Fesili Mai le ʻAufaitau

Pe e talia e Molimau a Ieova vaega ninii o le toto?

O le tali o loo mulimuli mai na toe lomia mai Le Olomatamata o Iuni 15, 2000.

O le tali autū lava e lē talia e Molimau a Ieova le toto. E matou te talitonu maumauaʻi e lē tatau ona suia le tulafono a le Atua e faatatau i le toto, ina ia faafetaui atu i manatu fesuisuiaʻi. Ae peitaʻi, ua lāgā ni finauga fou ona ua mafai ona vaevaeina le toto i ni vaega autū se fā ma ni vaega ninii o na vaega autū. I le faia o se filifiliga pe talia na vaega, e iai se isi vala e ao i se Kerisiano ona matuā uaʻi atu i ai na i lo na o aogā ma lamatiaga e ono maua mai i ia togafitiga faafomaʻi. E tatau ona manatu mamafa o ia i le mea o loo fai mai ai le Tusi Paia ma le aafiaga o lana faiā ma le Atua e Ona le Malosi Uma Lava.

O mataupu autū o loo talanoaina e faigofie lava. Ina ia fesoasoani iā i tatou e malamalama i le pogai ua faigofie ai, ia iloilo ni faamatalaga faale-Tusi Paia, talafaasolopito, ma talaaga o togafitiga faafomaʻi.

Na taʻu atu e Ieova le Atua i lo tatou augātamā o Noa e tatau ona manatu i le toto o se mea e tāua. (Kenese 9:3, 4) Mulimuli ane, o le tulafono a le Atua na tuuina atu iā Isaraelu na atagia ai le paia o le toto: “Ai se tagata foʻi o sā Isaraelū, po o so se tagata ese . . . na te ʻaina sina toto lava; ou te fai moʻu fili lea tagata na te ʻaina le toto.” O le teena o le tulafono a le Atua, e ono mafai e se tagata Isaraelu ona faaleagaina ai isi, o lea na fetalai atili mai ai le Atua: “Ou [te] vavae ese iā te ia i lona nuu.” (Levitiko 17:10) Mulimuli ane, i se fonotaga na faia i Ierusalema, na poloaʻi mai ai le ʻauaposetolo ma toeaina e tatau ona tatou ‘faamamao ma le toto.’ O le faia faapea, e tutusa lava lona tāua ma le faamamao mai feusuaʻiga lē mamā ma le ifo i tupua.—Galuega 15:28, 29.

I le uluaʻi senituri o le ā na uiga i ai le ‘faamamao’? E leʻi ʻaina e Kerisiano le toto e tusa lava pe fou pe ua toʻa; e latou te leʻi ʻaina foʻi se aano o se manu e leʻi faaaluina ese le toto. E faasā foʻi ona faaaogāina ni meaʻai na iai le toto, e pei o sosisi e faia i le toto. O le faaaogāina o le toto i so o se auala lava faapena, o le a solia ai le tulafono a le Atua.—1 Samuelu 14:32, 33.

Sa lē popole le toʻatele o tagata i aso anamua i le ʻaina o le toto, e pei ona tatou iloa mai tusitusiga a Tetuliano (i le senituri lona lua ma le lona tolu T.A.). I le tali atu i tuuaʻiga sesē faapea na faaaogāina e Kerisiano le toto, na taʻua ai e Tetuliano ni ituaiga o tagata sa latou faamautūina ni maliega e ala i le tofoina o le toto. Sa ia mātauina foʻi e faapea “pe a faia se faafiafiaga i se malae mataaga, [o nisi] sa galala i le fia feinu i le toto, sa latou talitalia le toto sa tafe mai i le tino o le tagata o loo faasalaina . . . e fai ma vaifofō o latou maʻi māliu.”

O na faiga (e tusa lava pe na faia e nisi tagata Roma ona o ni māfuaaga tau i le soifua mālōlōina) sa sesē lava mo Kerisiano: Na tusia e Tetuliano e faapea: “E matou te lē faaaofia ai foʻi le toto o ni manu i a matou taumafa masani.” Sa faaaogā e tagata Roma meaʻai e iai le toto e tofotofo ai le faamaoni o Kerisiano moni. Na faaopoopo mai Tetuliano: “Seʻi ou fesili atu iā te outou, o le ā so outou manatu, pe afai tou te talitonu maumauaʻi o le a tetee atu ma le ʻinoʻino [Kerisiano] i le toto o manu, tou te manatu iā i latou e faapea, o loo latou mananaʻo i le toto o tagata?”

I aso nei, e toʻaitiiti ni tagata o le a manatu faapea, ua aafia tulafono a le Atua e Ona le Malosi uma Lava pe afai e fautuaina e se fomaʻi le tuiina o le toto. E ui lava e mananaʻo Molimau a Ieova ina ia ola, ae ua tatou maumauaʻi ia usiusitai i le tulafono a Ieova e faatatau i le toto. O le ā le uiga o lenei mea e tusa ai ma faiga faafomaʻi i aso nei?

Ina ua mavae le Taua Lona Lua a le Lalolagi, na avea ai ma tū masani le tuiina o le toto atoa, ma sa iloa e Molimau a Ieova e feteenaʻi ma le tulafono a le Atua—ma o loo tumau pea ona tatou talitonu i lenā mea. Ae peitaʻi, talu mai lenā taimi ua suia ai togafitiga faafomaʻi. I aso nei, ua lē o toe faaaogāina e le tele o tuigātoto le toto atoa ae o se tasi o ona vaega autū: (1) sela mūmū; (2) sela papaʻe; (3) sela faatoʻa toto (platelets) (4) le vaega faasuavaia o le toto po o le plasma (serum). E faalagolago i le tulaga o le tagata maʻi, atonu e fautuaina e fomaʻi le tuiina atu i ai o sela mūmū, sela papaʻe,  vaega o sela faatoʻa toto, po o le vaega faasuavaia o le toto. O le tuiina o nei vaega autū o le toto, ua mafai ai ona vaevaeina se paina (513 mililita) toto i le tele o maʻi. E talitonu Molimau a Ieova e faapea, o le taliaina o le toto atoa po o se vaega o na vaega autū e fā o le toto, ua solia ai le tulafono a le Atua. O le itu e mataʻina, o le tausisia o lenei tulaga faale-Tusi Paia ua puipuia ai i latou mai le tele o lamatiaga, e aofia ai faamaʻi e pei o le ate fefete ma le AIDS, lea e mafai ona pipisi e ala i le toto.

Ae peitaʻi, talu ai e mafai ona fai ni gaoioiga e vaevaeina ai le toto e sili atu i na mea autū, ua lāgā ai ni fesili e uiga i vaega ninii e maua mai i vaega autū o le toto. E faapefea ona faaaogāina na vaega ninii, ma o le ā e ao i se Kerisiano ona manatunatu i ai pe a filifili e talia na mea pe leai?

O le toto e lavelave. E oo lava i le vaega faasuavaia o le toto—lea e 90 pasene o le vai—e tauaveina le tele o homone, le masima, o polotini eseese (enzymes), ma niuturiane (nutrients), e aofia ai minerale ma le suka. E tauaveina foʻi e le vaega faasuavaia o le toto polotini e pei o le albumin, ma mea e pogai ai ona toʻa le toto pe a lavea, ma vailaau (antibodies) e tetee atu ai i faamaʻi. E tuueseese e tagata popoto faapitoa ma faaaogā le tele o polotini mai le vaega faasuavaia o le toto. O se faaaʻoaʻoga, o vaega o le toto e mafai ai ona toʻa le toto (clotting factor VIII), ua avatu iā i latou ua lē mafai ona toʻa le tafe o le toto. Pe afai foʻi ua maua se tasi i nisi o faamaʻi, atonu o le a fautuaina e fomaʻi le faia o se tui e iai le gamma globulin lea ua aveesea mai le vaega faasuavaia o le toto o tagata ua puipuia o latou toto. O isi polotini o le vaega faasuavaia o le toto ua faaaogāina faafomaʻi, ae o le faiga lea o loo taʻua i luga ua faataʻitaʻia mai ai le auala e ono maua ai vaega ninii mai se vaega autū (o le vaega faasuavaia) o le toto. *

E pei lava ona avea le vaega faasuavaia o le toto ma pogai o vaega ninii eseese, e mafai la ona vaevaeina isi vaega autū o le toto (o sela mūmū, sela papaʻe, sela faatoʻa toto) ina ia maua ai vaega ninii. O se faaaʻoaʻoga, e mafai ona avea ia sela papaʻe ma puna o polotini (inteferons ma interleukins), ua faaaogāina e togafitia ai nisi o faamaʻi pipisi e māfua i vairusi ma le kanesa. E mafai ona vaevaeina ia sela faatoʻa toto ina ia aveesea ai vaega e mafai ona pē ai le manuʻa. E iai foʻi isi vailaau o loo gaosia ua faaaogā (atonu i le amatamataga) vaega ninii mai vaega autū o le toto. O nei togafitiga e lē o le tuiina o vaega autū o le toto; ae tele lava ina aafia ai ni vaega po o vaega ninii. Pe tatau i Kerisiano ona talia nei vaega ninii i togafitiga faafomaʻi? E lē mafai ona matou fai atua se tali. E lē o aumaia i le Tusi Paia ni faamatalaga auʻiliʻili, o lea e tatau ai i se Kerisiano ona faia lana lava faaiʻuga e tusa ai ma lona lotofuatiaifo i le silafaga a le Atua.

E teena e nisi so o se mea e faia mai i le toto (e oo lava i vaega ninii ua fuafuaina e saunia ai se puipuiga mo sina taimi puupuu). O le auala lenā o loo latou malamalama ai i le poloaʻiga a le Atua ina ia ‘faamamao mai le toto.’ Ua latou manatu e faapea o lana tulafono iā Isaraelu e manaʻomia ai ona ‘sasaaina i le eleele’ le toto lea ua aveesea mai se meaola. (Teuteronome 12:22-24) Aiseā e talafeagai ai lenā mataupu silisili? O lea, ina ia sauniunia le polotini o le gamma globulin, po o mea e faatoʻa ai le toto ma isi mea faapena, e manaʻomia ai ona teuina le toto ma faia i ai ni gaoioiga. O lea la e teena lava e nisi Kerisiano na togafitiga, e pei lava ona latou teena le tuiina saʻo o le toto po o ona vaega autū e fā. E tatau ona faaalia le faaaloalo i la latou filifiliga ua faia ma le faamaoni e tusa ma o latou lava lotofuatiaifo.

E ese foʻi filifiliga a isi Kerisiano. E latou te teena foʻi le tuiina saʻo o le toto atoa, sela mūmū, sela papaʻe, sela faatoʻa toto, po o le vaega faasuavaia o le toto. Peitaʻi, atonu e latou te faatagaina se fomaʻi e togafitia i latou mai se vaega ninii na aveesea mai vaega autū. E oo lava i lenei mea, e ono eseese ai ni faaiʻuga. Atonu e talia e se tasi Kerisiano le tuiina o le gamma globulin, ae atonu e na te talia pe lē talia foʻi se tui e iai se mea na aveesea mai sela mūmū po o sela papaʻe. I nei mea uma lava la, o le ā e ono taʻitaʻiina ai nisi Kerisiano e faia se faaiʻuga e faapea, e mafai ona latou talia ni vaega ninii o le toto?

I le “Fesili Mai le ʻAufaitau” i le Watchtower o Iuni 1, 1990, na mātauina ai e faapea, o loo faagasolo atu vaega ninii o polotini mai le vaega faasuavaia o le toto o se fafine e maʻitaga, i le toto o lana pepe o loo tuputupu aʻe i totonu o lona manava. I lea faiga, ua tuu atu ai e se tinā i lana tama ia immunoglobulin po o puipuiga, ma puipuia ai le  pepe mai faamaʻi. A o leʻi fanau le pepe, e faaauau pea le faataamilosaga masani a sela mūmū, ma e iai gaoioiga e fai i le vaega o loo tauaveina ai le okesene. Ona o nei gaoioiga ua avea nisi o lea vaega ma suāvai samasama (bilirubin), lea e ui atu i le fanua o le tinā ma lafoaʻia faatasi ai ma otaota o lona tino. E ono manatu nisi Kerisiano e faapea, talu ai o vaega ninii o le toto e mafai ona tuufaasolo atu i se isi tagata i lenei faatulagaga masani, e mafai la ona latou talia se vaega ninii o le toto ia e maua mai i vaega faasuavaia po o sela o le toto.

Talu ai e eseese manatu ma filifiliga e faavae i le lotofuatiaifo, po o lona uiga ea la e lē tāua lenei mataupu? E leai. E matuā tāua lava. Peitaʻi, e manino le mataupu. Ua faaalia i le mataupu o i luga e faapea, e teena uma e Molimau a Ieova le tuiina saʻo o le toto atoa, ma ona vaega autū. Ua faatonuina e le Tusi Paia Kerisiano ina ia ‘⁠faamamao i latou mai i mea e fasia mo tupua, ma le toto, ma mea titina, ma le faitaaga.’ (Galuega 15:29) Ae pe a oo i le filifilia o ni vaega ninii mai vaega autū o le toto, e tatau i Kerisiano taʻitoʻatasi ona faia sana lava faaiʻuga talafeagai pe a uma ona mafaufau loloto i lenei mea faatasi ma le tatalo.

E toʻatele tagata e lotomalilie e talia so o se togafitiga e foliga mai e maua vave ai ni aogā, e oo lava i se togafitiga ua iloa e lamatia ai e pei o le faaaogāina o le toto. E taumafai se Kerisiano faamaoni e faalautele lona malamalamaga ma ia iai se vaaiga lelei lea e aofia ai e lē na o vala faaletino. E talisapaia e Molimau a Ieova taumafaiga ina ia maua ni tausiga lelei faafomaʻi, ma e latou te manatunatu mamafa i lamatiaga ma aogā o so o se togafitiga. Ae peitaʻi, pe a oo loa i mea e faia mai i le toto, e latou te matuā faatāuaina le mea o fetalai mai ai le Atua ma la latou faiā ma lo tatou Foaʻi Ola.—Salamo 36:9.

O se faamanuiaga mo se Kerisiano le iai o lea ituaiga o mautinoa e pei o le faisalamo, o lē na tusi e faapea: “Auā o Ieova le Atua o le lā lava ia ma le talita; e foaʻiina mai e Ieova le alofa tunoa ma le manuia; e lē taofia e ia se mea lelei i ē ua sao lo latou savavali. Ieova e, . . . amuia le tagata ua faatuatua iā te oe.”—Salamo 84:11, 12.

[Faamatalaga pito i lalo]

[Pusa i le itulau 31]

FESILI UA FAUTUAINA MO LE FOMAʻI

Pe afai o le a faia sou taotoga po o se togafitiga e ono aafia ai se vaega o le toto, ia fesili:

Po o iloa uma e fomaʻi ma le ʻaufaigaluega o loo aafia ai e faapea, i le avea o se tasi o Molimau a Ieova, ou te faatonu atu ai ina ia aua neʻi tuiina mai iā te aʻu se toto, (e tusa lava po o le toto atoa, sela mūmū, sela papaʻe, sela faatoʻa toto, po o le vaega faasuavaia o le toto) i so o se tulaga lava?

Afai e fautuaina mai se vailaau atonu e faia mai i le vaega faasuavaia o le toto, sela mūmū po o sela papaʻe, po o sela faatoʻa toto, ia fesili:

Po o faia le vailaau mai se tasi o vaega autū e fā o le toto? Afai o faia ai, pe mafai ona e faamatala mai le auala o faia ai?

O le ā le tele e ono faaaogāina ai lenei vailaau ua faia mai i le toto, ma i le ā le auala?

Afai e talia e loʻu lotofuatiaifo lenei vaega ninii, o ā ni lamatiaga o aafia ai?

Afai e uunaʻia aʻu e loʻu lotofuatiaifo e teena lenei vaega ninii, o ā nisi o togafitiga e mafai ona faaaogā?

Pe a uma ona ou manatunatu atili i lenei mataupu, o afea e mafai ona ou faailoa atu ai iā te oe laʻu faaiʻuga?