Xikwembu Xa Ku Khathalela Hakunene

I SWA ntumbuluko ku huwelela eka Xikwembu hi xikhongelo loko hi tshikileleke swinene. Phela, Xikwembu i ‘xikulu naswona xi ni matimba lamakulu; ku twisisa ka xona a ku runguleki.’ (Pisalema 147:5) Hi xona ntsena lexi nga hi pfunaka leswaku hi langutana ni swiphiqo. Ku tlula kwalaho, Bibele yi hi khutaza ku ‘chulula timbilu ta hina’ emahlweni ka xona. (Pisalema 62:8) Kutani, hikwalaho ka yini vo tala va vona onge Xikwembu a xi swi hlamuli swikhongelo swa vona? Xana sweswo swi vula leswaku a xi khathali?

Ematshan’weni yo hatlisela ku sola Xikwembu hikwalaho ka leswi swi tikombaka onge a xi teki goza, tsundzuka loko wa ha ri n’wana. Loko vatswari va wena va pfa va ku tsona swin’wana, xana a wu nga va soli u vula leswaku a va ku rhandzi? Vana vo tala va swi vula sweswo. Hambiswiritano, loko u kula u sungule ku swi vona leswaku rirhandzu ri kombisiwa hi tindlela to tala ni leswaku loko mutswari a nyika n’wana xin’wana ni xin’wana, yoleyo a hi ndlela leyinene yo n’wi kombisa rirhandzu.

Hilaha ku fanaka, loko Yehovha a nga hlamuli swikhongelo swa hina hilaha hi languteleke hakona minkarhi hinkwayo, a swi vuli swona leswaku wa hi honisa. Ntiyiso hileswaku, Xikwembu xi hi khathalela hinkwerhu hi tindlela to tala.

“Ha Xona Hi Ni Vutomi”

Xo sungula, hi nkhensa Xikwembu hikuva “hi ni vutomi, ha famba hi tlhela hi va kona.” (Mintirho 17:28) Vutomi lebyi xi hi nyikeke byona byi kombisa nkhathalelo wa xona wa rirhandzu!

Ku tlula kwalaho, Yehovha u hi nyika leswi hi swi pfumalaka evuton’wini. Ha hlaya: “U endla leswaku byanyi bya rihlaza byi hlukela swiharhi, ni ximila lexi nga ta tirhisiwa hi vanhu, leswaku xi humesa swakudya emisaveni.” (Pisalema 104:14) Entiyisweni, Muvumbi wa hina u enerisa swilaveko swa hina swa vutomi. Hi malwandla u hi nyika ‘timpfula ta le tilweni ni tinguva ta mihandzu, u tata timbilu ta hina hi ku helela hi swakudya ni ku khana lokukulu.’—Mintirho 14:17.

Hambiswiritano, van’wana va nga ha vutisa leswaku, ‘Loko Xikwembu xi hi rhandza swonghasi, ha yini xi pfumelela leswaku hi xaniseka?’ Xana wa yi tiva nhlamulo ya xivutiso xexo?

Xana Xikwembu I Muvangi Wa Swiphiqo?

Swiphiqo swo tala swa vanhu i mhangu ku tilavela. Hi xikombiso, ku na swilo swo tala leswi tiviwaka leswaku swi veka vutomi ekhombyeni. Hambiswiritano, vanhu va tikhoma hi ndlela yo biha hi tlhelo ra rimbewu, va tirhisa xihoko ni swidzidzirisi hi ndlela yo biha, va dzaha, va hlanganyela eka mintlango leyi nga ni khombo, va chayela futa ni swin’wana ni swin’wana. Loko swiendlo swo tano swo biha swi ri ni khombo, xana nandzu wu na mani? Wu na Xikwembu kumbe wu na loyi a endlaka swilo hi ndlela ya vuphukuphuku? Rito ra Xikwembu leri huhuteriweke ri ri: “Mi nga tshuki mi hambukisiwa: Xikwembu a hi xa ku vungunyiwa. Hikuva xin’wana ni xin’wana lexi munhu a xi byalaka, u ta tlhela a tshovela xona.”—Vagalatiya 6:7.

Ku tlula kwalaho, minkarhi yo tala vanhu hi vona va bananaka hi rhanga ro hisa. Loko ku va na nyimpi etikweni, Xikwembu a xi fanelanga xi voniwa nandzu hi ku xaniseka loku vaka kona. Loko xigevenga xi hlasela munhu-kulobye, xana Xikwembu hi xona xi faneleke xi voniwa nandzu loko munhu yoloye a vaviseka kumbe a fa? A swi tano! Loko vafumi va tshikilela, va xanisa ni ku dlaya lava va va fumaka, xana hi fanele ku sola Xikwembu? Sweswo swi ta va swi nga twali.—Eklesiasta 8:9.

Kambe, ku vuriwa yini hi timiliyoni leti nga evuswetini kumbe leti sikaka? Xana Xikwembu xi fanele xi voniwa nandzu hikwalaho ka sweswo? Doo! Swakudya leswi humesiwaka hi misava swi nga wundla vanhu hinkwavo swi tlhela swi sala. (Pisalema 10:2, 3; 145:16) Ndlala ni vusweti swi vangiwa hileswi ndzalo leyi Xikwembu xi hi nyikeke  yona yi nga aviwiki hi ndlela ya kona. Naswona xiphiqo lexi, a xi tlhantlheki hikwalaho ka makwanga ya vanhu.

Muvangi Lonkulu Wa Swiphiqo

Kutani, xana i mani loyi a faneleke a voniwa nandzu loko munhu a vabya kumbe a fa hikwalaho ka ku dyuhala? Xana swi nga ku hlamarisa ku tiva leswaku hambi ku ri swiphiqo sweswo a swi vangiwi hi Xikwembu? Xikwembu a xi nga vumbanga vanhu leswaku va dyuhala va tlhela va fa.

Loko mpatswa wo sungula, Adamu na Evha wu vekiwe entangeni wa Edeni, Yehovha u wu nyike ntshembo wo hanya vutomi lebyi nga heriki emisaveni leyi nga paradeyisi. Hambiswiritano, swi le rivaleni leswaku a a lava leswaku emisaveni ku tshama vanhu lava nga ta tlangela ndzhaka ya vona. Hikwalaho, u endle leswaku ntshembo wa vona wo hanya vutomi lebyi nga heriki wu va ni swipimelo. Adamu na Evha a va ta hambeta va hanya eParadeyisini ntsendze loko va yingisa Muvumbi wa vona wa rirhandzu.—Genesa 2:17; 3:2, 3, 17-23.

Khombo ra kona, Adamu na Evha va xandzukile. Evha u hlawule ku yingisa Sathana Diyavulosi. U n’wi byele vunwa a vula leswaku Xikwembu a xi n’wi tsona nchumu wun’wana lowunene. Kutani u sungule ku tilawula a ringeta ku “fana ni Xikwembu, a ta tiva leswinene ni leswo biha.” Adamu na yena u xandzukile.—Genesa 3:5, 6.

Loko Adamu na Evha va dyohile hi ndlela leyi, va tikombise va nga ha faneleki ku hanya hilaha ku nga heriki. Va langutane ni vuyelo byo biha bya xidyoho. Va heleriwe hi matimba, kutani va hetelela hi ku fa. (Genesa 5:5) Hambiswiritano, vuxandzuki bya vona byi tise vuyelo byo biha swinene. Ku ta fikela sweswi ha ha koka exilogweni hikwalaho ka vuyelo bya xidyoho xa Adamu na Evha. Muapostola Pawulo u tsarile a ku: “Leswi xidyoho xi ngheneke emisaveni hi munhu un’we [Adamu], ni rifu hikwalaho ka xidyoho, xisweswo rifu ri tlulele vanhu hinkwavo hikuva hinkwavo va dyohile.” (Varhoma 5:12) Ina, hikwalaho ka ku xandzuka ka Adamu na Evha, xidyoho ni rifu swi hangalake ku fana ni ntungu exikarhi ka vanhu hinkwavo.

Leswi Hi Khorwisaka Leswaku Xikwembu Xa Khathala

Xana sweswo swi vula leswaku munhu loyi a tumbuluxiweke hi Xikwembu u onhakele makumu? Doo, sweswo swi hi nyika vumbhoni lebyi tiyeke bya ndlela leyi Xikwembu xi khathalaka ha yona hi hina. Xitlhavelo lexikulu  lexi Xikwembu xi xi endleke i lunghiselelo ro ponisa vanhu eka xidyoho ni rifu. Hakelo leyi a yi laveka yo hi ntshunxa a ku ri vutomi lebyi hetisekeke bya Yesu lebyi a byi nyikeleke hikwalaho ka hina. (Varhoma 3:24) Xisweswo, muapostola Yohane u te: “Xikwembu xi rhandze misava swinene xi kala xi nyikela hi N’wana wa xona la tswariweke a ri swakwe, leswaku un’wana ni un’wana loyi a kombisaka ripfumelo eka yena a nga lovisiwi kambe a va ni vutomi lebyi nga heriki.” (Yohane 3:16) Hikwalaho ka rirhandzu leri hi ta tlhela hi va ni ntshembo wo hanya hilaha ku nga heriki. Pawulo u tsalele Varhoma a ku: “Hikwalaho ka xivi xin’we, hi ku fanana ni hikwalaho ka xiendlo xin’we ntsena xa ku tsetselela, vanhu va mixaka hinkwayo va vuriwa lava lulameleke vutomi.”—Varhoma 5:18.

Hi nga tiyiseka leswaku hi nkarhi lowu Xikwembu xi wu vekeke, a ku nge he vi ni ku xaniseka kumbe rifu eMisaveni. Ematshan’weni ya sweswo, ku ta va hilaha buku ya Nhlavutelo yi vuleke hakona loko yi ku: “Waswivo! Ntsonga wa Xikwembu wu le vanhwini, xi ta tshama na vona, naswona vona va ta va vanhu va xona. Xikwembu hi xiviri xi ta va na vona. Kutani xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona. Swilo swo sungula swi hundzile.” (Nhlavutelo 21:3, 4) U nga ha ku: ‘Ndzi ta va ndzi file hi nkarhi wolowo.’ Ina, sweswo swi nga endleka. Kambe hambiloko wo fa, Xikwembu xi nga ku pfuxa eku feni. (Yohane 5:28, 29) Xexo i xikongomelo xa Xikwembu hi vanhu naswona xi ta hetiseka. Ku vula leswaku Xikwembu a xi khathali hi vanhu i vunwa bya rihlaza!

“Tshinela Eka Xikwembu”

Swa khutaza ku tiva leswaku Xikwembu hi xona xi tekeke goza leswaku xi herisa swiphiqo swa vanhu. Xana ku vuriwa yini hi nkarhi wa sweswi? Xana hi nga endla yini loko hi feriwa hi loyi hi n’wi rhandzaka kumbe hi vabyeriwa hi n’wana? Phela, a wu si fika nkarhi lowu Xikwembu xi nga ta herisa mavabyi ni rifu. Bibele yi kombisa leswaku hi fanele hi yimanyana leswaku sweswo swi hetiseka. Kambe, Xikwembu a xi hi tshikanga. Mudyondzisiwa Yakobo u ri: “Tshinelani eka Xikwembu, kutani xi ta tshinela eka n’wina.” (Yakobo 4:8) Ina, Muvumbi wa hina wa hi rhamba leswaku hi va ni vuxaka bya le kusuhi na yena, naswona lava endlaka tano va swi xiya leswaku wa va seketela niloko va ri eswiyin’weni swo tika swinene.

Kutani, xana hi nga tshinela njhani eka Xikwembu? Hosi Davhida u vutise xivutiso lexi fanaka kwalomu ka magidi manharhu ya malembe lama hundzeke a ku: “Oho Yehovha, . . . i mani la nga ta tshama entshaveni ya wena yo kwetsima?” (Pisalema 15:1) Davhida u tihlamurile a ku: “Hi loyi a fambaka a nga ri na xihoxo naswona a hanyaka hi ku lulama la vulavulaka ntiyiso embilwini ya yena. A nga hlevanga hi ririmi rakwe. Nakulobye wakwe a nga n’wi endlanga nchumu xo biha.” (Pisalema 15:2, 3) Hi marito man’wana, Yehovha u amukela vanhu lava fambaka hi ndlela leyi Adamu na Evha va yi fularheleke. U tshinela eka lava va endlaka ku rhandza ka yena.—Deteronoma 6:24, 25; 1 Yohane 5:3.

Xana hi nga endla ku rhandza ka Xikwembu hi ndlela yihi? Hi fanele hi dyondza leswi nga ‘swinene ni leswi amukelekaka emahlweni ka Muponisi wa hina, ku nga Xikwembu’ kutani hi hlawula ku hanya hi swona. (1 Timotiya 2:3) Sweswo swi katsa ku nghenisa vutivi lebyi kongomeke bya Rito ra Xikwembu, ku nga Bibele. (Yohane 17:3; 2 Timotiya 3:16, 17) Bibele a hi fanelanga hi yi hlayela nawu. Hi fanele hi tekelela Vayuda va le Beriya va lembe-xidzana ro sungula lava yingiseke ku chumayela ka Pawulo. Malunghana na vona, ha hlaya: “Va amukele rito hi mapfundza lamakulu ya mianakanyo, va kambisisa Matsalwa hi vukheta siku ni siku ku vona loko swilo leswi swi ri tano.”—Mintirho 17:11.

Hilaha ku fanaka ni namuntlha, ku hlaya Bibele hi vukheta swi tiyisa ripfumelo ra hina eka Xikwembu naswona swi hi pfuna ku va ni vuxaka na xona. (Vaheveru 11:6) Swi tlhela swi hi pfuna ku yi tiva kahle ndlela leyi Yehovha a tirhisanaka ni vanhu ha yona—vanhu lava nga ni mboyamelo lowunene a va nge vuyeriwi swa xinkarhana ntsena kambe va ta kuma mikateko leyi nga heriki enkarhini lowu taka.

Anakanya hi swikombiso swi nga ri swingani swa Vakreste lava tiendleleke vuxaka na Xikwembu. Danielle wa malembe ya 16 hi vukhale u ri: “Ndzi n’wi rhandza swinene Yehovha naswona swi tele swilo leswi ndzi nga n’wi nkhensaka hikwalaho  ka swona. U ndzi nyike vatswari lava nga ni rirhandzu lava ndzi kuriseke hi Rito ra yena tanihi leswi va n’wi rhandzaka.” Mukreste wa le Uruguay u tsarile a ku: “Mbilu ya mina yi tele ku nkhensa naswona yi ndzi susumetela ku nkhensa Yehovha hikwalaho ka musa wa yena lowu nga fanelangiki ni vunghana bya yena.” Hambi ku ri vana lavatsongo, Xikwembu xa va amukela. Gabriela wa malembe ya nkombo hi vukhale u ri: “Xikwembu ndzi xi rhandza ku tlula swilo hinkwaswo emisaveni! Ndzi ni Bibele ya mina. Ndzi rhandza ku dyondza hi Xikwembu ni hi N’wana wa xona.”

Namuntlha, emisaveni hinkwayo, timiliyoni ta vanhu ti yima hi rito rin’we ti pfumelelana ni mupisalema loyi a nga te: “Ku tshinela eka Xikwembu i swinene eka mina.” (Pisalema 73:28) Ti pfuniwe ku hlangavetana ni swiphiqo leswi ti langutanaka na swona sweswi naswona ti ni ntshembo lowu tiyeke wo hanya hilaha ku nga heriki emisaveni ya Paradeyisi. (1 Timotiya 4:8) Ha yini u nga swi endli pakani ya wena ku ‘tshinela eka Xikwembu’? Hakunene, ha tiyisekisiwa: “[A xi le] kule ngopfu ni un’wana ni un’wana wa hina.” (Mintirho 17:27) Ina, Xikwembu xa khathala hi wena hakunene!

[Swifaniso leswi nga eka tluka 5]

Ndlela leyi Yehovha a khathalaka hi hina ha yona yi kombisiwa hi swiyimo swo tala

[Xifaniso lexi nga eka tluka 7]

Hambi ku ri vana lavatsongo va nga tshinela eka Xikwembu

[Swifaniso leswi nga eka tluka 7]

Namuntlha, Yehovha wa hi pfuna leswaku hi tiyisela. Hi nkarhi lowu faneleke u ta herisa mavabyi ni rifu