Wan „srafu” di getrow èn di koni
Wan „srafu” di getrow èn di koni
„Suma na trutru a getrow èn koni srafu di en masra poti fu luku den futuboi fu en?”—MATEYUS 24:45.
1, 2. Fu san ede a de tumusi prenspari taki wi e kisi yeye nyanyan doronomo na ini a ten disi?
TAPU a bakadina fu tudewroko 11 Nisan 33 G.T., den disipel fu Yesus ben poti wan aksi di de tumusi prenspari gi wi na ini a ten disi. Den aksi Yesus: „San o de a marki fu yu denoya èn fu a kaba fu a grontapu sistema disi?” Yesus piki den fu di a fruteri den wan tumusi aparti profeititori. A ben taki fu wan bruya pisi ten fu orloku, angriten, gronseki, nanga siki. Èn dati ben o de soso „wan bigin fu wan banawtu di de leki a pen di wan uma e firi te a musu kisi en pikin”. Moro takru sani ben o kon. Disi na sani fu frede trutru!—Mateyus 24:3, 7, 8, 15-22; Lukas 21:10, 11.
2 Sensi 1914, bun furu fu a profeititori fu Yesus kon tru. A libisma famiri e firi a „banawtu” srefisrefi. Ma tru Kresten no abi fu frede. Yesus ben pramisi den taki a ben o sorgu den nanga bun yeye nyanyan. Fa Yesus seti sani gi wi na grontapu fu kisi yeye nyanyan doronomo, aladi a de na hemel now?
3. Sortu sani Yesus seti gi wi fu kisi „nyanyan na a reti ten”?
3 Yesus srefi sori san na a piki tapu na aksi dati. Di a ben fruteri a moi profeititori fu en, dan a aksi: „Suma na trutru a getrow èn koni srafu di en masra poti fu luku den futuboi fu en fu kan gi den nyanyan na a reti ten?” Dan a taki: „Koloku fu a srafu te en masra doro èn a si taki a srafu e du dati! Fu tru mi e taigi unu: A sa poti a srafu fu luku ala den sani di a abi” (Mateyus 24:45-47). Iya, wan „srafu” ben o de di kisi a wroko fu gi yeye nyanyan, èn a „srafu” dati ben o de getrow èn koni. Ma a srafu dati ben de wán spesrutu sma nomo? A ben de wan tu sma di ben o kon baka makandra, noso wan tra sani? Fu di a getrow srafu e prati yeye nyanyan di de tranga fanowdu, meki a ben o bun fu sabi suma na en.
„A getrow èn koni srafu” na wán sma nomo, noso wan grupu fu sma?
4. Fa wi sabi taki „a getrow èn koni srafu” no kan de wán sma nomo?
4 „A getrow èn koni srafu” no kan de wán sma nomo. Fu san ede? Bika a srafu bigin prati yeye nyanyan na ini a fosi yarihondro èn soleki fa Yesus ben taki, dan a srafu disi ben o prati nyanyan ete te a Masra ben o doro na ini 1914. Dati wani taki dati wán sma nomo ben o du diniwroko gi sowan 1900 yari langa na wan getrow fasi. Metusala srefi no ben libi solanga!—Genesis 5:27.
5. Fruklari fu san ede den wortu „getrow èn koni srafu” no abi fu du nanga ibri salfu Kresten aparti.
5 We dan, wi kan taki dati den wortu „getrow èn koni srafu” abi fu du nanga ibri Kresten aparti? A tru taki ala Kresten musu de getrow èn koni; ma a de krin fu si taki Yesus ben abi wan tra sani na prakseri di a ben taki fu „a getrow èn koni srafu”. Fa wi sabi dati? Fu di a ben taki dati „te en masra doro”, a ben o poti a srafu fu luku „ala den sani di a abi”. Fa ibri Kresten aparti ben o man luku „ala” den sani di a Masra abi? Dati no ben o man kwetikweti!
6. Fa a nâsi Israel ben musu de leki wan „futuboi” noso wan „srafu” fu Gado?
6 A wan-enkri sani di wi kan taki, na dati Yesus ben sori go na wan grupu fu Kresten di ben o de „a getrow èn koni srafu”. A kan taki disi e sori go na difrenti sma di e dini leki srafu? Iya. Seibi hondro yari bifo Krestes, dan Yehovah ben kari a heri nâsi Israel „mi kotoigi” nanga „mi futuboi di mi frukisi” (Yesaya 43:10). Ibri sma fu a nâsi Israel di ben kisi a Wet fu Moses èn di ben libi fu sensi 1513 b.G.T. te go miti a Pinksterfesa fu 33 G.T., ben de wan pisi fu a futuboi grupu disi. A moro bigi pisi fu den Israelsma no ben yepi fu tiri sani na ini a kondre, noso den no ben yepi fu sreka a yeye nyanyan. Yehovah ben gebroiki den kownu, den krutuman, den profeiti, den priester, nanga den Leifisma fu du den wroko dati. Toku, leki wan nâsi, Israel ben musu sori taki Yehovah de a moro hei tiriman èn den ben musu meki a glori fu en bekènti na mindri den nâsi. Ibri Israelsma ben musu de wan kotoigi fu Yehovah.—Deuteronomium 26:19; Yesaya 43:21; Maleaki 2:7; Romesma 3:1, 2.
Gado seni wan „futuboi” gowe
7. Fu san ede a nâsi Israel fu owruten no ben bun moro leki a „futuboi” fu Gado?
7 Israel ben de a „futuboi” fu Gado hondrohondro yari na fesi. Ma dati wani taki tu dati a ben de a srafu fu san Yesus ben taki? Nôno, dati no ben de so fu di na Israel fu owruten no ben de getrow èn den no ben koni. Paulus e fruteri fa a situwâsi ben de di a taki san Yehovah taigi a nâsi: „Fu unu ede den nâsi e fluku a nen fu Gado” (Romesma 2:24). Iya, Israel opo densrefi na wan tumusi ogri fasi teige Gado di den drai baka gi Yesus. Na a ten dati Yehovah srefi drai baka gi den.—Mateyus 21:42, 43.
8. O ten wan „futuboi” kisi a wroko fu teki a presi fu Israel, èn san ben de a situwâsi?
8 Fu di a „futuboi” Israel no ben de getrow moro, dan dati no ben wani taki dati getrow anbegiman no ben o kisi a yeye nyanyan moro. Na a Pinksterfesa fu 33 G.T., feifitenti dei baka na opobaka fu Yesus, dan sowan 120 disipel fu en kisi santa yeye di den ben de na ini wan tapusei kamra na ini Yerusalem. Na a momenti dati wan nyun nâsi ben gebore. Sondro frede den memre fu a nâsi bigin fruteri den sma di ben libi na ini Yerusalem fu „den tumusi moi sani di Gado du”. Na so fasi, sma ben kon sabi taki wan nyun nâsi ben gebore (Tori fu den Apostel 2:11). Sobun, a nyun nâsi dati, di ben de wan yeye nâsi, tron a „futuboi” di ben o meki a glori fu Yehovah bekènti na den kondre èn di ben o prati nyanyan na a yoisti ten (1 Petrus 2:9). A fiti, taki bakaten a „futuboi” disi kisi a nen „na Israel fu Gado.”—Galasiasma 6:16.
9. (a) Suma na a „getrow èn koni srafu”? (b) Suma na den „futuboi”?
9 Ibri memre fu „na Israel fu Gado” na wan Kresten di gi ensrefi abra, di dopu èn di salfu nanga santa yeye, èn di abi a howpu fu go na hemel. Fu dati ede den wortu „getrow èn koni srafu” abi fu du nanga ala den sma fu a salfu yeye nâsi dati di libi na grontapu fu sensi 33 G.T. teleki now. Disi ben de so tu gi ibri Israelsma di ben libi na ini a pisi ten fu 1513 b.G.T. teleki a Pinksterfesa fu 33 G.T. Den alamala ben de memre fu a futuboi grupu fu a ten bifo Krestes. Ma suma na den „futuboi” di e kisi a yeye nyanyan fu a srafu? Na ini a fosi yarihondro G.T., ala Kresten ben abi a howpu fu go na hemel. Fu dati ede den futuboi ben de salfu Kresten tu. A no a heri grupu den ben si leki a futuboi, ma ibri sma aparti. Ala sma, srefi den sma di ben abi bigi frantwortu na ini den gemeente, ben abi a yeye nyanyan fu a srafu fanowdu.—1 Korentesma 12:12, 19-27; Hebrewsma 5:11-13; 2 Petrus 3:15, 16.
’Ibriwan fu den musu du en eigi wroko’
10, 11. Fa wi sabi taki a no ala memre fu a srafu grupu abi a srefi wroko fu du?
10 Aladi „na Israel fu Gado” na a getrow èn koni srafu grupu di kisi wan wroko fu du, toku ibri memre fu a grupu disi abi en eigi frantwortu. Den wortu fu Yesus di skrifi na ini Markus 13:34 e sori disi krin. A ben taki: „A de leki wan man di ben go na wan tra kondre èn di ben gowe libi en oso gi den srafu fu en, fu meki den luku na oso èn ibriwan fu den ben musu du en eigi wroko èn a ben gi a waktiman a komando fu tan na ai.” Sobun ibri memre fu a srafu grupu kisi wan wroko fu du, namku fu meki den gudu di Yesus abi na grontapu kon moro furu. Ibri sma fu a srafu grupu e du a wroko disi soleki fa a man.—Mateyus 25:14, 15.
11 Moro fara, na apostel Petrus ben fruteri den salfu Kresten fu en ten: „Ibriwan fu unu kisi wan presenti; gebroiki a presenti disi fu dini makandra leki bun futuboi fu a bigi bun-ati di Gado sori na difrenti fasi” (1 Petrus 4:10). Sobun, den salfuwan abi a frantwortu fu dini makandra nanga den presenti di Gado gi den. Moro fara, den wortu fu Petrus e sori taki a no ala Kresten ben o abi a srefi koni fu du sani, a srefi frantwortu, noso a srefi grani. Ma ibri sma fu a srafu grupu ben kan yepi a yeye nâsi fu gro. Fa den ben kan du dati?
12. San ibri memre fu a srafu grupu du, awansi na mansma noso umasma, so taki a srafu ben kan gro?
12 Na a fosi presi, ibriwan abi a frantwortu fu de wan kotoigi fu Yehovah, fu preiki a bun nyunsu fu a Kownukondre (Yesaya 43:10-12; Mateyus 24:14). Leti bifo Yesus opo go na hemel, a gi ala den getrow disipel fu en, mansma nanga umasma, a komando fu de leriman. A ben taki: „Fu dati ede, go na ala kondre èn meki sma tron disipel, èn dopu den na ini a nen fu a Tata, fu a Manpikin èn fu a santa yeye. Leri den fu du ala san mi taigi unu. We, dan mi sa de nanga unu ala dei te na a kaba fu a grontapu disi.”—Mateyus 28:19, 20.
13. Sortu grani ala den salfuwan ben abi?
13 Te den disipel ben feni nyun disipel, dan den ben musu leri den finifini fu du ala den sani di Krestes ben komanderi den disipel fu en. Bakaten den wan di ben arki, ben tron sma di ben gi trawan leri. Na ini furu kondre den sma di ben kan tron memre fu a srafu grupu ben kisi bun yeye nyanyan. Ala Kresten, mansma nanga umasma, ben teki prati na a wroko disi fu meki disipel (Tori fu den Apostel 2:17, 18). A wroko disi ben musu go doro fu a ten di a srafu bigin nanga a wroko te go miti a kaba fu a seti fu sani disi.
14. Suma na ini a gemeente kisi a grani fu gi leri, èn fa getrow salfu umasma ben firi fu a tori dati?
14 Sma di ben teki dopu no solanga ete èn di salfu, ben tron memre fu a srafu grupu tu. Awansi suma ben gi den leri fosi, now den ben kisi leri fu sma na ini a gemeente di ben doro den markitiki fu dini leki owruman (1 Timoteyus 3:1-7; Titus 1:6-9). Den mansma disi di ben poti na wroko na ini a gemeente, ben kisi a spesrutu grani fu yepi a nâsi gro. Den getrow salfu Kresten umasma no ben mandi taki na soso Kresten mansma ben kan gi leri na ini a gemeente (1 Korentesma 14:34, 35). Na presi fu dati den ben prisiri fu di den kisi wini fu a tranga wroko di den mansma na ini a gemeente ben e du. Den ben warderi den grani tu di umasma ben kan kisi, soleki fu tyari a bun nyunsu gi trawan. Na ini a ten disi den salfu sisa e wroko fayafaya tu èn den e sori sakafasi, awansi den owruman di poti na wroko salfu, noso den no salfu.
15. San ben de wan fu den moro prenspari fasi fa a yeye nyanyan ben prati na ini a fosi yarihondro, èn suma ben teki fesi fu prati en?
15 A prenspari yeye nyanyan di sma ben kisi na ini a fosi yarihondro ben kon langalanga fu brifi di den apostel nanga tra disipel di ben teki fesi, ben skrifi. Den brifi di den ben skrifi, spesrutu den wan di de fu feni na mindri den 27 Kresten Griki Buku fu Bijbel di skrifi ondro a krakti fu santa yeye, ben seni go na den gemeente. Sondro tweifri den owruman ben gebroiki den brifi disi fu gi sma leri. Na a fasi disi den sma di ben teki presi gi a srafu ben prati a bun yeye nyanyan gi reti-ati Kresten. A srafu grupu fu a fosi yarihondro ben sori taki a ben du en wroko na wan getrow fasi.
Suma na a „srafu” 1900 yari baka dati
16, 17. Fa a srafu grupu sori taki a e du a wroko di a kisi na wan getrow fasi sensi a yari 1914?
16 Fa a de na ini a ten disi? Di a denoya fu Yesus bigin na ini 1914, dan a feni wan grupu fu salfu Kresten di ben prati nyanyan na wan getrow fasi èn na a yoisti ten? Iya, a feni so wan grupu trutru. A ben de krin fu si suma na a grupu disi, bika den ben meki moi froktu (Mateyus 7:20). A historia sensi a ten dati e sori taki disi tru.
17 Na a ten di Yesus doro, dan sowan 5000 sma fu a srafu grupu ben prati a waarheid fu Bijbel. Den wrokoman no ben furu, ma a srafu ben gebroiki wan tu koni fasi fu prati a bun nyunsu (Mateyus 9:38). Fu eksempre, sani ben seti fu druk Bijbel takimakandra na ini pikinmoro 2000 koranti. Na a fasi disi a waarheid fu Gado Wortu ben doro tin dusundusun sma wantewante. Boiti dati, wan programa di ben langa aiti yuru ben seti pe den ben moksi atosigi ini kloru nanga felem. A bakapisi fu a nyun programa disi ben de taki a Bijbel boskopu, di ben taki fu a bigin di Gado meki sani te go miti a kaba fu a Dusun Yari Tiri fu Krestes, ben doro pasa neigi milyun sma na dri pisi fu grontapu. Wan tra fasi fu prati a Bijbel boskopu ben de nanga yepi fu buku di den ben tyari kon na doro. Leki eksempre, na ini 1914 sowan 50.000 fu The Watchtower ben tyari kon na doro.
18. O ten Yesus poti a srafu fu luku ala den sani di a abi, èn fu san ede?
18 Iya, di a Masra kon, dan a si fa a getrow srafu fu en ben gi den futuboi nyanyan na wan opregti fasi èn taki den ben preiki a bun nyunsu tu. A srafu dati ben o kisi moro bigi frantwortu now. Yesus ben taki: „Fu tru mi e taigi unu: A sa poti a srafu fu luku ala den sani di a abi” (Mateyus 24:47). Yesus ben du disi na ini 1919, baka di a srafu ben pasa wan pisi ten pe den kisi tesi. Ma fu san ede „a getrow èn koni srafu” kisi moro bigi frantwortu? Bika den sani fu a Masra ben kon moro furu. Yesus ben kisi kownumakti na ini 1914.
19. Fruklari fa a „bigi ipi” kisi san den ben abi fanowdu na yeye fasi.
19 A Masra di tron kownu poti a getrow srafu disi na wroko fu luku den sani fu en. San na den sani disi fu a masra di a srafu musu luku? Ala den yeye sani na grontapu di de fu En. Leki eksempre, tu tenti yari baka di Krestes tron kownu na ini 1914, dan sma ben kon si suma de na ini „wan bigi ipi” fu „tra skapu” (Openbaring 7:9; Yohanes 10:16). Den sma disi no ben de salfu memre fu „na Israel fu Gado”, ma den ben de reti-ati mansma nanga umasma di abi a howpu fu tan na grontapu. Den ben lobi Yehovah, èn den ben wani dini en neleki fa den salfuwan e du dati. Te yu e luku en bun, dan den taigi „a getrow èn koni srafu”: „Wi wani go nanga unu, fu di wi yere taki Gado de nanga unu” (Sakaria 8:23). Den Kresten disi di ben teki dopu no solanga ete ben gebroiki a srefi bun yeye nyanyan di den salfu futuboi ben kisi, èn te now ete den tu grupu disi e nyan fu a srefi yeye tafra. Disi na trutru wan blesi gi den memre fu a „bigi ipi”!
20. Fa a „bigi ipi” meki den sani di a Masra abi kon moro furu?
20 Nanga prisiri den memre fu a „bigi ipi” moksi densrefi nanga a salfu srafu grupu leki preikiman fu a bun nyunsu. Aladi den ben e preiki, den sani di a Masra ben abi kon moro furu na grontapu, èn den frantwortu fu „a getrow èn koni srafu” ben kon moro furu tu. Fu di a grupu fu sma di ben e suku waarheid ben kon moro bigi, meki a ben de fanowdu fu bow moro presi fu meki buku. Disi ben musu du fu di moro sma ben wani kisi Bijbel publikâsi. Bijkantoro fu Yehovah Kotoigi ben bow na ini furu kondre. Zendeling ben e seni go „na a moro farawe presi fu grontapu” (Tori fu den Apostel 1:8). Na ini 1914, sowan feifi dusun salfuwan ben de. Ma a grupu fu sma di e prèise Gado gro kon moro leki siksi milyun sma na ini a ten disi, èn a moro bigi pisi fu den sma disi na fu a „bigi ipi”. Iya, den sani di a Kownu abi kon moro furu sensi a kisi kownumakti na ini 1914!
21. Fu sortu tu agersitori wi sa taki na ini na artikel di e kon?
21 Ala den sani disi e sori taki a srafu de „getrow èn koni”. Baka di Yesus ben taki fu „a getrow èn koni srafu”, dan a fruteri tu agersitori di ben poti prakseri na den fasi disi. A fruteri na agersitori fu den koni èn don yonguwenke nanga na agersitori fu den talenti (Mateyus 25:1-30). Wi wani sabi moro trutru! San den ondrofenitori dati wani taki gi wi na ini a ten disi? Wi sa poti prakseri na a aksi disi na ini na artikel di e kon.
San yu e prakseri?
• Suma na „a getrow èn koni srafu”?
• Suma na den „futuboi”?
• O ten a getrow srafu ben kisi a wroko fu luku ala den sani di a Masra abi, èn fu san ede a kisi a wroko na a ten dati?
• Suma yepi fu meki taki den sani di a Masra abi kon moro furu na ini den someni tenti yari di pasa no solanga ete, èn fa den du dati?
[Aksi fu a tori disi]
[Prenki na tapu bladzijde 10]
A srafu grupu fu a fosi yarihondro ben de getrow na ini a wroko di a ben kisi fu du