Ambe enga kurhanguarhijka ima enga arhintajka

¿Jiókuarhisïnksï Jeobaeri testiguecha sapichitu ambe enga petanhajka iurhirirhu?

I mókuntskua jindeesti ambe enga uérapka rebistarhu 15 de juniu de 2000.

Mókuntskua jindeesti eskachi Jeobaeri testiguecha no jiókuarhisïnga iurhiri. Jakajkusïngachi eska Tata Diosïiri juramukua enga uandajka iurhiriiri no úsïnga mójtakurhini kʼuiripuecheeri eratsekua jimbo. Joperu iásï jimbanhi ambe jarhasti para exeni jimboka iásï úsïnga arhukurhini iurhiri ka úsïndi ixú tʼámu ambe petanhani ka máteru sánderu sapichitu ambe. Enga kristianu ma eratseaka sini jiókuarhia indeni sapichitu ambe enga iurhirirhu petanhajka, no nomasi jatsisti para exeni na enga sési marhuakuaka o na enga no sési úkuaka, sánderu sési jatsisti para eratsentani ambe enga Biblia uandajka ka na enga uaaka sési o no sési úkuni imeeri sési pájperakua Tata Diosï Jeoba jingoni.

No káni úkua jukasti para kurhanguni ini ambe. Parachi úni míteni andi, ju je exeni máru ambe enga Biblia uandajka, enga istoria uandajka ka enga medisina uandajka.

Tata Diosï Jeoba arhispti Noéni, juchaari ióntki anapu taatini, eska jatsispka para pímbinhasï exeni iurhirini (Génesis 9:3, 4). Juramukuecha enga Tata Diosï sánderu orhepatini íntskupka Israelini, xarhatasptiksï eska iurhiri pímbinhasïispka, arhispti: “Kʼuiripu ma enga Israeliiri kʼumanchikuarhu anapueka, o enga no Israeliiri anapueuaka, peru enga chánksïni jingoni irekani jauaka ka enga iurhiri auaka, na uéjki jásï iurhiri, ji exeaka imani enga iurhiri auaka”. Israeliteecha engaksï no kurhajchapiringa ini juramukuani úpirindiksï no sési úkuani máteruechani, jimbosï ima uandapti: “Ka uándikuaka” (Levítico 17:10). Ióni tátsekua, tánguarhikua ma jimbo enga úkuarhipka Jerusaléni, apostoliicha ka orhejtsïkutiichaksï uandaspti eskachi jatsispka para no arhani iurhiri ka eska no arhani iurhiri sáno májkueniispka eska no ísku jándikua ambe úni ka ni idoluechani kómarhiani (Ukuecha 15:28, 29).

¿Ambe arhikuekasïreeni imani jurhiatikuechani jimbo ‘no arhani’? Kristianuechaksï no arhasïreendi iurhiri, ni imani enga apenasi uérani jarheenga ni imani enga patsakata jarheengia. Ístuksï no arhasïreendi kʼuiripeta ima animaliiri engaksï no tsïtakuenga iurhirini, ístuksï no arhasïreendi imani tʼirekuani enga iurhiri jukeenga, komueska sorikua. Ísï arhani iurhirini jindeepirindi no kurhajchani Tata Diosïiri juramukuani (1 Samuel 14:32, 33).

Sáno iámindu kʼuiripuecha imani jurhiatikuechani jimbo, nóksï no sési exesïreendi iurhiri arhani eskachi na mítekia imani ambe jimbo enga Tertulianu karapka sigluecharhu segundu ka terseru d. de J. Para úni mókuntani Tertulianu engaksï kʼuiripuecha uandeenga eskaksï kristianuecha iurhiri arhasïreenga ima uandaspti eskaksï máru tribuecha pakatperakuaksï úsïreenga ka paraksï sési úni arhasïreengaksï iurhiri. Ístu, i ambe uandaspti: “Jarhastiksï ima engaksï iurhiri arhajka paraksï úni sési pʼikuarherani engaksï pʼamenchani jarhajka komisiali [o epilepsia], arhasïndiksï iurhiri engaksï sirkuecharhu jarhajka imani iurhirini enga apenasi uérani jarhajka imeecheeri engaksï kachujchakuajka.

Kristianuechaksï no sési exesïreendi engaksï kʼuiripuecha ísï pʼindeenga arhani, nájkirukaksï romanuecha úpka ini ambe paraksï seguni sési pʼikuarherani. “Nóchi jamberi arhasïnga animaliicheeri iurhiri”, karaspti Tertulianu. Romanuechaksï uékasïreendi úni eskaksï kristianuecha no kurhajchapiringa Tata Diosïni, jimboksïsï íntskuauendi tʼirekua enga iurhiri jukeenga. Tertulianu uandaspti: “Nénajtsï eratsesïni eskaksï kristianuecha uékasïnga iurhiri arhani engaksï méntku no sáni jaiapanhentajka animaliicheeri iurhiri”.

Juchaari jurhiatikuechani jimbo, namunitu kʼuiripuechaksï eratsepirindi Tata Diosïiri juramukuechani enga doktori arhiapiringa eskaksï jatantapiringa iurhiri. Ísïisti, Jeobaeri testiguechachi uékasïnga irekani, peruchi sési eratsekata jatsiskia Tata Diosï Jeobaeri juramukuani enga iurhiriiri ambe uandajka. ¿Ambe arhikuekasïni i ambe iásï enga xáni úrakuarheni jaka iurhiri medisinarhu?

Engaksï ueenapka sánderu iurhiri jatantani kʼuiripuecha, ísï tátsekua enga na nitamapkia Segunda Guerra Mundial, Jeobaeri testiguechachi kurhanguspka eska iurhiri jatantani jindeespka no kurhajchani Tata Diosïiri juramukuani ka májkuenchi seguirisïnga jakajkuni. Joperu medisina kánikua mójtakurhistia ini tiempu jimbo. Iásï sáno iámindu engaksï jatantajka iurhiri, no jindeesïndi meru iurhiri sino ima tʼámu ambe enga iurhirirhu petanhajka, enga jindeeka 1) glóbulosi rojosi, 2) glóbulosi blankosi, 3) plaketa ambe o 4) plasma (suero sanguíneo), ima parti enga jindeeka komueska itsï. Seguni na enga jauaka kʼuiripu ma, doktoriichaksï úpirindi arhini eska jukapiringa glóbulosi rojosi, glóbulosi blankosi, plaketa ambe o plasma. Enga nema ini ambe úrajka, úsïndi eska ma unidadi iurhiriiri marhuauaka para uánikua kʼuiripuecha. Jeobaeri testiguechachi eratsesïnga eska jukantani iurhiri o ma i tʼámu ambeeri jindeesïndi no kurhajchani Tata Diosïiri juramukuani. Ka kánikua jukaparhakuesti míteni eska ísï eratseni eska Biblia na uandajka jarhuatastijtsïni juchantsïni parachi no pʼamenchani máru ambe, enga jindeeka epatitisi ka sida, nema úpirindi ini ambe pʼamenchani enga iurhiri jatantajka.

Joperu jimboka únhasïnga sapichitu ambe petanhani glóbulosi blankosirhu, glóbulosi rojosirhu, plaketeecharhu ka plasmarhu, jarhastiksï máru kurhamarhikuecha engachi jatsika para úkuarhiani i sapichitu ambeeri. ¿Nénaksï úrakuarhesïni? ka ¿ambechi jatsiski para úni kristianuecha engachi uékaaka erakuni sinchi úraa ini ambe o nómbe?

Iurhiri kánikua sési úkata jarhasti, asta plasma enga sáno 90% itsïika uánikua ormoneechani jukaasti, salesi inorganikasi, ensimasi ka nutrientiichani, engaksï ixú inchajka mineralesi ka asukari. Ístu, uánikua proteineechani jukaasti komu albúmina, factores de coagulación ka antikuerpuecha para pʼamenchakuecha. Ekspertuechaksï pʼitasïndi ini ambe ka úraasïndiksï uánikua proteineechani engaksï plasmarhu jukajka. Pori ejemplu, imani kʼuiripuechani engaksï jindeeka emofílikosi, o engaksï sóntku tsitajka iurhirini, ini ambeksï jatsikusïndi, jatsikusïndiksï factores de coagulación VIII. Ka imani kʼuiripuechani engaksï pʼamenchani jarhajka, doktoriichaksï úsïndi inyeksioniichani jatsikuani engaksï gammaglobulina petanhajka plasmaeri imani kʼuiripuecheeri engaksï inmunisada jarhajkia. Jarhastiksï máteru proteineecha plasmaeri engaksï ístu úrakuarhijka medisinarhu, peru i engachi uandakia, jarhuatasïndijtsïni parachi kurhanguni eska ma ambeeri, enga jindeeka plasmarhu, úsïndiksï petanhani máteru sapichitu ambe. a

Ísï eskaksï na újka petakuarhini máru ambe máru sapichitu ambe plasmarhu, ístu úsïndi májkueni úkuarhini máteru partiichani jingoni engaksï iurhirirhu jarhajka (glóbulosi rojosi, glóbulosi blankosi ka plaketa ambe) paraksï úni sánderu sapichitu ambe petakuni. Pori ejemplu, glóbulosi blankosirhu, úsïndiksï petani interferonesi ka ístu interleukinasi, engaksï úrakuarhijka para máru pʼamenchakuecha engaksï birusi jimboejka ka ístu para máru kanseriicha. Plaketeechaksï arhukurhisïndi paraksï úni pʼitani máru ambe engaksï úrakuarhejka paraksï erideecha úni sikatrisarikuarhini. Ka ístu sánderu orhepatini uéraatiksï máteru medikamentuecha engaksï úkata jauaka máru partiichani jingoni imeeri ambe enga iurhirirhu petanhajka. Inde tratamientuechaksï no arhikuekasïndi eska nema jukaxaka ma ambe enga jindeeka, glóbulosi blankosi, glóbulosi rojosi, plaketa ambe ka plasma. Sánderu sési, sáno méntkisï jindeesïndi ma parti o sapichitu ambe ma parti indeeri ambe. ¿Úpirinksï kristianuecha jiókuarhini ini sapichitu ambe para pʼamenchakua ma? Nóchi uaaka mókuntskua ma íntspini. Biblia no uandasïndi iiri ambe, ísï jimbo, mándani kristianu jatsisti para erakuni ambe enga uaaka para sési jarhani Tata Diosï jingoni ka ístu para no no sési pʼikuastani imeeri konsiensiani.

Máruksï no jiókuarhisïndi máru ambe enga iurhirirhu petanhajka, asta imani sapichitu ambe enga úrakuarhijka para inmunidadi íntspini ma tiempu kʼuiripuni ma. Ísïksï kurhangusïndi juramukuani enga Tata Diosï uandaka eskaksï no jámapiringa arhani iurhirini. Eratsesïndiksï eska juramukua enga Tata Diosï Israelini íntskupka, juramusïreenga eska iámu ima iurhiri enga animali ma tsïtapiringa o kʼuiripu ma, jatsipiringa para echerirhu tsïtanhani (Deuteronomio 12:22-24). ¿Andisï xáni jukaparhakue i ambe? Jimboka para prepararini gammaglobulina, factores de coagulación engaksï uérajka iurhirirhu ka máteru ambe jatsistiksï para tánani ka ánchitani iurhirini. Ísï jimbo, kristianuechaksï no jiókuarhisïndi iámindu ini ambe májkueni eskaksï na no jiókuarhijka iurhiri jatantani o ima tʼámu ambeeri enga uérajka iurhirirhu. Jatsisti para janhanharhinhani ambe engaksï imeecha eratsejka ka ísï eska na pʼikuastaajka imeecheeri konsiensia.

Máteru kristianuechaksï jamberi máteru ambe erakujti úni. Ístuksï no jiókuarhisïndi iurhiri jatantani ka nijtu glóbulosi rojosi, glóbulosi blankosi, plaketa ambe o plasma jatantani, peruksï jiókuarhisïndi eskaksï doktoriicha úraaka máru sapichitu ambe enga petanhaka glóbulosi blankosirhu, glóbulos rojosirhu, plaketarhu o plasmarhu. Jamberi kristianu ma jiókuarhijti inyeksioni ma enga jindeeka gammaglobulinaeri, peru no jiókuarhijti inyeksioni ma enga jukaaka máteru ambe enga petanhajka glóbulosi rojosirhu o glóbulos blankosirhu. Joperu ¿ambe úpirini eska kristianu ma jiókuarhipiringa sapichitu ambe enga petanhajka iurhirirhu?

Partirhu, “Ambe enga kurhanguarhijka ima enga arhintajka” enga uéraka rebistarhu La Atalaya 1 de juniu de 1990 jimbo, uandaspti eska máru proteineecha plasmarhu uératini sapichitu ambe iurhiriiri uarhiitiicheeri engaksï sapini ma erokuarhini jarhajka íntskusïndiksï sapini imeeri iurhiri jimbo. Ísï jimbo, sapi enga nótki andajpenujka intsïnhasïndi inmunoglobulina imeeri ambambarhu uératini, ini ambe jimbo, úsïndiksï inmunidadi jatsini máru pʼamenchakuecheeri. Máteru ambe enga úkuarhijka, jindeesti eska enga sapiiri glóbulosi rojuecha niárajkaksï uarhini, ánchikuarhisïndiksï imeecha engaksï oksijenuni pájka, ka ma parti iiri, bilirrubina úkuarhisïndi ka i amambarhu nintasïndi ka amamba petasïndi i ambe ísï eska na petajka imeeri. Máru kristianuechaksï jamberi eratsejti eska, jimboka i sapichitu ambe iurhiriiri úkuarhisïnga amambani jingoni ka imeeri sapini jingoni, eskaksï uaaka jiókuarhini imani sapichitu ambe enga petanhajka plasmarhu o ístu glóbulosi blankosi o glóbulosi rojosirhu.

Engaksï Jeobaeri testiguecha no májkueni ambe eratsejka úni iiri ambe, ¿arhikuekasïni i ambe eska no jukaparhakueska? Nómbe. Jindeesti ambe ma enga kánikua jukaparhakueka. Peru jarhasti ma ambe engachi jatsika para exeni. Iámu ambe engachi uandakia, arhikuekasïndi eskaksï Jeobaeri testiguecha no jiókuarhisïnga iurhiri jatantani ka nijtu imani tʼámu ambe enga jimbo arhukunhajka iurhiri. Biblia juramukuasïndi kristianuechani eskaksï no auaka idoluecheeri kéjtsïtakuani ka nijtu iurhiri, nijtuksï auantani animaliichani engaksï pirajchakukateuaka ka nijtuksï ísku jándi úkuarhini (Ukuecha 15:29). Joperu enga jindeejka ima sapichitu ambe enga iurhirirhu petanhajka mándani kristianu jatsisti para sési eratsentani ka kómarhini Tata Diosïni para uaaka imani ambe erakuni úni enga imeeri konsiensia sési pikuastaaka.

Uánikua kʼuiripuechaksï sóntku jiókuarhisïndi ambe uéjki engaksï intsïnhaaka paraksï úni sési pʼikuarherani, nájkiruka i ambe uaaka no sési úkuani o sánderu pʼamenchataani, na enga úkuarhijka enga nema iurhiri jatantajka. Jucha engachi sési marhuakuni jaka Tata Diosïni, jánguarhintasïngachi sánderu sési eratsentani ka no solu eratsentani imani ambe enga jindeeka para sési pʼikuarherantani. Jeobaeri testiguechachi kánikua jaiapanhentasïnga engachi ísï jánguarhintajka parakachi sési pʼikuarheraaka ka sésichi eratsentasïnga ambe engajtsïni uaaka marhuacheni ka ambe engajtsïni úpiringa no sési úchini medisineeri. Peru enga jindeejka para iurhiri ambe jatantani o imani ambe úrani enga iurhiriiriuaka, méntkisïchi orheta peerasïnga ambe enga Tata Diosï uandajka ka parachi no tsïtani juchaari ambakiti pájperakua imani jingoni engajtsïni tsípikua íntskujka (Salmo 36:9).

Na enga xáni kʼéri kóntperata máeka para kristianuecha ísï jatsini mintsinharhikua eska salmista enga karapka: “Jimboka Tata Diosï Jeoba jurhiateeska ka kuájchakpisïnga; ima jaiapanhentasïndi ka kʼéri ambe exeni nemani. Tata Diosï Jeoba méntkisï ambakiti ambe íntsauati imeechani engaksï jurhimbitku jámajka. Oh, Tata Diosï Jeoba [...], tsïpisïndi ima kʼuiripu engakeni tʼungini mintsikajka (Salmo 84:11, 12).

[Nota]

[Rekuadruecha]

KURHAMARHIKUECHA ENGAJTSÏ UAAKA ÚKUANI DOKTORIICHANI

Engaksïni operariuaka oksïni tratamientu ma íntskuni enga jukapiringa sapichitu ambe iurhiriiri, kurhanguarhi je:

Iáminduecha engajtsïni exeaka jíndeni, ¿míteskiksïa eskani ji Jeobaeri testigueska ka eskani juramuskia eskajtsïni méntku no jámaaka iurhiri jatsirantani (glóbulosi rojosi, glóbulosi blankosi, plaketa ambe ni plasma iurhiriiri)?

Engajtsï úpiringa ma repentku medisina ma intsïnhani enga úkata jauaka sapichitu ambe jingoni plasmaeri, glóbulosi rojosi o glóbulosi blankosi, o plaketa ambe, kurhanguarhi je:

¿Úkata jarhaski medisina ma ima tʼámu ambeeri enga iurhirirhu petanhajka? Enga ísïiuaka, úpirintsïni arhini néna úkata jarhaski?

¿Na xántsïni jatsikua i medisineeri enga úkata jaka sapichitu ambe iurhiriiri ka nénajtsïni jatsikua?

Engareni juchiiti konsiensia jurajkuaka parani jiókuarhini ini sapichitu ambe, ¿úpirini no sési ambe úkuarhinchani?

Engareni juchiiti konsiensia arhiaka eskani no jatsiska parani jiókuarhini i sapichitu ambe iurhiriiri, ¿jarhaski máteru tratamientu engajtsïni úpiringa íntskuni?

Engani na sési eratsentaakia ini ambe, kánksïni úpirini aianguni sini jiókuarhia o nómbe?