Хығырығҷыларның сурығлары

Иегованың киречілеріне ханның оох фракцияларынаң тузаланарға чарир ба?

Пу нандырығ, кӧбізін, 15 хандых айында, 2000 чылда сыххан журналдаң алылған.

Иегованың киречілері постарына хан урдырбинчалар, анзында ікінҷілес чоғыл. Піс ікінҷілебинчебіс, Худайның ханнаңар пирген чахиин кізілернің алысчатхан кӧрістеріне килістіре алыстырарға чарабас. Че пӱӱн ханның тӧрт ӧӧн компоненттерін паза оларның оох фракцияларын оонаң сығарып алчалар, аннаңар наа сурығлар сыхчалар. Христианинге оларнаң тузаланарға чарир ба, чарабас па тіп пӧкчетсе, таллап алған имнег оңдайынаң тузазын паза хомай итчеткенін не санға аларға чарабас. Ағаа пу сурығдаңар Библияда ниме чоохталчатханын паза аның пӧгіні Худайнаң палғалызына хайди теелерін санға аларға кирек.

Ӧӧн сурығлар пілдістіглер. Оларны піліп аларға Библияда, тархында паза имнег кирегінде пазылған нимелер полысчалар.

Иегова Худай пістің ӧбекебіске, Нойға ханнаң пасхаҷыл оңдайнаң тудынарға чоохтаан (Бытие 9:3, 4). Соонаң Израиль чонына пирілген чахығ хан ах-арығ полчатханын кӧзіткен: «Израиль кізізі алай сірернің араңарда чуртапчатхан пасха чирдең килген кізі хан чізе, мин аннаң тоғыр парам». Худайның чахиин сайбаан кізі хомай кӧзідім полған, аннаңар Худай: «Аны чох идібізем», — тіпче (Левит 17:10). Соонаң илҷілер паза ах сағаллар, Иерусалимде чыылызып алып, піске «ханны чібеске» устағ пиргеннер. Анзы чой худайларға пазырғаны паза сайбах чӧргені осхас чазых полған (Илҷілернің 15:28, 29).

Ол туста чуртаан христианнар пу чахыға хайди хайғаннар? Олар наа даа, узубысхан даа ханны чібеҷеңнер. Ханын позытпаан малның идін ідӧк чібеҷеңнер. Паза олар ханны аралап иткен чиисті, кӧзідімге, ханнығ колбасаны, чібеҷеңнер. Хайдағ даа ханны чеені Худайның чахиин сайбааны полған (1 Самуила 14:32, 33).

Ол туста чуртаан кізілернің кӧбізі ханны чеенін хомай нимее санабаҷаңнар. Анзы Тертуллианның тоғыстарынаң кӧрінче (ІІ—ІІІ век, п. э.). Христианнарны хан ісчелер тіп саба пыролааннарына нандырып, Тертуллиан хан оортап чӧптезіг турғысчатхан чоннардаңар пасхан. Ідӧк ол, аңдарчатхан ағырығдаң позып алар ӱчӱн, гладиаторскай ойыннар тузында аренада ӧдірткен сайбағҷыларның ханын маңзырап ісчеткен кізілердеңер чоохтаан.

Римдегілер хан іскенін хазыхха туза тіп саназалар даа, христианнар андағ кирек идерге чарабас тіп санаҷаңнар. Тертуллиан пасхан: «Христианнар... малның даа ханын чібинчелер». Римдегілер, тізең, христианнарның Худайға киртістіг полчатханнарын, ханнығ чиисті пиріп, сыныхтаҷаңнар. Тертуллиан аннаң андар пасча: «Сірер оларны малның даа ханынаң хорыхтырарға хынчазар, хайди сірер олар кізі ханын ізерге ахсыларын асчалар тіп киртінчезер?»

Пӱӱн асхынах кізі Ӧӧркі Худайға киртістіг полғаны хан урдырғанынаң сыныхталча тіп сағынча. Ікінҷілес чоғыл, Иегованың киречілері чуртирға хынчалар, че олох туста олар Худай ханнаңар пирген чахығны толдырарға кӱстенчелер. Амғы имнег киректерін санға алза, анзы нимені таныхтапча?

Ікінҷі мировой чаа соонда хан урғаны имҷілер аразында уғаа тарап парған, андада Иегованың киречілері анзы Худайның чахиина тоғырланчатханын оңнап алғаннар. Олар ам даа іди сағынчалар. Че пола-пола наа имнег оңдайлары таап алған. Пӱӱн пӱдӱн ханны асхынах урчалар. Кӧбізін ханның тӧрт ӧӧн компоненттерінің пірсін урчалар: 1) эритроциттер; 2) лейкоциттер; 3) тромбоциттер; 4) ханның плазмазы алай сыворотка тіп адалчатхан сууғас чардығы. Кізінің ағыриин санға алып, ағаа пу тӧрт компоненттернің пірсін урчалар. Ханның ӧӧн компоненттерінің пірсін не урғаны олох ханның пасха чардыхтарын пасха кізілерге урарға оңдай пирче. Иегованың киречілері пӱдӱн ханны даа, аның ӧӧн тӧрт чардыхтарын даа урғаны Худайның чахиина тоғырланча тіп санапчалар. Паза оларның Библияда тӧстелген кӧрізі оларны кӧп хорғыстардаң арачылапча: кӧзідімге, гепатит паза СПИД осхас ағырығлардаң.

Че ханнаң пу ла тӧрт ӧӧн компоненттерні нимес, хай-хай оох фракцияларны сығарып алчалар. Аннаңар мындағ сурығлар сыхчалар: ханның андағ оох фракцияларынаң хайди тузаланчалар? ол фракцияларнаң имненерге бе, чох па пӧгін алчатса, христианинге нименең устанарға кирек?

Ханға уғаа кӧп ниме кірче. Кӧзідімге, плазма, аның 90 проценті суғ, че андағ даа полза, анда уғаа кӧп гормоннар, неорганическай тустар, ферменттер паза тузалығ веществолар, кӧзідімге, минераллар паза сахарлар кӧп. Ағаа хоза плазмада альбумин осхас белоктар, хан тохтатчатхан факторлар, организмге ағырығларнаң харбазарға полысчатхан антителалар пар. Ідӧк плазмадаң аймах-пасха белоктар сығарып алчалар. Кӧзідімге, фактор свертывания VIII. Аннаң гемофилияны имнепчелер. Ол ағырығнаң ағырчатхан кізінің ханын тохтадарға уғаа сидік. Пірее чуғынҷах ағырығ чухтырып аларға хорғыс полза, кізее пірееде гамма-глобулин турғысчалар. Гамма-глобулинні ол ағырыға иммунитеді пар кізінің ханының плазмазынаң алчалар. Плазмада пасха даа белоктар кӧп, оларнаң ідӧк медицинада тузаланчалар. Пу кӧзідімнер ханның ӧӧн компонентінең, плазмадаң, аймах-пасха фракциялар сығарып аларға оңдай парын кӧзітчелер a.

Ханның оох фракцияларын плазмадаң на нимес, че ханның пасха даа ӧӧн компоненттерінең (эритроциттердең, лейкоциттердең паза тромбоциттердең) сығарчалар. Кӧзідімге, лейкоциттердең интерфероннар паза интерлейкиннер сығарчалар. Оларнаң вируснай инфекцияларны паза ракты имнирінде тузаланчалар. Тромбоциттердең палығлар пӱдірерге полысчатхан факторлар алчалар. Ам даа ханның оох компоненттері кірчеткен наа имнер идіп алчалар. Ол имнернең имненчеткен кізее ханның ӧӧн компоненттерін урбинчалар, ол ӧӧн компоненттернің оох чардыхтарынаң алай фракцияларынаң тузаланчалар. Христианинге ол фракцияларнаң имненерге чарир ба? Пу сурыға піс нандыр полбаспыс. Пу сурыға Библия кӧні устағ пирбинче, аннаңар христианинге позына, чахсы сағынып алып, пӧгін аларға кирек.

Піреелері ханның хайдағ даа фракциялары пар имнернең тузаланарға отказ полчалар. Ӱр нимеске пассивнай иммунитет пирчеткен фракцияларнаң даа тузаланминчалар. Олар Худайның «ханны чібеңер» тіп чахиин іди оңнапчалар. Худай Израиль чонына ханны чирге тӧгерге чахаан, олар ол чахыға тӧстенчелер (Второзаконие 12:22—24). Ноға? Ханнаң иділчеткен гамма-глобулинні, фактор свертыванияны паза пасха даа имнерні идер ӱчӱн, ханны чыып алып, хайдағ-да оңдайнаң кирек нимелерні сығарып аларға кирек. Аннаңар ол христианнар пӱдӱн ханнаң даа, аның тӧрт компоненттерінең дее паза ханның оох фракцияларынаң имненерге отказ полчалар. Оларның арығ чӱрекнең алған пӧгіннерін улуғлирға кирек.

Пасха христианнар, тізең, пу сурығда пасха пӧгіннер алчалар. Олар ідӧк пӱдӱн ханны эритроциттерні, лейкоциттерні, тромбоциттерні паза плазманы урдырбинчалар. Че олар ханның тӧрт ӧӧн компонентінең сығарылған оох фракцияларнаң имненерге чарир тіп санапчалар. Че ол даа христианнарның пӧгіннері аймах-пасха полчалар. Кӧзідімге, кем-де гамма-глобулин турғыстырча, че эритроциттернең алай лейкоциттернең иділген имнернең имненерге алай имненмеске оонаң пӧгін алчалар. Ханның оох фракцияларынаң имненерге пӧгін алчатхан христианнар нименең устанчалар?

1 хандых айында, 1990 чылда сыххан «Сторожевой башнядағы» «Хығырығҷыларның сурығлары» тіп рубрикада ипчінің істіндегі паланың позының хан чӱгӱрҷең тамырлары пар полза даа, ол ипчінің ханындағы белоктар (фракциялар) ол паланың ханына кірчелер тіп пазылған. Іди іҷезі палазына аның иммунитедіне уғаа кирек иммуноглобулиннер пирче. Іҷезінің істіндегі паланың ханындағы эритроциттер тоғыстарын тоос салзалар, оларның кислород ал чӧрчеткен чардыхтары алыс парча. Оларның чардығы, билирубин пол парып, іҷезінің организмінең пастыра сых парыбысча. Ханның фракциялары пір организмнең пасха организмге олаңай ла ӱт парыбысчатханын санға алып, пірее христианнар ханның плазмазынаң алай клеткаларынаң алылған фракцияларнаң имненерге пӧгін алчалар.

Христианнар, совестьтерінең устанып, алчатхан пӧгіннер аймах-пасха полчалар. Че анзы пу сурығ аарлығ нимес полчатханын таныхтапча ба? Чох. Пу сурығ олаңай даа полза, уғаа аарлығ сурығ. Ӱстӱнде пирілген информация Иегованың киречілері пӱдӱн ханны паза аның тӧрт ӧӧн компоненттерін урдырбинчатханнарын кӧзітче. Библия христианнарға: «чой худайларға тайығ идіп салған чиисті... паза ханны чібеске, чӧреес хылыхтығ полбасха» чоохтапча (Илҷілернің 15:29). Че ханның ӧӧн компоненттерінең алылчатхан фракцияларнаң имненерінеңер полған на христианин, прай ибіре сағынып алып паза пазырып алып, пӧгін аларға кирек.

Кӧп кізілер, ағырығларынаң амох позып аларға ізеніп, хайдағ даа оңдайнаң имненерге тимделер. Олар хазыхтарына хорғыс ағылчатхан даа оңдайнаң имненчелер. Ханнаң иділген имнер ідӧк хорғыс ағылчалар. Сын христианнар киректерні алғым арах кӧрерге кӱстенчелер. Олар кізінің хазиинаң хай-хай аарлығ нимелер пар тіп санапчалар. Иегованың киречілері имненіп аларға хынчалар, олох туста, олар имнег оңдайларының тузазын паза оларнаң палғалыстығ хорғыстарны санға алчалар. Че ханнаң иділген имнернең тузаланарға ба, чох па пӧгін алчатсалар, олар Худайның кӧрізін паза хайди ол пӧгін чуртас пирген Худайнаң палғалысха теелерін санға алчалар (Псалом 35:10).

Псалмопевец чіли, пір дее ікінҷілебин, чоохтан полчатхан христианин часкалығ. Ол пасхан: «Иегова Худай — кӱн паза хусхуйах. Ол чахсызын кӧзітче паза сабланыс пирче. Пырозы чох тудынчатханнарға Иегова чахсызын читірер. Иегова... сағаа ізенчеткеннер часкалығлар» (Псалом 84:11, 12).

[Сноска]

[Рамка]

ИМҶЕЕ МЫНДАҒ СУРЫҒЛАР ТУРҒЫЗАРҒА ЧАРИР

Операцияда алай имнег тузында ханнаң иділген имнең тузаланарлар тіп пілдірчетсе, сурыбызыңар:

Мині имнепчеткен прай имҷілер минің Иегованың киречізі полчатханымны пілчелер бе паза мин пӱдӱн ханны, эритроцитнай, лейкоцитнай, тромбоцитнай массаны алай плазманы урдырарға саңай отказ полчатханымны пілчелер бе?

Алай пірее им ханның плазмазынаң, эритроциттердең, лейкоциттердең алай тромбоциттердең алылған тіп пілдірчетсе, сурыбызыңар:

Пу им ханның тӧрт ӧӧн компонентінең піреезінең алылған ма? Алылған полза, мин аның чардыхтарын прай піліп аларға хынчам.

Мағаа нинҷе кӧп андағ им пирілер паза аны мағаа хайдағ оңдайнаң пирерлер?

Минің совезім мағаа андағ имнең имненерге чаратса, ол им мағаа хайдағ хорғыстар ағылар?

Минің совезім ол фракциянаң тузаланарға чаратпаза, паза хайдағ имненҷең оңдайлар пар?

Мағаа сағынып аларға кирек. Алған пӧгінімні хаҷан сірерге чоохтап пирерге кирек?