alor i devret enteres nou pour rode lekel sa lesklav.
En Dimoun oubyen en Group Dimoun?
4. Ki mannyer nou konnen ki “lesklav fidel e pridan” pa kapab en sel dimoun?
4 “Sa lesklav fidel e pridan” pa kapab en sel dimoun. Akoz? Parski sa lesklav ti konmans fourni nouritir spirityel depi dan premye syek, e dapre Zezi, sa lesklav ti pou pe kontinyen fer sa kan son Met i arive an 1914. An tou, sa ti pou fer apepre 1,900 lannen ki sa dimoun ti pou pe servi fidelman. Ni menm Metousela pa ti viv sa kantite letan!—Zenez 5:27.
5. Eksplike akoz sa term “lesklav fidel e pridan” pa kapab pe refer avek sak Kretyen endividyelman?
5 Alor, eski sa term “lesklav fidel e pridan” i aplik pour sak Kretyen endividyelman? I vre ki tou Kretyen i bezwen fidel e pridan. Me i kler ki Zezi ti pe mazin en lot keksoz kan i ti koz lo “lesklav fidel e pridan.” Kot nou konn sa? Parski i ti dir ki ler met pou arive i ti pou met sa lesklav ansarz “tou son byen.” Ki mannyer sak Kretyen i kapab ansarz “tou” byen Senyer? Sa i enposib!
6. Ki mannyer nasyon Izrael ti pou fonksyonn konman “serviter” oubyen “lesklav” Bondye?
6 Alors, sel konklizyon ki fer sans, i ki Zezi ti pe refer avek en group Kretyen letan i ti dir “lesklav fidel e pridan.” Eski i posib pour en lesklav konpoze avek plizyer dimoun? Wi, i posib. Set san zan avan Kris ti vin lo later, Zeova ti refer avek nasyon Izrael antye konman “mon bann temwen” ek “mon serviter ki mon’n swazir.” (Izai 43:10) Tou manm nasyon Izrael depi 1513 A.N.L., kan Lalwa Moiz ti ganny donnen, ziska zour Lapannkot lannen 33 N.L. ti form parti sa serviter. Laplipar Izraelit ti napa nanryen pour fer avek ladministrasyon sa nasyon oubyen avek laranzman pour nouri zot spirityelman. Zeova ti servi bann lerwa, ziz, profet, pret, ek bann Levit pour akonpli sa bann latas. Kantmenm sa, Izrael konman en nasyon ti bezwen reprezant dominasyon Zeova e loue li parmi bann nasyon. Sak Izraelit ti bezwen servi konman en Temwen pour Zeova.—Deterononm 26:19; Izai 43:21; Malaki 2:7; Romen 3:1, 2.
En “Serviter” ti ganny retire
7. Akoz ansyen nasyon Izrael ti ganny retire konman “serviter” Bondye?
7 Vi ki nasyon Izrael ti “serviter” Bondye dan lepase, eski i sa lesklav ki Zezi ti pe koz lo la? Non, parski malerezman ansyen nasyon Izrael pa ti ni fidel ni pridan. Pol ti rezim sitiasyon Izrael letan i ti sit sa ki Zeova ti dir sa nasyon: “Se akoz zotmenm, bann Zwif, ki lezot pep i koz kont Bondye.” (Romen 2:24) Anfet, laplipar-di-tan nasyon Izrael ti rebel kont Zeova e finalman zot ti rezet Zezi. Se pour sa rezon ki Zeova ti rezet zot.—Matye 21:42, 43.
8. Kan ki en “serviter” ti ganny apwente pour ranplas nasyon Izrael, e konman sa ti arive?
8 Bann serviter fidel Zeova pa ti pou toultan reste san nouritir spirityel zis akoz sa “serviter,” Izrael, pa’n reste fidel. Zour Lapannkot lannen 33 N.L, senkant zour apre lanmor Zezi, lespri sen ti ganny verse lo apepre 120 son bann disip ki ti anler dan en lasanm an Zerizalenm. Sa moman la, en nouvo nasyon ti ne. Son nesans ti ganny proklanmen kan son bann manm ti konmans koz avek bann dimoun ki ti pe reste Zerizalenm konsernan “bann mervey ki Bondye in fer.” (Akt 2:11) Alor, sa nouvo nasyon, en nasyon spirityel, ti vin sa “serviter” ki ti pou fer tou nasyon konn laglwar Zeova e fourni manze kan i ler. (1 Pyer 2:9) I apropriye ki i ti ganny apele “Izrael Bondye.”—Galat 6:16, NW.
9. (a) Lekel ki form parti sa “lesklav fidel e pridan”? (b) Lekel “tou lezot lesklav”?
9 Tou manm “Izrael Bondye” i en Kretyen ki’n dedye son lavi avek Bondye, batize, e ganny swazir par lespri sen. Zot annan lespwar pour al viv dan lesyel. Alors, sa lekspresyon “lesklav fidel e pridan” i refer avek tou Kretyen swazir lo later ant lannen 33 N.L. ziska ozordi, zis parey tou Izraelit ki ti viv ant 1513 A.N.L. ziska Lapannkot 33 N.L. ti form parti sa serviter avan letan Kretyen. Me lekel “tou lezot lesklav,” ki ti ganny nouritir spirityel avek sa lesklav? Dan premye syek N.L., tou Kretyen ti annan sa lespwar pour al viv dan lesyel. Alors, sak Kretyen swazir endividyelman, pa konman en group, ti osi ganny konsidere konman tou lezot lesklav. Zot tou, enkli bann ki ti annan serten responsabilite dan kongregasyon, ti bezwen nouritir spirityel sorti kot sa lesklav.—1 Korentyen 12:12, 19-27; Ebre 5:11-13; 2 Pyer 3:15, 16.
“Sakenn son Louvraz”
10, 11. Ki mannyer nou konnen ki pa tou manm sa lesklav ki ti pou ganny menm travay pour fer?
10 Kantmenm “Izrael Bondye” i sa lesklav fidel e pridan ki annan en latas pour akonpli, sak manm i osi annan son prop responsabilite. Sa ki Zezi ti dir dan Mark 13:34 i montre sa klerman. I ti dir: “I pou parey en zonm ki pe al fer en vwayaz. Kan i kit son lakour i met son bann serviter ansarz; i donn sakenn son louvraz e i konmann gardyen pour veye.” (Nou ki’n met an italik.) Alor, sak manm ki form sa lesklav in ganny en travay pour fer. Sa se pour ogmant bann byen Kris lo later. I fer sa travay dapre son prop kapasite ek loportinite ki i gannyen.—Matye 25:14, 15.
11 Anplis ki sa, zapot Pyer ti dir bann Kretyen swazir dan son letan: “Sakenn antre zot, konman en bon ladministrater bann don ki Bondye in donn zot, itiliz sa bann don spesyal ki zot in resevwar pour fer dibyen lezot.” (1 Pyer 4:10, nou ki’n met an italik.) Alor, sa bann Kretyen swazir i annan responsabilite pour servi zot don ki Bondye in donn zot pour fer dibyen kanmarad. Deplis, sa ki Pyer ti dir i endike ki pa tou Kretyen ki ti pou annan menm kapasite, responsabilite, oubyen privilez. Me sak manm sa lesklav ti pou ede dan en fason ou en lot pour fer sa nasyon spirityel agrandi. Konman?
12. Ki mannyer sak manm sa lesklav, zonm konman fanm, ti ede rod lezot manm sa lesklav?
12 Premyerman, zot tou zot ti bezwen servi konman en temwen pour Zeova, setadir pres sa bon nouvel lo Rwayonm. (Izai 43:10-12; Matye 24:14) Zis avan i ti mont dan lesyel, Zezi ti donn lord son bann disip fidel, zonm konman fanm, pour al ansenny lezot. I ti dir: “Ale e fer tou pep vin mon bann disip. Batiz zot o non di-Per, di-Fis e di-Sent-Espri. Ansenny zot pour obei tou sa ki mon’n konmande. E konnen ki mwan mon avek zot toulezour, ziska lafen dimoun.”—Nou ki’n met an italik; Matye 28:19, 20.
13. Ki privilez tou Kretyen swazir ti gannyen?
13 Kan zot ti trouv bann nouvo disip, zot ti bezwen ansenny zot pour obei tou sa ki Kris ti’n komann son bann disip. Avek letan, bann ki ti aksepte sa bon nouvel ti kalifye pour ansenny lezot. Bann fitir manm sa lesklav sorti dan tou nasyon ti ganny nouritir spirityel ki nourisan. Tou Kretyen swazir, zonm konman fanm, ti kontribye pour fer disip. (Akt 2:17, 18) Sa travay ti pou kontinyen ziska lafen sa sistenm.
14. Lansennyman dan kongregasyon ti ganny rezerve pour ki sennla, e konman bann ser Kretyen swazir ti santi konsernan sa?
14 Bann nouvo Kretyen swazir ki ti ganny batize ti form parti sa lesklav. Nenport ki ki ti ansenny zot okonmansman, zot ti osi kontinyen ganny ansennyen par bann manm kongregasyon ki ti kalifye pour servi konman ansyen. (1 Timote 3:1-7; Tit 1:6-9) Sa bann zonm ki ti’n ganny apwente ti alor ganny sa privilez pour ede fer grandi sa nasyon dan en fason spesyal. Bann ser Kretyen fidel pa ti mekontan ki lansennyman dan kongregasyon ti ganny rezerve zis pour bann frer Kretyen. (1 Korentyen 14:34, 35) Okontrer, zot ti kontan pour benefisye avek travay dir ki bann frer dan kongregasyon ti fer e zot ti apresye bann privilez ki bann ser ti gannyen, enkli anmenn sa bon nouvel kot lezot. Bann ser Kretyen swazir ozordi i demontre menm limilite, san pran kont si bann ansyen dan zot kongregasyon i bann Kretyen swazir ou non.
15. Kote nouritir spirityel dan premye syek ti sorti prensipalman, e lekel ki ti fourni sa bann nouritir?
15 Bann nouritir spirityel debaz ki ti ganny donnen dan premye syek ti sorti direkteman dan let bann zapot ek lezot disip ki ti diriz aktivite Kretyen sa letan. Sa bann let ki zot ti ekrir, sirtou sa 27 liv enspire dan Lekritir Grek Kretyen, ti ganny sirkile partou dan bann kongregasyon e sirman bann ansyen ti servi zot pour baz zot lansennyman lo la. Dan sa fason, bann ki ti reprezant sa lesklav ti fourni bann Kretyen senser nouritir spirityel an abondans. Sa lesklav dan premye syek ti montre li fidel avek son latas ki i ti’n gannyen.
Sa “Lesklav” 19 Syek plitar
16, 17. Ki mannyer sa lesklav ti montre ki i ti pe fidelman akonpli son latas dan bann lannen avan 1914?
16 Me ki nou pou dir dan nou letan? Kan prezans Zezi ti konmanse an 1914, eski i ti vwar en group Kretyen swazir ki ti pe donn nouritir spirityel kan i ler? Sirman. Sa group ti pou kapab klerman ganny rekonnet par son bon fri ki i ti pou prodwir. (Matye 7:20) Listwar in montre ki sa i vre.
17 Kan Zezi ti arive, apepre 5,000 dimoun ki ti form sa lesklav ti byen okipe dan sa travay pour propaz laverite dan Labib. Zouvriye ti pti gin, me sa lesklav ti sey mazin plizyer bon metod pour propaz sa bon nouvel. (Matye 9:38) Par egzanp, laranzman ti ganny fer pour bann diskour lo bann topik Labib ganny pibliye dan apepre 2,000 zournal. Dan sa fason, laverite dan Parol Bondye ti ariv kot en dizenn milye lekter anmenmtan. Anplis ki sa, en progranm avek slayd kouler ek film ki ti dir pour wit er-d-tan ti ganny prepare. Gras a sa nouvo prezantasyon, mesaz Labib baze lo konmansman Kreasyon ziska lafen Renny Milener Kris, ti ganny transmet avek en lodyans plis ki nef milyon dimoun lo trwa kontinan. Bann piblikasyon ti en lot metod ki ti ganny servi. Par egzanp, an 1914 apepre 50,000 kopi sa magazin, Latour Veyer, ti ganny pibliye.
18. Kan Zezi ti fer sa lesklav ansarz tou son byen, e akoz?
18 Wi, kan sa Met ti arive, i ti vwar son lesklav fidel pe konsyansyezman nouri lezot lesklav e osi pe pres sa bon nouvel. Sa lesklav ti pou ganny plis responsabilite aprezan. Zezi ti dir: “An verite mon dir zot, son met pou met li ansarz tou son byen.” (Matye 24:47) Zezi ti fer sa an 1919, apre ki sa lesklav ti’n pas dan en moman leprev. Me akoz sa “lesklav fidel e pridan” ti ganny pli gro responsabilite? Parski bann byen son Met ti’n ogmante. Zezi ti’n vin lerwa an 1914.
19. Eksplike konman sa “gran lafoul” in ganny nouri spirityelman.
19 Ki sa bann byen ki sa Met ti met son lesklav fidel ansarz? Tou keksoz spirityel ki pour Li lo later. Par egzanp, apepre 20 an apre ki Kris ti vin lerwa an 1914, “en gran lafoul” ‘lezot mouton’ ti ganny idantifye. (Revelasyon 7:9; Zan 10:16) Zot pa ti bann manm “Izrael Bondye.” Zot ti bann zonm ek fanm senser ki kontan Zeova e anvi servi li zis parey bann Kretyen swazir. Me zot, zot ti annan lespwar pour viv lo later. An realite, zot ti dir avek “lesklav fidel e pridan”: “Nou pou al avek zot, akoz nou’n antann ki Bondye i avek zot.” (Zekarya 8:23) Sa bann nouvo Kretyen batize ti pran menm nouritir spirityel avek lezot lesklav ki ti’n ganny swazir par lespri sen. Depi sa, sa de group in manz lo menm latab spirityel. Pa sa i vreman en benediksyon pour sa “gran lafoul”!
20. Ki rol sa “gran lafoul” in zwe pour ogmant byen Senyer?
20 Avek lazwa, bann manm sa “gran lafoul” in zwenn ansanm avek sa lesklav pour pres sa bon nouvel. Anmezir ki zot prese, byen zot Met i ogmante lo later, ki fer ki “lesklav fidel e pridan” i ganny plis responsabilite. Vi ki ti annan ankor bokou dimoun ki ti pe rod laverite, i’n vin neseser pour agrandi bann fasilite lenprimri pour satisfer demann piblikasyon lo Labib. Bann biro brans Temwen Zeova in ganny etabli dan bokou pei. Misyonner in ganny anvoye dan “tou bann landrwa pli elwannyen lo later.” (Akt 1:8) Lakantite adorater Bondye in ogmante sorti depi anviron senk mil Kretyen swazir an 1914 pour ariv plis ki sis milyon ozordi. Lamazorite i form parti sa “gran lafoul.” Wi, byen sa Lerwa in ogmant bokou depi ki i’n ganny kouronnen an 1914!
21. Ki sa de parabol ki nou pou diskite dan nou lartik swivan?
21 Tousala i montre ki sa lesklav in montre li “fidel e pridan.” Zis apre ki i ti koz lo “lesklav fidel e pridan,” Zezi ti donn de parabol ki ti met lanfaz lo sa de kalite. Sa i parabol dis zenn fiy ek parabol trwa serviter. (Matye 25:1-30) Nou anvi konn plis lo la. Ki lenportans sa de parabol i annan pour nou ozordi? Nou pou vwar larepons sa kestyon dan lartik swivan.
Ki ou panse?
• Lekel ki form parti sa “lesklav fidel e pridan”?
• Lekel bann “lezot lesklav”?
• Kan ki sa lesklav fidel ti konmans ansarz tou byen Senyer, e akoz sa letan?
• Lekel ki’n ede ogmant byen Senyer dan bann lannen ki’n pase, e konman?
[Kestyon]
[Portre lo paz 24]
Sa lesklav ti akonpli son latas fidelman dan premye syek