Ngaahi Fehuʻi mei he Kau Lautohí

ʻOku tali ʻe he Kau Fakamoʻoni ʻa Sihová ha fanga kiʻi konga iiki pē ʻo e totó?

Ko e tali hokó ko e toe pulusi ia mei he ʻīsiu ʻo Sune 15, 2000.

Ko e tali tefitó ʻoku ʻikai ke tali ʻe he Kau Fakamoʻoni ʻa Sihová ia ʻa e totó. ʻOku mau tui mālohi ko e lao ʻa e ʻOtuá ki he totó ʻoku ʻikai fakaʻatā ai hano toe faʻahinga fulihi ke feʻunga mo e ngaahi fakakaukau feliliuakí. Kae kehe, ʻoku malanga hake ʻa e ngaahi fakakikihi foʻou koeʻuhi ʻoku malava he taimí ni ʻo ʻai ʻa e totó ki he ngaahi konga lalahi ʻe fā mo e fanga kiʻi konga iiki ʻo e ngaahi konga ko iá. ʻI he fili pe ʻe tali ha meʻa peheé, ʻoku totonu ki ha Kalisitiane ke sio fakalaka atu mei he ngaahi ʻaonga mo e ngaahi fakatuʻutāmaki fakafaitoʻo ʻe ala hokó. ʻOku totonu ko ʻene tokangá ki he meʻa ko ia ʻoku leaʻaki ʻe he Tohi Tapú pea mo e meʻa ʻe ala hoko ʻi hono vahaʻangatae mo e ʻOtua Māfimafi-Aoniú.

ʻOku mātuʻaki faingofua pē ʻa e ngaahi fakakikihi tefitó ia. Ko ha tokoni ke sio ai pe ko e hā ʻoku pehē aí, fakakaukau angé ki he ʻātakai Fakatohitapú, fakahisitōliá mo e fakafaitoʻó.

Naʻe tala ʻe Sihova ko e ʻOtuá ki heʻetau kui fakatokolahi ko Noá kuo pau ke ʻai ʻa e totó ko ha meʻa makehe. (Senesi 9:​3, 4) Ki mui ai, naʻe fakahaaʻi ʻi he ngaahi lao ʻa e ʻOtuá ki ʻIsilelí ʻa e tuʻunga toputapu ʻo e totó: “Ka ai ha tangata ʻoku kau ki Isileli, pe ha muli ʻoku ʻāunofo kiate kinautolu . . . ʻoku ne kai ha toto, neongo pe ko e ha: te u hangai mamahi ki he toko taha ko ia ʻoku ne kai toto.” ʻI hono siʻaki ʻa e lao ʻa e ʻOtuá, naʻe malava ai ʻe ha taha ʻIsileli ke ne fakaʻuliʻi ʻa e niʻihi kehé; ko ia ai, naʻe tānaki atu ʻe he ʻOtuá: “Te u tuʻusi ia mei hono kakai.” (Livitiko 17:10) Ki mui ai, ʻi ha fakataha ʻi Selusalema, naʻe tuʻutuʻuni ai ʻe he kau ʻapositoló mo e kau tangata matuʻotuʻá ʻo pehē kuo pau ke tau ‘fakaʻehiʻehi mei he totó.’ Ko e fai peheé ʻoku mātuʻaki mahuʻinga tatau pē mo e fakaʻehiʻehi mei he fehokotaki fakasino taʻetāú pea mo e tauhi ʻaitolí.—Ngāue 15:​28, 29.

Ko e hā naʻe ʻuhinga ki ai ʻa e “fakaʻehiʻehi” ʻi he taimi ko iá? Naʻe ʻikai ke kai ʻe he kau Kalisitiané ʻa e totó, tatau ai pē pe naʻe foʻou pe naʻe ʻai ke pakupaku fefeka; pea naʻe ʻikai te nau kai ha kakanoʻi manu mei ha manu naʻe ʻikai fakatafe ʻa e totó. ʻOku toe tapui ʻa e ngaahi meʻakai kuo tānaki ki ai ʻa e totó, ʻo hangē ko e sōsisi totó. Ko hono tali ʻa e totó ʻi ha faʻahinga founga pē ʻo e ngaahi founga ko iá ʻe maumauʻi ai ʻa e lao ia ʻa e ʻOtuá.—1 Samiuela 14:​32, 33.

Ko e tokolahi taha ʻo e kakai ʻi he ngaahi taimi ʻo e kuonga muʻá naʻe ʻikai te nau hohaʻa kinautolu ki hono kai ʻo e totó, hangē ko ia ʻoku lava ke tau sio ki ai mei he ngaahi tohi ʻa Tetuliané (senituli hono ua mo hono tolu T.S.). ʻI he tali ki he ngaahi tukuakiʻi loi naʻe kai toto ʻa e kau Kalisitiané, naʻe lave ʻa Tetuliane ki he ngaahi matakali naʻa nau silaʻi ʻa e ngaahi talité ʻaki hono kiʻi inuʻi ha meʻi toto. Naʻá ne toe lave ʻo pehē “ʻi he taimi ʻoku fai ai ha fakaʻaliʻali ʻi he malaʻe feʻauhí [ko e niʻihi] naʻe havala he fieinuá naʻa nau maʻu ʻa e toto foʻou ʻo e tokotaha halaiá . . . ko ha faitoʻo ki heʻenau mahaki-moá.”

Ko e ngaahi tōʻonga ko iá (neongo kapau naʻe fai ia ʻe he kau Loma ʻe niʻihi ʻi he ngaahi ʻuhinga fekauʻaki mo e moʻui leleí) naʻe hala ia ki he kau Kalisitiané: “Naʻa mo e toto ʻo e fanga manú ʻoku ʻikai te mau fakakau ia ʻi heʻemau meʻakai totonú,” ko e tohi ia ʻa Tetuliané. Naʻe ngāueʻaki ʻe he kau Lomá ʻa e meʻakai naʻe ʻi ai ʻa e totó ko ha ʻahiʻahiʻi ʻo e anga-tonu ʻa e kau Kalisitiane moʻoní. Naʻe tānaki atu ʻe Tetuliane: “Sai, te u ʻeke atu leva kiate koe, ko e faʻahinga meʻa fēfē ia, ʻa hoʻo tuipau [ko e kau Kalisitiané] te nau tafoki mamahi mei he toto ʻo e fanga manú ke ke pehē ai te nau mānumanu ki he toto fakaetangatá?”

ʻI he ʻahó ni, ʻe fakakaukau ʻa e kakai tokosiʻi ko e ngaahi lao ʻa e ʻOtua Māfimafi-Aoniú ʻoku ʻi he tuʻunga ke fakakikihiʻi kapau ʻoku fokotuʻu mai ʻe ha toketā ke nau tali ʻa e totó. Neongo ʻoku loto papau ʻa e Kau Fakamoʻoni ʻa Sihová ke hokohoko atu ʻa e moʻuí, ʻoku mau tukupā ke talangofua ki he lao ʻa Sihova ʻi he totó. ʻOku ʻuhinga eni ki he hā ʻi he vakai atu ki he ngāue fakafaitoʻo lolotongá?

ʻI he hoko ko ia ʻo ngāuelahiʻaki ʻa hono huhu ʻo e toto kakató ʻi he hili ʻa e Tau II ʻa Māmaní, naʻe vakai ʻa e Kau Fakamoʻoni ʻa Sihová ki he meʻá ni naʻe fepaki ia mo e lao ʻa e ʻOtuá—pea ʻoku mau kei tui pē ki ai. Ka, kuo fetongitongi ʻa e faitoʻó ʻi he ʻalu ʻa e taimí. ʻI he ʻahó ni, ko e lahi taha ʻo e ngaahi huhu totó ʻoku ʻikai ko e totó kakato ka ko e taha ʻo hono ngaahi konga tefitó (1) fanga kiʻi sela kulokula; (2) fanga kiʻi sela hinehina; (3) ngaahi platelet; (4) pelesimā (serum), ko e konga ʻoku huhuʻá. Fakatuʻunga ʻi he tuʻunga ʻo e tokotaha mahakí, ʻe tuʻutuʻuni nai ʻe he kau toketā fakafaitoʻó ke ngāueʻaki ʻa e fanga kiʻi sela kulokulá, fanga kiʻi sela hinehiná, ngaahi platelet, pe pelesimaá. ʻOku hanga ʻe he huhu ʻo e ngaahi konga lalahí ni ʻo fakaʻatā ha foʻi ʻiuniti ʻe taha ʻo e totó ke vahevahe ia ʻi ha kau mahaki tokolahi ange. ʻOku tui ʻa e Kau Fakamoʻoni ʻa Sihová ko hano tali ʻo e toto kakató pe ko ha  taha pē ʻo e ngaahi konga tefito ʻe fā ko iá ʻoku maumauʻi ai ʻa e lao ʻa e ʻOtuá. ʻOku hā mei ai, ko e tauhi maʻu ki he tuʻunga makatuʻunga Fakatohitapu ko ʻení kuó ne maluʻi kinautolu mei he ngaahi fakatamaki lahi, ʻo kau ai ʻa e ngaahi mahaki hangē ko e ʻate pupulá mo e ʻeitisí ʻa ia ʻoku lava ke maʻu mei he totó.

Kae kehe, koeʻuhi ʻoku malava ʻo ngaohi ʻa e totó ʻo tānaki atu ki he ngaahi konga tefito ko iá, ʻoku malanga hake ʻa e ngaahi fehuʻi fekauʻaki mo e fanga kiʻi konga iiki ʻoku toʻo mei he ngaahi konga tefito ʻo e totó. ʻOku anga-fēfē hono ngāueʻaki ʻa e fanga kiʻi konga iiki peheé, pea ko e hā ʻoku totonu ke fakakaukau ki ai ha Kalisitiane ʻi he taimi ʻokú ne fili ai fekauʻaki mo kinautolú?

ʻOku fihi ʻa e totó. Naʻa mo e pelesimaá—ʻa ia ko e peseti ai ʻe 90 ko e vai—ʻokú ne maʻu ʻa e ngaahi hōmone lahi, ngaahi māsima ʻikai mei he meʻamoʻuí, ngaahi ʻenisaime, mo e ngaahi meʻakai fakatupu ivi, ʻo kau ai ʻa e fanga kiʻi minulolo mo e suka. ʻOku toe maʻu foki ʻe he pelesimaá ʻa e ngaahi polotini hangē ko e albumin, ngaahi meʻa fakafatu toto, mo e ngaahi siemu maluʻi ki hono fakafepakiʻi ʻa e ngaahi mahakí. ʻOku fakamavaheʻi mo ngāueʻaki ʻe he kau mataotao fakafaitoʻó ʻa e ngaahi polotini lahi ʻi he pelesimaá. Ko e fakatātaá, kuo ʻoange ʻa e meʻa fakafatu toto VIII ki ha kau toto vai, ʻa ia ʻoku faingofua ʻa e fānoa ʻa honau totó. Pe kapau ʻoku ʻi ai ha taha ʻe ala maʻu ʻe ha ngaahi mahaki pau, ʻe tuʻutuʻuni nai ʻe he kau toketaá ke huhu ki ai ʻa e gamma globulin, ko e toʻo mei he toto pelesimā ʻo e kakai ʻa ia kuo nau ʻosi maʻu ʻa e maluʻi mei he mahakí. ʻOku ngāueʻaki fakafaitoʻo ʻa e ngaahi polotini pelesimā kehe, ka ʻoku fakahaaʻi ʻe he meʻa ʻoku lave ki ai ʻi ʻolungá ʻa e anga hono ngaohi nai ʻo ha konga tefito ʻo e totó (pelesimā) ke maʻu ʻa e fanga kiʻi konga īkí. *

Hangē pē ko e malava ʻa e toto pelesimaá ke hoko ko ha matavai ia ʻo e fanga kiʻi konga iiki kehekehé, ko e ngaahi konga tefito kehé (ʻa e fanga kiʻi sela kulokulá, fanga kiʻi sela hinehiná, ngaahi platelet) ʻoku lava ke ngaohi ia ke fakamavaheʻi ʻa e fanga kiʻi konga iiki angé. Ko e fakatātaá, ʻoku hoko nai ʻa e fanga kiʻi sela toto hinehiná ko ha matavai ia ʻo e ngaahi interferon mo e interleukin, ʻoku ngāueʻaki ki hono faitoʻo ʻa e ngaahi mahaki fakapipihi ʻe he vailasí mo e ngaahi mahaki kanisaá. ʻOku lava ke ngaohi ʻa e ngaahi platelet ke toʻo mei ai ha meʻa fakamoʻui-lavea. Pea ʻoku lava ke toe faʻu mo e ngaahi faitoʻo kehe ʻoku kau (ʻi hono kamatá) ʻi he toʻo mei he ngaahi konga lalahi ʻo e totó. Ko e ngaahi faitoʻo peheé ʻoku ʻikai ko hono huhu ia ʻo e ngaahi konga tefito ko ia ʻo e totó; ʻoku nau faʻa kau pē ʻi he ʻū konga pe fanga kiʻi konga iiki mei ai. ʻOku totonu ke tali ʻe he kau Kalisitiané ʻa e fanga kiʻi konga iiki ko ʻení ʻi he ngāue fakafaitoʻó? Heʻikai malava ke tau leaʻaki. ʻOku ʻikai ke ʻomai ʻe he Tohi Tapú ia ha ngaahi fakaikiiki, ko ia ai, kuo pau ki he tokotaha Kalisitiane taki taha ke ne fai ʻene fili fakaekonisēnisi pē ʻaʻana ʻi he ʻao ʻo e ʻOtuá.

ʻE fakafisi ʻa e niʻihi ia mei ha meʻa pē naʻe toʻo mei he totó (naʻa mo e fanga kiʻi konga iiki naʻe fakataumuʻa ki hono tokonaki mai ʻa e maluʻi fakataimi ʻikai longomoʻui). Ko e anga ia ʻo ʻenau mahinoʻi ʻa e fekau ʻa e ʻOtuá ke ‘fakaʻehiʻehi mei he totó.’ ʻOku nau fakaʻuhinga ko ʻene lao ki ʻIsilelí naʻe fiemaʻu ai ʻa e toto naʻe fakamavaheʻi mei ha meʻamoʻui ke ‘lilingi ia ki he kelekelé.’ (Teutalonome 12:​22-24) Ko e hā ʻoku mahuʻinga ai iá? Sai, ke teuteu ha gamma globulin, ngaahi meʻa fakafatu toto makatuʻunga ʻi he totó, mo e ngaahi alā meʻa peheé, ʻoku fiemaʻu ia ke tānaki ʻa e totó pea fai ha ngāue ki ai. Ko ia ai, ʻoku talitekeʻi ʻe he kau Kalisitiane ʻe niʻihi ʻa e ngaahi meʻa faʻu peheé, ʻo hangē pē ko ʻenau talitekeʻi ʻa e ngaahi huhu ʻo e toto kakató pe ko hono ngaahi konga tefito ʻe faá. ʻOku totonu ke tokaʻi ʻenau tuʻu loto-moʻoni fakaekonisēnisi ko ení.

ʻOku kehe ʻa e fili ia ʻa e kau Kalisitiane kehé. ʻOku nau fakafisi mo kinautolu foki ʻi he huhu ʻo e toto kakató, fanga kiʻi sela kulokulá, fanga kiʻi sela hinehiná, ngaahi platelet, pe pelesimaá. Ka, ʻoku nau fakaʻatā nai ha toketā ke ne faitoʻo kinautolu ʻaki ha kiʻi konga naʻe toʻo mei he ngaahi konga tefitó. Naʻa mo e ʻi he tuʻunga ko ení ʻoku ʻi ai nai ha ngaahi faikehekehe. ʻOku tali nai ʻe ha taha Kalisitiane ia ʻa e huhu ʻo ha gamma globulin, ka ʻokú ne loto pe ʻikai loto nai ki ha huhu ʻoku ʻi ai ha meʻa naʻe toʻo mei he fanga kiʻi sela kulokulá pe hinehiná. Ko ia, ʻi hono fakakātoá, ko e hā nai ʻokú ne taki atu ha kau Kalisitiane ʻe niʻihi ke nau fakaʻosiʻaki ʻo pehē ʻe lava ke nau tali ʻa e fanga kiʻi konga iiki ʻo e totó?

Ko e “Ngaahi Fehuʻi mei he Kau Lautohí” ʻi he Watchtower ʻo Sune 1, 1990, naʻe pehē ai ko e ngaahi polotini pelesimaá (fanga kiʻi konga iiki) ʻoku ʻalu ia mei he toto ʻo ha fefine feitama ki he sisitemi toto mavahe ʻo ʻene tama kei ʻi manavá. Ko ia, ʻoku paasi ʻe ha faʻē ʻa e ngaahi immunoglobulin ki heʻene tamá, ʻo tokonaki ai ha maluʻi mahuʻinga. ʻI heʻena māvahevahé, ʻi he kakato ʻa e foʻi vahaʻa taimi moʻui ʻo e fanga kiʻi sela kulokula ʻi ha kiʻi tama kei ʻi manavá, ʻoku ngāueʻi leva honau konga fetuku ʻosikená. Ko ha niʻihi ʻo ia ʻoku hoko ʻo lanu engeenga meimei kulokula, ʻa ia ʻoku kolosi ia ʻi he fonuá ki he faʻeé pea ʻokú ne tukuange  fakataha atu ia mo e ngaahi meʻa liʻaki ʻo hono sinó. ʻOku fakaʻosiʻaki nai ʻe he kau Kalisitiane ʻe niʻihi ʻo pehē koeʻuhi ʻoku lava ʻe he fanga kiʻi konga iiki ʻo e totó ʻo ʻalu ki ha toe tokotaha kehe ʻi he fokotuʻutuʻu fakaenatula ko ení, ʻoku malava ke nau tali ha kiʻi konga ʻo e totó naʻe toʻo mei he toto pelesimaá pe fanga kiʻi selá.

ʻOku ʻuhinga ʻa e moʻoniʻi meʻa ko ia ʻo e kehekehe nai ʻa e ngaahi fili fakaefakakaukau mo fakaekonisēnisí ke pehē ai ʻoku ʻikai mahuʻinga ʻa e ʻīsiu ko ení? ʻIkai. ʻOku mafatukituki ia. Ka, ʻoku ʻi ai ha tuʻunga faingofua tefito. ʻOku fakahaaʻi ʻe he fakamatala ʻi ʻolungá ʻoku fakafisi ʻa e Kau Fakamoʻoni ʻa Sihová fakatouʻosi mei hono huhu ʻa e toto kakató pea mo hono ngaahi konga tefito ʻo e totó. ʻOku tataki ʻe he Tohi Tapú ʻa e kau Kalisitiané ke nau ‘fakaʻehiʻehi mei he ngaahi meʻa kuo ʻoatu ki ha ʻaitolí, pea mo e totó, pea mo e feʻauakí.’ (Ngāue 15:29) ʻIkai ngata aí, ʻi he taimi ʻoku haʻu ai ki ha fanga kiʻi konga iiki ʻo ha faʻahinga pē ʻo e ngaahi konga tefitó, ko e Kalisitiane taki taha, ʻi he hili hono fai ha fakalaulauloto tokanga mo faʻa lotu, kuo pau ke ne fai ʻene fili fakakonisēnisi pē ʻaʻana.

ʻE loto-lelei ʻa e kakai tokolahi ke tali ha faʻahinga faitoʻo pē ʻoku hā ngali te ne ʻomai ha ʻaonga vavé, naʻa mo ha faitoʻo kuo ʻosi ʻilo ʻene fakatuʻutāmaki ki he moʻuí, ʻo hangē ko ia ʻoku hoko moʻoni ʻi he ngaahi meʻa faʻu mei he totó. ʻOku feinga ʻa e Kalisitiane loto-moʻoní ke ne maʻu ha vakai lahi ange mo mafamafatatau ki ai ʻo ʻikai ʻi he ngaahi tafaʻaki fakaesinó pē. ʻOku houngaʻia ʻa e Kau Fakamoʻoni ʻa Sihová ʻi he ngaahi feinga ke tokonaki mai ha tokanga fakafaitoʻo leleí, pea ʻoku nau fua tautau ʻa e tuʻunga ʻo e fakatuʻutāmaki/ʻaonga ʻo ha faʻahinga faitoʻo pē. Kae kehe, ʻi he taimi ʻoku hoko mai ai ki he ngaahi meʻa faʻu naʻe toʻo mei he totó, ʻoku nau fakafuofua fakalelei ʻa e meʻa ʻoku folofolaʻaki ʻe he ʻOtuá pea mo honau vahaʻangatae fakafoʻituitui mo hotau Tokotaha-Foaki-Moʻuí.​—Sāme 36:9.

Ko ha tāpuaki ē ki ha Kalisitiane ke ne maʻu ha loto-falala ʻo hangē ko e tokotaha-tohi-saame ko ia naʻá ne tohi: “Ko Sihova Elohimi ko e laʻa ʻo e fakaū ia; ʻoku foaki ʻe Sihova ʻa e kelesi mo e kololia: ʻe ʻikai te ne mamaeʻi ha lelei ʻe taha meiate kinautolu ʻoku laka haohaoa. ʻE Sihova . . . , monuʻiaā ka ko e tangata ʻoku falala kiate koe!”—Sāme 84:​11, 12.

[Fakamatala ʻi lalo]

[Puha ʻi he peesi 31]

NGAAHI FEHUʻI FOKOTUʻU KI HE TOKETAÁ

Kapau te ke fehangahangai mo ha tafa pe ko ha faitoʻo ʻoku kau nai ki ai ha meʻa ʻoku faʻu mei he totó, ʻeke:

ʻOku ʻiloʻi ʻe he kau ngāue fakafaitoʻo kotoa ʻoku kau ki aí, ʻi he tuʻunga ko e taha ʻo e Kau Fakamoʻoni ʻa Sihová, ʻoku ou fakahā atu ke ʻoua ʻe ʻomai kiate au ʻi he malumalu ʻo ha faʻahinga tuʻunga pē ha ngaahi huhu toto (toto kakató, fanga kiʻi sela kulokulá, fanga kiʻi sela hinehiná, ngaahi platelet, pe toto pelesimā)?

Kapau ko ha faitoʻo ʻe tuʻutuʻuni maí naʻe ngaohi nai mei he toto pelesimaá, fanga kiʻi sela kulokulá pe hinehiná, pe ngaahi platelet, ʻeke:

Kuo ngaohi ʻa e faitoʻó mei ha taha ʻo e ngaahi konga tefito ʻe fā ʻo e totó? Kapau ko ia, te ke fakamatalaʻi mai hono faʻungá?

Ko e hā hono lahi ʻe ngāueʻaki nai ai ʻa e faitoʻo toʻo ko eni mei he totó, pea ʻi he founga fē?

Kapau ʻoku fakaʻatā au ʻe hoku konisēnisí ke u tali ʻa e kiʻi konga ko ení, ko e hā ʻa e ngaahi fakatuʻutāmaki fakafaitoʻo ʻoku ʻi aí?

Kapau ʻoku ueʻi au ʻe hoku konisēnisí ke u taʻofi ʻa e kiʻi konga ko ení, ko e hā ha faitoʻo kehe ʻe lava nai ke ngāueʻaki?

ʻI he hili ʻa ʻeku fakakaukau lahi ange ki he meʻá ni, ko fē ʻa e taimi te u fetuʻutaki atu ai fekauʻaki mo ʻeku filí?