Bann Pwen enteresan dan Liv Levitik
Parol Bondye i vivan
Bann Pwen enteresan dan Liv Levitik
EN LANNEN pa ti ankor pase depi ler bann Izraelit ti’n ganny libere Lezip. La ki zot ti’n organize konman en nouvo nasyon, zot ti lo zot semen pour al dan pei Kanaan. Zeova ti oule etablir en nasyon sen dan sa pei. Me fason viv bann Kananeen ek zot koutim relizye ti vreman degradan. Alor, sa vre Bondye ti donn pep Izrael bann lalwa ki ti pou met zot apar pour son servis. Sa bann lalwa i ganny rikorde dan sa liv Labib ki apel Levitik. Profet Moiz ti ekrir sa liv dan dezer Sinai, apepre 1512 A.N.L. Sa liv i rakont bann levennman ki ti arive pandan zis en mwan dan listwar bann Izraelit. (Egzod 40:17; Nonm 1:1-3) Plizyer fwa Zeova ti ankouraz son bann adorater pour vin sen.—Levitik 11:44; 19:2; 20:7, 26.
Ozordi, Temwen Zeova pa anba Lalwa ki Bondye ti donn Moiz. Lanmor Zezi in aboli sa Lalwa. (Romen 6:14; Efezyen 2:11-16) Me bann lalwa dan Levitik i kapab benefisye nou en kantite. Zot ansenny nou bokou keksoz lo ladorasyon nou Bondye, Zeova.
LOFRANN KI SEN —VOLONTER E OBLIGATWAR
Serten lofrann ek sakrifis dan Lalwa ti volonter, tandis ki lezot ti obligatwar. Par egzanp, lofrann brile ti volonter. Tou sa ki ti ganny ofer ti al pour Bondye, zis parey Zezi Kri ti pare pour donn son lavi antye konman en sakrifis pour liber nou. Sakrifis konminyon ti en sakrifis volonter e sa zannimo ti ganny partaze. En porsyon ti al pour Bondye lo lotel, pret ti manz en bout, e en lot porsyon ankor ti al pour sa dimoun ki’n ofer sa sakrifis. Pareyman, pour bann Kretyen swazir, Memoryal lanmor Kris i en repa konminyon.—1 Korentyen 10:16-22.
Lofrann pour pese ek lofrann kilpabilite ti obligatwar. Lofrann pour pese ti kouver bann pese komet par fot oubyen ki pa volonter. En dimoun ti ofer en lofrann kilpabilite pour satisfer Bondye ler i ti vyol drwa en lot dimoun oubyen pour reganny serten drwa pour en mal ki i’n fer apre ki i’n repantir—oubyen tou le de. Ti osi annan lofrann lagrenn, i ti ganny fer pour remersye Zeova pour tou sa ki i ti donn zot. Tou sa bann keksoz i enteres nou akoz bann sakrifis dan lalyans Lalwa ti pe reprezant sakrifis Zezi Kri oubyen bann byenfe ki son sakrifis ti pou anmennen.—Ebre 8:3-6; 9:9-14; 10:5-10.
Larepons pour bann Kestyon lo Labib:
2:11, 12—Akoz Zeova pa ti aksepte dimyel konman en sakrifis brile? Sa dimyel mansyonnen la pa pe refer avek dimyel ki mous i fer. Menm si i pa ti kapab ganny ofer konman en lofrann brile, sa dimyel ti enkli parmi “bann premye rekolt . . . prodwi plantasyon.” (2 Kronik 31:5) Sa dimyel ti aparaman dyous oubyen siro bann fri. Vi ki i kapab fermante, alor i pa ti akseptab pour ofer lo lotel.
2:13—Akoz disel ti bezwen ganny azoute “avek tou lofrann”? Sa pa ti ganny fer pour ogmant gou bann sakrifis. Dan lemonn antye, disel i ganny servi pour prezerv manze. I paret ki i ti ganny prezante avek bann lofrann akoz i montre ki en keksoz i prop e pa pouri.
Leson pour nou:
3:17. Vi ki lagres ti ganny konsidere konman porsyon pli bon oubyen pli ris, lalwa pour pa manz lagres ti ed bann Izraelit byen konpran ki pli bon porsyon i pour Zeova. (Zenez 45:18) Sa i rapel nou ki nou devret donn Zeova nou meyer.—Proverb 3:9, 10; Kolosyen 3:23, 24.
7:26, 27. Bann Izraelit pa ti devret manz disan. Pour Bondye, disan i reprezant lavi. Dapre Levitik 17:11 lavi i dan disan. Bann vre Kretyen ozordi i ankor swiv sa standar pour pa servi disan dan okenn fason.—Akt 15:28, 29.
LETABLISMAN EN SISTENM PRET SEN
Lekel ki ti responsab pour okip bann travay ki ti annan pour fer avek bann sakrifis ek lofrann? Sa responsabilite ti al pour bann pret. Dapre gidans Bondye, Moiz ti fer en seremoni pour etablir Aaron konman gran pret e son kat garson pret anba li. I paret ki sa seremoni ti al pour set zour, e son wityenm zour sa laranzman pret ti konmans fonksyonnen.
Larepons pour bann Kestyon lo Labib:
9:9—Ki sinifikasyon vers disan ater devan lotel e met li lo plizyer keksoz? Sa i demontre ki Zeova ti aksepte disan pour kouver pese. Laranzman prospisyasyon ti baze lo servi disan. Zapot Pol ti ekrir: “Annefe, dapre Lalwa preski tou keksoz i ganny pirifye par disan, e san versman disan napa pardon pese.”—Ebre 9:22.
10:1, 2—Kwa ki ti kapab enplike dan pese ki garson Aaron, Nadab, ek Abiou ti fer? Zis apre ki Nadab ek Abiou pa ti desarz byen zot responsabilite konman pret, Zeova ti defann bann pret servi diven oubyen lezot labwason ler zot pe servi kot tabernak. (Levitik 10:9) Sa i endike ki petet sa de garson Aaron ti anba lenfliyans lalkol sa zour. Me vre rezon zot lanmor i akoz zot ti bril lansan ki pa ti an akor avek Lalwa, ki Zeova pa ti’n demann zot fer.
Leson pour nou:
10:1, 2. Bann serviter Zeova ozordi ki annan responsabilite i fer sa ki Zeova i demann zot pour fer. Deplis, zot devret respekte zot limit ler zot pe desarz zot responsabilite.
10:9. Nou pa devret fer okenn travay ki Bondye in donn nou anba lenfliyans lalkol.
LAPROPTE I ENPORTAN DAN LADORASYON BONDYE
Bann Izraelit ti benefisye dan de fason avek bann lareg lo manze konsernan bann zannimo ki prop e bann ki sal. Sa bann lalwa ti ede evite ki zot ganny enfekte avek bann mikrob danzere. I ti osi kontinyen fer zot reste separe avek bann nasyon dan zot zalantour. Lezot lalwa ti koz konsernan ler en dimoun ti ganny sali par bann lekor mor, pirifikasyon bann madanm apre lakousman, prosedir ki enplik bann dimoun ki ganny lalep, e konsernan desarz seksyel sorti avek zonm ek fanm ki fer vin enpir. Bann pret ti bezwen tret bann ka ler en dimoun ti’n vin enpir.
Larepons pour bann Kestyon lo Labib:
12:2, 5—Akoz donn nesans i fer en madanm vin “enpir”? Lorgann reprodiktif ti’n ganny fer pour transmet lavi parfe. Me akoz move lefe pese ki nou’n erite, lenperfeksyon ek pese in ganny transmet avek zanfan. Sa peryod letan enpir asosye avek donn nesans, osi byen ki lezot ka parey peryod ek desarz sperm, ti fer bann Izraelit konsyan sa pese ki zot ti’n erite. (Levitik 15:16-24; Psonm 51:5; Romen 5:12) Bann lalwa konsernan pirifikasyon ti pou ed bann Izraelit rekonnet nesesite en ranson pour kouver pese limanite e refer imen vin parfe. Alor, Lalwa ti vin zot “gardyen ziska ler Kris ti arive.”—Galat 3:24.
15:16-18—Ki sa bann “desarz sperm” mansyonnen dan sa bann verse? Sa i paret pe refer avek en desarz ki arive avek en dimoun pandan lannwit osi byen pandan relasyon seksyel dan maryaz.
Leson pour nou:
11:45. Zeova i sen e i demande ki bann ki ofer li servis sakre i sen. Zot devret fer zefor pour vin sen e reste prop fizikman e spirityelman.—2 Korentyen 7:1; 1 Pyer 1:15, 16.
12:8. Zeova ti permet bann pov ofer zwazo olye en mouton ki kout pli ser konman en lofrann sakrifisyel. I pran konsiderasyon pour bann pov.
BEZWEN RESTE SEN
Bann sakrifis pour pese pli enportan ti ganny ofer Zour Propisyasyon ki ti ganny fer tou le zan. En toro ti ganny ofer pour bann pret ek tribi Levi. En kabri ti ganny sakrifye pour lezot tribi Izrael. En lot kabri ti ganny anvoye vivan dan dezer apre ki gran pret ti met son lanmen lo sa kabri e konfes bann pese sa pep. Tou le de kabri ti ganny konsidere konman en sel lofrann pour pese. Tousala ti endike ki Zezi Kri ti pou ganny sakrifye e i ti pou osi anmenn nou pese.
Bann lareg konsernan manz lavyann e konsernan lezot keksoz i fer resorti nesesite pour nou sen ler nou ador Zeova. Pour sa rezon, bann pret ti bezwen reste sen. Sa trwa lafet tou le zan ti bann moman lazwa e moman pour remersi Kreater. Zeova ti osi donn son pep bann lareg konsernan sali son non sen, obzerv Saba ek Zibile, konportman anver bann pov, e fason pour tret bann lesklav. Zeova ti fer resorti bann benediksyon ki zot ti pou gannyen si zot obeir li e osi bann malediksyon si zot dezobei. I ti osi annan bann lareg konsernan lofrann an rapor avek bann ve ek valer en keksoz, premye ne bann zannimo, e donn en dizyenm tou keksoz konman “en keksoz sen pour Zeova.”
Larepons pour bann Kestyon lo Labib:
16:29—Dan ki fason bann Izraelit ti bezwen fer zot lekor soufer? Sa levennman ti ariv apre Zour Propisyasyon, ki ti relye avek rod pardon pour pese. I paret ki zot pa ti manze akoz zot ti rekonnet ki zot ti bann peser. Alor, i tre probab ki fer zot lekor soufer ti refer avek pa manze.
19:27—Ki sa komannman pour pa koup seve kourt lo kote oubyen detrir bout labarb? I paret ki sa lalwa ti ganny donnen pour anpes bann Zwif koup zot labarb oubyen seve dan en fason ki ti pou imit serten pratik payen. (Zeremi 9:25, 26; 25:23; 49:32) Me komannman Bondye pa ti vedir ki bann Zwif pa ti kapab koup zot labarb oubyen seve ditou.—2 Samyel 19:24.
25:35-37—Eski i ti toultan mal pour bann Izraelit sarz lentere? Si sa larzan ti’n ganny prete pour en rezon biznes, sa dimoun ki’n prete ti kapab sarz lentere. Me Lalwa pa ti permet en dimoun sarz lentere lo larzan ki i ti’n pret en dimoun mizer. I ti mal pour fer profi lo en vwazen ki ti annan problenm larzan.—Egzod 22:25.
26:19—Ki mannyer ‘lesyel i vin parey feray e later parey kwiv’? Akoz lasesres, lesyel parlao pei Kanaan ti pou paret dir e solid parey feray. San lapli, later ti pou paret klate parey en kouler kwiv.
26:26—Ki ‘dis madanm pe fer dipen dan en four’ i vedir? Normalman, sak madanm ti pou bezwen annan son prop four pour kwi tou son dipen. Me sa parol i montre ki manze pou telman rar ki en four ti pou ase pour kwi tou sa bann dipen ki dis madanm ti pou fer. Sa ti arive akoz zot pa ti reste sen.
Leson pour nou:
20:9. Pour Zeova, en lespri malis e kriyel i osi grav ki touy dimoun. Alor i ti donn menm pinisyon pour en dimoun ki’n maltret son paran avek enn ki’n touy zot. Eski sa pa i devret pous nou pour montre lanmour pour nou frer ek ser?—1 Zan 3:14, 15.
22:32; 24:10-16, 23. Nou pa devret sali non Zeova. Okontrer, nou devret loue son non e priye pour ki i ganny glorifye.—Psonm 7:17; Matye 6:9.
Ki Lefe Liv Levitik i fer lo nou Ladorasyon
Ozordi, bann Temwen Zeova pa anba Lalwa. (Galat 3:23-25) Me vi ki sa ki Levitik i dir i fer nou ganny en apersi lo pwennvi Zeova lo diferan keksoz, alor i kapab fer lefe lo nou ladorasyon.
Ler ou lir Labib pour lasemenn pour prepar pour Lekol Minister Teokratik, sirman ou pou realize ki nou Bondye i ekspekte ki son bann serviter i sen. Sa liv dan Labib i osi pous ou pour donn Bondye Tre O ou meyer, e pour toultan reste sen pour ki Zeova i ganny glorifye.
[Portre lo paz 19]
Bann sakrifis ki ti ganny fer anba Lalwa ti pe reprezant Zezi Kri ek son sakrifis
[Portre lo paz 20]
Lafet Gato san Lelven ti en levennman ki ti anmenn bokou lazwa
[Portre lo paz 21]
Bann lafet annyel, parey Lafet bann Payot, ti bann moman pour remersi Zeova