An Dios Nagtatagad Gud ha Imo

NATURAL la nga manginyupo ha Dios kon nanginginahanglan gud kita hin bulig. Tutal, hiya ‘daku ngan gamhanan; an iya kinaadman waray katubtoban.’ (Salmo 147:5) Hiya an pinaka-may-kapas ha pagbulig ha aton nga malamposan an aton mga problema. Gawas pa hito, gindadapit kita han Biblia nga ‘ihuwad an aton kasingkasing’ ha iya. (Salmo 62:8) Kon sugad hito an kahimtang, kay ano nga damu hinduro nga mga tawo an naabat nga diri binabaton han Dios an ira mga pag-ampo? Nangangahulogan ba ito nga diri hiya nagtatagad?

Imbes nga basulon dayon an Dios tungod han baga hin diri panginlabot, hinumdumi an panahon han bata ka pa. Han waray dayon umuyon an imo mga kag-anak ha ngatanan mo nga karuyag, gin-akusahan mo ba hira hin diri paghigugma ha imo? Damu nga mga anak an nagbubuhat hito. Kondi, han dumaku ka na, nasantop mo nga an gugma ipinapakita ha damu nga paagi ngan nga an pagtuman han ngatanan nga karuyag han bata diri gud amo an mahigugmaon nga buhaton.

Ha pariho nga paagi, kon diri pirme binabaton ni Jehova an aton mga pag-ampo ha paagi nga aton ginlalaoman, diri ito nangangahulogan nga ginbabalewaray niya kita. Ha pagkamatuod, iginpapakita han Dios an iya pagtagad ha aton ngatanan ha damu nga mga paagi.

Tungod ‘ha Iya Buhi Kita’

Siyahan ha ngatanan, tungod ha Dios nga ‘buhi kita ngan nakiwa.’ (Buhat 17:28) An paghatag ha aton hin kinabuhi sigurado nga nagpapakita han iya mahigugmaon nga pagpaid ha aton!

Dugang pa, gintatagan kita ni Jehova han aton ginkikinahanglan basi magpabilin kita nga buhi. Aton mababasa: “Nagpapaturok hiya han banwa para ha mga kabakahan, ngan urutanon tungod han paggamit han tawo; basi nga hiya makakuha hin karan-on tikang ha tuna.” (Salmo 104:14) Ha pagkamatuod, an aton Maglalarang diri la kay nagtatagana han aton simple nga mga kinahanglanon ha kinabuhi. Hura nga naghahatag hiya hin “uran tikang ha langit, ngan hin panahon nga mauswagon, nga ginpuno an [aton] mga kasingkasing hin karan-on ngan hin kalipay.”—Buhat 14:17.

Bisan pa hito, damu an bangin maghunahuna, ‘Kon hinigugma gud kita han Dios, kay ano nga tinutugotan niya nga mag-antos kita?’ Maaram ka ba han baton hito nga pakiana?

An Dios ba an Angay Basulon?

Tinuyoan an damu han pag-antos han mga tawo. Pananglitan, damu gud an maaram han mga peligro han pipira nga delikado hinduro nga mga buruhaton. Ha gihapon, an mga tawo nagbubuhat hin imoral nga pakighilawas, nagamit hin sobra nga de-alkohol nga irinmon ngan iba nga mga droga, nagamit hin tabako, nakikigbahin ha peligroso nga mga isport, nagmamaneho hin malaksi hinduro, ngan iba pa. Kon an sugad nga peligroso nga paggawi nagriresulta ha pag-antos, hin-o an sadang basulon? An Dios o an usa nga diri-maaramon an paggios? An giniyahan nga Pulong han Dios nasiring: “Ayaw kamo palimbong; an Dios diri sadang pagtiawtiawan: kay kon ano an igpugas han tawo, amo man an iya pag-aanihon.”—Galasia 6:7.

Dugang pa, agsob nga an katawohan nakakasakit ha kada tagsa. Kon nagdideklara an usa nga nasud hin girra, sigurado nga diri angay basulon an Dios ha pag-antos nga resulta hito. Kon gin-aatake han usa nga kriminal an igkasi-tuminungnong, an Dios ba an angay basulon ha anoman nga kadaot o kamatayon nga resulta hito? Syempre diri! Kon an usa nga diktador nananalumpigos, nagpapakuri, ngan nagpapatay hadton aada ha iya nasasakopan, sadang ba naton basulon an Dios? Diri ito makatadunganon.—Eklesiastes 8:9.

Kondi, kumusta man an minilyon nga nagkikinabuhi ha duro nga kakablas o adton duro nga nagugutom? An Dios ba an angay basulon? Diri. An aton urukyan nga tuna nagtatagana hin hura nga pagkaon para ha ngatanan. (Salmo 10:2, 3; 145:16) An diri-parapriho nga distribusyon han hura nga  suplay nga hatag han Dios an nagriresulta ha kaylap nga kagutom ngan kakablas. Ngan an kahakog han mga tawo nagpupugong han kasulbad hito nga problema.

An Nangunguna nga Hinungdan

Kondi, hin-o an angay basulon kon masakit o mamatay an usa tungod han kalagas? Mahipapausa ka ba ha paghibaro nga diri liwat an Dios an angay basulon tungod hito? Waray laranga han Dios an tawo basi malagas ngan mamatay.

Han iginbutang ha hardin han Eden an siyahan nga tawhanon nga mag-asawa, hira Adan ngan Eva, iginhatag ha ira ni Jehova an paglaom nga mabuhi ha waray kataposan ha paraiso ha tuna. Kondi, matin-aw nga karuyag niya nga an tuna mapuno hin mga tawo nga maapresyar han ira nakarawat. Salit, iya ginhimo nga may-kondisyon an ira paglaom nga mabuhi ha tidaraon. Mabubuhi la hira Adan ngan Eva ha Paraiso kon magigin masinugtanon hira ha ira mahigugmaon nga Maglalarang.—Genesis 2:17; 3:2, 3, 17-23.

Makasurubo, nagrebelde hira Adan ngan Eva. Pinili ni Eva nga mamati kan Satanas nga Yawa. Nagbuwa ha iya hi Satanas ngan sugad hin nagsiring nga an Dios may-ada maopay nga butang nga diri iginhahatag ha iya. Salit, nagtikang hiya hin independente nga pagkinabuhi ngan nagsari nga ‘mahinugad ha Dios, nga mag-inaramon han kaopayan ngan han karaotan.’ Pariho ha iya, nagrebelde liwat hi Adan.—Genesis 3:5, 6.

Han nakasala hira hini nga paagi, iginpakita nira Adan ngan Eva nga diri hira takos nga mabuhi ha waray kataposan. Naeksperyensyahan nira an nakakadaot nga mga resulta han sala. An ira kusog nagtikawara, ngan ha kataposan hira namatay. (Genesis 5:5) Kondi, an ira pagrebelde may-ada mas seryoso pa gud nga mga resulta. Nag-aantos pa gihapon kita han mga epekto han sala nira Adan ngan Eva. Hi apostol Pablo nagsurat: “Tungod ha usa ka tawo [Adan], sinulod an sala ha kalibotan, ngan tungod ha sala an kamatayon; ngan sugad man an kamatayon inagi ha ngatanan nga katawohan, kay an ngatanan nakasala.” (Roma 5:12) Oo, tungod han pagrebelde nira Adan ngan Eva, an sala ngan kamatayon nagsarang ha bug-os nga tawhanon nga rasa, pariho hin makamaratay nga sakit.

An Pinakamakakombinse nga Ebidensya han Pagtagad han Dios

Nangangahulogan ba ito nga an tawhanon nga mga linarang han Dios permanente na nga nadaot? Diri, ngan dinhi naabot kita ha pinakamakakombinse nga ebidensya nga an Dios nagtatagad ha aton. Igintagana han Dios an  paagi ha paglukat han katawohan tikang ha sala ngan kamatayon, nga nangahulogan nga daku an iya isasakripisyo. An halad lukat amo an hingpit nga kinabuhi ni Jesus, nga iya kinaburut-on nga iginhatag para ha aton. (Roma 3:24) Salit, hi apostol Juan nagsurat: “An Dios naghigugma gud han kalibotan, nga iya iginhatag an iya bugtong nga Anak, basi nga an ngatanan nga natoo ha iya, diri mawara, kondi mamay kinabuhi nga waray kataposan.” (Juan 3:16) Sugad nga resulta hinin bantogan hinduro nga buhat han gugma, kita may-ada na liwat paglaom nga mabuhi ha waray kataposan. Hi Pablo nagsurat ngadto ha mga taga-Roma: “Tungod ha usa nga buhat han katadongan an hatag nga waray bayad dinangat ha ngatanan nga mga tawo ngadto ha pagkamatadong han kinabuhi.”—Roma 5:18.

Makakasiguro kita nga ha itinanda nga panahon han Dios, mawawaray na pag-antos o kamatayon ha planeta nga Tuna. Lugod, an mga kahimtang nga igintagna ha libro han Pahayag matutuman na: “Kitaa, an payag han Dios aada ha mga tawo, ngan mag-uukoy hiya upod nira, ngan hira magigin iya katawohan, ngan an Dios ha iya ngahaw maupod man ha ira, ngan magigin ira Dios: ngan pagpapahiron niya an ngatanan nga luha tikang ha ira mga mata; ngan mawawaray na kamatayon; ngan mawawaray na an kabidoan, bisan pagtangis, bisan kasakit pa gud: kay an siyahan nga mga bagay nag-agi na.” (Pahayag 21:3, 4) Bangin ka sumiring, ‘Patay na ako kon mahitabo ito.’ Kondi, ha totoo la, bangin buhi ka pa hito nga panahon. Ngan bisan kon mamatay ka, mahimo ka banhawon han Dios tikang ha mga patay. (Juan 5:28, 29) Ito an katuyoan han Dios para ha aton, ngan ito an mahitatabo. Sayop gud an pagsiring nga diri nagtatagad an Dios ha katawohan!

“Magin Duok Kamo ha Dios”

Nakakaliaw an paghibaro nga gintikangan na han Dios an magpapadayon, permanente nga solusyon ha problema nga pag-antos han mga tawo. Kondi, kumusta man yana? Ano an aton mahihimo kon mamatayan kita hin hinigugma o magkasakit an aton anak? Bueno, diri pa yana an panahon han Dios ha pagwara han sakit ngan kamatayon. Ipinapakita han Biblia nga kinahanglan maghulat na la kita hin gutiay nga panahon ngada ha kasulbad hito. Kondi diri kita pinapabay-an han Dios. Hi disipulo Jakobo nagsiring: “Magin duok kamo ha Dios, ngan hiya magigin duok ha iyo.” (Jakobo 4:8, NW) Oo, ginhahangyo kita han aton Maglalarang nga magkaada duok nga personal nga relasyon ha iya, ngan adton may-ada duok nga relasyon ha Dios pirme naabat han iya suporta bisan ha pinakamakuri nga mga kahimtang.

Kondi, paonan-o kita magigin duok ha Dios? Mga tulo ka milenyo na an naglabay, hi Hadi David nagbangon hin pariho hito nga pakiana, nga nasiring: “Jehova, . . . hin-o ba an magpupuyo dida ha imo baraan nga tayod?” (Salmo 15:1) Ginbaton ni David an iya kalugaringon nga pakiana han nagpadayon hiya ha pagsiring: “An naglalakat hin hingpit, ngan nagbubuhat ha katadongan, ngan nagyayakan hin kamatuoran ha iya kasingkasing; an diri magbubutang-butang pinaagi han iya dila, ngan diri nagbubuhat hin maraot ha iya sangkay.” (Salmo 15:2, 3) Ha iba nga pagkayakan, gin-aabiabi ni Jehova adton nasunod ha pamaagi nga iginsalikway nira Adan ngan Eva. Nagigin duok hiya ngada hadton nagbubuhat han iya kaburut-on.—Deuteronomio 6:24, 25; 1 Juan 5:3.

Paonan-o naton mabubuhat an kaburut-on han Dios? Kinahanglan naton hibaroan an “maopay ngan karuruyagon ha atubangan han Dios nga aton Manluluwas,” ngan katapos, pilion an pagbuhat uyon hito. (1 Timoteo 2:3) Nahiuupod hito an pagkuha hin husto nga kahibaro mahitungod ha Pulong han Dios, an Biblia. (Juan 17:3; 2 Timoteo 3:16, 17) Diri igo an basta pagbasa la han Biblia. Kinahanglan naton subaron an siyahan-siglo nga mga Judio ha Berea nga nakabati han pagsangyaw ni Pablo. Mahitungod ha ira, aton mababasa: “Hira nagkarawat han pulong hin bug-os nga kaabtik, ngan ha adlaw-adlaw ira gin-usisa an Santos nga Surat, kon ini nga mga bagay amo an kamatuoran.”—Buhat 17:11.

Sugad man yana, an maopay nga pag-aram han Biblia nagpaparig-on han aton pagtoo ha Dios ngan nabulig ha aton nga magpatubo hin duok nga relasyon ha iya. (Hebreo 11:6) Binubuligan liwat kita hito nga hisabtan kon ano gud an paagi han pagtrato ni Jehova ha katawohan—diri la para ha temporaryo nga mga kapulsanan kondi labi na para ha nagpapadayon nga kaopayan han ngatanan nga may-ada husto nga disposisyon.

Tagda an mga kapahayagan han pipira nga mga Kristiano nga may-ada duok nga relasyon ha Dios. “Hinigugma ko gud hi Jehova, ngan damu hinduro an angay ko pasalamatan ha iya,” siring han 16-anyos  nga hi Danielle. “Gintagan niya ako hin mahigugmaon nga mga kag-anak nga may-ada putli nga gugma ha iya ngan nagtutdo ha akon uyon ha iya Pulong.” Usa nga Kristiano ha Uruguay an nagsurat: “An akon kasingkasing puno hin apresasyon, ngan naaaghat ako ha pagpasalamat kan Jehova tungod han iya diri-takos nga pagkabuotan ngan han iya pakigsangkay.” Gin-aabiabi han Dios bisan an kabataan pa hinduro. An 7-anyos nga hi Gabriela nasiring: “Hinigugma ko an Dios labaw ha bisan ano ha bug-os nga kalibotan! May-ada ako kalugaringon nga Biblia. Naruruyag ako mahibaro mahitungod ha Dios ngan han iya Anak.”

Yana nga panahon, minilyon ha bug-os nga kalibotan an bug-os-kasingkasing nga nauyon ha salmista nga nagsiring: “Maopay ito ha akon nga pumahirani ako ngadto ha Dios.” (Salmo 73:28) Nabuligan hira nga malamposan an mga problema nga ira gin-aatubang yana, ngan may-ada hira han sigurado nga paglaom nga mabuhi ha Paraiso nga tuna ha waray kataposan. (1 Timoteo 4:8) Kay ano nga diri mo himoon nga tumong an “magin duok ha Dios”? Ha pagkamatuod, ginpapasarig kita nga: “Hiya diri hirayo ha tagsatagsa ha aton.” (Buhat 17:27) Oo, an Dios nagtatagad gud ha imo!

[Mga Retrato ha pahina 5]

An pagtagad ni Jehova ha aton nakikita ha damu nga mga paagi

[Retrato ha pahina 7]

Bisan an kabataan mahimo magin duok ha Dios

[Mga Retrato ha pahina 7]

Yana nga panahon, binubuligan kita ni Jehova nga makailob. Ha itinanda nga panahon, iya wawad-on an sakit ngan kamatayon