Bondye i vreman enterese avek ou

I NORMAL pour nou sipliy Bondye pour ed nou ler nou dan sitiasyon difisil kot nou pa konnen ki pou fer. Apre tou, i gran e pwisan; nou pa pou zanmen arive konn tou keksoz lo li. (Psonm 147:5) I pli byen kapab ed nou fer fas avek nou problenm. Deplis, Labib i envit nou pour ‘devid nou leker’ avek li. (Psonm 62:8) Me akoz sitan en kantite dimoun i santi ki Bondye pa reponn zot lapriyer? Eski sa i vedir ki i pa enterese avek imen?

Olye taye pour blanm Bondye akoz ou ganny lenpresyon i pa pe fer nanryen, mazin ler ou ti ankor en manrmay. Ou rapel ler ou paran pa ti donn ou tou sa ki ou ti demann zot. Ki ou ti fer? Eski ou ti dir zot: “Ou pa kontan mwan.” Bokou zanfan i dir sa. Me aprezan ki ou en adilt, ou realize ki i annan diferan fason pour demontre lanmour. Ou osi realize ki donn en zanfan tou keksoz ki i anvi i pa vreman sa pli bon keksoz pour fer.

Pareyman, si Zeova pa toultan reponn nou lapriyer parey nou nou anvi, sa pa vedir ki i pe inyor nou. An realite, Bondye i montre ki i enterese avek nou tou dan bokou fason.

“Atraver li nou ganny Lavi”

Premyerman, se gras a Bondye ki “nou kapab mouvmante e nou egziste.” (Akt 17:28) Par donn nou lavi i sirman montre ki i enterese avek nou e kontan nou!

Deplis, Zeova i donn nou sa ki nou bezwen pour nou reste vivan. Nou lir: “I pe fer zerb ver pouse pour zannimo, e vezetasyon pour limanite servi, pour ki later i prodwir manze.” (Psonm 104:14) Annefe, nou Kreater i fer plis ki zis fourni bann nesesite debaz dan lavi. Dan en fason zenere, i donn nou ‘lapli sorti dan lesyel, ek bann rekolt, sakenn dan son sezon. I’n donn nou osi manze e i’n ranpli nou leker avek lazwa.’—Akt 14:17.

Me serten dimoun i kapab demande, ‘Si Bondye i kontan nou sitan en kantite, akoz i les nou soufer?’ Eski ou konn larepons sa kestyon?

Eski nou kapab blanm Bondye?

Laplipar-di-tan nou soufer akoz nou prop aksyon. Par egzanp, nou konn byen ki i annan serten aktivite ki kapab fasilman met nou lavi an danze. Kantmenm sa, bokou dimoun i viv en lavi dezord, abiz lalkol ek lezot drog, servi sigaret, fer bann sport vreman danzere, dray tro vit, ensidswit. Si sa bann labitid danzere i anmenn maler pour en dimoun, lekel ki devret ganny blanmen? Bondye oubyen sa dimoun ki’n azir dan en fason bet? Parol enspire Bondye i dir: “Pa bezwen tronp ou lekor, personn pa kapab anbet Bondye. En dimoun i rekolte sa ki in senmen.”—Galat 6:7.

Anplis ki sa, imen i souvan fer ditor kanmarad. Ler en nasyon i deklar lager, sirman nou pa kapab blanm Bondye pour soufrans ki sa pou anmennen. Ler en kriminel i atak en dimoun, eski nou devret blanm Bondye pour ditor ouswa lanmor ki arive? Byensir non! Ler en diktater i kraz, tortir, e touy bann dimoun anba son lotorite, eski nou devret blanm Bondye? I pa pou rezonnab pour fer sa.—Eklezyast 8:9.

Aprezan, ki nou pou dir konsernan sa plizyer milyon dimoun ki pe viv dan lanmizer nwanr e ki pe mor lafen? Eski se Bondye ki devret ganny blanmen? Non. Nou plannet later i fourni dekwa manze pour nouri tou dimoun. (Psonm 10:2, 3; 145:16) Problenm se ki imen i mal distribye sa kantite manze ki  Bondye i fourni, ki fer annan lafanmin ek lanmizer. Deplis sa problenm pa ganny rezourd akoz imen i egois.

Lakoz prensipal

Me lekel ki devret ganny blanmen ler en dimoun i malad oubyen mor akoz lavyeyes? Eski ou pou sirprann pour konnen ki Bondye pa responsab pour sa osi? Bondye pa ti kree zonm pour vin vye e mor.

Ler Zeova ti met sa premye koup imen, Adan ek Ev dan zarden Edenn, Zeova ti donn zot sa lespwar pour viv pour touzour lo later dan en paradi. I kler ki i ti anvi ki later i peple avek bann imen ki pou apresye zot leritaz. Alor, pour zot lespwar vin en realite, Bondye ti met devan zot en kondisyon. Adan ek Ev ti pou viv dan Paradi, si selman zot ti kontinyen soumet avek zot Kreater.—Zenez 2:17; 3:2, 3, 17-23.

Malerezman, Adan ek Ev ti rebele. Ev ti swazir pour ekout Satan. Satan ti koz manti avek Ev e pretann ki Bondye ti pe anpes li ganny en bon keksoz. Alors, Ev ti konmans viv en lavi endepandan e esey “vin parey Bondye, pour konn sa ki bon ek sa ki move.” Adan ti pran kote avek Ev dan son rebelyon.—Zenez 3:5, 6.

Ler zot ti fer pese dan sa fason, Adan ek Ev ti montre ki zot pa merit viv pour touzour. Zot ti sibir bann move konsekans pese. Zot lafors ek lasante ti afeblir ziska finalman zot ti mor. (Zenez 5:5) Me zot rebelyon ti annan bann konsekans bokou pli serye. Nou ankor pe soufer avek lefe pese Adan ek Ev. Zapot Pol ti ekrir: “Pese in antre dan lemonn par en sel zonm, e pese in anmenn lanmor, e lanmor in pas avek tou dimoun, parski tou dimoun in konmet pese.” (Romen 5:12) Wi, akoz rebelyon Adan ek Ev, pese ek lanmor in propaz dan tou laras imen parey en maladi ki napa gerizon.

Pli gran Levidans ki Bondye i enterese avek nou

Eski sa i vedir ki kreasyon Bondye, bann imen, ti’n ganny afekte pour touzour? Non, e la nou vwar pli gran levidans ki Bondye i enterese avek nou. Menm si i ti kout li en kantite, Bondye ti donn mwayen  pour delivre limanite dan pese ek lanmor. Zeova ti volonterman donn lavi parfe Zezi konman sa pri pour delivre nou. (Romen 3:24) Se pour sa ki zapot Zan ti ekrir: “Bondye in telman kontan lemonn ki i’n donn son sel Garson, pour ki nenport ki, ki krwar dan li, pa pou mor, me i a ganny lavi eternel.” (Zan 3:16) En byenfe ki sa aksyon lanmour remarkab i anmennen pour nou i ki, ankor enn fwa, imen i annan sa lespwar pour viv pour touzour. Pol ti ekrir bann Romen: “Alor, parey par pese en sel zonm, tou dimoun in ganny kondannen, demenm par laksyon zis en sel zonm Bondye in akit e donn lavi tou dimoun.”—Romen 5:18.

Nou kapab asire ki dan letan apropriye Bondye, pou nepli annan soufrans oubyen lanmor lo sa Later. Okontrer, nou pou viv dan bann kondisyon ki liv Revelasyon i dir: “La aprezan Bondye in fer son demer parmi zonm. I pou reste avek zot. Zot pou vin son pep, e i pou vin zot Bondye. I pou eswiy tou larm dan zot lizye. Lanmor pou nepli egziste. Pou nepli annan ni dey, ni plere, ni soufrans, parski lemonn ansyen in disparet.” (Revelasyon 21:3, 4) Petet ou kapab dir, ‘Mon pa pou viv pour vwar sa letan.’ Me i kapab arive ki ou vwar sa zour. Menm si ou mor, Bondye i kapab resisit ou. (Zan 5:28, 29) Se sa ki Bondye i oule pour nou, e sanmenm ki pou arive. Alor, i totalman fo pour dir ki Bondye pa enterese avek imen!

“Apros avek Bondye”

I rekonfortan pour konnen ki Bondye in met an plas en solisyon permanan e alonterm pour soufrans ki imen i ladan. Me kwa ki kapab ed nou depi konmela menm? Ki nou kapab fer si nou perdi en dimoun ki nou kontan dan lanmor oubyen nou zanfan i tonm malad? Sa moman pa ankor arive pour Bondye retir maladi ek lanmor. Labib i montre ki nou bezwen esper en pe letan pour sa ganny rezourd. Me Bondye pa’n kit nou tousel san okenn led. Disip Zak ti dir: “Apros avek Bondye, e i ava apros avek zot.” (Zak 4:8) Wi, nou Kreater i envit nou pour annan en relasyon personnel avek li. Bann dimoun ki fer sa pou toultan santi son sipor menm dan bann sitiasyon pli difisil.

Me ki mannyer nou kapab apros avek Bondye? I fer apepre trwa milener ki Lerwa David ti demann en kestyon en pe parey. I ti dir: “O Zeova, . . . lekel ki pou reste dan ou montanny sen?” (Psonm 15:1) David ti reponn son prop kestyon ler i ti dir: “Sa ki napa okenn repros kont li e ki pe fer sa ki drwat, e ki koz laverite dan son leker. I pa’n fer kalonmni avek son lalang. Anver son konpanyon i pa’n fer nanryen mal.” (Psonm 15:2, 3) Andotmo, Zeova i akey sa bann ki swiv sa semen ki Adan ek Ev ti rezete. I apros avek bann dimoun ki fer son lavolonte.—Deterononm 6:24, 25; 1 Zan 5:3.

Ki mannyer nou kapab fer lavolonte Bondye? Nou bezwen aprann sa ki ‘bon e ki fer plezir Bondye nou Sover,’ e apre deside pour fer sa ki nou’n aprann. (1 Timote 2:3) Sa i enplik pran konnesans egzakt lo Parol Bondye, Labib. (Zan 17:3; 2 Timote 3:16, 17) I pa sifi zis pour lir Labib anler anler. Nou bezwen fer parey bann Zwif dan premye syek an Bere ki ti antann Pol prese. Labib i dir sa lo zot: “Zot ti resevwar Parol Bondye avek bokou lentere. Toulezour zot ti etidye Lekritir pour war si sa ki Pol ti dir zot ti vre.”—Akt 17:11.

Pareyman ozordi, en letid profon lo Labib i fer nou lafwa dan Bondye vin pli for e i ed nou batir en relasyon pros avek li. (Ebre 11:6) I osi ed nou konpran egzakteman ki mannyer Zeova i azir avek imen—pa zis pour nou benefisye pour en pti moman me sirtou avek bann byenfe eternel antet pour tou bann ki annan leker senser.

Annou get santiman detrwa Kretyen ki annan en relasyon pros avek Bondye. En fiy 16 an ki apel Danielle i dir: “Mon kontan Zeova en kantite, e mon annan bokou  rezon pour remersi li. I’n donn mwan bann bon paran ki vreman kontan li e ki’n ansenny mwan dapre son Parol.” En Kretyen an Irigway i ekrir: “Mon leker i ranpli avek lapresyasyon, e mon santi mwan pouse pour remersi Zeova pour son labonte e pour son lanmitye.” Bondye i akey menm bann ki byen zenn. Gabriela aze set an i dir: “Mon kontan Bondye plis ki okenn lezot keksoz dan lemonn antye! Mon annan mon prop Labib. Mon kontan aprann lo Bondye ek son Garson.”

Ozordi, plizyer milyon dimoun dan lemonn antye i toutafe dakor avek sa ki sa psalmis ti dir: “Apros avek Bondye i bon pour mwan.” (Psonm 73:28) Zot in ganny sa led pour fer fas avek problenm ki zot pe rankontre. Deplis, zot annan en lespwar solid pour viv pour touzour dan Paradi lo later. (1 Timote 4:8) Akoz ou pa fer li ou lobzektif pour “apros avek Bondye”? Annefe, Bondye i asir nou: “I pa lwen avek sakenn parmi nou.” (Akt 17:27) Wi, Bondye i vreman enterese avek ou!

[Portre lo paz 5]

Lentere ki Zeova i annan pour nou i evidan dan bokou fason

[Portre lo paz 7]

Menm bann pti manrmay i kapab apros avek Bondye

[Portre lo paz 7]

Ozordi, Zeova i ed nou andire. Dan letan apropriye, i pou retir maladi ek lanmor