Peteg a Mangiyaansakit so Dios ed Sika

NATURAL lambengat so onkerew na tulong ed Dios sano kakkaukolan tayo itan. On, lapud sikato so ‘manuna, tan abalbaleg so pakayari to; say pakatalos to anggapo so sampot to.’ (Salmo 147:5) Sikatoy manunan makatulong ed sikatayo pian naresolbi iray problema tayo. Nilikud ni ed satan, papasesegen itayo na Biblia ya ‘ipaway so puso tayo’ ed arapan to. (Salmo 62:8) No ontan, akin et dakdakel so maniisip ya ag-eebatan na Dios iray pikakasi ra? Kasin kabaliksan na satan ya anggapoy panangiyansakit to?

Imbes a tetelen a tampol so Dios lapud ompatnag a pamapaulyan to, nonoten pa so panaon sanen ugaw ka ni. Sanen ag-inter a tampol na saray ateng mo so kada kerewen mo, kasin inakusaan mo ira ya agda ka inaro? Ontan so gagawaen na dakel ya ugugaw. Balet, sanen binmaleg ka la, amoriam a say aro so nipapatnag ed dakel a paraan tan say pangiter ed amin a kerewen na ugaw so aliwan peteg a panangaro.

Mipadpara, no ag-eebatan a naynay nen Jehova iray pikakasi tayo diad paraan ya iilaloan tayo, agkabaliksan na satan ya ikakaindan to itayo. Diad tua, ipapatnag na Dios so panagpaga to ed sikatayo diad dakel a paraan.

‘Mabilay Itayo Lapu ed Sikato’

Manuna ed amin, ‘sikatayo so mabilay, onggagalaw, tan nagmaliw a too’ lapu ed Dios. (Gawa 17:28) Say impangiter to ed sikatayo na bilay so peteg a pakapatnagan na maaron panangiyansakit to ed sikatayo!

Niarum ni, itatarya nen Jehova iray nakaukolan tayo ta pian mantultuloy itayon manbilay. Oniay nabasa tayo: “Sikato patuboen to so dika ya onkana ed saray ayayep, tan say tanaman ya onkana a pan-inawaan na too; pian sikato makapapaway na tagano a manlapu ed dalin.” (Salmo 104:14) Diad tua, aglambengat itatarya na Manamalsa tayo iray manunan nakaukolan ed bilay. Sikato met so mabunlok a mangiiter na ‘saray uran manlapu ed tawen tan mabunga a panaon, a papanoen to so kapusoan tayo na tagano tan gayaga.’​—Gawa 14:17.

Anggaman kuan, nayarin wala ni ray manuumameng, ‘No ontan lay panangaro na Dios ed sikatayo, akin et aabuloyan to itayon manirap?’ Naebatan mo kasi itan a tepet?

Kasin Natetel so Dios?

Maslak ed paniirap na katooan et makasengeg ed sikara lanlamang. Alimbawa, kabkabat iray kapeligroan ed pigaran makarisgon aktibidad. Siansia ni, saray totoo so mangaagamil na seksual ya imoralidad, mangaabuso ed alkohol tan arum ni ran druga, mansisigarilyo, mibibiang ed delikado iran isport, mapmaples a manmamaneho, tan arum ni ra. No manirap ira lapud satan a mapeligron kiwas da, siopa so natetel? Say Dios odino samay kinmiwas ya agmakabat? Oniay ibabaga na pinuyanan a Salita: “Agkayo komon nalingo; say Dios agnayarin naludlurey: ta say antokaman ya itanem na too satan met so anien to.”​—Galacia 6:7.

Sakey ni, saray totoo so mabetbet a makapansasakitan. Sano ideklara na sakey a nasyon so pibakal to, seguradon agnatetel so Dios ed panirap a resulta na satan. Sano atakien na kriminal so kabaleyan to, kasin natetel so Dios no bilang ta arisgo odino inatey? Andin balot! Sano nilames, pinairap, tan pinatey na sakey a diktador iramay walad pananguley to, nepeg kasin tetelen tayo so Dios? Aliwan makatunongan itan.​—Eclesiastes 8:9.

Komusta balet so minilyon a manbibilay ed pirmin kairapan odino naeerasan? Kasin natetel so Dios? Andi. Daakan so tagano diad dalin  a panaayaman tayo pian nasustuni so amin a too. (Salmo 10:2, 3; 145:16) Say ikakasmak na eras tan kairapay-bilay et makasengeg ed ag-asimbang a panangiyutob ed daakan a probisyon na Dios. Tan naamper so pakaresolbi na satan a problema lapud inkasiblet na too.

Say Manunan Sengegan

Balet, siopa so natetel sano nansakit odino inatey so sakey a too lapud inkatakken la? Kasin pankelawan yo no naamtaan yo ya anggan diad satan et agnatetel so Dios? Agpinalsa na Dios so too ya ontakken insan ompatey.

Sanen inyan diad hardin na Eden so inmunan sankaparis a too, si Adan tan Eva, sikaray inikdan nen Jehova na ilalon manbilay ya andi-anggaan diad sakey a paraison dalin. Balet, mabitar a kaliktan ton say dalin so panayaman na totoo a mangapresya ed atawir da. Kanian, intarya to so ilalon pambilay diad arapen a walaan na kondisyon. Makapambilay lambengat si Adan tan si Eva diad Paraiso daput no mansiansia iran matulok ed maaron Manamalsa ra.​—Genesis 2:17; 3:2, 3, 17-23.

Makapaermen ta nanrebeldi si Adan tan si Eva. Pinili nen Eva a talinengen si Satanas a Diablo. Tinilaan to si Eva ya inkuan ton walay maabig a bengatla ya ikikibot na Dios ed sikato. Kanian ginapoan nen Eva so nankurang ya independente tan ginetma toy magmaliw a ‘singa Dios, a makaamta na maong tan mauges.’ Si Adan so akinonong ed impanrebeldi to.​—Genesis 3:5, 6.

Sanen nankasalanan ira ed onian paraan, impatnag nen Adan tan Eva ya ag-ira makanepegan a manbilay a maando. Sinagmak da iray makadesyang ya epekto na kasalanan. Kinmapuy tan linmetey so laman da, tan inatey ira diad kaunoran. (Genesis 5:5) Balet, wala ni iray graben nansumpalan na impanrebeldi ra. Anggad natan et sasagmaken tayo ni iray epekto na kasalanan nen Adan tan Eva. Oniay insulat nen apostol Pablo: “Say kasalanan linmoob ed mundo lapu ed sakey a too [si Adan], tan say patey lapu ed kasalanan; et say patey ed satan linma ed amin a too, ta amin nankasalanan.” (Roma 5:12) On, lapud impanrebeldi nen Adan tan si Eva, kinmayat ed sankatooan so kasalanan tan ipapatey, a singa makapatey a sakit.

Say Sankabiskegan ya Ebidensya ed Panangiyansakit na Dios

Kasin kabaliksan na satan a permanente lan aderal so toon pinalsa na Dios?  Andi, lapud wala so mabisbiskeg ya ebidensya a sikatayoy iyaansakit na Dios. Diad pirmin impansakripisyo na Dios, intarya to so paraan pian narondon so katooan ed kasalanan tan ipapatey. Say bayar a dondon et say ayadyarin bilay nen Jesus, a mabulos ton inter nisesengeg ed sikatayo. (Roma 3:24) Kanian, oniay insulat nen apostol Juan: “Ontan lay impangaro na Dios ed mundo, ya inter to so bogbogtong ya Anak to, pian siopaman a manisia ed sikato agnatawtaw, noag ingen wala so bilay ton andi-anggaan.” (Juan 3:16) Bilang resulta na sayan matalonggaring a panangipatnag na aro, awalaan itayo lamet na ilalon manbilay a maando. Nansulat si Pablo ed saray taga-Roma: “Lapu ed sakey a gawa na katunongan dinmateng so langkap ed amin a too ya onkana ed pamatunong na bilay.”​—Roma 5:18.

Makaseguro itayo a diad aturon panaon na Dios, naandi la so panirap odino ipapatey diad planetan Dalin. Imbes, ontalona iray kipapasen a nipasakbay diad libro na Apocalipsis: “Nia, so tabernakulo na Dios wala ed saray totoo, tan sikato so manayam naani ed sikara, tan sikara naani baley to, tan say Dios met lanlamang so wala naani ed sikara tan Dios da: Tan punasen to so amin a lua ed kamataan da; tan andi gapo la naani ipatey; tan anggapo la naani onnangis o dageyem, o ot-ot: ta saray una a bengatla sikara so linmabas la.” (Apocalipsis 21:3, 4) Nayarin ikuan mo, ‘Anggapo ak la sano nagawa itan.’ Balet, diad tua et napanggayagaan mo itan. Tan anggano inatey ka la, nayarian na Dios a paolien ka manlapud saray inaatey. (Juan 5:28, 29) Ontan so gagala na Dios ed sikatayo, tan nagawa itan. Talagan sigpot a katilaan so pangibagan ag-iyaansakit na Dios so katooan!

“Singger Kayo ed Dios”

Makaligliwan naamtaan a ginapoan la na Dios so magnayon tan permanentin solusyon ed paniirap na too. Komusta balet natan? Antoy nagawaan tayo no inatey so inad-aro tayo odino no nansakit so anak tayo? Bueno, aliwa nin saya so panaon pian paandien na Dios so sakit tan ipapatey. Ipapabitar na Biblia a kaukolan tayon alagaren so panaon a pakasumpal na satan. Balet ag-itayo ikakaindan na Dios. Oniay imbaga nen babangatan a Santiago: “Singger kayo ed Dios, et sikato so onsingger naani ed sikayo.” (Santiago 4:8) On, sikatayoy papasesegen na Manamalsa tayo a bayuboan so maapit a relasyon ed sikato, tan saramay manggawa ed satan so lawas makalikna na suporta to anggaman ed sankairapan iran situasyon.

Panon itayon onapit ed Dios? Ontan met so intepet nen Arin David manga talon libon taon lay apalabas, a kuanto: “Jehova, . . . siopa naani manayam ed masanto a pukdol mo?” (Salmo 15:1) Inebatan nen David so tepet ton mismo sanen intuloy ton inkuan: “Say manakar a mapmaptek, tan manggawa na matunong, tan mansalita na matua ed puso to. Say agto pantalabutob [ed] dila to, tan agmanggawa na mauges ed kaaro to.” (Salmo 15:2, 3) Diad arum a salita, aabrasaen nen Jehova iraman so manutumbok ed kurang ya impulisay di Adan tan Eva. Sikato so onaapit ed saramay manggagawa na linawa to.​—Deuteronomio 6:24, 25; 1 Juan 5:3.

Panon tayon nagawaan so linawa na Dios? Kaukolan tayon aralen so “maong tan makapalikliket ed arap na Dios a Manangilaban tayo,” insan onkiwas itayo unong ed satan. (1 Timoteo 2:3) Lalanoren na satan so pakawalaan na suston pikakabat ed Salita na Dios, say Biblia. (Juan 17:3; 2 Timoteo 3:16, 17) Aliwan magenap so basta labat pambasa ed Biblia. Kaukolan tayon aligen iray Judio ed Berea nen inmunan-siglo a dinmengel ed impanpulong nen Pablo. Oniay nabasa tayo nipaakar ed sikara: “Inako ra so salita ed sipaparaan a nonot; inagew-agew ya inusisa ra so sulat, no peteg so sarayan bengatla.”​—Gawa 17:11.

Ontan met natan, say panaral a maong ed Biblia so mamabiskeg na pananisia tayo ed Dios tan ontulong ed sikatayon niletneg so maapit a relasyon ed sikato. (Hebreos 11:6) Ontulong met itan pian malinew tayon natalosan no panon a midedeneng si Jehova ed katooan​—ya aliwa labat a makagunggona ed antikey a panaon noagta nagkalalo la parad magnayon a pankaabigan na amin na saramay suston nikiling.

Imanoen pa iray komento na pigaran Kristiano a walaan na maapit a relasyon ed Dios. “Inar-arok  si Jehova, tan dakdakel so pisasalamatan ko ed sikato,” so kuan na 16-años a si Danielle. “Inikdan to ak na maaron atateng a tuan mangaaro ed sikato tan mangibabangat ed siak unong ed Salita to.” Oniay insulat na sakey a Kristiano ed Uruguay: “Manleppua ed apresasyon so pusok, tan napapakiwas ak a misalamat ed si Jehova lapud agkanepegan a kaabigan tan pikakaaro to.” Anggan saray ugugaw so aabrasaen met na Dios. Oniay inkuan nen Gabriela a mantaon na pitora: “Aaroen ko so Dios nen say antokaman nin bengatla a walad interon mundo! Wala so Bibliak a dili. Labalabay koy manaral nipaakar ed Dios tan ed Anak to.”

Natan, minilyon ed sankamundoan so interon-puso a mipakna ed inkuan na salmista: “Maong ed siak so ondere ed abay na Dios.” (Salmo 73:28) Natutulongan iran manresolbe ed saray probleman aarapen da natan, tan walaan ira na seguradon ilalo a manbilay a maando ed Paraiso diad dalin. (1 Timoteo 4:8) Akin ya agmo gawaen a kalat so ‘iyasingger ed Dios’? Tua a makaseguro itayon: “Sikato so . . . ag-arawi ed sinansakey ed sikatayo.” (Gawa 17:27) On, peteg a mangiyaansakit so Dios ed sika!

[Saray litrato ed pahina 5]

Say panangiyansakit nen Jehova ed sikatayo so naiimano diad dakel a paraan

[Litrato ed pahina 7]

Anggan saray ugugaw so nayarin onapit ed Dios

[Saray litrato ed pahina 7]

Natan et tutulongan itayo nen Jehova a mansungdo. Diad aturon panaon, paandien to so sakit tan ipapatey