Пушэн кодэла, ко адинон

Моӷут лэ Иеговастирэ свидетеля важ и личения тэ лэн варисави цынёни частица анда рат?

Андо атвето пэ кадэва вопросо исин бут гиндоря анда выпуско пала 15 июнё 2000 бэрш.

Точно можно тэ ԥэнас, кай лэ Иеговастирэ свидетеля на прилэн андэ пэско орӷанизмо о рат. Амэ патяс, кай лэ Дэвлэско законо нащи тэ подстос тала гиндо, саво можэт тэ парудёл. Но адес и учони сытелэ тэ лэн анда рат штар ӷлавни части и цынёне частицы. Важ када ваздэнпэ нэвэ вопросоря. Кала о христианино гиндой, можэт во тэ использует лэн чи най, во трэбуй тэ шол сама най кати пэ кода, сави польза или вредо анэна и личения, сави во витидя. Важ лэстэ трэбуй тэ авэл со май важно, со ԥэнэнпэ пала када андэ Библия, и сар лэстири ришэния повлияет пэ лэстири дружба лэ Всемоӷущёнэ Дэвлэса.

Ӷлавни вопросоря фартэ прости. Кай май драго када тэ полас, роздиқаса, со пала када росԥэнэнпэ андэ Библия, андэ история и андэ медицына.

О Дэл Иегова ԥэндя амарэ ԥурэсти, лэ Ноёсти, кай пэ вся, со связано лэ ратэса, тэ стон патив (Бытие 9:3, 4). Ӷэт май интя лэ Дэвлэско законо, саво сас дино лэ Израилёсти, сыкавэлас, саво дэ свынто о рат: «Если о израильтянино или о мануш, саво авеля па чужо ԥув, лэла тэ хал о рат, мэ жава против кацаво мануш». О израильтянино, саво жалас против лэ Дэвлэско законо, моӷ тэ сыкавэл найлашо примеро аврэнди, важ када о Дэл инке ԥэнэн: «Умарава лэс» (Левит 17:10). Прожыля время и апостолоря и барэдэр ԥрала стидэпэ андо Иерусалимо и приԥэндэ, кай трэбуй «тэ ритярдён май дур...лэ ратэстар». Када сас кадя жэ важно, сар тэ ритярдён май дур лэ хохавнэ дэвлэндар и лэ билажавардимастар (Деяния 15:28, 29).

Сар и христианоря андэ кодэя время полэнас и алава «тэ ритярдён май дур»? Вонэ на ханас о рат: ни свижо, ни стадо́. На ханас вонэ и мас анда жывотно, анда саво на сас вимэкло о рат. Вонэ кадяжэ на ханас о хамос, андэ саво сас рат, например ратвалэ гоя. Если варико хоть варисар халас о рат, када означало, кай во жал против лэ Дэвлэско законо (1 Самуила 14:32, 33).

Сар пистросардя ек писателё, савэс ақарэнас Тертуллиано (2—3 вико н. э.), бут мануша на гиндонас, кай када вэрыто тэ хан о хамос, андэ саво исин рат. Кода, кай пэ христианоря андярэнас хохавни дума, кай вонэ пэн о рат, о Тертуллиано пистрояс пала племена, савэ, кала терэнас о доӷоворо, закрепинас лэс ӷлоткоса ратэса. Во кадяжэ ԥэнэнас пала кодэла, ко, «кай тэ виличийпэ лэ насвалимастар, жадностяса нақавэлас свижо рат лэ приступниконэнго, савэн во зашындя пэ гладиаторски иӷры».

Важ и христианоря када сас нащи (дажэ если и римляноря гиндонас, кай када сас полезно важ о зор). О Тертуллиано пистрояс: «И христианоря... на хан дажэ лэ жывотнонэнго рат». И римляноря дэнас лэ христианонэнди хамос, андэ саво сас рат, кай тэ проверят, чаче вонэ ритярэн о законо чи най. Инке во пистросардя: «Чаче тумэ патян, кай кодэла, кас камэн тэ пэрэдаравэн лэ жывотнонэстирэ ратэса, ԥэрнавэна пэско муй важ о манушыкано рат?»

Адес почти никасти на дэла андо шэро, кай, кала варикасти камэн тэ пэрэшон о рат, када варисар можэт тэ повлияет пэ лэстири дружба лэ Дэвлэса. Канешно, лэ Иеговастирэ свидетеля камэн тэ жувэн, но кадяжэ вонэ старыинпэ и тэ ритярэн лэ Дэвлэско законо пала рат. Ай со пала када ԥэнэн и медицына андэ амари время?

Кала посли Дуйто мирово война и врачоря сытелэ тэ пэрэшон о рат, лэ Иеговастирэ свидетеля полинэ, кай када жал против лэ Дэвлэско законо. Кадэлэсти вонэ приритярдён идоси. Но время жалас, ай и врачоря фэдэр полэнас, сар май драго тэ личин. Адес май часто пэрэшон най вся о рат, ай ек анда лэстирэ штар ӷлавни части: 1) эритроцыторя; 2) лейкоцыторя; 3) тромбоцыторя; 4) плазма (сыворотка) анда рат, то есть латири жытко часть. О врачо диқэл, пэ скати о мануш насвало, и важ када можэт лэсти назначить, кай тэ пэрэшон эритроцытно, лейкоцытно, тромбоцытно масса или плазма. Кала пэрэшон дажэ ек анда кадэла штар ӷлавни части, хутилэл ек доза рат, кай тэ пэрэшон най еқэ насвалэсти. Лэ Иеговастирэ свидетеля гиндон: тэ пэрэшон хоть цыло рат или хоть ек анда лэстирэ штар ӷлавни части — када жал против лэ Дэвлэско законо. И инке, кала вонэ жувэн па Библия и на пэрэшон о рат, када бут состар лэн фэрий, например, кацавэ насвалимастар, сар гепатито и СПИДо.

Но андо рат исин най кати штар ӷлавни части, но и май цынёне, пэ савэ ԥэнэн частицы. Тоди ваздэнпэ кацавэ вопросоря: сар используюца кадэла найбарэ части анда рат и пэр со трэбуй тэ шол сама о христианино, кала прилэл ришэния, сави личения тэ витидэл важ пэстэ?

О составо андо рат фартэ ԥаро. Дажэ андэ плазма, сави почти вся анда паи, исин фартэ бут гармоноря, ниарӷаничиски лона, ферменторя и бут питатильни вещества, андэ савэ ужан миниральни вещества и сахароря. Инке андэ плазма исин кацавэ белки, сар альбумино, факторы, кай тэ стидэлпэ о рат, и антитела, савэ поможын, кай о орӷанизмо тэ борийпэ лэ насвалимаса. Анда плазма вилэн разни белки, савэ бут каринг жан. Например, о антигимафильно глобулино используют, кай тэ личин и гемофилия — о насвалимос, кала о орӷанизмо нащи тердярэл о рат. Кодэлэнди, ко можэт тэ занасвавэл варисавэ насвалимастар, дэкала назначают о гама-глобулино, саво лэн анда плазма кодэлэ манушэндэ, кастэ исин имунитето против кадэва насвалимос. Андэ плазма исин и авэр белки, савэ используют андэ медицына. Кадэла примероря сыкавэн, кай анда ек ӷлавно лэ ратэстири часть (анда плазма) можно тэ лэн разни цынёне частицы a.

Разни цынёне лэ ратэстирэ частицы лэн най кати анда плазма, но и анда авэр ӷлавни части андо рат (анда эритроцыторя, лейкоцыторя и тромбоцыторя). Например, анда лейкоцыторя вилэн интерфероноря и интерлейкиноря, савэ поможын тэ личин дэсавэ вирусни инфекцыи и о найлашо насвалимос. Анда тромбоцыторя вилэн кода, со поможый, кай тэ зажувэн и раны. Появинпэ и авэр драба, андэ савэ (када пока) исин май цынёне лэ ратэстирэ частицы. Кай тэ личин кадэлэ драбэнца, трэбуй тэ пэрэшон най и ӷлавни части анда рат, ай лэстирэ цынёне частицы. Можэт о христианино тэ соӷласийпэ пэ кацави личения? Пэ кадэва вопросо амэ нэ можэм тэ дас атвето. Андэ Библия ворта пала када на ԥэнэнпэ, и важ када о христианино трэбуй екжэно тэ погиндой, сави ришэния во прилэла англа Дэл.

Дэсавэ отԥэндён, кай андэ лэндири личения тэ авэн драба, андэ савэ исин варисавэ частицы анда рат (дажэ совсем цынёне частицы, савэ моӷут пэ дэсави время тэ ваздэн о имунитето). Кадя вонэ полэн лэ Дэвлэско законо «тэ ритярдён май дур лэ ратэстар». Вонэ терэн кадя, важ кода кай о Дэл ԥэнэнас лэ израильтянонэнди тэ вишон о рат пэ ԥув (Второзаконие 12:22—24). Васо када важно? Кай тэ стерэн о гама-глобулино, факторы, кай тэ стидэлпэ о рат, савэ вилэн анда ӷлавно лэ ратэстири часть, и авэр драба, трэбуй тэ стидэн о рат и тэ стерэн лэсти спецыально абработка. Важ када дэсавэ христианоря гиндон, кай кацави личения кадяжэ нащи, сар и нащи тэ пэрэшон вся о рат или лэстирэ штар ӷлавни части. Вонэ вужэ одеса камэн тэ авэн уӷодни лэ Дэвлэсти, и амэнди трэбуй тэ стас патив пэ лэндири ришэния.

Кай дэсавэ христианоря авэр гиндо пала када. Вонэ кадяжэ гиндон, кай нащи тэ пэрэшон вся о рат, ай кадяжэ эритроцыторя, лейкоцыторя, тромбоцыторя или плазма. Но вонэ моӷут тэ соӷласинпэ тэ личинпэ лэ драбэнца, андэ савэ исин цынёне частицы анда штар ӷлавни лэ ратэстирэ части. Но дажэ тоди и христианоря моӷут тэ гиндон по разному. Варико можэт тэ соӷласийпэ, кай лэс тэ личин через о гама-глобулино, но и андэ кодэя жэ время тэ отԥэндёл или най, кай лэс тэ личин аврэ драбэса, андэ саво исин дэсавэ частицы анда эритроцыторя или лейкоцыторя. Но пэр со шон сама дэсавэ христианоря, кала витидэн и личения, андэ сави исин цынёне частицы анда рат?

Андэ статья «И читателя пушэн» андо журнало «Сторожэво башня» пала 1 июнё 1990 бэрш ԥэнэнаспэ, кай андэ плазма исин белки (цынёне частицы), савэ анда рат кай и манушни, сави аштярэл бэятос, и вонэ попэрэн андо рат кай о бэято, савэстэ исин ужэ пэстири кровеносно система. Кадя и дэй пэрэдэл пэстирэ бэятости имунаглобулиноря, кай лэстэ тэ авэл пэско лашо имунитето. Кала и эритроцыторя андо рат лэ бэятостэ хындён (када кадя трэбуй тэ авэл), тоди дэсавэ частицы андар лэндэ, савэ розындярэн о кислородо, парудён. Дэсо анда кадэла частицы ашэл билирубино, саво пэрэжал андэ ла дако орӷанизмо и виандярэл лэс котар. Дицол, кай лэ ратэстирэ цынёне частицы моӷут тэ пэрэжан анда ек орӷанизмо андэ авэр кадя, сар када трэбуй тэ авэл. Важ када дэсавэ христианоря соӷласинпэ пэ личения, кай исин варисави цынёни частица анда рат, сави линэ анда плазма или анда лэ ратэстирэ клетки.

О гиндо и ришэния, сави прилэн и христианоря па пэстири совесть, разно. Но сыкавэл када, кай кадэва вопросо найважно? Най. Кадэва вопросо фартэ важно, хоть во и просто. Со сас пистромэ андэ кадэя статья, сыкавэл, кай лэ Иеговастирэ свидетеля отԥэндён тэ пэрэшон вся о рат или лэстирэ штар ӷлавни части. Андэ Библия ԥэнэнпэ, кай и христианоря «тэ ритярдён май дур кодэлэстар, со анэн андэ жэртва лэ хохавнэ дэвлэнди, лэ ратэстар и билажавардимастар» (Деяния 15:29). Кала ваздэлпэ о вопросо, кай тэ пэрэшон и цынёне частицы анда дэсавэ ӷлавни лэ ратэстирэ части, тоди кажно христианино трэбуй вся драго тэ обгиндой и тэ мангэлпэ, кай тэ прилэл екжэно кадэя ришэния.

Бут мануша соӷласни пэ любо личения, кай ӥто тэ виличинпэ. Вонэ дажэ жан пэ кацави личения, савятар лэнго зор можэт тэ римойпэ. Кордэ кадяжэ ужан и вещества, андэ савэ исин рат. И чачунэ христианоря старыинпэ тэ диқэн пэ вся май серьёзно и тэ гиндон най кати пала кода, со касаеца лэ зорэса. Лэ Иеговастирэ свидетеля фартэ цэнин и лащи личения и полэн, саво лашымос када можэт тэ анэн. Кадяжэ вонэ шон сама, саво лашымос можэт тэ анэн варисави личения или сави опасность можэт тэ авэл кадэлэстар. Но, кала ваздэлпэ о вопросо пала драба, андэ савэ исин дэсо анда рат, вонэ драго обгиндон, авэла лэнго выборо правильно англа Дэл чи най и сар када повлияет пэ лэндири дружба амарэ Создателёса (Псалом 36:9).

Бахтало кодэва христианино, саво, сар и о псалмопевцо, можэт смило тэ ԥэнэн: «Важ кода кай о Дэл Иегова — сар қам и щито, во дэл пэско лашымос и терэл, кай о мануш тэ авэл ашунгло. Кодэлэстар, ко андэ вся вужо, о Иегова на одлэла о лашымос. Иегова... бахтало кодэва, ко надеийпэ пэр тутэ» (Псалом 84:11, 12).

[Сноска]

[Рамка]

ПАЛА СО МОЖНО ТЭ ПУШЭС КАЙ О ВРАЧО

Если тутэ трэбуй тэ авэл операцыя или личения, андэ сави моӷут тэ используют варисо, со лино анда рат, тоди пуш:

Точно всаворэ врачоря ӷанэн, кай мэ, сар лэ Иеговаско свидетелё, тердював пэ пэско, кай манди, со бы тэ на авэл, тэ на пэрэшон о рат (када вся о рат, эритроцыторя, лейкоцыторя, тромбоцыторя или плазма)?

Если можэт тэ авэл кацаво, кай андэ варисаво назначено драб, исин хоть варисави часть анда плазма, анда эритроцыторя, анда лейкоцыторя или анда тромбоцыторя, тоди пуш:

Кала терэнас кадэва драб, использовали хоть ек анда штар ӷлавни лэ ратэстирэ части? Если да, тоди мэ камлоп тэ уӷанав лэско составо.

Скати моӷут тэ назначут кадэва драб, андэ саво исин дэсавэ цынёне частицы анда рат, и сар лэс лэна тэ зашон?

Со вэрыто важ о зор можэт тэ авэл через кадэя личения, андэ сави исин кадэя цынёни частица анда рат, если и совесть домэкэл манди тэ соӷласисавав пэ када?

Сави инке личения можэт тэ поджал, если мэрни совесть на домэкэл ман тэ соӷласисавав, кай ман тэ личин драбэса, андэ саво исин кадэя цынёни частица анда рат?

Манди трэбуй тэ погиндосарав пала када. Кала мэ трэбуй тэ ԥэнав тумэнди пала пэстири ришэния?