“Mukoma” A Fulufhedzeaho Na Wa Vhuṱali
“Mukoma” A Fulufhedzeaho Na Wa Vhuṱali
“Zwino, mukoma a fulufhedzeaho na wa vhuṱali ndi nnyi, we muṋe wawe a mu kumedza vhalanda vhawe.”—MATEO 24:45.
1, 2. Ndi ngani zwi zwa ndeme uri ri dzule ri tshi wana zwiḽiwa zwa muya ṋamusi?
NGA Ḽavhuvhili ḽa 11 Nisan, 33 C.E., vhafunziwa vha Yesu vho vhudzisa mbudziso ine ya vha ya ndeme na kha riṋe ṋamusi. Vho mu vhudzisa vha ri: “Ri vhudze; zwi ḓo bvelela lini; U ri vhudze zwiné ra ḓo ḓivha ngazwo’ zwauri u vhuya hau na vhufhelo ha ḽifhasi zwi tsini.” A tshi vha fhindula, Yesu o amba maipfi a swayeaho vhukuma a vhuporofita. O amba nga ha tshifhinga tsha dzikhakhathi, tsha nndwa, nḓala, midzinginyo, na malwadze. Na uri zwenezwo zwoṱhe zwo vha zwi tshi ḓo vha hu “hone u ranga ha maṱungu a ḓaho.” Nahone zwiimo zwo vha zwi tshi ḓo ṋaṋa u hulela. Zwo vha zwi zwilavhelelwa zwi tshuwisaho lungafhani!—Mateo 24:3, 7, 8, 15-22; Luka 21:10, 11.
2 U bva nga 1914, vhunzhi ha masia a vhuporofita ha Yesu o ḓadzea. “Maṱungu” o ḓala kha vhathu vhoṱhe nga u tou angaredza. Naho zwo ralo, Vhakriste vha ngoho a vha faneli u tshuwa. Yesu o fulufhedzisa uri u ḓo vha khwaṱhisa nga zwiḽiwa zwa muya. Samusi zwa zwino Yesu e ṱaḓulu, o lugiselela hani uri ri kone u wana zwiḽiwa zwa muya fhano kha ḽifhasi?
3. Ndi ndugiselelo dzifhio dze Yesu a dzi ita uri ri kone u wana “zwiḽiwa nga tshikhathi tshazwo”?
3 Yesu o fhindula yeneyo mbudziso nga ene muṋe. Musi a tshi khou ṋea honoho vhuporofita, o amba a ri: “Zwino, mukoma a fulufhedzeaho na wa vhuṱali ndi nnyi, we muṋe wawe a mu kumedza vhalanda vhawe uri a vha fhe zwiḽiwa nga tshikhathi tshazwo.” Nga zwenezwo a ri: “Mashudu! mukoma uyo, ané muṋe wawe a tshi vhuya, a mu wana a tshi ita zwe a laiwa. Ngoho, ndi ri: U ḓo mu kumedza thakha yawe yoṱhe.” (Mateo 24:45-47) Vhukuma, ho vha hu tshi ḓo vha na “mukoma” we a vha a tshi ḓo ṋewa mushumo wa u ṋea vhathu zwiḽiwa zwa muya, “mukoma” a fulufhedzeaho na wa vhuṱali. Naa onoyo mukoma o vha e muthu muthihi, tshigwada, kana o vha e tshiṅwe tshithu? Samusi mukoma a fulufhedzeaho a tshi ṋea zwiḽiwa zwinzhi zwa muya zwa ndeme, ri a ṱoḓa u ḓivha phindulo.
Naa Ndi Muthu Muthihi Kana Ndi Tshigwada?
4. Ri zwi ḓivha hani uri zwi nga si konadzee uri “mukoma a fulufhedzeaho na wa vhuṱali” a vhe muthu muthihi?
4 Zwi nga si konadzee uri “mukoma a fulufhedzeaho na wa vhuṱali” hu vhe muthu muthihi. Ndi ngani? Ngauri onoyo mukoma o thoma u ṋekedza zwiḽiwa zwa muya u bva nga ḓana ḽa u thoma ḽa miṅwaha, nahone u ya nga Yesu, mukoma o vha a tshi ḓo ita zwenezwo u vhuya u swika Muṋe a tshi vhuya nga 1914. Zwenezwo zwo vha zwi tshi amba uri muthu muthihi o vha a tshi ḓo shuma miṅwaha i ṱoḓaho u vha 1900 a tshi khou fulufhedzea tshumeloni. Na Methusala ho ngo tshila u swika henefho!—Genesi 5:27.
5. Ṱalutshedzani uri ndi ngani dzina “mukoma a fulufhedzeaho na wa vhuṱali” ḽi sa ambeli kha Mukriste nga muthihi nga muthihi.
5 Fhedzi, naa dzina “mukoma a fulufhedzeaho na wa vhuṱali” ḽi nga vha ḽi tshi imela Vhakriste nga muthihi nga muthihi? Ndi ngoho uri Vhakriste vhoṱhe vha fanela u fulufhedzea na u vha na vhuṱali; naho zwo ralo, Yesu o vha a tshi khou ambela kha tshiṅwe tshithu tsho tou livhaho musi a tshi amba nga ha “mukoma a fulufhedzeaho na wa vhuṱali.” Zwenezwo ri zwi ḓivha hani? Ngauri o amba uri ‘musi muṋe wawe a tshi vhuya’ u ḓo mu kumedza “thakha yawe yoṱhe.” Mukriste muṅwe na muṅwe a nga kumedzwa hani zwoṱhe—thakha “yoṱhe” ya Murena? A zwi konadzei!
6. Lushaka lwa Isiraele lwo vha lu tshi fanela u shuma sa “mulanda,” kana “mukoma” wa Mudzimu nga nḓila-ḓe?
6 Nga zwenezwo, ri nga phetha nga hu pfalaho uri Yesu o vha tshi khou ambela kha tshigwada tsha Vhakriste musi a tshi amba nga ha “mukoma a fulufhedzeaho na wa vhuṱali.” Naa zwi a konadzea u ambela kha vhathu vhanzhi sa mulanda? Ee. Miṅwaha ya maḓana a sumbe nga phanḓa ha musi Kristo a sa athu bebiwa, Yehova o ambela kha lushaka lwoṱhe lwa Vhaisiraele a ri ‘ṱhanzi dzanga’ na ‘mulanda wanga we nda mu ṋanga.’ (Yesaya 43:10, maḽeḓeretsendama ndi ashu.) Muraḓo muṅwe na muṅwe wa lwonolu lushaka lwa Vhaisiraele u bva nga 1513 B.C.E., musi lu tshi ṋewa Mulayo wa Mushe, u swika nga Pentekoste ya 33 C.E. wo vha u tshipiḓa tsha tshenetsho tshigwada tsha mulanda. Vhunzhi ha Vhaisiraele vho vha vha sa ṱanganeli kha mafhungo a lushaka kana u dzudzanya zwiḽiwa zwa muya. Yehova o vha a tshi shumisa mahosi, vhahaṱuli, vhaporofita, vhotshifhe, na Vha-Levi u ita wonoyo mushumo. Naho zwo ralo, sa lushaka, Vhaisiraele vho vha vha tshi fanela u imela vhuvhusahoṱhe ha Yehova na u mu rendisa kha dzi tshaka. Muisiraele muṅwe na muṅwe o vha a tshi fanela u vha ṱhanzi ya Yehova.—Doiteronomio 26:19; Yesaya 43:21; Maleaxi 2:7; Vha-Roma 3:1, 2.
“Mulanda” U A Pandelwa
7. Ndi ngani lushaka lwa kale lwa Vhaisiraele lu songo tsha fanelea u vha “mulanda” wa Mudzimu?
7 Samusi Vhaisiraele vho vha vhe “mulanda” wa Mudzimu maḓanani manzhi a miṅwaha o fhiraho, naa vho vha vha tshi dovha vha vha mukoma we Yesu a amba nga hae? Hai, ngauri Vhaisiraele vho mbo ḓi litsha u vha vha fulufhedzeaho na u vha na vhuṱali nga nḓila i pfisaho vhuṱungu. Paulo o ṱalutshedza zwenezwo zwiimo nga u tou pfufhifhadza musi a tshi redza maipfi e Yehova a a vhudza lwonolo lushaka a tshi ri: “Dzina ḽa Mudzimu ḽi ṱambuludzwa nga vho inwi vhukati ha Vha-nnḓa.” (Vha-Roma 2:24) Vhukuma, Vhaisiraele vho swika kha vhuimo ha nṱha ha u vutshela musi vha tshi landula Yesu, nga zwenezwo Yehova a vha landula.—Mateo 21:42, 43.
8. “Mulanda” o vhewa lini u itela u dzhiela vhudzulo Vhaisiraele, nahone nga fhasi ha zwiimo zwifhio?
8 U sa fulufhedzea ha “mulanda” ane a vha lushaka lwa Vhaisiraele, a zwo ngo amba uri vharabeli vha fulufhedzeaho a vha tsha ḓo wana zwiḽiwa zwa muya lwa tshoṱhe. Nga murahu ha maḓuvha a 50 musi Yesu o no vuswa vhafuni, nga Pentekoste ya 33 C.E., muyamukhethwa wo shululelwa kha vhafunziwa vhawe vha 120 nḓuni ya nṱha ya Yerusalema. Nga tshenetsho tshifhinga, ho mbo ḓi bebwa lushaka luswa. Zwo tea, u bebwa halwo ho mbo ḓi thoma u ḓivhadzwa musi miraḓo yalwo i re na tshivhindi i tshi thoma u vhudza vhathu vhoṱhe vha Yerusalema nga ha “mishumo mihulu ya Mudzimu.” (Mishumo 2:11) Ngauralo, lwonolo lushaka luswa, lushaka lwa muya, lwo mbo ḓi vha “mulanda” we a vha a tshi ḓo ḓivhadza vhugala ha Yehova kha dzitshaka na u bveledza zwiḽiwa nga tshifhinga tshazwo. (1 Petro 2:9) Zwo tea, lwo mbo ḓi vhidzwa “Isiraele wa Mudzimu.”—Vha-Galata 6:16.
9. (a) Ndi vhafhio vhane vha vhumba tshigwada tsha “mukoma a fulufhedzeaho na wa vhuṱali”? (b) “Vhalanda” ndi vhafhio?
9 Muraḓo muṅwe na muṅwe wa “Isiraele wa Mudzimu” ndi Mukriste o ḓiṋekedzaho, o lovhedzwaho na u ḓodzwa nga muyamukhethwa na u vha na fulufhelo ḽa u tshila ṱaḓulu. Nga zwenezwo, mubulo une wa ri “mukoma a fulufhedzeaho na wa vhuṱali” u ambela kha tshigwada tsha miraḓo yoṱhe ya lushaka lwo ḓodzwaho nga muya i re hone fhano kha ḽifhasi, zwihuluhulu u bva nga 33 C.E. u swika zwino, samusi Muisiraele muṅwe na muṅwe we a tshila u bva nga 1513 B.C.E. u swika nga Pentekoste ya 33 C.E. o vha e tshipiḓa tsha tshigwada tsha mulanda tsha nga phanda ha Vhukriste. Ngauralo, “vhalanda” ndi vhafhio, vhane vha ṋewa zwiḽiwa zwa muya zwi bvaho kha mukoma? Ḓanani ḽa u thoma ḽa miṅwaha C.E., Mukriste muṅwe na muṅwe o vha e na fulufhelo ḽa u tshila ṱaḓulu. Nga zwenezwo, vho vha vhe Vhakriste vho ḓodzwaho, hu si sa tshigwada, fhedzi nga muthihi nga muthihi. Vhoṱhe, u katela na vhane vha ṱhogomela tshivhidzo, vho vha vha tshi tea u ḽa zwiḽiwa zwa muya zwi bvaho kha mukoma.—1 Vha-Korinta 12:12, 19-27; Vha-Heberu 5:11-13; 2 Petro 3:15, 16.
“Vhoṱhe O Vha Fha Mishumo Yavho”
10, 11. Ri zwi ḓivha hani uri miraḓo ya tshigwada tsha mukoma a i na mishumo i fanaho?
10 Samusi “Isiraele wa Mudzimu” e tshigwada tsha mukoma a fulufhedzeaho na wa vhuṱali tshi re na mushumo we tsha ṋewa wone, muraḓo muṅwe na muṅwe watsho u na mushumo wawo. Maipfi a Yesu o ṅwalwaho kha Marko 13:34 a vhea zwenezwi zwithu khagala. O ri: “Nga zwi nge zwa muthu a faraho lwendo, a siaho nnḓu yawe ó ṋea vhalanda vhawe maanḓa, vhoṱhe ó vha fha mishumo yavho, ó laya muli̗ndi wa muṋango uri a dzule ó fhaṱuwa.” (Maḽeḓeretsendama ndi ashu.) Ngauralo muraḓo muṅwe na muṅwe wa tshigwada tsha mukoma u na mushumo wawo—wa u engedza thakha ya Kristo ya kha ḽifhasi. U ita wonoyu mushumo u ya nga maanḓa na zwibuli zwawo.—Mateo 25:14, 15.
11 Zwiṅwe-hafhu, muapostola Petro o vhudza Vhakriste vho ḓodzwaho vha misini yawe a ri: “U shumelana ha muṅwe a tshi shumela muṅwe hu eḓane na mukanzwo wa tshilidzi we a ṋewa; ni vhe vhakoma vho lugaho, vha kovhaho tshilidzi tsha Mudzimu tsha mivhala minzhi.” (1 Petro 4:10, maḽeḓeretsendama ndi ashu.) Ngauralo, vhenevho vhaḓodzwa vho vha vhe na vhuḓifhinduleli ha u shumelana vha tshi shumisa zwifhiwa zwe vha ṋewa nga Mudzimu. Hafhu, maipfi a Petro a sumbedza uri Vhakriste vhoṱhe a vha na vhukoni vhu fanaho, vhuḓifhinduleli na ndugelo dzi fanaho. Naho zwo ralo, muraḓo muṅwe na muṅwe wa tshigwada tsha mukoma a nga thusa nga dziṅwe nḓila u hulisa lushaka lwa muya. Nga nḓila-ḓe?
12. Muraḓo muṅwe na muṅwe wa tshigwada tsha mukoma, hu sa londwi uri ndi munna kana ndi musadzi, u thusa hani kha u engedza tshigwada tsha mukoma?
12 Tsha u thoma, muṅwe na muṅwe o vha o tea u vha ṱhanzi ya Yehova, na u huwelela mafhungo maḓifha a Muvhuso. (Yesaya 43:10-12; Mateo 24:14) Nga phanḓanyana ha musi a sa athu gonya ṱaḓulu, Yesu o vhudza vhafunziwa vhawe vhoṱhe vha vhanna na vhasadzi vha fulufhedzeaho uri vha vhe vhagudisi. O ri: “Iyani-ha ni ite vhathu vhoṱhe vhafunziwa nga u vha lovhedza dzinani ḽa Khotsi na ḽa Murwa na ḽa Muya-mukhethwa. Ni vha funze u ita zwoṱhe zwe nda ni laya. Huno vhonani, ndi na’nwi misi yoṱhe u swika vhufheloni ha ḽifhasi.”—Mateo 28:19, 20, maḽeḓeretsendama ndi ashu.
13. Ndi ndugelo ifhio ye vhaḓodzwa vhoṱhe vha ḓiphina ngayo?
13 Musi vhafunziwa vhaswa vha tshi wanala, vho vha vha tshi tea u funzwa nga vhuronwane u ita zwoṱhe zwe Kristo a laedza vhafunziwa vhawe. Nga u ya ha tshifhinga, vhane vha aravha zwavhuḓi vho vha vha tshi ḓo fanelea u funza vhaṅwe. Zwiḽiwa zwa muya zwi fushaho zwo ṋekedzwa miraḓo yoṱhe ya tshigwada tsha mukoma kha tshaka nnzhi. Vhakriste vhoṱhe vho ḓodzwaho, vhanna na vhasadzi vho ṱanganela kha wonoyu mushumo wa u ita vhafunziwa. (Mishumo 18:24-26) Wonoyu mushumo wo vha u tshi tea u bvela phanḓa u bva tshifhingani tshee mukoma a thoma ngatsho u shuma u swika vhufheloni ha ano maitele a zwithu.
14. Ndi vhonnyi vhe vha vha vha tshi fanela u funza tshivhidzoni, nahone vhasadzi vha fulufhedzeaho vho ḓodzwaho vho ḓipfa hani nga zwenezwo?
14 Vhaḓodzwa vha kha ḓi bvaho u lovhedzwa vho mbo ḓi vha tshipiḓa tsha mukoma, nahone hu sa londwi uri vho funzwa nga vhonnyi u thomani, vho dovha vha wana vhulivhisi vhu bvaho kha miraḓo ya tshivhidzo ye ya vha i tshi fanelea nga lwa maṅwalo u shuma sa vhanna vhahulwane. (1 Timotheo 3:1-7; Tito 1:6-9) Vhenevha vhanna vho ḓodzwaho vho mbo ḓi vha na ndugelo ya u thusa kha u alusa lushaka nga nḓila yo khetheaho. Vhaḓodzwa vha fulufhedzeaho vha vhasadzi a vho ngo hana mbuno ya uri nyambo dza tshivhidzo dzo vha dzi tshi tea u ṋewa nga vhanna vha Vhakriste fhedzi. (1 Vha-Korinta 14:34, 35) Nṱhani ha zwenezwo, vho vha vho takalela u vhuyelwa nga mishumo ya biko ya miraḓo ya tshivhidzo ya vhanna nahone vho vha vha tshi dzhiela nṱha ndugelo dzo khetheaho tshumeloni yo ṋewaho vhasadzi, u katela na u huwelela mafhungo maḓifha kha vhaṅwe. Ṋamusi, vhahashu vha tshisadzini vha fhiseaho vha sumbedza muya u fanaho wa u ḓiṱukufhadza, hu sa londwi uri vhahulwane ndi vhaṅwe vha vhaḓodzwa kana hai?
15. Tshisima tshihulwane tsha zwiḽiwa zwa muya ḓanani ḽa thoma ḽa miṅwaha tsho vha tshi tshifhio, nahone ndi vhonnyi vhe vha ranga phanḓa kha u ṋekedza zwenezwo zwiḽiwa?
15 Zwiḽiwa zwa muya zwa mutheo zwe zwa vha zwi tshi phaḓaladzwa kha ḓana ḽa u thoma ḽa miṅwaha zwo vha zwo tou ṅwaliwa nga vhaapostola na vhaṅwe vhafunziwa vhe vha vha vha tshi khou ranga phanḓa. Enea maṅwalo—zwihuluhulu bugu dza 27 dzo hevhedzwaho dzine dza vhumba Maṅwalo a Tshigerika a Tshikriste—dzo phaḓaladzwa na zwivhidzo nahone zwi tou pfala uri dzo shuma sa pfunzo dza mutheo dze dza vha dzi tshi shumiswa nga vhahulwane vha zwivhidzo. Nga yeneyi nḓila, vhaimeleli vha mukoma vho phaḓaladza nga u fulufhedzea zwiḽiwa zwa muya kha Vhakriste vha fulufhedzeaho. Tshigwada tsha mukoma tsha ḓana ḽa thoma ḽa miṅwaha tsho ita mushumo we tsha ṋewa wone nga u fulufhedzea.
“Mukoma” Nga Murahu Ha Miṅwaha I Ṱoḓaho U Vha 1900
16, 17. Tshigwada tsha mukoma tsho sumbedza hani uri tshi khou ita mushumo watsho nga u fulufhedzea u bva nga 1914?
16 Hu pfi mini nga ṋamusi? Musi u vha hone ha Yesu hu tshi thoma, nga 1914, naa o wana tshigwada tsha Vhakriste vho ḓodzwaho tshi tshi khou phaḓaladza zwiḽiwa nga tshifhinga tshazwo nga u fulufhedzea? O wana tshi tshi khou ita nga u ralo. Tshenetshi tshigwada tsho vhonala nga ṅwambo wa mitshelo yavhuḓi ye tsha vha tshi tshi khou i aṋwa. (Mateo 7:20) Ḓivhazwakale i sumbedza uri honoho u vhonala ho vha ho tea.
17 Musi Yesu a tshi vhuya, vhaṅwe vhalanda vha ṱoḓaho u vha 5000 vho vha vho farakanea nga u phaḓaladza mafhungo-ngoho a Bivhili. Vhashumi vho vha vhe si vhanzhi, fhedzi mukoma o shumisa maitele manzhi o fhambanaho u itela u phaḓaladza mafhungo maḓifha. (Mateo 9:38) Sa tsumbo, ho itwa ndugiselelo dza uri hu vhe na pfunzo dza Bivhili kha gurannḓa dzi swikaho 2000. Nga yeneyi nḓila, mafhungo-ngoho a Ipfi ḽa Mudzimu o mbo ḓi swikelela vhathu vha swikaho zwigidi zwa fumi nga kathihi. Hafhu, ho dzudzanywa mbekanyamushumo ya awara dza malo u katela na dzi-slide dzi re na mivhala yo fhambanaho na zwifanyiso zwo fhambanaho. Nga ṅwambo wa wonoyo musumbedzo, mulaedza wa Bivhili, u bva mathomoni a Tsiko u swika mafheloni a Miṅwaha ya Tshigidi ya Vhuvhusi ha Kristo, wo mbo ḓi huwelelwa kha vha thetshelesi vhe vha vha vha tshi fhira milioni dza ṱahe kha madzhango mararu. U gandisa khandiso o vha e maṅwe a maitele e a vha a tshi shumiswa. Sa tsumbo, nga 1914 ho phaḓaladzwa khandiso dza wonoyu magazini dzi ṱoḓaho u vha 50 000.
18. Yesu o ṋea mukoma thakha yawe yoṱhe lini, nahone ndi ngani?
18 Vhukuma, musi Muṋe a tshi vhuya, o wana mukoma wawe a fulufhedzeaho a tshi khou bvela phanḓa u fusha vhalanda na u vhona uri mushumo wa u huwelela mafhungo maḓifha u khou itwa. Zwa zwino, mukoma o lindelwa nga mushumo muhulwane vhukuma. Yesu o ri: “Ngoho, ndi ri: U ḓo mu kumedza thakha yawe yoṱhe.” (Mateo 24:47) Yesu o ita zwenezwi nga 1919, musi mukoma o no fhira tshifhinga tsha u lingwa. Ngauralo, ndi ngani “mukoma a fulufhedzea na wa vhuṱali” o wana mushumo muhulwane vhukuma? Ngauri Muṋe o wana thakha yawe yo no engedzea. Yesu o ṋewa vhuvhusi nga 1914.
19. Ṱalutshedzani uri ṱhoḓea dza zwiḽiwa zwa muya dza vha “gogo ḽihulu” dzo fushwa hani.
19 Ndi dzifhio thakha dze Muṋe ane a kha ḓi tou bva u ṋewa vhuhosi a dzi kumedza mukoma wawe a fulufhedzeaho? Ndi zwithu Zwawe zwoṱhe zwa muya zwi re fhano kha ḽifhasi. Sa tsumbo, miṅwaha ya mahumi mavhili yo fhelaho nga murahu ha u ṋewa ha Kristo vhuhosi nga 1914, ho thoma u vhonala “gogo ḽihulu” ḽa vha “dziṅwe nngu.” (Ndzumbululo 7:9; Yohane 10:16) Ho vha hu si miraḓo ya “Isiraele wa Mudzimu” o ḓodzwaho, fhedzi ho vha hu vhanna na vhasadzi vha re na fulufhelo ḽa u tshila kha ḽifhasi vhane vha funa Yehova na vhane vha ṱoḓa u mu shumela samusi vhaḓodzwa vho ita nga u ralo. Zwi re zwone ndi u ri, vho vhudza “mukoma a fulufhedzeaho na wa vhuṱali” vha ri: “Litshani ri tshimbile na vho-inwi, ngauri ro zwi pfa zwauri Mudzimu u na inwi.” (Sakaria 8:23) Vhenevha Vhakriste vhane vha kha ḓi tou bva u lovhedzwa vha ṱanganela kha zwiḽiwa zwa muya zwi fanaho na zwa vhaḓodzwa, nahone zwenezwo zwigwada zwivhili ndi kale zwi tshi khou ḽa zwiḽiwa zwa muya zwoṱhe. Zwenezwi zwo vha phaṱhutshedzo lungafhani kha miraḓo ya “gogo ḽihulu”!
20. Vha “gogo ḽihulu” vho ita mushumo ufhio kha u engedzea ha thakha ya Murena?
20 Miraḓo ya “gogo ḽihulu” i a ṱanganela nga dakalo na tshigwada tsha mukoma o ḓodzwaho kha u huwelela mafhungo maḓifha. Musi vha tshi khou huwelela, thakha ya Muṋe ya kha ḽifhasi i a engedzea, zwi tshi engedza mushumo wa “mukoma a fulufhedzeaho na wa vhuṱali.” Musi hu tshi vha na vhathu vhanzhi vhane vha vha na dzangalelo kha mafhungo-ngoho, hu a vha na ṱhoḓea yo engedzeaho ya fhethu ha u gandisela u itela u vha fusha nga khandiso dza Bivhili. Ho fhaṱiwa ofisi dza davhi ḽa Ṱhanzi dza Yehova dzo engedzeaho kha mashango manzhi. Ho rumelwa vharumiwa “u swika nga mugumo wa shango.” (Mishumo 1:8) U bva kha vhaḓodzwa vha ṱoḓaho u vha zwigidi zwiṱanu nga 1914, ho mbo ḓi vha na vhathu vha fhiraho milioni dza rathi vhane vha renda Mudzimu ṋamusi, nahone vhunzhi havho ndi vha “gogo ḽihulu.” Vhukuma, thakha ya Khosi yo engedzea zwihulwane u bva tshee a ṋewa vhuhosi nga 1914!
21. Ndi zwifanyiso zwifhio zwivhili zwine ra ḓo zwi haseledza theroni i tevhelaho?
21 Zwoṱhe hezwi zwi sumbedza uri mukoma u a ‘fulufhedzea nahone u na vhuṱali.’ Nga murahunyana ha musi o no amba nga ha “mukoma a fulufhedzeaho na wa vhuṱali,” Yesu o ṋea zwifanyiso zwivhili zwe zwa sumbedza dzenedzo pfaneleo: o amba nga ha vhasidzana vha vhuṱali na vha matsilu nahone a dovha a amba nga ha mali. (Mateo 25:1-30) Zwenezwo zwifanyiso zwi ita uri ri vhe dzangalelo lungafhani! Zwenezwo zwifanyiso zwi ri funza mini ṋamusi? Ri ḓo ṱhogomela yeneyo mbudziso theroni i tevhelaho.
Ni Humbula Mini?
• Ndi vhafhio vhane vha vhumba “mukoma a fulufhedzeaho na wa vhuṱali”?
• “Vhalanda” ndi vhafhio?
• Mukoma a fulufhedzeaho o ṋewa lini thakha yoṱhe ya Murena, nahone ndi ngani o ṋewa nga tshenetsho tshifhinga?
• Ndi vhafhio vhe vha thusa kha u engedza thakha ya Murena mahumi a miṅwaha a zwenezwino, nahone nga nḓila-ḓe?
[Mbudziso Dza Pfunzo]
[Zwifanyiso kha siaṱari 10]
Tshigwada tsha mukoma tsha ḓana ḽa u thoma ḽa miṅwaha tsho sumbedza u fulufhedzea kha mushumo watsho