Dios Ta Realmente Interesá den Bo

DEN momentunan di desesperashon ta masha normal ku nos ta buska yudansa di Dios. Al fin i al kabo, e ta “grandi . . . i abundante den fortalesa; su komprondementu ta infinito.” (Salmo 147:5) E ta den e mihó posishon pa yuda nos trata ku nos problemanan. Es mas, Beibel ta invitá nos pa ‘drama nos kurason’ dilanti dje. (Salmo 62:8) Pakiko anto hopi hende tin e impreshon ku Dios no ta kontestá nan orashonnan? Esei ke men ku Dios no ta interesá den nan?

En bes di kore kulpa Dios pa motibu ku aparentemente e no ta hasi nada, kòrda bèk riba e tempu ku bo tabata mucha. Ora bo mayornan no a duna bo tur loke bo a pidi, bo a yega di akusá nan ku nan no ta stima bo? Hopi mucha ta hasi esei. Sin embargo, ora bo a bira grandi, bo a realisá ku amor ta ser manifestá den hopi manera, i ku un mayor ku semper ta bai na amèn di su yu i ta dun’é tur loke e pidi no ta dunando muestra ku e realmente ta stima su yu.

Meskos tambe, si Yehova no ta kontestá nos orashonnan semper manera nos ta spera, esei no ke men ku e ta ignorá nos. Echo ta ku Dios ta mustra su interes den nos tur den hopi manera.

Pa Medio di Dje “Nos Ta Biba”

Na promé lugá, ta Dios por ke ku nos “ta biba i ta move i ta eksistí.” (Echonan 17:28) E echo ku el a duna nos bida sigur ta un muestra di su interes amoroso den nos!

Ademas, Yehova ta duna nos loke ta nesesario pa nos keda na bida. Beibel ta bisa di dje: “E ta hasi yerba krese pa bestia, i vegetashon pa hende kultivá, pa asina e por saka pan for di e tera.” (Salmo 104:14) De echo, no ta nos nesesidatnan básiko so nos Kreadó ta satisfasé. Den su bondat, e ta manda ‘áwaseru for di shelu i tempu di bon kosecha pa nos, i ta satisfasé nos kurason ku kuminda i alegria.’—Echonan 14:17.

Pero kisas un hende ta puntra: ‘Si Dios ta stima nos asina tantu, pakiko e ta laga nos sufri?’ Abo sa e kontesta pa e pregunta ei?

Nos Por Kulpa Dios?

Hopi hende ta sufri pa nan mes falta. Por ehèmpel, nos ta bon na altura di sierto aktividatnan ku ta hopi riská i peligroso. Tòg, hende ta riska praktiká inmoralidat seksual, bebe di mas, huma, usa droga, hasi deportenan peligroso, kore outo muchu duru, etcetera. Si un komportashon peligroso asina pone un hende sufri, ta ken e tin ku kulpa? Dios òf e mes pa su imprudensia? E Palabra inspirá di Dios ta bisa: “No gaña boso mes: Dios no ta laga hasi bofon di dje; pasobra loke un hende sembra, esaki tambe e lo kosechá.”—Galationan 6:7.

Ademas, hopi bes hende ta kousa daño na otro. Ora un nashon ta bai den guera, sigur nos no por kulpa Dios pa tur e sufrimentu ku esei ta trese kuné. Ora un kriminal ataká un konsiudadano, herid’é òf kousa su morto, nos por kulpa Dios? Klaru ku nò! Ora un diktadó oprimí, torturá i mata e personanan ku ta kai bou di dje, nos mester kulpa Dios? Esei lo no ta rasonabel, no ta bèrdat?—Eklesiastés 8:9.

Pero ke tal di e miónes di hendenan ku ta biba den miseria òf ku ta muri di hamber? Nos por kulpa Dios pa esei? Nò. Nos planeta ta produsí mas ku sufisiente kuminda pa alimentá tur hende. (Salmo 10:2, 3; 145:16) Ta e repartishon desigual di e abundansia ku  Dios a duna ta hiba na hamber i pobresa ekstenso. I egoismo di hende ta stroba nan di resolvé e problema ei.

E Kousa Básiko

Ken anto nos tin ku kulpa ora un persona bira malu òf muri di behes? Lo bo keda sorprendí pa sa ku ni pa esei bo no por kulpa Dios? Dios no a krea hende pa bira bieu i muri.

Ora Yehova a pone e promé pareha humano, Adam ku Eva, den e hòfi di Edén, el a duna nan e posibilidat di biba pa semper den un paradeis riba tera. Ma e tabata ke p’e tera ser habitá pa hende ku lo a apresiá loke nan a haña. P’esei el a mara nan posibilidat di sigui biba na sierto kondishon. Adam ku Eva lo a sigui biba den Paradeis tanten ku nan a keda obediente na nan Kreadó amoroso.—Génesis 2:17; 3:2, 3, 17-23.

Lamentablemente, Adam ku Eva a rebeldiá. Eva a haña gana di skucha Satanas e Diabel. Esaki a gaña Eva i básikamente a bisa Eva ku Dios a keda sin dun’é algu ku tabata bon p’e. Pues asina Eva a skohe un rumbo independiente i a purba bira “manera Dios, konosiendo bon i malu.” Adam tambe a djòin e den su rebeldia.—Génesis 3:5, 6.

Ora Adam ku Eva a peka den e manera aki, nan a demostrá ku nan no a meresé di biba pa semper. Nan a sufri e konsekuensianan desastroso di piká. Nan forsa i vigor a mengua, i despues di un tempu nan a muri. (Génesis 5:5) Ma nan rebelion tabatin konsekuensianan muchu mas serio. Ainda nos ta sufri di e efektonan di e piká di Adam ku Eva. Apòstel Pablo a skirbi: “Dor di ún hende [Adam] piká a drenta den mundu, i morto dor di piká, i asina morto a pasa pa tur hende, pasobra tur a peka.” (Romanonan 5:12) Sí, pa motibu di e rebelion di Adam ku Eva, piká i morto a plama manera un enfermedat maligno den henter humanidat.

E Prueba di Mas Konvinsente di Dios Su Interes

Esei ta nifiká ku Dios su kreashon humano a ser ruiná pa semper? Nò, i aki nos ta yega n’e prueba di mas konvinsente  ku e tin interes den nos. Hasiendo un gran sakrifisio, Dios a perkurá e medio pa reskatá humanidat for di piká i morto. E preis di reskate tabata Hesus su bida perfekto, ku el a duna boluntariamente na nos fabor. (Romanonan 3:24) P’esei apòstel Juan a skirbi: “Dios a stima mundu asina tantu, ku el a duna su Yu unigénito, pa ken ku kere den dje no bai pèrdí, ma tin bida eterno.” (Juan 3:16) Komo resultado di e akto sobresaliente aki di amor, nos a bolbe haña e posibilidat di biba pa semper. Pablo a skirbi e romanonan: “Ún echo di hustisia a trese hustifikashon di bida pa tur hende.”—Romanonan 5:18.

Nos por ta sigur ku n’e debido tempu di Dios, lo no tin sufrimentu ni morto mas riba nos planeta. Mas bien, lo reina e kondishonnan ku e buki di Revelashon a profetisá di dje: “Mira, e tabernakel di Dios ta meimei di hende, i e lo biba meimei di nan, i nan lo ta su pueblo, i Dios mes lo ta meimei di nan, i e lo seka tur lágrima kita for di nan wowo; i lo no tin morto mas; lo no tin lamento mas, ni yoramentu, ni doló; e promé kosnan a pasa.” (Revelashon 21:3, 4) Kisas bo ta bisa, ‘Ami lo no t’ei pa mira e kosnan ei sosodé.’ Sin embargo, echo ta ku bo por t’ei. I asta si bo muri, Dios por lanta bo for di morto. (Juan 5:28, 29) Esei ta e propósito di Dios pa nos, i ta esei ta loke lo sosodé. E deklarashon di ku Dios no ta interesá den humanidat ta leu fo’i bèrdat!

“Hala Serka Dios”

Ta un konsuelo pa sa ku Dios a dal e promé paso pa trese un solushon permanente p’e problema di sufrimentu humano. Pero kiko di aworakí mes? Kiko nos por hasi si nos pèrdè un ser stimá den morto òf si nos yu bira malu? Wèl, e tempu pa Dios eliminá enfermedat i morto no a yega ainda. Beibel ta indiká ku nos lo tin ku warda un poko mas pa esei sosodé. Pero Dios no a laga nos desampará. Disipel Santiago a bisa: “Hala serka Dios i e lo hala serka boso.” (Santiago 4:8) Sí, nos Kreadó ta invitá nos pa forma un relashon personal íntimo kuné, i esnan ku hasi esei semper lo sinti su sosten asta den e situashonnan di mas difísil.

Kon nos por hala serka Dios? Rei David a hasi un pregunta similar rònt di tres mil aña pasá: “O SEÑOR, . . . ken por biba riba bo seru santu?” (Salmo 15:1) David a kontestá su mes pregunta ora el a bisa: “Esun ku ta kana den rektitut i ta hasi hustisia, i ta papia bèrdat den su kurason. E no ta kalumniá ku su lenga, ni ta hasi malu na su próhimo.” (Salmo 15:2, 3) Ku otro palabra, Yehova ta risibí ken ku ta sigui e kaminda ku Adam ku Eva a rechasá. E ta hala serka hende ku ta hasi su boluntat.—Deuteronomio 6:24, 25; 1 Juan 5:3.

Kon nos por hasi e boluntat di Dios? Nos tin ku siña kiko ta “bon i aseptabel den bista di Dios nos Salbadó,” anto disidí pa aktua di akuerdo ku esei. (1 Timoteo 2:3) Esei ta enserá gana e konosementu eksakto di Beibel, e Palabra di Dios. (Juan 17:3; 2 Timoteo 3:16, 17) Lesa Beibel aribariba no ta sufisiente. Nos tin ku imitá e hudiunan di promé siglo den Berea ku a tende Pablo prediká. Beibel ta bisa di nan: “Nan a risibí e palabra ku bon boluntat i tabata skudriñá e Skrituranan tur dia, pa mira si e kosnan aki tabata asina.”—Echonan 17:11.

Awe ta meskos. Un estudio kuidadoso di Beibel ta hasi nos fe den Dios bira mas fuerte i ta yuda nos kultivá un relashon íntimo kuné. (Hebreonan 11:6) Tambe e ta yuda nos komprondé eksaktamente kon Yehova ta trata ku humanidat: e ta interesá no solamente den hende su bienestar riba término kòrtiku sino spesialmente den e bienestar di término largu di tur hende ku tin un bon disposishon.

Mira kon algun kristian ku tin un relashon íntimo ku Dios a ekspresá nan mes. Danielle di 16 aña a bisa: “Mi stima Yehova masha  tantu mes, i mi tin hopi di gradisié. El a duna mi mayornan amoroso ku di bèrdat ta stima mi i ku a siña mi di akuerdo ku su Palabra.” Un kristian na Uruguay a skirbi: “Mi kurason ta yen di apresio, i mi ta sinti mi impulsá pa gradisí Yehova pa su bondat inmeresí i pa su amistat.” Asta mucha chikitu por ta amigu di Dios. Gabriela di shete aña a bisa: “Mi ta stima Dios mas ku tur kos den henter e mundu aki! Mi tin mi mes Beibel. Mi ta gusta siña di Dios i di su Yu.”

Awe, miónes di hende rònt mundu ta kompletamente di akuerdo ku e salmista, kende a bisa: “Hala serka Dios ta bon pa mi.” (Salmo 73:28, NW) Nan a haña yudansa pa trata ku e problemanan ku nan ta konfrontando aworakí, i nan tin e speransa sigur di biba pa semper den Paradeis riba tera. (1 Timoteo 4:8) Pakiko bo no ta pone e meta di “hala serka Dios”? Sí, Beibel ta duna nos e siguransa ku “e no ta leu di kada un di nos.” (Echonan 17:27) Sí, Dios realmente ta interesá den bo!

[Plachinan na página 5]

Yehova su interes den nos ta bisto den hopi forma

[Plachi na página 7]

Asta mucha chikitu por hala serka Dios

[Plachinan na página 7]

Awe, Yehova ta yuda nos perseverá. Na su debido tempu, lo e eliminá enfermedat i morto