‘Enye Ama Ekpep Nnyịn Ndiwụt Ukpono Nnọ Ido Ukpono Esie’

KIET ke otu Mme Ntiense Jehovah otode mbahade obio ukara Rovigo, Italy, ama edifiọk ke imọ imenyene mbufịt ye nte ke mbufịt emi ekeme ndiwot imọ. Ke enye ama okodu ke ufọkibọk ke anyan ini onyụn̄ ọdọhọ ẹsọbọ imọ idem ye unana edikịm iyịp nsịn imọ ke idem, mme nurse n̄kann̄kụk emi ẹsisede ẹban̄a mbon udọn̄ọ kansa ẹma ẹn̄wam ndinọ enye usọbọ ke ufọk esie.

Ọkpọsọn̄ mbuọtidem owo udọn̄ọ emi edide isua 36 mi ye enye ndikenyịme ndibere ye mbiausọbọ ama enen̄ede otụk mbiausọbọ oro ẹkenọde enye usọbọ. Esisịt ini mbemiso kansa oro okowotde enye, kiet ke otu mme nurse oro ẹkesisede enye enyịn ama ewet se enye okokụtde ke idem owo udọn̄ọ emi, oro enye okokotde Angela, ke magazine emi etịn̄de n̄kpọ aban̄a mme nurse.

“Angela okop odudu onyụn̄ ọdọn̄ enye ndika iso ndu uwem. Enye ọfiọk idaha esie ye idiọk udọn̄ọ oro enye ọdọn̄ọde, kpa nte owo nnyịn ekededi oro odude ke idaha esie ọkpọfiọkde, edi enye ke oyom usọbọ m̀mê ibọkusọbọ. . . . Nnyịn mme nurse ima itọn̄ọ ndimehe ye enye sụn̄sụn̄. Enye ikesịnke un̄wam nnyịn. Ke edide isio, in̄wan̄-in̄wan̄ edu Angela ama anam kpukpru n̄kpọ ẹdi mmemmem. Ekedi n̄kpọ inemesịt ndise mban̄a enye, sia ikọfiọkde ke emi ekedi ini ndinyene eti itie ebuana nnyụn̄ mbọ ufọn nto edem mbiba. . . . Nnyịn ima isọsọp idifiọk ke ido ukpono esie idiyakke nnyịn isọbọ enye idem.” Emi ekedi ekikere nurse oro sia enye ekekerede ke ẹkpenyene ndikịm iyịp nsịn Angela ke idem, edi Angela ama esịn.—Utom 15:28, 29.

“Nte nta mme ọnọ-usọbọ, nnyịn ima isian Angela ite ke nnyịn inyịmeke ye ubiere esie ndisịn edikịm iyịp nsịn ke idem, edi enye ama an̄wam nnyịn ndifiọk nte enye akadade uwem ke akpan n̄kpọ. Nnyịn n̄ko ima idifiọk nte enye ye ubon esie ẹkedade ido ukpono mmọ ke akpan n̄kpọ. Angela osụk ọsọsọn̄ọ ada ke ubiere esie. Enye iyakke udọn̄ọ esie akan enye ubọk. Enye okop odudu. Enye oyom ndidu uwem, ndisịn ofụri ukeme nyom usọbọ oro odotde, ndinyụn̄ n̄ka iso ndu uwem. Enye anam nnyịn ifiọk ubiere esie ye se enye enịmde ke akpanikọ. Enye enyene uko oro ediwak ini nnyịn mînyeneke, ye ọkpọsọn̄ mbuọtidem oro nnyịn mînyeneke. . . . Angela ekpep nnyịn nte edide akpan n̄kpọ ndiwụt ukpono nnọ ido ukpono esie, n̄kpọ emi edide ata isio ye se ido unọ usọbọ nnyịn oyomde. . . . Nnyịn imenịm ke se Angela ekpepde nnyịn enen̄ede edi akpan n̄kpọ, koro nnyịn imesisobo kpukpru orụk owo, kpukpru orụk idaha, ye kpukpru orụk ido ukpono, ndien nnyịn imekeme ndikpep n̄kpọ nto emi inyụn̄ inọ kpukpru owo oro isobode se mmọ ẹyomde.”

Ekem ibuotikọ magazine oro ama odụri ntịn̄enyịn owụt Ndutịm Ibet Oro Akarade Ido Unọ Usọbọ Mbon Nurse Italy, emi ẹkesịnde ke n̄wed ke 1999, emi ọdọhọde ete: “Nurse esinam utom esie, ekerede aban̄a ido ukpono, ido uwem, ye ido edinam obio owo, ọkọrọ ye orụk oro owo otode ye m̀mê owo oro edi eren m̀mê n̄wan.” Ke ndusụk idaha, ekeme ndisọn̄ mbiausọbọ ye mme nurse ndikpono mme edinịm ke akpanikọ ido ukpono owo udọn̄ọ, edi nnyịn imesiwụt esịtekọm iban̄a mbiausọbọ oro ẹnyịmede ndikpono mme edinịm ke akpanikọ emi.

Mme Ntiense Jehovah ẹsitịm ẹtie ẹkere mbemiso ẹnamde ubiere ẹban̄a usọbọidem mmọ. Mmọ ẹnen̄ede ẹda se N̄wed Abasi etịn̄de ke akpan n̄kpọ, nte Angela akadade, mmọ idịghe mbon ukwan̄ ifiopesịt. (Philippi 4:5) Ke ofụri ererimbot, nta mme ọnọ-usọbọ emi ibat akade-ka iso ndikọri ẹnyịme ndikpono ubieresịt mbon udọn̄ọ mmọ oro ẹdide Mme Ntiense.