Ikaw ba Nagatutok sa Ganti?

ANG sakit inanayng mograbe. Una, menosan niini ang gilapdon sa panan-aw sa usa ka tawo. Kon dili matambalan, daoton niini ang sentro nga panan-aw. Ngadtongadto, makapahinabo kinig bug-os nga pagkabuta. Unsa man kini? Ang glaucoma—usa ka pangunang hinungdan sa pagkabuta.

Maingon nga posible nga mawad-an kitag literal nga panan-aw nga dili lang makamatikod niana, posible usab nga mawad-an kitag usa ka mas bililhong matang sa panan-aw—atong espirituwal nga panan-aw. Busa, hinungdanon nga huptan natong tin-aw kaayo ang espirituwal nga mga butang diha sa atong hunahuna.

Hupti nga Tin-aw Kaayo sa Hunahuna ang Ganti

Lakip sa “mga butang nga dili-makita” sa atong literal nga mga mata mao ang mahimayaong ganti sa kinabuhing walay kataposan, nga gitanyag ni Jehova sa iyang maunongong mga alagad. (2 Corinto 4:18) Siyempre, ang pangunang hinungdan nga ang mga Kristohanon nag-alagad sa Diyos maoy tungod sa ilang gugma kaniya. (Mateo 22:37) Bisan pa niana, buot ni Jehova nga kita mahinamong magpaabot sa atong ganti. Buot niya nga ilhon nato siya ingong usa ka mahinatagong Amahan nga “maoy tigganti sa mga matinuorong nagapangita kaniya.” (Hebreohanon 11:6) Busa, kadtong nakaila gayod sa Diyos ug nahigugma kaniya nagpabili sa iyang gisaad nga mga panalangin ug nangandoy sa mga katumanan niini.—Roma 8:19, 24, 25.

Daghang magbabasa niining magasina ug sa kauban niini, ang Pagmata!, nalingaw sa mga hulagway nga naglarawan sa umaabot nga Paraisong yuta. Tinuod, wala kita masayod sa tukma kon sama gayod sa unsa ang Paraiso, ug ang napatik nga mga hulagway maoy artistikong pagpadayag lang binase sa mga teksto sa Bibliya sama sa Isaias 11:6-9. Bisan pa niana, usa ka Kristohanong babaye miingon: “Sa dihang makakita akog mga hulagway sa umaabot nga Paraiso diha sa Ang Bantayanang Torre ug Pagmata!, ako kining tan-awon pag-ayo, sama sa himoon sa usa ka tawo sa dihang motan-awg brosyur sa usa ka lugar nga adtoanan sa mga turista. Gihanduraw nako ang akong kaugalingon nga atua didto kay dinhi niining dapita gayod ako naglaom mopuyo sa gitakdang panahon sa Diyos.”

Sama usab niana ang gibati ni apostol Pablo bahin sa iyang ‘pagkatinawag sa itaas.’ Wala niya isipa ang iyang kaugalingon nga nakahupot na niini, kay kinahanglang pamatud-an pa niya ang iyang kaugalingon nga matinumanon hangtod sa kataposan. Apan siya padayong “nagapangab-ot sa mga butang sa unahan.” (Filipos 3:13, 14) Sa susama, giantos ni Jesus ang kamatayon sa usa ka sakitanang estaka “tungod sa kalipay nga gibutang sa iyang atubangan.”—Hebreohanon 12:2.

Nagduhaduha ka ba sukad kon kaha makasulod ka sa bag-ong kalibotan? Maayo gayod nga dili mahimong sobra ka masaligon, sanglit ang atong pagdawat sa ganti nga kinabuhi nagdepende sa atong pagpabiling matinumanon hangtod sa kataposan. (Mateo 24:13) Apan, kon maningkamot kita kutob sa mahimo sa pagtuman sa mga kinahanglanon sa Diyos, kita aduna gayoy maayong katarongan sa pagsalig nga makabaton sa ganti. Hinumdomi  nga si Jehova “wala magtinguha nga adunay malaglag apan nagtinguha nga ang tanan makakab-ot sa paghinulsol.” (2 Pedro 3:9) Kon mosalig kita kang Jehova, tabangan kita niya nga makab-ot ang atong tumong. Sa pagkatinuod, dili gayod niya kinaiya ang pagpangitag sayop aron kadtong sinserong naningkamot sa pagpahimuot kaniya dili makadawat sa ganti.—Salmo 103:8-11; 130:3, 4; Ezequiel 18:32.

Ang pagkahibalo kon unsay gibati ni Jehova sa iyang katawhan makahatag kanatog paglaom—usa ka kalidad nga ingon ka hinungdanon sa pagtuo. (1 Corinto 13:13) Ang Gregong pulong nga gihubad ug “paglaom” diha sa Bibliya adunay ideya sa mahinamong “pagdahom ug kaayohan.” Uban sa maong paglaom sa hunahuna, si apostol Pablo misulat: “Kami nagtinguha nga ang matag usa kaninyo magpakita sa samang kakugi aron makabaton sa bug-os nga pagsalig sa paglaom hangtod sa kataposan, aron dili kamo mahimong tapolan, kondili mahimong mga tigsundog kanila nga pinaagi sa pagtuo ug pailob nagapanunod sa mga saad.” (Hebreohanon 6:11, 12) Matikdi nga kon kita magpadayon sa pag-alagad nga matinumanon kang Jehova, kita makasalig nga matuman ang atong gilaoman. Dili sama sa kalibotanong mga paghandom, kini nga paglaom “dili motultol sa pagkahigawad.” (Roma 5:5) Busa sa unsang paagi nato mahuptang buhi ug tin-aw kaayo ang atong paglaom?

Kon Unsaon Pagpatin-aw sa Atong Espirituwal nga Panan-aw

Ang atong pisikal nga mga mata dili makatutok sa duha ka butang sa samang higayon. Tinuod usab kana sa atong espirituwal nga panan-aw. Ang pagtutok sa atong mga mata diha sa mga butang niining presenteng sistema seguradong magpahinabo nga ang gisaad sa Diyos nga bag-ong kalibotan medyo mohanap diha sa atong mga hunahuna. Sa kadugayan, kining hanap nga larawan nga wala na mapokus sa hunahuna dili na madanihon ug mahanaw na lang. Pagkaalaot unya niana! (Lucas 21:34) Busa, hinungdanon nga huptan gayod nato ang usa ka ‘yanong mata’—usa nga nagatutok sa Gingharian sa Diyos ug sa ganti nga kinabuhing dayon!—Mateo 6:22.

Ang paghupot ug usa ka yanong mata dili gayod sayon. Ang adlaw-adlaw nga mga suliran nagkinahanglan sa atong pagtagad, ug ang mga kabaldahan—bisan mga tentasyon—mahimong moabot kanato. Ubos sa maong mga kahimtang, sa unsang paagi kita makapabilin sa pagtutok sa Gingharian ug sa gisaad sa Diyos nga bag-ong kalibotan nga dili mapasagdan ang ubang hinungdanong mga buluhaton? Tagdon nato ang tulo ka paagi.

Pagtuon sa Pulong sa Diyos kada adlaw. Ang regular nga pagbasag Bibliya ug pagtuon sa mga publikasyong gibase sa Bibliya motabang kanato sa pagsentro sa atong hunahuna sa espirituwal nga mga butang. Tinuod, daghang tuig na tingali kita nga nagtuon sa Pulong sa Diyos, apan kinahanglang magpadayon kita sa pagtuon niini, sama nga kinahanglang magpadayon kita sa pagkaon ug pisikal nga kalan-on aron kita mabuhi. Dili kita mohunong sa pagkaon tungod lang kay daghang higayon na kitang nakakaon sa miagi. Busa bisan pag sinati na kaayo kita sa Bibliya, nagkinahanglan kita ug padayon, regular nga pagkuhag espirituwal nga sustansiya gikan niana aron magpabiling buhi ang atong paglaom ug lig-on ang atong pagtuo ug gugma.—Salmo 1:1-3.

Mapabilhong palandonga ang Pulong sa Diyos. Nganong hinungdanon ang  pagpamalandong? Tungod sa duha ka katarongan. Una, ang pagpamalandong makatabang kanato sa pagsabot sa atong gibasa ug sa pag-ugmad ug kinasingkasing nga pagpabili niana. Ikaduha, ang pagpamalandong motabang kanato sa dili pagkalimot kang Jehova, sa iyang kahibulongang mga buhat, ug sa paglaom nga iyang gibutang sa atong atubangan. Sa pag-ilustrar: Ang mga Israelinhon nga mibiya sa Ehipto uban ni Moises nakakita mismo sa mga pasundayag sa kahibulongang gahom ni Jehova. Natagamtam usab nila ang iyang mahigugmaong panalipod samtang giagak niya sila ngadto sa ilang panulondon. Apan, wala magdugay human makaabot ang mga Israelinhon sa kamingawan sa ilang pagpadulong sa Yutang Saad, sila nagsugod pagbagulbol, nga nagpakitag kakulang ug pagtuo. (Salmo 78:11-17) Unsay ilang suliran?

Gibalhin sa mga tawo ang ilang pagtagad gikan kang Jehova ug sa kahibulongang paglaom nga iyang gitanyag kanila ngadto sa ilang kaugalingong kaharuhay ug unodnong mga kabalaka. Bisan pa sa milagroso ug katingalahang mga buhat nga ila mismong nasaksihan, daghang Israelinhon nahimong walay-pagtuong mga bagulbolan. ‘Sa madali nakalimot sila sa mga buhat ni Jehova,’ nag-ingon ang Salmo 106:13. Tungod sa ilang dili-mapasaylo nga pagkalimot, ang maong kaliwatan wala makasulod sa Yutang Saad.

Busa, sa dihang magbasag Bibliya o mga giya sa pagtuon sa Bibliya, paggahin ug panahon sa pagpalandong sa imong nabasa. Ang maong pagpamalandong hinungdanon sa imong espirituwal nga kahimsog ug pagtubo. Pananglitan, samtang magbasa sa Salmo 106, nga gikutlo sa bahin diha sa ibabaw, palandonga ang mga hiyas ni Jehova. Matikdi kon unsa siya ka mapailobon ug maluluy-on ngadto sa mga Israelinhon. Tan-awa kon giunsa niya paghimo sa tanan niyang maarangan sa pagtabang kanila nga makaabot sa Yutang Saad. Panid-i kon sa unsang paagi sila nagpadayon sa pagrebelde kaniya. Handurawa ang kaguol ug kasakit ni Jehova dihang ang iyang kaluoy ug pailob gisulayan pag-ayo sa usa ka katawhan nga dili gayod mapasalamaton. Dugang pa, pinaagi sa pagpamalandong sa mga bersikulo 30 ug 31, nga naghubit sa lig-on, maisogon nga pagbarog ni Pinehas sa pagkamatarong, kita napasaligan nga si Jehova dili malimot sa iyang maunongong mga alagad ug nga siya madagayaong nagaganti kanila.

Ipadapat ang mga prinsipyo sa Bibliya sa imong kinabuhi. Samtang nagasunod kita sa mga prinsipyo sa Bibliya, makita nato mismo nga ang mga tambag ni Jehova mapuslanon. Ang Proverbio 3:5, 6 nag-ingon: “Salig kang Jehova sa bug-os mong kasingkasing ug ayaw pagsalig sa kaugalingon mong pagsabot. Sa tanan mong mga dalan tagda siya, ug siya magatul-id sa imong mga alagianan.” Hunahunaa kon sa unsang paagi ang imoral nga mga buhat sa daghang tawo misangpot ug mental, emosyonal, ug pisikal nga mga problema. Tungod sa pagpatuyang diha sa lumalabayng mga kalipay, anihon niining mga tawhana ang kasakitan sa daghang katuigan—usahay sa tibuok kinabuhi pa gani. Apan sa pagkalahi kaayo, kadtong nagalakaw sa ‘hagip-ot nga dalan’ nakasinatig pasiunang-patilaw kon unsa ang kinabuhi sa bag-ong sistema, ug kini nagdasig kanila sa pagpadayon diha sa dalan sa kinabuhi.—Mateo 7:13, 14; Salmo 34:8.

Ang pagpadapat sa mga prinsipyo sa Bibliya dili sayon. Usahay, ang dili-kasulatanhong solusyon morag mao ang makahatag ug dihadihang kahupayan sa malisod nga situwasyon. Pananglitan, sa panahon nga lisod ang panalapi, basin mahaylo kita sa pagbutang sa mga intereses sa  Gingharian diha sa ikaduhang dapit. Apan, kadtong molihok nga may pagtuo ug magpadayon sa pagtutok sa espirituwal nga mga butang gipasaligan nga sa kataposan “maayo ang sangpotan niadtong nahadlok sa matuod nga Diyos.” (Ecclesiastes 8:12) Basin adunay panahon nga ang usa ka Kristohanon kinahanglang mag-obertaym, apan dili gayod angay nga mahisama siya kang Esau, kinsa nagtamay sa espirituwal nga mga butang, nga nagsalikway niana ingong walay-bili.—Genesis 25:34; Hebreohanon 12:16.

Klarong gipatin-aw ni Jesus ang atong mga kaakohan ingong mga Kristohanon. Kita kinahanglang ‘mangita pag-una sa gingharian ug sa pagkamatarong sa Diyos.’ (Mateo 6:33) Kon buhaton nato kana, ipakita ni Jehova ang iyang amahanong gugma kanato pinaagi sa pagseguro nga atong mabatonan ang atong materyal nga mga panginahanglan. Dili gayod niya buot nga pabug-atan nato ang atong kaugalingon sa mga kabalaka labot sa mga butang nga giingon niya nga siya ang motagana. Ang maong hilabihang kabalaka mahisama unya sa espirituwal nga glaucoma—kon dili matambalan, kini anam-anam nga magpahinabo nga wala na kitay laing makita kondili pulos materyal nga mga butang na lamang ug sa ngadtongadto magpabuta kanato sa espirituwal. Kon magpabilin kita nianang kahimtanga, ang adlaw ni Jehova modangat kanato “ingon nga usa ka lit-ag.” Pagkadakong kapildihan kana!—Lucas 21:34-36.

Padayon sa Pagtutok sa Ganti Sama ni Josue

Magpadayon kita sa paghupot sa atong mahimayaong paglaom sa Gingharian nga tin-aw kaayo sa atong hunahuna, nga ibutang ang ubang mga kaakohan diha sa hustong dapit niini. Pinaagi sa paglahutay sa batasan sa pagtuon, pagpamalandong, ug pagpadapat sa mga prinsipyo sa Bibliya, makapabilin kitang masaligon sa atong paglaom sama ni Josue. Human sa pag-agak sa mga Israelinhon paingon sa Yutang Saad, siya miingon: “Kamo nahibalo pag-ayo sa bug-os ninyong kasingkasing ug sa bug-os ninyong kalag nga walay usa ka pulong gikan sa tanang maayong pulong nga gisulti ni Jehova nga inyong Diyos kaninyo nga napakyas. Kining tanan natuman alang kaninyo. Walay usa ka pulong kanila nga napakyas.”—Josue 23:14.

Hinaot nga ang paglaom sa Gingharian makapalagsik kanimo, ug hinaot makapasadya kini sa imong kinabuhi samtang kini mobanaag diha sa imong mga hunahuna, pagbati, desisyon, ug mga buluhaton.—Proverbio 15:15; Roma 12:12.

[Hulagway sa panid 21]

Nagduhaduha ka ba sukad kon kaha makasulod ka sa bag-ong kalibotan?

[Hulagway sa panid 22]

Ang pagpamalandong maoy hinungdanong bahin sa pagtuon sa Bibliya

[Mga hulagway sa panid 23]

Padayon sa pagtutok sa mga intereses sa Gingharian