Koai Ma te Au Anabaptist?

TE AU manuiri tei atoro mua i te ngai maata o te oire maata o Münster i Westphalia, Tiamani, i te maataanga o te taime e tapu ana i te akara i nga aua auri e toru te tautau maira mei te punanga o tetai are pure. No etai au tuatau iti ua, kua vai taua au aua ra ki reira e vaitata i te 500 mataiti. I te akamataanga kua mou te reira i te au kopapa o nga tangata e toru tei tamamaeia e tei tamateia ki te ngai tangata. Ko ratou ia te au Anabaptist, e e au akatutuanga o to ratou patireia te au aua.

Koai ma te au Anabaptist? Akapeea te akapupuanga i te akamataanga ia? Eaa ta ratou au tumu apiianga? Eaa ra te au tane i tamateia ai? E eaa te pirianga a te au aua e toru ki tetai patireia?

Taui i te Akonoanga​—Akapeea Ra?

I te openga o te 15 e i te akamataanga o te 16 anere mataiti, kua tupu mai te au akaapaanga o te Ekaretia Katorika Roma e te au orometua. Kua ki te akonoanga i te pikikaa e te akonoanga tau kore, e no reira, e manganui tei manako mai i te inangaro no te au tauianga maata tikai. I te 1517, kua kapiki atea a Martin Luther no tetai tauianga, e i etai tei kapiti atu ki roto i te maro anga, kua akamataia te Taui Anga Porotetani.

Inara kare a te au tangata taui e parani tamou tikai e eaa te ka raveia me kore mei teaa te mamao i te itae anga o te au tauianga. E manganui tei kite mai i te inangaro i te aru anga i te Pipiria no runga i te au tumu o te akamori anga. Inara, kare ua i rauka ana i te au tangata taui i te akatika no runga i te uri anga noa ua o te au apiianga Pipiria. Kua manako etai papaki e e marie roa te tere anga o te Taui Anga. E no roto mai i teia au tangata taui i akamata mai ei te akapupuanga Anabaptist.

“I te tikaanga tikai, kare e ko tai ua akapupuanga papetito, e maata rai ratou,” i tata ei a Hans-Jürgen Goertz i roto i tana puka Die Täufer​—Geschichte und Deutung. Ei akatauanga, i te 1521 kua akatupu nga tane e a tei kiteaia e ko te au peroveta i te oripu anga na te tutu anga i te au apiianga Anabaptist i Wittenberg. E i te 1525 kua akamata mai tetai pupu Anabaptist takake mai i Zurich, i Tuiterani. Kua akamata katoa ia te pupu tangata Anabaptist i Moravia​—ko te Tieki Repapuriki i teianei​—e i te Neterani.

Papetitoanga​—No te Tamariki me no te Aronga Mamaata?

E rikiriki ua te maataanga o te pupu tangata Anabaptist, e kua matau te au mema i te akono i te tu au. Kare to ratou aronga irinaki i uuna ana i to ratou irinaki, ko te tika, kua tutu aere atu ratou ki etai ke. Kua akatakaia mai te au tumu apii anga o te akarongo o te Anabaptist i roto i te Schleitheim Akakiteanga i te 1527. Kapiti atu ki tetai au apinga ke atu, kua kopae ratou i te piri atu anga i roto i te tamaki anga, kua akatakake mai mei to teianei ao, e kua akaatea atu i te aronga rave tarevake. Inara te apinga maata oki tei akataka i to ratou akarongo, i te akataka meitaki anga i te au Anabaptist mei te au akonoanga ke mai, e ko te irinakianga e no te aronga mamaata ua te papetitoanga kare ia e no te tamariki. *

Kare te papetitoanga no te aronga mamaata e maroanga ua no te apii anga akonoanga; e maro anga te reira no te mana. Me taroaroa ia te papetitoanga kia taeria ki te mamaata anga​—i te akatikaanga i reira i tetai tangata kia akono i te tuku anga tumuia ki runga i te akarongo​—penei kare takiri tetai e papetitoia. E ka rauka i etai aronga kare i papetitoia, i tetai tuanga, kia noo ki vao mai i te akatereanga o te akonoanga. No etai au akonoanga, te papetitoanga i te aronga mamaata ko te ngere anga ia o te mana.

 No reira, kua inangaro te au Katorika e te au Lutheran kapipiti i te akamaroiroi kore i te akonoanga o te papetitoanga i te aronga mamaata. I muri ake i te 1529, koia tikai i roto i tetai au ngai aere, ko te aronga tei rave i te papetitoanga i te aronga mamaata me kore tei papetitoia i to ratou mamaata anga mai kua orongaia te utunga kia tamateia. Kua akataka mai te tangata tata ko Thomas Seifert e no te au Anabaptist kua “takinga kino pakariia i te Patireia Roma Tapu o te Pa Enua Tiamani.” Kua taeria te takinga kino anga i Münster ki tona take.

Kua Kimi a Münster Taito i te Tauianga

E 10,000 aronga tei noo ana i Münster Taito ra e kua koropiniia e tetai akatereanga no te paruruanga te akaraanga e kare takiri e tomokiaia mei tetai 90 mita te atea e tetai 50 kiro mita tona takapini anga. Inara, te turanga i roto ake i te oire maata, e meangiti mai te tu ngaueue kore e i tona au paruruanga. Kua taiku The Kingdom of the Anabaptists, tei neneiia e te City Museum o Münster, “i te au taumaro anga poritiki o roto roa i rotopu i te City’s Aldermen e te Guilds.” Tetai katoa, kua riri te tangata enua i te tu o te au orometua. Kua ariki a Münster i te Taui Anga e i roto ia 1533 kua tauiia mei te oire Katorika ki te Luther.

Ko tetai tangata tutu aere maata roa atu o te au tangata taui i Münster e ko Bernhard Rothmann ia, e tangata rererere ua te manako. Kua akamarama mai te tangata tata ko Friedrich Oehninger i to Rothmann “au manako e papu e Anabaptist tikai; kua kopae aia e tetai atu au taeake i te papetito i te au pepe.” Kua rauka iaia te turuanga rongonui i Münster, noatu e e pakari roa tana au manako tuke tikai ki etai ke. “E maata ua atu te aronga tei inangaro i te tuatau taito ra kua akaruke i te oire maata, ma te manako apiapi e te matakite. E maata te au Anabaptist tei aere pu ua mai ki Münster mei te au ngai katoa, manako anga i te kite i te akatupuanga i ta ratou au manako anga.” Kua taki atu teia aka pupu Anabaptist i Münster ki tetai tupu anga kino tikai.

Kua Tamakiia a Ierusalema Ou

E rua nga tangata Orani tei aere mai ki Münster​—ko Jan Mathys, e tangata tunu varaoa mei Haarlem mai, e Jan Beuckelson tei kitea katoa ia e ko John o Leiden​—kua rave i tetai tuanga tau ki te au akatupuanga ki reira ra. Kua kapiki a Mathys iaia e e peroveta e kua akakite e ko Aperira 1534 te tuatau o te rua o to Karaiti oki akaou anga mai. Kua kapikiia te oire maata e ko Ierusalema Ou tei taikuia i roto i te Pipiria, e kua akariro te reira i te tu apokarupo. Kua iki a Rothmann e pouroa te au ngai e na te katoatoa ia. Kia tau te aronga mamaata te noo ra ki reira kia akono i te tukuanga: Kia papetitoia me kore kia akaatea ki vao. Kua kapiti mai i roto i te au papetitoanga urupu tangata e ko te aronga tei papetito ua ia kia kore e akaruke i to ratou kainga e ta ratou au apinga.

Kua akara poitirere mai te au pupu tangata ke ia Münster i te akariro anga mai e ko te oire maata mua e ko te au Anabaptist te ririnui pakari i te akonoanga e te poritiki. Tei tau ki te puka Die Täufer zu Münster, kua apai mai kia “Münster i te takinokino anga o te katoa anga o te Patireia Roma Tapu o te Pa Enua Tiamani.” Kua taokotai mai tetai tangata turanga teitei i reira, te Tamaiti Ariki-Epitikopo ko Count Franz von Waldeck, tetai pupu vaeau kia tamaki atu ia Münster. Tei roto te au Katorika e te au Lutheran i taua pupu vaeau ra. Teia nga akarongo e rua, tei tu i mua ana tetai i tetai tua o te Taui Anga e kua inangaro ua atu i te tamaki atu tetai ki tetai i te Toru Ngauru Mataiti Tamaki, kua kapiti to raua pupu i te tamaki atu anga i te au Anabaptist.

Takore Anga o te Patireia Anabaptist

Kare te tu ketaketa o te vaeau tei tamaki maira i tamataku i te aronga tei paruruia i muri i te au patu paruru o te oire maata. I roto ia Aperira 1534, e kua manakoia ka tupu te rua o to Karaiti  oki akaou anga mai, kua aere atu a Mathys ki vao mai te oire maata na runga i tetai oroenua teatea, manako anga no tetai paruru anga tu-Atua. Akamanako ana i te poitirere o te aronga turuturu o Mathys ia ratou i te aro anga i rungao i te patu paruru o te oire maata e te kite anga i te nuku vaeau te tamaki maira i te tipupu anga ia Mathys e kua akauta i tona katu ki runga i tetai rakau.

Kua riro mai a John o Leiden ei mono no Mathys e kua kapikiia ko Jan te Ariki o te au Anabaptist i Münster. Kua tauta aia i te akatano i te tuke i rotopu i te au tane e te au vaine​—e maata atu te au vaine e i te au tane i te oire maata​—na te akamaroiroi anga i te au tane kia apai maata i te au vaine ka akaipoipo i ta ratou i inangaro. Ei akatauanga i te kino pakari i roto tikai i te patireia o te au Anabaptist i Münster, te utunga no te akaturi e te piri anga ainga ka tamateia, inara kua akatikaia te porikami, e kua akamaroiroiia. Kua apai uaorai te Ariki ko Jan e 16 vaine akaipoipo. I tetai ia ratou, ko Elisabeth Wandscherer, i te patianga kiaia i te tikaanga kia akaruke i te oire maata, kua pariia tona katu i te ngai tangata.

Kua taeria te tamaki anga e 14 marama, e tae roa kia Tiunu 1535 i te taopenga anga i te oire maata i te inga anga. Kua mamae a Münster i tetai takore anga i te tu e kare te oire maata i kite akaou ana e tae roa ki te Tamaki II o te Ao. Kua oro a Rothmann, inara kua opukiaia te Ariki ko Jan e e rua akaou mai au Anabaptist rongonui, kua tamamaeia, e kua tamateia. Kua tukunaia to ratou au kopapa ki roto i te au aua e kua takina ia ki runga kia tautau ua mai mei te punanga o te Are Pure o St. Lambert. Te reira “kua akariroia ei akamatakite anga mataku tikai ki te aronga katoatoa te ka tamanamanata mai,” i akataka mai ei a Seifert. Ae, kua apai mai te piri atu anga ki roto i te au poritiki i te au tupu anga mate tikai.

Eaa tei tupu ki te pupu tangata Anabaptist ke mai? Kua rave tamouia te takinga kino anga e manganui te au mataiti i roto ia Europa. Kua akamou te maataanga o te au Anabaptist ki ta ratou au kaveinga no te apii anga no te au, noatu e meangiti ua te aronga marokiakia. . Aere rai, kua apai te orometua i mua ana ko Menno Simons i te arataki anga o te au Anabaptist, e taopenga mai kua kapikiia te pupu ko te au Mennonite me kore na tetai ingoa ke atu.

Te Au Aua e Toru

E iti tangata akonoanga ua te au Anabaptist tei tauta kia akamou ki te au kaveinga Pipiria. Inara kua taki atu te aronga kino roa te manako i roto ia Münster i te au Anabaptist kia akaruke i te reira aerenga e kia piri atu ki roto i te au angaanga poritiki. I te akamataanga te reira i te akatupu, kua taui te akapupu anga ki roto i tetai orureau ririnui. Kua akataka mai teia i te tumatetenga no te akapupu anga Anabaptist e no te oire maata taito ra o Münster.

Te akamaaraia ra rai te au manuiri tei aere ki te ngai maata o te oire maata o teia au tupu anga kino tikai e vaitata rai ki te 500 mataiti i topa. Akapeea ra? Na te au aua auri e toru te tautau maira mei te punanga o te are pure.

[Tataanga Rikiriki i Raro]

[Au Tutu i te kapi 13]

Te Ariki ko Jan tei tamamaeia, tei tamateia, e tei akatautauia mei te punanga o te Are Pure o St. Lambert