Ang Dios Nagaulikid Gid sa Imo

NATURAL lang nga magpangayo kita sing bulig sa Dios kon kinahanglan gid naton ini. Ti, ‘daku [sia] kag bugana sa gahom; ang iya paghangop indi masaysay.’ (Salmo 147:5) Sia gid ang sarang makabulig sa aton sa paglubad sang aton mga problema. Luwas pa sa sina, ang Biblia nagaagda sa aton nga ‘iula sa atubangan niya ang aton tagipusuon.’ (Salmo 62:8) Kon amo, ngaa madamo gid nga mga tawo ang nagabatyag nga wala ginasabat sang Dios ang ila mga pangamuyo? Nagakahulugan bala ini nga wala sia nagaulikid?

Sa baylo nga basulon dayon ang Dios tungod daw wala sia nagasapak, dumduma ang tion sang bata ka pa. Sang wala dayon ginhatag sang imo mga ginikanan ang imo ginpangayo, ginsumbong mo bala sila nga wala ka nila ginahigugma? Madamo nga kabataan ang nagahimo sini. Apang, sang nagdaku ka na, narealisar mo nga ang imo mga ginikanan nagapakita sa imo sing gugma sa madamo nga paagi kag ang paghatag sa bata sang tanan nga ginapangayo niya indi gid man ang mahigugmaon nga butang nga himuon.

Subong man, kon wala pirme ginasabat ni Jehova ang aton mga pangamuyo suno sa luyag naton, wala ini nagakahulugan nga ginapabay-an niya kita. Ang matuod amo nga ginapakita sang Dios ang iya pag-ulikid sa aton tanan sa madamo nga paagi.

“Paagi sa Iya Kita May Kabuhi”

Una sa tanan, bangod sa Dios “kita may kabuhi kag nagahulag kag nagaluntad.” (Binuhatan 17:28) Ang paghatag sa aton sing kabuhi nagapakita gid nga sia mahigugmaon nga nagaulikid sa aton!

Dugang pa, ginahatag ni Jehova ang aton mga kinahanglanon agod mabuhi kita. Aton mabasa: “Ginapatubo niya ang mga hilamon para sa mga kasapatan, kag ang gamhon para sa pag-alagad sa katawhan, agod magpagua sing kalan-on gikan sa duta.” (Salmo 104:14) Sa katunayan, indi lamang ang sadsaran nga mga kinahanglanon sa kabuhi ang ginaaman sang aton Manunuga. Maalwan nga nagahatag sia “sing mga ulan gikan sa langit kag sing mapatubason nga mga panag-on, nga ginapuno ang [aton] mga tagipusuon sing pagkaon kag kasadya.”—Binuhatan 14:17.

Walay sapayan sini, ang iban mahimo mamangkot, ‘Kon ginahigugma gid kita sang Dios, ngaa ginapahanugutan niya nga mag-antos kita?’ Nahibaluan mo bala ang sabat sa sini nga pamangkot?

Ang Dios Bala ang Dapat Basulon?

Ang tawo mismo ang kabangdanan sang kalabanan nga ginaantos niya. Halimbawa, madamo ang nakahibalo sang mga katalagman sang pila ka buhat. Walay sapayan sini, ang mga tawo nagahimo gihapon sing seksuwal nga imoralidad, nagaabuso sa alkohol kag sa iban nga mga droga, nagapanabako, kag nagapakigbahin sa makatalagam nga mga isport, nagamaneho sing tuman kadasig, kag iban pa. Kon ining makatalagam nga mga buhat magaresulta sa pag-antos, sin-o ang dapat basulon? Ang Dios bala ukon ang isa nga nagapanghikot sing di-maalamon? Ang inspirado nga Pulong sang Dios nagasiling: “Indi kamo magtalang: Ang Dios indi tiliawtiawan. Kay bisan ano ang ginasab-ug sang tawo, ini man ang iya anihon.”​—Galacia 6:7.

Dugang pa, masunson nga ginasakit sang mga tawo ang isa kag isa. Kon ang isa ka pungsod magdeklarar sing inaway, pat-od gid nga ang Dios indi dapat basulon sa resulta nga pag-antos. Kon himuan sing malain sang isa ka kriminal ang iya masigkabanwahanon, dapat bala basulon ang Dios sa bisan ano nga resulta nga halit ukon kamatayon? Aba indi! Kon ang isa ka diktador nagapigos, nagapaantos, kag nagapatay sang iya mga sakop, dapat bala naton basulon ang Dios? Indi ina makatarunganon.​—Manugwali 8:9.

Apang, kamusta ang minilyon nga tuman ka imol ukon ginagutom? Dapat bala basulon ang Dios? Indi. Ang aton planeta nagaaman sing bugana nga pagkaon para sa tanan. (Salmo 10:2, 3; 145:16) Ang indi alangay nga pagpanagtag sa bugana  nga ginaaman sang Dios amo ang kabangdanan sang lapnag nga gutom kag kaimulon. Kag ang kakagod sang tawo amo ang kabangdanan kon ngaa wala malubad ini nga problema.

Ang Sadsaran nga Kabangdanan

Apang, sin-o ang dapat basulon kon ang isa magmasakit ukon mapatay bangod sang katigulangon? Makibot ka bala kon mahibaluan mo nga indi dapat basulon ang Dios bisan sa sini? Wala gintuga sang Dios ang tawo agod magtigulang kag mapatay.

Sang ang unang tawhanon nga mag-asawa, si Adan kag si Eva, ginbutang sa hardin sang Eden, ginhatagan sila ni Jehova sing paglaum nga magkabuhi sing walay katapusan sa paraiso nga duta. Apang, luyag niya nga ang duta puy-an sang mga tawo nga magaapresyar sang ila nabaton. Gani, ang ila paglaum para sa palaabuton nga kabuhi may kondisyon. Si Adan kag si Eva makapuyo lamang sa Paraiso kon magpabilin sila nga magpasakop sa ila mahigugmaon nga Manunuga.​—Genesis 2:​17; 3:​2, 3, 17-​23.

Makapasubo nga si Adan kag si Eva nagrebelde. Si Eva namat-od sa pagpamati kay Satanas nga Yawa. Si Satanas nagbutig sa iya kag nagsiling nga ginadingutan sia sang Dios. Gani ginsugdan ni Eva ang independiente nga dalanon kag nagtinguha nga ‘mangin kaangay sang Dios, nga nakahibalo sang maayo kag malain.’ Nagbuylog si Adan sa iya pagrebelde.​—Genesis 3:​5, 6.

Sang nagpakasala sila sa sining paagi, ginpakita ni Adan kag ni Eva nga indi sila takus nga magkabuhi sing dayon. Naeksperiensiahan nila ang malaglagon nga mga resulta sang sala. Ang ila kusog kag kabaskog nagluya, kag sang ulihi napatay sila. (Genesis 5:5) Apang, ang ila pagrebelde may mas malubha pa nga mga resulta. Nagaantos gihapon kita sa mga epekto sang pagpakasala ni Adan kag ni Eva. Si apostol Pablo nagsulat: “Paagi sa isa ka tawo [si Adan] nagsulod ang sala sa kalibutan kag ang kamatayon paagi sa sala, kag busa ang kamatayon naglapnag sa tanan nga tawo bangod sila tanan nakasala.” (Roma 5:12) Huo, bangod sang pagrebelde ni Adan kag ni Eva, ang sala kag kamatayon naglapnag kaangay sang malubha nga balatian sa bug-os tawhanon nga rasa.

Ang Pinakamabakod nga Ebidensia sang Pag-ulikid sang Dios

Buot silingon bala sini nga ang tawhanon nga tinuga sang Dios permanente na nga nalaglag? Indi, kag hambalan naton karon ang pinakamabakod nga ebidensia nga ang Dios  nagaulikid sa aton. Walay sapayan sang iya daku nga pagsakripisyo, ang Dios nag-aman sing paagi agod gawaron ang katawhan gikan sa sala kag kamatayon. Ang ginbayad nga gawad amo ang himpit nga kabuhi ni Jesus, nga ginhatag sing kinabubut-on tungod sa aton. (Roma 3:24) Gani, si apostol Juan nagsulat: “Ginhigugma gid sang Dios ang kalibutan sa bagay nga ginhatag niya ang iya bugtong nga Anak, agod nga ang bisan sin-o nga magtuo sa iya indi malaglag kundi may kabuhi nga walay katapusan.” (Juan 3:16) Subong resulta sining tumalagsahon nga mahigugmaon nga buhat, may paglaum kita liwat nga mabuhi sing dayon. Si Pablo nagsulat sa mga taga-Roma: “Paagi sa isa ka buhat sang pagkamatarong ang resulta sa tanan nga sahi sang tawo amo ang pagpahayag sa ila nga matarong para sa kabuhi.”—Roma 5:18.

Makapat-od kita nga sa gintalana nga tion sang Dios, madula na ang pag-antos kag kamatayon sa planeta nga Duta. Sa baylo sini, ang mga kahimtangan nga gintagna sa tulun-an nga Bugna matuman: “Yari karon! Ang kayangkayang sang Dios upod sa mga tawo, kag magapuyo sia kaupod nila, kag sila mangin iya katawhan. Kag ang Dios gid magaupod sa ila. Kag pahiran niya ang tagsa ka luha sa mga mata nila, kag wala na sing kamatayon, ukon kalisod ukon paghibi ukon kasakit pa. Ang nahaunang mga butang nagtaliwan.” (Bugna 21:3, 4) Mahimo magasiling ka, ‘Patay na ako kon matabo ina.’ Apang, basi buhi ka pa man. Kag bisan pa mapatay ka, banhawon ka sang Dios. (Juan 5:28, 29) Amo ina ang katuyuan sang Dios para sa aton, kag amo ina ang matabo. Sayop gid ang magsiling nga ang Dios wala nagaulikid sa katawhan!

“Magpalapit Kamo sa Dios”

Makalulugpay mahibaluan nga ginsugdan sang Dios ang isa ka nagadugay kag permanente nga solusyon sa problema sang pag-antos sang tawo. Apang, kamusta naman karon? Ano ang himuon naton kon mapatay ang aton isa ka hinigugma ukon magmasakit ang aton anak? Ti, wala pa mag-abot ang gintalana nga tion nga dulaon sang Dios ang balatian kag kamatayon. Ginapakita sang Biblia nga dapat maghulathulat pa kita agod malubad ina. Apang wala kita ginapabay-an sang Dios. Si disipulo Santiago nagsiling: “Magpalapit kamo sa Dios kag magapalapit sia sa inyo.” (Santiago 4:8) Huo, ang aton Manunuga nagaagda sa aton nga magtigayon sing suod nga kaangtanan sa iya, kag ang mga nagahimo sini sakdagon niya pirme bisan sa pinakamabudlay nga mga kahimtangan.

Paano kita magpalapit sa Dios? Amo man sini ang ginpamangkot ni Hari David mga tatlo ka milenyo na ang nagligad: “O Jehova, . . . Sin-o ang magapuyo sa imo balaan nga bukid?” (Salmo 15:1) Ginsabat ni David ang iya mismo pamangkot sang padayon sia nga nagsiling: “Sia nga nagalakat nga walay kasawayan kag nagahimo sing pagkamatarong kag nagapamulong sing kamatuoran sa iya tagipusuon. Wala sia nagapasipala paagi sa iya dila. Sa iya kaupod wala sia sing ginahimo nga malain.” (Salmo 15:2, 3) Kon sa aton pa, ginaabiabi ni Jehova ang mga nagalakat sa dalanon nga ginsikway nanday Adan kag Eva. Nagapalapit sia sa mga nagahimo sang iya kabubut-on.​—Deuteronomio 6:​24, 25; 1 Juan 5:3.

Paano naton mahimo ang kabubut-on sang Dios? Dapat naton tun-an ang “maayo kag kalahamut-an sa itululok sang aton Manluluwas, ang Dios,” kag nian magpanghikot nahisuno sini. (1 Timoteo 2:3) Nagakinahanglan ini sang pagkuha sing sibu nga ihibalo sa Pulong sang Dios, ang Biblia. (Juan 17:3; 2 Timoteo 3:16, 17) Ang hapaw lamang nga pagbasa sing Biblia indi bastante. Kinahanglan ilugon naton ang unang-siglo nga mga Judiyo sa Berea nga nagpamati sa pagbantala ni Pablo. Tuhoy sa ila, aton mabasa: “Ginbaton nila ang pulong nga may daku gid nga kalangkag sing hunahuna, nga ginausisa sing maayo ang Kasulatan adlaw-adlaw kon bala matuod gid ini nga mga butang.”—Binuhatan 17:11.

Sa karon man, ang maukod nga pagtuon sa Biblia nagapabakod sang aton pagtuo sa Dios kag nagabulig sa aton sa pagtukod sing suod nga kaangtanan sa iya. (Hebreo 11:6) Nagabulig man ini sa aton nga mahangpan kon paano gid nagapakig-angot si Jehova sa katawhan​—indi lang para sa karon nga benepisyo kundi ilabi na sa nagadugay nga kaayuhan sang tanan nga nahuyog sa matarong.

Binagbinaga ang ginsiling sang pila ka Cristiano nga may suod nga kaangtanan sa Dios. “Ginahigugma ko gid si Jehova, kag madamo  ako sing dapat ipasalamat sa iya,” siling sang 16-anyos nga si Danielle. “Ginhatagan niya ako sing mahigugmaon nga mga ginikanan nga nagahigugma gid sa iya kag nagtudlo sa akon nahisanto sa iya Pulong.” Ang isa ka Cristiano sa Uruguay nagsulat: “Ang akon tagipusuon puno sing apresasyon, kag nagapasalamat ako kay Jehova tungod sang iya di-bagay nga kaayo kag sang iya pagpakig-abyan.” Ginaabiabi sang Dios bisan ang magagmay nga mga kabataan. Ang siete-anyos nga si Gabriela nagsiling: “Ginahigugma ko ang Dios labaw sa bisan ano nga mahatag sang bug-os nga kalibutan! May kaugalingon ako nga Biblia. Luyag ko magtuon tuhoy sa Dios kag sa iya Anak.”

Sa karon, minilyon sa bug-os nga kalibutan ang tinagipusuon nga nagaugyon sa salmista nga nagsiling: “Ang pagpalapit sa Dios maayo para sa akon.” (Salmo 73:28) Nabuligan sila sa mga problema nga ginaatubang nila karon, kag may masaligan nga paglaum sila nga magkabuhi sing dayon sa Paraiso sa duta. (1 Timoteo 4:8) Ngaa indi mo pagtinguhaan nga ‘magpalapit sa Dios’? Sa pagkamatuod, ginapasalig kita: “Indi sia malayo sa tagsatagsa sa aton.” (Binuhatan 17:27) Huo, ang Dios nagaulikid gid sa imo!

[Mga retrato sa pahina 5]

Ang pag-ulikid ni Jehova sa aton makita sa madamo nga paagi

[Retrato sa pahina 7]

Bisan ang magagmay nga mga kabataan makapalapit sa Dios

[Mga retrato sa pahina 7]

Sa karon, si Jehova nagabulig sa aton sa pagbatas. Sa gintalana nga tion, dulaon niya ang balatian kag kamatayon