Bo Ta Enfoca Riba e Recompensa?

GLAUCOMA, un di e causanan principal di ceguera, ta un malesa cu ta avansa pocopoco. Na cuminsamento e persona por mira solamente loke tin stret su dilanti; glaucoma ta limita loke e ta mira den banda. Si no trat’e, e por plama bai na e parti central di su bista. Por ultimo, glaucoma por pone e persona perde su bista por completo.

Mescos cu pocopoco y na un manera masha sutil nos por perde nos bista literal, asina nos por perde un tipo di bista cu ta asta mas precioso—nos bista spiritual. Pesei ta masha importante pa nos mantene asuntonan spiritual bon enfoca den e parti central di nos bista.

Sigui Enfoca Riba e Recompensa

Entre “e cosnan cu no ta wordo mira” cu nos wowonan literal ta e recompensa glorioso di bida eterno cu Yehova ta ofrece esnan leal na dje. (2 Corintionan 4:18) Claro cu e motibo principal pakico cristiannan ta sirbi Dios ta pasobra nan stim’e. (Mateo 22:37) No obstante, Yehova kier pa nos spera cu gran anticipacion riba nos recompensa. E kier pa nos reconoc’e como un Tata generoso cu ta “recompensa esnan cu ta busc’e.” (Hebreonan 11:6) Pesei, hende cu realmente conoce Dios y ta stim’e, tin gran aprecio pa e bendicionnan cu el a priminti y nan ta anhela pa nan cumpli.—Romanonan 8:19, 24, 25.

Hopi lector di e revista aki y di su compañero, Spierta!, ta gusta e plachinan den nan cu ta representa e benidero Paradijs riba tera. Claro cu nos no sa exactamente con e Paradijs ei lo ta, y e plachinan publica ta simplemente impresionnan artistico basa riba pasashinan biblico manera Isaias 11:6-9. Apesar di esei, un señora cristian a bisa: “Ora mi mira e plachinan di e benidero Paradijs den E Toren di Vigilancia y Spierta!, mi ta analisa nan bon, manera un hende lo a haci cu un folder di un destinacion turistico. Mi ta purba mira mi mes einan, pasobra na Dios su debido tempo, ta ei ta caminda realmente mi ta spera di ta.”

Apostel Pablo tambe a sinti asina relaciona cu su “yamada celestial.” E no a pretende cu el a gar’e caba, pasobra e tawatin cu demostra cu e ta fiel te na fin. Pero el a sigui ‘haci esfuerso pa alcansa e meta.’ (Filipensenan 3:13, 14) Hesus tambe a soporta morto na un staca di tormento “pa motibo di e goso poni su dilanti.”—Hebreonan 12:2.

Bo a yega di duda si lo bo drenta den e mundo nobo of no? Claro cu ta bon pa nos no tin demasiado confiansa, ya cu pa nos ricibi e premio di bida esei ta depende di si nos ta keda fiel te na fin. (Mateo 24:13) Sinembargo, si nos ta purba haci nos best pa cumpli cu e rekisitonan di Dios, nos tin tur motibo pa confia cu nos lo haya e recompensa. Corda cu Yehova “no kier  pa ningun hende bai perdi, ma pa tur bin na repentimento.” (2 Pedro 3:9) Si nos ta confia den Yehova, lo e yuda nos alcansa nos meta. De echo, ta contra Yehova su naturalesa pa busca motibo pa descualifica esnan cu sinseramente ta purba agrad’e.—Salmo 103:8-11; 130:3, 4; Ezekiel 18:32.

Ora nos sa con Yehova ta sinti pa cu su pueblo, esei ta duna nos speransa; y speransa ta mesun importante cu fe. (1 Corintionan 13:13) E palabra Griego traduci “speransa” den Bijbel ta carga e idea di gran expectativa of “anticipacion di bon.” Cu tal speransa na mente, apostel Pablo a skirbi: “Nos ta desea cu cada un di boso lo mustra e mesun diligencia pa asina realisa e siguransa completo di speransa te na fin, pa boso no flakia, ma pa boso ta imitadonan di esnan cu pa medio di fe y pasenshi ta hereda e promesanan.” (Hebreonan 6:11, 12) Tuma nota cu si nos sigui sirbi Yehova fielmente, nos por tin e siguransa di realisa nos speransa. Distinto for di hopi aspiracionnan mundano, e speransa aki “no ta desapunta.” (Romanonan 5:5) Pues anto, con nos por mantene nos speransa bibo y sigui enfoca riba dje?

Con pa Haci Nos Bista Spiritual Mas Skerpi

Nos wowonan literal no por enfoca riba dos cos pareu. Mescos ta e caso cu nos bista spiritual. Si nos fiha nos bista riba e cosnan di e sistema actual, anto esei sigur lo pone cu e mundo nobo cu Dios ta priminti ta keda na banda den nos bista y ta bira menos skerpi den nos mente. Cu tempo e imagen wazig aki cu ta keda den banda di nos bista spiritual, lo por perde su atraccion y simplemente disparce for di bista. Esei si lo ta un tragedia! (Lucas 21:34) Pesei ta masha importante anto pa nos “wowo ta bon”, (literalmente, ‘bon enfoca’) es decir, pa nos keda tene nos bista fiha riba e Reino di Dios y e recompensa di bida eterno!—Mateo 6:22.

No ta semper facil pa nos wowo keda bon enfoca. Problemanan di tur dia ta exigi nos atencion, y den nos caminda por tin distraicion, asta tentacion. Den tal circunstancia, con nos por keda enfoca riba e Reino y e mundo nobo cu Dios ta priminti, sin neglisha otro actividadnan necesario? Laga nos considera tres manera.

Studia e Palabra di Dios tur dia. Lesa Bijbel y studia publicacionnan biblico riba un base regular ta yuda nos keda cu nos mente fiha riba asuntonan spiritual. Ta berdad cu kisas nos tin hopi aña ta studia e Palabra di Dios, pero nos tin cu sigui studi’e, mescos cu nos tin cu sigui come cuminda pa sostene nos bida. Nos no ta stop di come djis pasobra nos a come miles di biaha caba den pasado. Pesei, sin importa con bon nos conoce Bijbel, nos mester sigui alimenta nos mes spiritualmente cu ne riba un base regular y continuo pa asina nos por mantene nos speransa bibo y pa nos fe y amor keda fuerte.—Salmo 1:1-3.

Medita cu aprecio riba e Palabra di Dios. Dicon ta masha importante pa nos  medita? Pa dos motibo. Na prome luga, meditacion ta yuda nos digeri loke nos a lesa y cultiva aprecio profundo p’e. Na di dos luga, meditacion ta pone cu nos lo no haya chens di lubida Yehova ni su obranan maraviyoso, ni e speransa cu el a pone nos dilanti. Un ehempel: E Israelitanan cu a sali for di Egipto cu Moises, a mira cu nan propio wowo con Yehova a demostra su poder extraordinario. Tambe nan a experencia su proteccion amoroso segun cu el a dirigi nan na nan herencia. Sinembargo, asina cu e Israelitanan a yega na e desierto rumbo pa e Tera Priminti nan a cuminsa keha, y a revela un falta serio di fe. (Salmo 78:11-17) Kico tawata nan problema?

E pueblo a stop di enfoca riba Yehova y riba e speransa maraviyoso cu el a pone nan dilanti y a bai consentra riba nan comodidadnan di e momento ei y nan precupacionnan carnal. Apesar di e señalnan y milagernan maraviyoso cu nan a mira personalmente, hopi Israelita a bira kehadonan sin fe. Salmo 106:13 ta bisa cu “masha lihe nan a lubida [Yehova] su obranan.” E negligencia ei tawata algo pa cua no tin excuse, y a pone cu e generacion ei no a drenta e Tera Priminti.

Pesei, ora bo ta lesa e Scritura of publicacionnan pa studia Bijbel, tuma bo tempo pa medita riba loke bo ta lesa. E meditacion ei ta vital pa bo salu y crecemento spiritual. Por ehempel, ora bo ta lesa Salmo 106, cu en parte ta cita ariba, medita riba e cualidadnan di Yehova. Observa cuanto pasenshi y misericordia el a demostra na e Israelitanan. Wak con el a haci tur su posibel pa yuda nan yega na e Tera Priminti. Tuma nota con continuamente nan tawata rebela contra dje. Imagina e angustia y dolor cu Yehova a sinti segun cu un pueblo masha malagradicido y sin heful a pone su pasenshi y misericordia yega te na nan limite. Ademas, door di medita riba versiculo 30 y 31, cu ta describi Finehas (Finees) su posicion firme y di curashi na fabor di husticia, nos ta haya e siguransa cu Yehova no ta lubida esnan leal na dje y cu e ta recompensa nan abundantemente.

Aplica principionan biblico den bo bida. Segun cu nos ta sigui principionan biblico, nos ta mira pa nos mes cu Yehova su conseho ta duna resultado. Proverbionan 3:5 y 6 ta bisa: “Confia den SEÑOR cu henter bo curason, y no depende riba bo mes comprondemento. Den tur bo camindanan reconoc’e, y e lo dirigi bo bereanan.” Pensa riba e manera cu e bida inmoral di hopi hende a resulta den problemanan mental, emocional y fisico pa nan. Door di entrega na placernan temporal, e hendenan ei ta cosecha calamidad pa añanan largo, y tin biaha pa e resto di nan bida. Na contraste skerpi cu esei, esnan cu ta cana den e ‘caminda smal’ ta haya chens di purba di antemano con bida lo ta den e sistema nobo, y esaki ta anima nan pa sigui riba e caminda cu ta hiba na bida.—Mateo 7:13, 14; Salmo 34:8.

E por ta un reto pa aplica principionan biblico. Tin biaha, ora nos ta den un situacion dificil, un solucion cu ta bai contra principionan di Bijbel kisas ta priminti di duna alivio inmediato. Por ehempel, ora nos ta den dificultad financiero,  kisas nos ta sinti e tentacion di pone interesnan di Reino na di dos luga. Sinembargo, esnan cu actua den fe y mantene nan bista fiha riba asuntonan spiritual tin e siguransa cu na final di cuenta “lo bai bon cu esnan cu ta teme Dios.” (Eclesiastes 8:12) Por sosode cu un cristian tin cu traha overtime de bes en cuando, pero nunca lo e bira manera Esau, kende a desprecia cosnan spiritual y a rechasa nan como cosnan cu no ta importante.—Genesis 25:34; Hebreonan 12:16.

Hesus a splica bon cla kico ta nos responsabilidad como cristian. Nos tin cu sigui “busca prome e reino di Dios y su husticia.” (Mateo 6:33) Si nos haci esei, Yehova lo demostra su amor di tata na nos door di haci sigur cu nos tin loke nos mester den sentido material. Un cos ta sigur, e no kier pa nos ta carga cu precupacion pa cosnan cu e ta bisa ta na su encargo. Tal precupacion innecesario por ta manera glaucoma spiritual—si nos neglish’e, pocopoco lo e reduci nos bista te cu nos ta mira solamente precupacionnan material, y al final nos ta bira spiritualmente ciego. Si nos keda den e condicion ei, e dia di Yehova lo bin riba nos “manera un trampa.” Esei si lo ta un tragedia!—Lucas 21:34-36.

Keda cu Bista Fiha Manera Hosue

Laga nos keda cu nos bista skerpi, bon enfoca riba nos glorioso speransa di Reino, y pone nos otro responsabilidadnan na nan debido luga. Door di persisti den e rutina di studia, medita y aplica principionan biblico, nos por ta sigur di nos speransa mescos cu Hosue. Despues di a hiba Israel den e Tera Priminti, el a bisa: “Boso sa di henter boso curason y di henter boso alma cu ni un palabra di tur e bon palabranan cu SEÑOR boso Dios a papia tocante di boso no a faya; tur a keda cumpli pa boso, ni un di nan no a faya.”—Hosue 23:14.

Nos deseo ta pa e speransa di Reino duna bo vigor, y haci bo felis segun cu bo ta refleha e speransa ei den bo pensamento-, sintimento-, decision- y actividadnan.—Proverbionan 15:15; Romanonan 12:12.

[Plachi na pagina 21]

Bo a yega di duda si lo bo drenta den e mundo nobo of no?

[Plachi na pagina 22]

Medita riba loke bo siña ta un parti masha importante di studia Bijbel

[Plachinan na pagina 23]

Keda cu bo bista fiha riba interesnan di Reino