Te Akara ra Ainei Koe ki Runga i te Tutakianga?

TE TUPU marie maira te maki. I te akamataanga, ka akameangitiia mai te kite o tetai tangata. Me kare e rapakauia, ka totoa atu ki rotopu i te akara anga. I te openga iora, ka akatupu te reira kia ngaro takiri te kite anga. Eaa te reira? E glaucoma​—ko tetai tupuanga maataia o te matapo.

Mei tei rauka katoa ia tatou i te ngaro marie anga i to tatou kite o te mata tikai me kare e kitea vaveia, e maata atu ta tatou ka ngere i tetai tuanga akaperepereia o te kite​—to tatou akara anga i te pae vaerua. No reira, e mea puapinga e kia akono i te au apinga pae vaerua ei akamouanga pakari i rotopu i to tatou ngai no te akaraanga.

Kia Akara Tika Ua i te Tutakianga

I roto ‘i te au mea akara koreia ra’ ki to tatou mata tikai e ko te akameitakianga kaka o te oraanga mutu kore, ta Iehova e oronga maira ki tona aronga tiratiratu. (2 Korinetia 4:18) Inara, te tumu maata i tavini ei te au Kerititiano i te Atua koia oki te aroa ra ratou iaia. (Mataio 22:37) Kareka ra, te inangaro ra a Iehova kia akara tatou ki mua ki ta tatou tutakianga. Te inangaro ra aia kia kite tatou iaia ei Metua oronga ua e “koia tei tutaki mai i te aronga i kimi tikai iaia.” (Ebera 11:6) E no reira, ko te aronga tei kite meitaki tikai i te Atua e te aroa ra iaia te akaperepere ra i tana au akameitakianga taputouia e te inangaro ra no te reira akatupuanga.​—Roma 8:19, 24, 25.

E manganui te aronga tatau o teia tianara e tona tokorua, te Awake!, te rekareka ra i te toro anga te akatutu maira i te enua Parataito te aere maira. Inara, kare tatou e kite tikai e mei teaa te akaraanga o te enua Parataito, e ko te au tutu tei neneiia e tamanako anga ati ua tei akatumuia ki runga i te au irava Pipiria mei ia Isaia 11:6-9. Pera katoa oki, kua karanga tetai vaine Kerititiano: “Me kite au i te au tutu o te Parataito te aere maira i roto i Te Punanga Tiaki e te Awake!, e makitoro marie ana au ma te meitaki i te reira, mei tetai poroutia rai no te au ngai teretere anga. E tauta ana au i te akamanako iaku uaorai i reira no te mea ko teia tikai taku manakonako anga i to te Atua tuatau tau.”

Kua manako aiteite te apotetoro ko Paulo no runga i tona ‘kapiki anga no runga maira.’ Kare aia i manako iaia uaorai e kua rauka takere i te reira, no te mea kia akapapu tiratiratu aia iaia uaorai ki te openga ra. Inara kua rave tamou ua atu rai aia “e kia uapou atu i te au mea i mua ra.” (Philipi 3:13, 14, NW) Pera katoa, kua akakoromaki a Iesu i te mate i runga i te rakau tamamae “no te rekareka tei tukuia mai ki mua iaia ra.”​—Ebera 12:2, NW.

Kua ekoko ana ainei koe me ka tomo atu koe ki roto i te ao ou? E mea meitaki tikai kia kore e irinaki maata roa atu, mei te mea e te vai ra ta tatou rauka anga i te tutaki no te ora ki runga ia tatou i te vai tiratiratu ua atu anga ki te openga. (Mataio 24:13) Inara, me te tauta ra tatou i tei meitaki ia tatou i te akono i te au umuumuanga a te Atua, e tumu to tatou kia irinaki no te itae anga i te tutakianga. E akamaara e “kare rava [a Iehova] i anoano e kia mate atu tetai, kia rauka katoatoa ra te tataraara.” (2 Petero 3:9) Me irinaki tatou ki roto ia Iehova, ka tauturu mai aia ia tatou kia itaeia ta tatou akakoroanga. E tikai, ei mea tuke anga ki tona tu i te kimi i te au tumu kia akakoreia te aronga te tauta  ra ma te ngakau tae i te akamareka iaia.​—Salamo 103:8-11; 130:3, 4; Ezekiela 18:32.

I te kiteanga i to Iehova manako ki tona iti tangata te oronga maira i te manakonakoanga kia tatou​—e tu tei aiteite te puapinga ki te akarongo. (1 Korinetia 13:13) Te tuatua Epera tei uriia e “manakonakoanga” i roto i te Pipiria te apai ra i te manako no tetai inangaro “tapapaanga no te meitaki.” Ma taua manakonakoanga ra i roto i te manako, kua tata te apotetoro ko Paulo: “Te anoano nei matou ia kotou tataki tai kia akaari i te tu aiteite o te manako angaanga kia rauka te akapapu anga ki katoa o te manakonakoanga e tae ua atu ki te openga, kia kore kotou e akatau, inara kia riro mai ei aronga aru i te aronga tei akarongo e te tapapa marie kua rauka ia ratou te au taputou.” (Ebera 6:11, 12, NW) E akara ana ra e me ka tavini tiratiratu tamou ua atu rai tatou ia Iehova, ka rauka ia tatou te akapapu anga i te kiteanga i to tatou manakonakoanga. Kare mei te au akakoroanga o te ao nei, ko teia manakonakoanga ‘kare e taki atu ki te mareka kore anga.’ (Roma 5:5, NW) E akapeea i reira e rauka ai ia tatou i te tamou i to tatou manakonakoanga kaka e kia kite meitakiia atu?

Akapeea i te Akameitaki Atu Anga i to Tatou Akaraanga Pae Vaerua

Kare e rauka i to tatou mata kopapa i te akara ki runga i nga apinga e rua e okotai taime. Ko te tika katoa ia i to tatou akaraanga pae vaerua. Ko te akara anga ki runga i te au apinga o teia akatereanga nei e papuia e ka akaraanga aveave to te Atua ao ou taputouia i roto i to tatou au manako. Kare i roa ana, ko teia tu aveave, penei ka akangere i tona manea e ka ngaro ke ua atu mei te akaraanga. Mei teaa tikai te kino i te reira! (Luka 21:34) No reira, mei teaa tikai te puapinga, e kia akono tatou i te ‘mata meitaki’​—ko tetai te akara tika ra ki runga i to te Atua Patireia e te tutakianga no te oraanga mutu kore!​—Mataio 6:22.

Te tamou anga i tetai mata meitaki kare i te mea ngoie ua. Te au manamanata mei tera ra ki tera ra te titau maira i to tatou manako, e te au arairai anga​—te timataanga katoa​—penei ka tu mai ki mua i to tatou aerenga. I raro ake i teia au turanga, akapeea tatou i te akara tika anga ki runga i te Patireia e ta te Atua ao ou taputouia ma te kopae kore anga i te au angaanga ke te umuumuia ra? E akamanako ana tatou i nga mataara e toru.

Apii i te Tuatua a te Atua i te au ra. Te tatau putuputu anga i te Pipiria e te apii anga i te au puka tei akatumuia ki runga i te Pipiria ka tauturu ia tatou kia akono i to tatou manako kia akanoo ki runga i te au apinga pae vaerua. E tika, penei e manganui te au mataiti i apii ana tatou i ta te Atua Tuatua, inara kia rave tamou ua atu rai tatou i te apii i te reira, mei ia tatou katoa i te inangaro anga i te kaikai ua atu i te kai kopapa e rauka ai to tatou oraanga i te akaoraia. Kare tatou e akamutu ua ana i te kaikai no te mea kua kaikai ana tatou e tauatini ua atu au kaikai anga i te tuatau i topa. No reira noatu e mea matauia e tatou i te Pipiria, ka umuumuia tatou i te rave putuputu ua atu anga, i te kai anga i te kai pae vaerua mei reira mai e rauka ai i te akono ketaketa i to tatou manakonakoanga kaka e to tatou akarongo e te inangaro.​—Salamo 1:1-3.

Kia akamanako oonu ma te ariki ua ki runga i ta te Atua Tuatua. Eaa ra i anoanoia ai te akamanako oonu anga? E rua nga tumu. Te mea mua, ka tauturu mai te akamanakoanga ia tatou kia akamanako i ta tatou e tatau ra e  kia akono i te arikianga ngakau no te reira. Te rua, ka arai te akamanako oonu anga ia tatou mei te akangaropoina anga ia Iehova, tana au angaanga umereia, e te manakonakoanga tana i akanoo i mua ia tatou. Ei akatutuanga: Te Iseraela tei akaruke ia Aiphiti ma ia Mose kua kite ratou ma to ratou uaorai mata i te au akaariarianga o to Iehova ra mana umere. Kua kite katoa ratou i tona paruruanga takinga meitaki iaia e arataki atura ia ratou ki ta ratou tuanga. Inara, kare i roa ana i te taeanga te Iseraela ki te metepara e te aere atura ki te Enua Taputouia kua akamata ratou i te kopekope, i te akaari anga i tetai ngereanga kino o te akarongo. (Salamo 78:11-17) Eaa ra to ratou manamanata?

Kua taui te iti tangata i to ratou akaraanga mei Iehova ra e te manakonako anga umereia tana i akanoo i mua ia ratou ki to ratou au akapumaana anga i taua taime ra e te au manamanata tangata ua nei. Noatu te au akairo o te au temeio e te au umereanga ta ratou uaorai i kite, kua riro te manganui o te Iseraela ei aronga kopekope akarongo kore. “Ngaropoina vave atura ia ratou [ta Iehova] au angaanga,” i karanga ai a Salamo 106:13. Kua akangereia taua uki ra i taua tatipake anga e kare e kotoeanga i te tomoanga ki roto i te Enua Taputouia.

No reira, i te tatau anga i te au Tuatua Tapu me kare te au apii Pipiria, e tuku taime i te akamanako oonu no runga i taau e tatau ra. Ka riro taua manakoanga ra ei puapinga anga ki toou oraanga e te tupuanga pae vaerua. Ei akaraanga, i te tatau anga ia Salamo 106, e tuanga ua tei taikuia i runga akenei, e akamanako oonu no runga i to Iehova au tu. E akara e akapeea aia i te akakoromaki anga e te akaaroa anga i te Iseraela. E akara e akapeea aia i te rave pouroa anga i tana ka rauka i te tauturu ia ratou kia itae i te Enua Taputouia. Akara ana e akapeea ratou i te meameaau putuputu anga iaia. E akamanako i to Iehova riri e te mamae i te oparaia anga tona akaaroa e te akakoromaki anga ki te ope o te kotinga e tetai iti tangata tei manako kore ua i te ariki kore anga. Pera katoa, na te akamanako oonu anga i nga irava 30 e te 31, te akakite maira i to Phinehaza tu ngaueue kore, e te maroiroi no te tuatua tika, te akapapuia maira kia tatou e kare e ngaropoina ia Iehova tona aronga tiratiratu e ka tutaki maata aia ia ratou.

Akono i te au kaveinga Pipiria i roto i toou oraanga. Ia tatou e aru ra i te au kaveinga Pipiria, te kite ra tatou no tatou uaorai e te angaanga ra te ako anga a Iehova. Te karanga ra a Maseli 3:5, 6 e: “E irinaki kia Iehova ma to ngakau katoa ra; auraka ra e irinaki ki toou uaorai kite. Auraka e akangaropoina iaia i toou katoa ra au aerenga; e nana e akakite kia koe i toou ra au arataa.” E akamanako ana e akapeea te au mataara tau kore o te au tangata e manganui e akatupu ana i te au tupuanga kino o te manako, e te au manamanata pae kopapa ra. Na te kapitianga ki roto i te au navenave poto ua, e kokoti ana taua tangata ra e mataiti ua atu​—penei tetai oraanga​—no te tumatetenga. Ei tukeanga pakari roa, ko te aronga te aere ra i te “piri oki o te ara” ka rauka ia ratou tetai akakiteanga ki mua no tetai oraanga i raro i te akatereanga ou, e na teia e akamaroiroi ia ratou kia aere tamou ua atu i runga i te ara ki te ora.​—Mataio 7:13, 14; Salamo 34:8.

Ka riro te akonoanga i te au kaveinga Pipiria ei akaaoanga. I tetai taime, tetai pauanga kare i tau ki te tuatua tapu penei i te akaraanga te taputou maira i tetai akapumaana i taua taime ra i roto i tetai turanga ngata. Ei akaraanga, i te au tuatau o te manamanata i te pae moni, penei e mea timataanga  kia akapae te au inangaro o te Patireia ki te ngai rua. Inara, ko te aronga tei rave ma te akarongo e kua akono i to ratou akaraanga pae vaerua te akapapuia ra e i te openga iora “e meitaki to te aronga i mataku i te Atua.” (Koheleta 8:12) Penei i te au atianga ka angaanga tetai Kerititiano e tere atu i te ora akamutuanga, inara kia kore aia e riro mai mei ia Esau rai, ko tei akavaavaa i te au apinga pae vaerua, i te kopae anga i te reira ei mea puapinga kore ua.—​Genese 25:34; Ebera 12:16.

Kua akataka meitaki mai a Iesu i ta tatou au apainga ei Kerititiano. Kia rave tatou i te ‘kimianga na mua i te patireia e te tuatua tika a te Atua.’ (Mataio 6:33, NW) Me rave tatou i te reira, ka akaari mai a Iehova i tona aroa ei metua tane no tatou na te akapapu anga e kua rauka i ta tatou ka inangaroia i te pae materia. Kare roa aia e inangaro kia akateiaa tatou ia tatou uaorai i te au apiapi no te au apinga tana i akakite e tei raro i tana akonoanga. Ka riro taua au apiapianga i te akaaiteia ki te glaucoma pae vaerua​—tei kopaeia, ka akameangiti marie mai te reira i ta tatou akaraanga ua ki te au manamanata o te pae materia e i te openga iora ka akamatapo ia tatou i te pae vaerua. Me ka noo ua atu rai tatou i roto i tera turanga, ka aere mai te ra o Iehova ki runga ia tatou “mei te ereere ra.” Mei teaa tikai te tumatetenga i te reira!​—Luka 21:34-36.

Kia Akara Ua Atu Mei ia Iosua Rai

Kia akono tatou i to tatou manakonakoanga kaka o te Patireia kia meitaki te akaraanga, tukuanga i te au apainga ke mai i roto i to ratou turanga tau. Na te aruaru anga i roto i te akonoanga matauia i te apii, akamanako oonu anga, e te akonoanga i te au kaveinga Pipiria, ka vai papu tatou mei ia Iosua rai i to tatou manakonakoanga. I te aratakianga i te Iseraela i roto i te Enua Taputouia, kua karanga aia: “I teianei, i na! te aere nei au i teianei ra na te ara o te au enua ravarai, e kua kite tikai kotou ma to kotou ngakau katoa e ma to kotou meta katoa e kare rava tetai i te au tuatua meitaki a to kotou Atua ko Iehova i tuatua mai kia kotou i poka. Kua tupu katoa ra ratou no kotou. Kare okotai ia ratou i poka.”​—Iosua 23:14, NW.

Kia akamaroiroi te manakonakoanga o te Patireia ia koe, e kia akaka i toou au ra ra i te akaata anga i te reira i roto i toou au manakoanga, au manako ngakau, au ikianga, e te au angaanga.​—Maseli 15:15; Roma 12:12.

[Tutu i te kapi 21]

Kua ekoko ana ainei koe me ka tomo atu koe ki roto i te ao ou?

[Tutu i te kapi 22]

E tuanga puapinga ia te akamanako oonu anga o te apii Pipiria

[Au Tutu i te kapi 23]

Akono i te akaraanga ki runga i te au inangaro o te Patireia