Jehovap oqaasia uumavoq

Mosesimik allakkat pingajui-nit pingaarnersat

ISRAELIKKUT Egyptenimi inussiatut aniguisinneqarneranniit suli ukioq ataasinngunngilaq. Maannakkut inuiaqatigiittut nutaatut aaqqissorneqarlutik nunamut Kana’animut ingerlapput. Jehovap inuiaqatigiit illernartut tassani najugaqarnissaat siunertaraa. Kana’anikkulli inooriaasiat guutisioriaasiilu ajortunngorsimaqaat. Taamaattumik Guutip ilumoortup Israelikkut ilagiissaat ilitsersorpai qanoq imminut kiffaasutut immikkoortinneqarsinnaalissasut oqaluussisinnaalerlutillu. Ilitsersuutit taakku Biibilimi Mosesimik allakkat pingajui-ni allaatigineqarput. Pruffiitip Mosesip qularnanngitsumik ukiumi 1512-imi u.n.s. Sinajip inoqajuitsuani allassimavai. Atuakkami oqaluttuarineqartut qaammatip ataasiinnaap ingerlanerani pisimapput. (2 Mosesi 40:17; 4 Mosesi 1:1-3) Jehovap arlaleriarluni pallorfiginnitsini illernartooqqullugit kajumissaarpai. — 3 Mosesi 11:44; 19:2; 20:7, 26.

Ullumikkut Jehovamut nalunaajaasut inatsisinut Guutip Mosesimut tunniusaanut naalatsigititaanngillat. Jiisusi Kristusi toqummat Inatsisit atortuujunnaarput. (Romamiut 6:14; Efesosimiut 2:11-16) Taamaattorli Mosesimik allakkat pingajui-ni inatsisit iluaqutigisinnaavavut, Guutitsinnik Jehovamik pallorfiginninnermik ilinniangaarsinnaagatta.

GUUTIMUT ILLERNARTUNIK PILLIUTEQARNEQ — KAJUMILLUNI PINNGITSAALIILLUNILU

(3 Mosesi 1:1–7:38)

Pilliutit Inatsisini eqqaaneqartut ilaat kajumilluni tunniunneqartussaapput, allalli pinngitsaaliissutaapput. Assersuutigalugu pilliutit ikikkagassat kajumilluni tunniunneqartarput. Taakku tamakkerlugit Guutimut tunniunneqartarput, soorluttaaq Jiisusi Kristusip inuunini utertitsissutitut pilliutaasutut kajumilluni tunniukkaa. Kajumilluni pilliut nereqatigiissutissaq avinneqartarpoq. Ilaa pilliivimmi Guutimut saqqummiunneqartarpoq, ilaa palasimit nerineqarluni sinneralu pilliisumit nerineqarluni. Kristumiunut tanitanut Kristusip toqunerata eqqaaniarnera pilliutaavoq nereqatigiissut. — 1 Korinthimiut 10:16-22.

Pilliutissat ajortaaruteqqussutit taarsiissutillu pinngitsaalisamik tunniunneqartussaapput. Ajortaaruteqqussutit piaarinani ajortuliornerit pillugit pilliutigineqartarput. Taarsiissutit Guutip pilliutigineqaqquai unioqqutitsisoqaraangat, imaluunniit unioqqutitsisup peqqissimisup aalajangersimasunik pisinnaatitaaffeqalerseqqinnerani. Naatitat pilliutigineqartarput Jehovap tukkussusia akueriniarlugu. Tamakku tamarmik uagutsinnut soqutiginaateqarput pilliutissat Inatsisini peqqussutigineqartut Jiisusi Kristusimut imminullu pilliutissaanut tamatumanngaluunniit pilluaqqussutissanut tikkuussimmata. — Hebræerit 8:3-6; 9:9-14; 10:5-10.

 Allassimaffinnut apeqqutit akineqartut:

2:11, 12 — Sooq tungusunnitsuut ’ikuallagassatut’ Jehovap akuerisinnaanngilaa? Tungusunnitsuut tamaani eqqaaneqartoq tassaasinnaanngilaq igutsaat tungusunnitsuutaat. Naak ’ikuallagassatut pilliutigineqassanngikkaluartoq’, tassaavoq ’naatitat inereqqaatit . . . narsaatit inerittuisa ilaat’. (2 Nalunaarsuutit 31:5) Tungusunnitsuut tamaani eqqaaneqartoq tassaagunarpoq paarnat tunguat. Tamanna immiussinnaammat pilliivimmi pilliutissatut akuerineqarsinnaanngilaq.

2:13 — Sooq pilliutigisassat tamarmik ’taratsunik ilaqartariaqarpat’? Pilliutigisassat mamassusiat pissutaanngilaq. Nunani assigiinngitsuni tarajoq aserutsaaliissutut atorneqartarpoq. Pilliutigisassat taratsunik ilaqarnerat qularnanngitsumik ajortunngorsimannginnermut asiulinnginnermullu assersuutaavoq.

Ilinniarfigisinnaasavut:

3:17. Tunnoq pitsaanerpaatut isigineqartarmat tamatuma nereqqusaannginnerata Israelikkut ilinniartissavaat Jehovap pitsaanerpaaq pigigaa. (1 Mosesi 45:18) Eqqaasinneqarpugut Jehova pitsaanerpaamik tunisariaqaripput. — Ussatit 3:9, 10; Kolossemiut 3:23, 24.

7:26, 27. Israelikkut aattortussaanngillat, aak Guutip isaani inuunermut assersuutaammat. „Uinngup uumassutaa aammiippoq,“ 3 Mosesi 17:11-mi allassimavoq. Ullumikkuttaaq pallorfiginnittut ilumoortut aattoqqusaanngillat. — Apustilit Suliaat 15:28, 29.

PALASEQATIGIIT ILLERNARTUT IVERTINNEQARPUT

(3 Mosesi 8:1–10:20)

Pilliutigisassanut atatillugu kikkut assigiinngitsunik akisussaaffilerneqarpat? Palasit. Guutimit peqquneqarnermisut Mosesip ileqqulersorluni Aroni palasiunertut ernerilu sisamat palasitut ivertippai. Ileqqulersorneq ulluni arfineq-marlunni ingerlasimagunarpoq, tamatumalu kingorna palasit taakku kiffartulerput.

Allassimaffinnut apeqqutit akineqartut:

9:9 — Aap pilliiviup killinganut kuineqarnera atortunullu assigiinngitsunut tanigunneqarnera sumut assersuutaava? Tamatuma takutippaa Jehovap aak saammaanneqaatitut akuerigaa. Saammaanneqarnissaq aammut tunngaveqarpoq. „Tassami inatsisit malillugit suut tamangajammik aammik eqqiarneqartarput,“ apustili Paulusi allappoq, „isumakkeerfiginninnerlu pisinnaanngilaq aammik kuisineqartinnagu.“ — Hebræerit 9:22.

10:1, 2 — Aronip ernerisa Nadabip Abihulu suna ajortuliuutigisimassagamikku? Nadabip Abihullu palasitut kiffartornerminni piumasaminnik iliornerisa kingunitsiannguani, Jehovap palasit illernartuummi kiffartortillugit viinnisoqqunagillu imigassartoqqunngilai. (3 Mosesi 10:9) Taamaattumik Aronip erneri marluk taakku tamatumani aalakoorunarput. Toqunneqarnerannulli pissutivik tassaavoq ’inneq illernartitaanngitsoq Jehovap kiinaata saanut sassaammassuk, tassa Jehovap peqqussutaanut akerliusumik iliorlutik’.

Ilinniarfigisinnaasavut:

10:1, 2. Ullumikkut Jehovap kiffai akisussaaffilerneqartut peqqussutai naapertorlugit iliortariaqarput. Suliassatillu naammassitillugit anneruniartussaanngillat.

10:9. Akisussaaffiit Guutimit tunniunneqartut naammassisinnaanngilavut imigassanit sunnerneqarutta.

 GUUTI PALLORFIGISSAGAANNI MINGUITSUUSARIAQARPOQ

(3 Mosesi 11:1–15:33)

Uumasut mingunnaatsut mingunnartullu pillugit maleruagassat Israelikkut marlutsigut iluaqutigaat. Nerisassanut bakterianik ajoqutaasunik mingutsinneqartunut illersorneqarput inuiaqatigiinnillu allanit avatangiisigisaminnit immikkoortinneqarnerullutik. Aamma uumasunit toqungasunit mingutsinneqarneq, arnat erninermik kingorna minguersiinerat, pupittoqarnermi aamma angutit aniasoqarnerat arnallu aaqarnerat pillugit allanik malittarisassiaqarpoq. Minguttoqaleraangat palasit isumagisussaavaat.

Allassimaffinnut apeqqutit akineqartut:

12:2, 5 — Sooq arnaq erniguni mingussimassava? Kinguaassiuutit naammalluinnartumik inuunermik tunisinissaq eqqarsaatigalugu pinngortinneqarput. Ajortili kingornuttagaq pissutigalugu inuuneq naammalluinnanngitsoq ajortiliusorlu kinguaassanut tunniunneqartarpoq. Erninernut, aaqarnermut anisoornermullu atatillugu ’mingunnerup’ atuukkallartup Israelikkut kingornuttakkaminnik naammalluinnanngitsumik eqqaasippaat. (3 Mosesi 15:16-24; Tussiaat 51:7; Romamiut 5:12) Minguerseeqqusaagamik Israelikkut paasisinnaavaat pilliutissat utertitsissut ajortiliussutsip matoorneqarnissaanut inuillu naammalluinnartunngoqqinnissaannullu pisariaqartikkitsik. Taamaalillutik Inatsisit ’perorsaasigaat’ Kristusimut. — Galatiamiut 3:24.

15:16-18 — Anisoorneq qanoq ittoq allassimaffinni pineqarpa? Tassaagunarpoq unnuakkut anisoorneq aammalu aappariit atoqatigiinneranni anisoorneq.

Ilinniarfigisinnaasavut:

11:45. Jehova Guuti illernartuuvoq imminullu kiffartortut illernartuunissaat piumasaralugu. Timikkut anersaakkullu minguitsuuniarlutik illernartuuniartariaqarput. — 2 Korinthimiut 7:1; 1 Petrusi 1:15, 16.

12:8. Jehovap piitsut savaaraq naleqarnerugaluartoq taarsiullugu timmissanik pilliuteqarnerat akueraa. Piitsut soqutigisarpai.

ILLERNARTUUNEQ ATATINNEQARTARIAQARPOQ

(3 Mosesi 16:1–27:34)

Pilliutit ajortaaruteqqussutit pingaarnerit ullormi saammaannartitsivimmi ukiumoortumi naammassineqartarput. Palasit naggueqatigiillu Levikkut iluaqutissaannut nersut angutiviaq pilliutigineqarpoq. Israelikkut naggueqatigiivisa palasiunngitsut iluaqutissaannut savaasaq angutiviaq pilliutigineqarpoq. Savaasaq angutiviaq alla uumatillugu inoqajuitsumut aallartinneqarpoq inuit ajortuliorneri qulangerlugu anngiiaatigineqareermata. Savaasat marluk taakku ataatsikkut pilliutitut ajortaaruteqqussutitut ataasiinnartut isigineqarput. Tassuuna assersuutigineqarpoq Jiisusi Kristusi pilliutigineqarlunilu ajortaajaasussaasoq.

Neqitornermut allanullu atatillugu maleruaqqusat erseqqissarpaat Jehovamik pallorfiginninnitsinni illernartuusariaqartugut.  Tamatumunnga naapertuuttumik palasit illernartuujuartariaqarput. Ukiup ingerlanerani nalliuttorsiornerit pingasut nuannaarfiupput Pinngortitsisumut qujamasunnermik ersersitsiviullutik. Jehovap aamma innuttani atermi illernartup atornerlunneqannginnissaa, sabbatisiorneq, ukiup utertitsiviup nalliussinera, piitsut inussiallu iliorfiginninnerat pillugu aalajangerfigai. Guutimut naalannermut atatillugu pilluaqqussutissat naalannginnermut pillaatissanut naleqqiunneqarput. Neriorsuutinut, nalilerneqarnernut, nersutaatit piaqqeqqaataannut atatillugu pilliutissat, qulinginillu tunisineq, tassa ’tunissutit illernartitat Jehovamut pigisassanngortitassat’ pillugit maleruaqqusaqarpoq.

Allassimaffinnut apeqqutit akineqartut:

16:29 — Sooq Israelikkut ’iisinnginniassappat’? Ullormi saammaannartitsivimmi Israelikkut iisinnginniassapput, ajortinik isumakkeerfigineqarniarsarisussaagamik. Taamanikkut iisinnginniarneq ajortinik nassuerutiginninnermut ersiutaavoq.

19:27 — Suna pissutigalugu Israelikkut ’nutsatik naalisarlugit killortassanngilaat umitilluunniit ilanngarnagit’? Inatsisini tamanna qularnanngitsumik oqaatigineqarpoq juutit Guutimik nalusut nutsanut uminullu atatillugu ileqqorisaat aalajangersimasut ilaaqqunagit. (Jeremia 9:25, 26; 25:23; 49:32) Guutilli inatsisaa isumaqanngilaq juutit nutsatik umitilluunniit killortassanngivikkaat. — 2 Samueli 19:24.

25:35-37 — Israelikkut tamatigut ernialinnik akiligassarsisinnaanngillat? Niuerneq eqqarsaatigalugu aningaasanik taarsigassarsisitsisoq ernialinnik akiligassarsisinnaavoq. Inatsisinili piitsut ikiornissaannut taarsigassarsisitsisoq ernialinnik akiligassarsinissaq inerteqqutigineqarpoq. Inoqat naalliuttoq iluanaarutigalugu pisuunnguutiginiarnissaa eqqunngitsuliorneruvoq. — 2 Mosesi 22:25.

26:19 — ’Qilak saviminertut nunalu kanngussattut’ qanoq manngertigilersinneqarsinnaappat? Sialoqannginnissaq pissutigalugu qilak nuna Kana’anip qulaaniittoq saviminertut manngertigilerpoq. Sialoqanngimmallu nuna kanngussattut isikkoqalissaaq.

26:26 — ’Arnat quliullutik iffiorfimmi ataasiinnarmi timiusaliortassasut’ qanoq paasisariaqarpa? Amerlanertigut arnat tamarmik immikkut iffiorfeqartariaqarput timiusaliornerminut. Oqaatsilli tamakkua takutippaat nerisassaaleqineq ima ingasatsitigissasoq iffiorfik ataasiinnaq arnat qulit timiusaliornissaannut naammassinnaasoq. Siulittuutigineqarpoq inuit illernartuujuanngippata taama kinguneqassasoq.

Ilinniarfigisinnaasavut:

20:9. Uumissuisumik ajortumillu isiginnittaaseqarneq Jehovap isaani toqutsinertulli ajortigaaq. Taamaattumik angajoqqaaminik perloqqusisoq taakkuninnga toqutsisutulli pillarneqartussaavoq. Tamanna eqqarsaatigalugu uppeqativut asasariaqannginnerpavut? — 1 Johannesi 3:14, 15.

22:32; 24:10-16, 23. Jehovap aqqa mitaatigineqartussaanngilaq. Akerlianik aqqa unnersiutigisariaqarparput illernartitaanissaalu qinnutigisariaqarlugu. — Tussiaat 7:18; Matthæusi 6:9.

QANOQ MOSESIMIK ALLAKKAT PINGAJUI PALLORFIGINNINNITSINNUT SUNNIUTEQARTUT

Jehovap Nalunaajaasui ullumikkut Inatsisinut naalatsigititaanngillat. (Galatiamiut 3:23-25) Mosesimilli allakkat pingajui-ni allanneqarsimasut Jehovap assigiinngitsunut isiginnittaasianik paasitikkamisigut, pallorfiginninnitsinnut pingaaruteqarsinnaapput.

Sapaatip akunneri tamaasa Teokratiimik Atuarfimmut piareersarluta Biibilimik atuartaraangatta, qularnanngitsumik paasilluassavarput Guutip imminik pallorfiginnittut illernartuunissamik piumasaqarfigigai. Biibilip atuagartaata tamatuma aamma killissinnaavaatigut Qutsinnerpaaq pigisatsinnik pitsaanerpaanik tuniumallugu, taassumalu unnersiutiginissaanut illernartuujuarumalluta. (wE 5/15 04)

[Qupp. 29-mi assiliartaq]

Inatsisit naapertorlugit pilliutit Jiisusi Kristusimut pilliutaanullu tikkuussipput

[Qupp. 30-mi assiliartaq]

Seernarsaateqanngitsumik timiusartortarfik tassaavoq nalliuttorsiorfik nuannaarfiungaartoq

[Qupp. 31-mi assiliartaq]

Nalliuttorsiornerit ukiumoortut, assersuutigalugu tupiusaliorfik, Jehovap qutsaviginissaanut periarfissaalluarpoq