‘Gintudluan Niya Kami nga Tahuron ang Iya Relihion’

NATUKIBAN sang isa sang mga Saksi ni Jehova sa probinsia sang Rovigo, sa Italya, nga may tumor sia kag malala na ang iya kahimtangan. Pagkatapos sang pila ka beses nga pagtener sa ospital, nga sa amo nga mga tinion nagpangabay sia nga bulngon nga wala nagapatughong sing dugo, gin-atipan sia sa balay sang mga nars gikan sa lokal nga serbisyo nga nagaaman sing mga nars agod atipanon ang mga pasyente nga may kanser.

Ang mabakod nga pagtuo kag kinabubut-on nga pagkooperar sining 36 anyos nga pasyente nagpadayaw gid sa mga doktor kag mga nars nga nagbulong sa iya. Antes mapatay sa kanser ang pasyente, nagsulat ang isa sang mga nars nga nag-atipan sa iya sa isa ka nursing magazine tuhoy sa iya eksperiensia sa pasyente nga gintawag niya nga Angela.

“Mapagsik kag determinado nga mabuhi si Angela. Nahibaluan niya ang iya kahimtangan kag ang iya malala na nga balatian, kag kaangay sang bisan sin-o sa aton, nagapangita sia sing solusyon, remedyo, ukon bulong. . . . Amat-amat nga nakilala namon sia. Wala sia nagpamatok sa amon bulig. Sa baylo, nangin mahapos ang tanan bangod sa pagkaprangka ni Angela. Isa gid ka kalipay nga atipanon sia, kay nahibaluan namon nga tion ini nga makapakig-angot kami sa isa ka sinsero nga tawo kag ang tion nga tanan kami makabenepisyo. . . . Narealisar namon gilayon nga ang iya relihion mangin upang sa amon pagbulong sa iya balatian.” Amo ini ang iya opinyon bangod sa pagpati niya dapat tughungan sing dugo si Angela, nga ginpangindian ni Angela.—Binuhatan 15:28, 29.

“Subong mga propesyonal sa ikaayong-lawas, ginsilingan namon si Angela nga indi kami ugyon sa iya desisyon, apang sa bulig niya, nahangpan namon kon daw ano ka importante ang kabuhi para sa iya. Nahangpan man namon kon daw ano ka importante ang iya relihion para sa iya kag sa iya pamilya. Wala mangampo si Angela. Wala sia magpadaug sa iya balatian. Maisog kag determinado sia. Luyag niya nga mabuhi, magpakigbato, kag padayon nga magkabuhi. Ginpabutyag niya ang iya determinasyon, ang iya pagpati. May determinasyon sia nga sa masami wala sa amon, ang pagtuo, nga sa amon bahin indi subong kalig-on sang iya pagtuo. . . . Gintudluan kami ni Angela sang pagkaimportante sang pagtahod sa iya relihion, nga tuhay gid sa prinsipio sang amon propesyon. . . . Nagapati kami nga ang gintudlo ni Angela sa amon tuman gid ka importante, kay makasumalang kami sing tanan nga sahi sang tawo, tanan nga sahi sang sirkunstansia, kag tanan nga sahi sang relihion, kag makatuon kami kag makabulig sa bisan sin-o nga amon mapakig-angutan.”

Nian, ang artikulo sang magasin nagpatuhoy sa Code of Professional Ethics for Italian Nurses, nga naaprobahan sang 1999, nga nagasiling: “Ang nars nga nagahimo sang iya mga obligasyon, nagabinagbinag sang relihioso, moral, kag kultural nga mga prinsipio, kag subong man sang rasa kag sekso sang isa.” Kon kaisa, mahimo nga mabudlay para sa mga doktor kag mga nars nga tahuron ang relihioso nga mga pagpati sang isa ka pasyente, apang pabaloran gid kag pasalamatan sang isa ang mga handa sa paghimo sini.

Ginahunahuna sing maayo sang mga Saksi ni Jehova ang mga desisyon nga ila ginahimo tuhoy sa ila ikaayong-lawas kag pagpabulong. Hanuot nga ginabinagbinag nila ang ginasiling sang Kasulatan, kag subong sang ginpakita sa kaso ni Angela, indi sila mga panatiko. (Filipos 4:5) Sa bug-os nga duta, handa sa pagtahod ang nagadugang nga kadamuon sang mga nagaatipan-sang-ikaayong lawas nga mga propesyonal sa konsiensia sang ila mga pasyente nga Saksi.