Estorya nin Buhay

Sarong Nakakakontentong Buhay sa Ibong nin mga Kamondoan

ISINAYSAY NI AUDREY HYDE

Sa paggirumdom kan labing 63 na taon sa bilog na panahon na ministeryo​—59 sa opisina prinsipal kan Mga Saksi ni Jehova​—masasabi ko na nagin nakakakontento an buhay ko. Totoo, nakakapanluya nin biyo na maheling an enot kong agom na luway-luway na nagagadan sa kanser asin an ikaduwa na nagdudusa huli sa makatatakot na marhay na mga epekto nin helang na Alzheimer’s. Alagad togoti nindo akong isaysay saindo kun paano ko napagdanay an sakong kagayagayahan sa ibong kan mga kalamidad na ini.

NAGDAKULA ako sa sarong oma na harani sa sadit na banwaan nin Haxtun sa kaplanodohan nin amihanan-sirangan na Colorado, harani sa linderos nin Nebraska. Ikalima ako sa anom na aki ni Orille asin Nina Mock. Si Russell, Wayne, Clara, asin Ardis namundag sa pag-oltanan nin 1913 asin 1920, asin ako kan suminunod na taon. Si Curtis namundag kan 1925.

Kan 1913, si Nanay nagin Estudyante sa Biblia, an apod kaidto sa Mga Saksi ni Jehova. Pag-abot nin panahon, kami gabos sa pamilya nagsurunod na man.

Sarong Nakakarahay na Buhay sa Kaplanodohan

Si Tatay mapag-isip nin bagong mga bagay. Igwa na kami kaidto nin de-koryenteng mga ilaw sa gabos na edipisyo sa samong oma, bagay na bihira nanggad kan mga aldaw na idto. Igwa man kami kan mga produkto na sa parate makukua sa oma​—mga sogok kan sadiri ming mga manok, saka gatas, krema, asin mantikilya hale sa sadiri ming mga baka. Mga kabayo an ginagamit mi sa pag-arado kan oma asin nagtanom kami nin mga strawberry asin patatas, siring man nin trigo asin mais.

 Naniniwala si Tatay na kami gabos na aki maninigong makanood na magtrabaho. Dawa kaidtong bago pa ako mag-eskuela, sinanay na akong magtrabaho sa oma. Narurumdoman ko kaidto an mga aldaw kun tig-init mantang balad-balad sa saldang, na nag-aasada nin haralawig na mga raya-raya sa samong tatamnan. ‘Makakaabot pa daw ako sa poro kan raya?’ sa boot-boot ko sana. Entero akong ginagaranot, asin kinakagat ako nin mga alimbubuyog. May beses na naheherak ako sa sakong sadiri huli ta an ibang mga aki dai kaipuhan na magtrabaho nin siring kagabat kan ginigibo mi. Pero an totoo, kun ginigirumdom ko an panahon kan aki pa ako, nagpapasalamat ako na tinokdoan kami na magtrabaho.

Gabos kami may asignasyon. Si Ardis mas matibay maggatas nin mga baka kisa sako, kaya an trabaho ko maglinig kan mga kuadra sa kamalig, na nagpapala nin odo. Pero, may panahon man kami na mag-oroogma asin magkawat. Kami ni Ardis nagkakawat nin sopbol kaiba nin sarong lokal na grupo nin parakawat. Ako an nagpi-pitcher, o bantay sa ikatolong base, asin si Ardis an bantay sa enot na base.

Magayonon an maaliwalas na kalangitan kun banggi sa kaplanodohan. An rinibong bitoon nagpagirumdom sa sako kan satong Kaglalang, si Jehova Dios. Dawa kaidtong aki pa, nagsasabong sa isip ko an Salmo 147:​4, na nagsasabi: “Saiyang [si Jehova] sinusuma an kabilangan kan mga bitoon; sinda gabos inaapod nia sa saindang ngaran.” Dakol na beses sa maaliwalas na mga bangging ini, pinapadatol kan samong ayam, si Judge, an saiyang payo sa sakong tabay asin dai nia ako binabayaan. Sa parate nagtutukaw ako sa samong beranda kun hapon asin maogmang pinagmamasdan an kaomahan nin berdeng trigo mientras na minahuyop dian an doros, na nagpapangyari na iyan magin kolor pirak sa liwanag kan saldang.

An Marahayon na Halimbawa ni Nanay

An sakong ina sarong dusay nanggad na agom na babae. Si Tatay pirmeng iyo an payo kan pamilya, asin tinokdoan kami ni Nanay na igalang sia. Kan 1939 sia nagin saro na man sa Mga Saksi ni Jehova. Aram mi na namomotan kami ni Tatay minsan ngani pinapatrabaho nia kami nin magabat asin dai kami ginibong senyorito o senyorita. Sa parate kun tiglipot iginagayak nia an duwang kabayo asin ipinapasyar kami sakay nin paguyod. Kanigoan kan kaogmahan mi sa nagkikinang na niebe!

Minsan siring, si Nanay an nagtokdo sa samo na kamotan an Dios asin igalang an Biblia. Nanodan niamo na Jehova an ngaran nin Dios asin na sia an Burabod nin buhay. (Salmo 36:9; 83:18) Nanodan mi man na tinawan nia kita nin mga susundan, bakong tanganing halean kami nin kagayagayahan, kundi pakinabangon kami. (Isaias 48:17) Pirmeng idinodoon samo ni Nanay an bagay na may espesyal na gibohon kami na dapat gibohon. Nanodan mi na sinabihan ni Jesus an saiyang mga parasunod: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na  nasyon; dangan madatong an katapusan.”​—Mateo 24:14.

Kan ako aki pa, pagpuli ko hale sa eskuelahan asin mayo sa harong an sakong ina, hinahanap ko sia. Sarong beses, kan ako mga sais o siete anyos, nanompongan ko sia sa kamalig. Dangan uminoran nin grabe. Nasa itaas na kabtang kami kan kamalig, asin hinapot ko sia kun mapaabot giraray nin Baha an Dios. Sinierto nia sako na nanuga an Dios na dai na nia noarin man lalaglagon an daga paagi sa delubyo. Nagigirumdoman ko man na dakol na beses akong nagdadalagan pasiring sa bodega sa sirong tanganing magpahipli, mantang ordinaryo na sana an buwawi.

Dawa kaidtong bago ako mamundag, nakikikabtang na si Nanay sa paghuhulit. Nagtitiripon an sarong grupo sa samong harong, na gabos may paglaom na mabuhay kaiba ni Cristo sa langit. Minsan ngani masakit para ki Nanay an paghuhulit sa harong-harong, dinaog kan saiyang pagkamoot sa Dios an saiyang takot. Sia maimbod sagkod na sia magadan, kan Nobyembre 24, 1969, kan sia 84 anyos. “Nanay, maduman ka sa langit, asin makakaibanan nindo an mga midbid nindo,” an ihininghing ko sa saiyang talinga. Kanigoan an kaogmahan ko na makaiba si Nanay kaidto asin sabihon man sa saiya an sakong kompiansa! Maluway niang sinabi, “Marahayon ka sako.”

Nagpoon Kaming Maghulit

Kan 1939, nagin payunir si Russell, an apod sa bilog na panahon na mga ebanghelisador na kabilang sa Mga Saksi ni Jehova. Nagpayunir sia sa Oklahoma asin Nebraska sagkod kan 1944 kan sia apodon tanganing maglingkod sa pankinaban na opisina prinsipal kan Mga Saksi ni Jehova (an apod Bethel), sa Brooklyn, Nueva York. Nagpoon akong magpayunir kan Setyembre 20, 1941, asin naglingkod sa laen-laen na lugar sa Colorado, Kansas, asin Nebraska. Maogma an mga taon na idto nin pagpapayunir bako sanang huli ta natatabangan ko an iba na makanood manongod ki Jehova kundi huli ta nanodan ko man na magsarig sa saiya.

Haros kadungan kan panahon na nagpoon si Russell na magpayunir, si Wayne, nasa kolehio sa sirangan na baybayon pakatapos na magtrabaho nin sekular sa laog nin dikit na panahon. Kan huri, inimbitaran sia sa Bethel. Naglingkod sia nin harohalawig na panahon sa Kingdom Farm, harani sa Ithaca, Nueva York. Duman pinoprodusir an kakanon para sa sadit na pamilya na nagtatrabaho sa oma siring man para sa mga 200 na nagtatrabaho sa Bethel sa Brooklyn. Ginamit ni Wayne an saiyang mga abilidad asin eksperyensia sa paglilingkod ki Jehova sagkod sa saiyang kagadanan kan 1988.

An sakong tugang na si Ardis naagom ni James Kern, asin nagkaigwa sinda nin limang aki. Nagadan sia kan 1997. An saro ko pang tugang, si Clara, nagdadanay na maimbod ki Jehova sagkod ngonyan, asin kun ako bakasyon dinadalaw ko pa sia sa saiyang harong sa Colorado. An kangudhan ming tugang na lalaki, si Curtis, naglaog sa Bethel sa Brooklyn sa kabangaan nin mga taon nin 1940. Sarong trak an minamaneho nia kaidto nin balikan sa Kingdom Farm na may kargang manlaenlaen na suplay asin produkto. Dai sia nag-agom, asin nagadan sia kan 1971.

An Sakong Kamawotan​—Paglilingkod sa Bethel

Mas naenot na luminaog sa Bethel an sakong matuang mga tugang na lalaki, asin mawot ko man kaidtong maglingkod duman. Sierto ko na an saindang marahay na halimbawa  an dahelan na ako naimbitaran. An paghinanyog sa sakong ina na nag-eestorya manongod sa kasaysayan kan organisasyon nin Dios asin an pakaheling ko mismo kan kaotoban kan mga hula sa Biblia may labot sa huring mga aldaw an nagkultibar sa sako nin kamawotan na maglingkod sa Bethel. Nanuga ako ki Jehova sa pamibi na kun totogotan nia akong maglingkod sa Bethel, dai ako noarin man mahale apuera sana kun magkaigwa ako nin Kristianong mga paninimbagan na dapat asikasohon.

Nagdatong ako sa Bethel kan Hunyo 20, 1945, asin inasignaran akong magtrabaho bilang paralinig. Kaipuhan kong linigan aroaldaw an 13 kuarto, na may 26 na kama, apuera sa mga pasilyo, hagyanan, asin bintana. Magabat an trabaho. Sa kada aldaw mantang nagtatrabaho, pirme kong sinasabi sa sakong sadiri, ‘Totoo, ika pagal, alagad yaon ka sa Bethel, an harong nin Dios!’

Durante kan enot na kabtang kan sakong paglilingkod sa Bethel, may nangyari sako na makasusupog na marhay. Huling nagdakula sa baryo, dai ko aram na an dumbwaiter sarong sadit na elebeytor na kinakargahan nin mga suplay paghale sa sarong eskalon pasiring sa ibang eskalon. Bueno, sarong aldaw sinimbag ko an sarong apod sa telepono mantang nasa trabaho na nakikiolay, “Pababaon mo tabi an dumbwaiter.” Biglang ibinaba kan nag-apod an telepono, kaya dai ko aram kun ano an gigibohon ko. Alagad nagirumdoman ko na an saro sa mga tugang na lalaki na nag-iistar sa eskalon na idto na kaiba sa nakaasignar na linigan ko sarong weyter. Kaya nagtoktok ako sa saiyang pinto asin sinabihan ko sia, “Bumaba ka daa sa kusina.”

Naagom ni Nathan Knorr

Poon kan mga taon nin 1920, an mga Bethelite na gustong mag-agom kinakaipuhan na maghale sa Bethel asin maglingkod sa intereses kan Kahadean sa ibang lugar. Alagad kan enot na mga taon nin 1950, an nagkapirang magkailusyon na nakapaglingkod na sa Bethel sa laog nin harohalawig na panahon tinogotan na magpakasal asin magdanay. Kaya kan si Nathan H. Knorr, na iyo an nangengenot kaidto sa pambilog na kinaban na gibohon na pan-Kahadean, nagpaheling nin interes sako, sa isip ko, ‘Uya an saro na magdadanay!’

Dakol an paninimbagan ni Nathan sa pangangataman kan pambilog na kinaban na aktibidad kan Mga Saksi ni Jehova. Kaya sia onestong marhay sako, na tinatawan ako nin dakol na dahelan kun taano ta maninigo akong mag-isip nin maingat bago ko akoon an saiyang alok na kasal. Kan mga panahon na idto, dakol na beses siang nagbibiahe tanganing dalawon an mga sangang opisina kan Mga Saksi ni Jehova sa bilog na kinaban asin sa parate mayo sia sa laog nin dakol na semana. Kaya ipinaliwanag nia na may mga panahon na magkakasuwayan kami nin halawig.

Kan ako hoben pa, pangarap kong ikasal sa panahon nin tigsoli asin mag-honeymoon sa mga isla nin Pasipiko sa Hawaii. Bueno, ikinasal kami sa tiglipot, kan Enero 31, 1953, asin nag-honeymoon kami kan Sabadong hapon asin Domingo sa New Jersey. Kan Lunes nagtrabaho na kami. Minsan siring, pakalihis nin sarong semana, nag-honeymoon kami sa laog nin sarong semana.

 Sarong Mahigos na Kadamaydamay

Si Nathan 18 anyos kan dumatong sa Bethel kan 1923. Nakakua sia nin mahalagang pagsasanay hale sa mga haloyan na arog ni Joseph F. Rutherford, na nangenot sa gibohon kan mga Saksi, asin sa manedyer sa imprentahan na si Robert J. Martin. Pagkagadan ni Tugang na Martin kan Setyembre 1932, si Nathan an nagin manedyer sa imprentahan. Kan suminunod na taon, iiniba ni Tugang na Rutherford si Nathan kan dalawon nia an mga sangang opisina kan Mga Saksi ni Jehova sa Europa. Kan Enero 1942 pagkagadan ni Tugang na Rutherford, si Nathan an tinawan nin paninimbagan na mangataman sa pambilog na kinaban na gibohon kan Mga Saksi ni Jehova.

Si Nathan abanteng marhay an isip, na pirmeng nagpaplano nin amay pa para sa pag-oswag sa ngapit. Para sa nagkapira bako ining tama, huling sinasabi na haranihon na an katapusan kan sistemang ini nin mga bagay. Sa katunayan, an sarong nakaheling kan mga plano ni Nathan naghapot saiya: “Ano ini, Tugang na Knorr? Ano, mayo kang pagtubod?” Nagsimbag sia: “Iyo, may pagtubod ako, alagad kun dai tolos dumatong an katapusan siring sa linalaoman ta, magigin andam kita.”

An sarong ideya na partikularmenteng kombensidong marhay si Nathan iyo an pag-establisar nin sarong paadalan para sa mga misyonero. Sa siring, kan Pebrero 1, 1943, pinonan an sarong paadalan para sa pagmimisyonero sa dakulang Kingdom Farm na duman naglilingkod kaidto an sakong tugang na si Wayne. Minsan ngani an paadalan igwa nin sigidong kurso nin pag-adal sa Biblia sa laog nin mga limang bulan, sinierto ni Nathan na magkaigwa man nin pag-aling-aling an mga estudyante. Durante kan enot na mga klase, nakikiayon sia sa mga karawat nin bola, alagad kan huri dai na sia nagkakawat sa takot na maerido na tibaad magin dahelan na dai sia makaatender sa pandistritong mga kombension sa tig-init. Pinili na sana niang magreperi. Naoogmang marhay an mga estudyante kun hayagan niang binabago an mga reglamento apabor sa mga dayong estudyante na nagkakawat.

Mga Pagbiahe Kaiba ni Nathan

Pag-abot nin panahon, nagpoon akong magbiahe sa ibang nasyon kaiba ni Nathan. Ikinaogma kong mag-estorya nin mga eksperyensia sa mga boluntaryo sa mga sangang opisina asin misyonero. Personal kong naheling an saindang pagkamoot asin debosyon, asin nakanood ako manongod sa saindang mga rutina asin kamugtakan sa pamumuhay sa saindang nasyon na nadestinohan. Sa nag-aging mga taon, padagos akong nakakaresibi nin mga surat na nagpapahayag nin pag-apresyar sa siring na mga pagdalaw.

Sa pagpensar kan samong mga pagbiahe, dakol akong nagigirumdoman na eksperyensia. Halimbawa, kan kami dumalaw sa Polandia, may duwang tugang na babae na naghihinghingan sa atubangan ko. Hinapot ko sinda, “Taano ta naghihinghingan kamo?” Naghagad sinda nin dispensasyon, na nagpapaliwanag na natuod na sindang maghiringhingan kan an gibohon kan Mga Saksi ni Jehova prohibido pa kaidto sa Polandia asin an saindang harong linagan nin nakatagong mga mikropono.

Si Tugang na Adach saro sa dakol na naglingkod durante kan pagprohibir sa Polandia. Kurong an buhok nia na may bangs. Sarong beses itinaas nia an saiyang bangs asin ipinaheling sako an sarong hararom na pinilaan, na resulta kan paghampak nin sarong paralamag. Nabigla ako kan maheling ko mismo an mga resulta kan maringis na pagtratar na kinaipuhan na tagalan kan satong mga tugang na lalaki asin babae.

Panduwa sa Bethel, an paborito kong lugar iyo an Hawaii. Narurumdoman ko an kombension duman sa siudad nin Hilo kan 1957. Saro idtong dakulang okasyon, asin an mga nag-atender mas dakol kisa total na kabilangan kan lokal na mga Saksi. Tinawan pa ngani kan alkalde si Nathan kan liabe sa siudad. Dakol an nagdatong tanganing taratarahon kami, na sinusulotan kami nin mga burak.

An saro pang nakakaogmang kombension iyo an sa Nuremberg, Alemania, kan 1955, na ginibo sa lugar na dating tiriponan para sa parada kan tropa ni Hitler. Aram na  marhay na nagsumpa si Hitler na popohoon an banwaan ni Jehova sa Alemania, alagad ngonyan an istadyum na ini pano nin mga Saksi ni Jehova! Dai ko mapogolan na mapaluha. Dakulaon an plataporma asin igwa nin nakakagulat na 144 darakulang harigi sa likod. Nasa entablado ako asin natatanaw ko an kadakol na nagdadangog na labing 107,000. Harayoon na an nasa hurihan kaya dai ko na haros maheling an ultimong raya.

Namatean mi an integridad kan mga tugang na Aleman asin an kosog na inako ninda hale ki Jehova durante kan sinda lamagon sa irarom kan pamamahalang Nazi. Pinakosog kaiyan an determinasyon mi na magin maimbod asin papagdanayon an samong integridad ki Jehova. Si Nathan an nagtao kan pantapos na pahayag, asin sa katapusan kaiyan, nagbabay sia sa mga nagdadangog. Tolos-tolos sindang nagsimbag paagi sa pagpaypay kan saindang mga panyo bilang paaram. Iyan garo sarong magayon na langtad nin mga burak.

Memorable man an samong pagdalaw sa Portugal kan Disyembre 1974. Kaiba kami sa mga nag-atender sa enot na pagtiripon kan mga Saksi sa Lisbon pakatapos na legalisaron an satong paghuhulit. Prohibido iyan sa laog nin 50 taon! Minsan ngani 14,000 sana an parahayag kan Kahadean sa nasyon kan panahon na idto, labing 46,000 an presente sa ginibong duwang pagtiripon. Napaluha ako kan sabihon kan mga tugang: “Dai na niato ngonyan kaipuhan na magtago. Talingkas na kita.”

Poon kan mga aldaw na nagbibiahe kami ni Nathan sagkod ngonyan, ikinakaogma ko an impormal na paghuhulit​—sa mga eroplano, sa mga restawran​—asin an paghuhulit sa tinampo. Pirme akong nagdadara nin literatura tanganing magin andam ako. Sarong beses kan hinahalat mi an pag-abot nin naatrasong eroplano, naghapot sako an sarong babae kun saen ako nagtatrabaho. Huli kaiyan nakaolay ko sia asin an iba pang nasa palibot mi na nagdadangog. An paglilingkod sa Bethel asin an sakong paghuhulit an nagpadanay sako na pirmeng sibot asin maogmahon.

Paghelang Asin Huring Pagparigon sa Boot

Kan 1976, si Nathan nagkahelang nin kanser, asin ako, kaiba an mga tawohan sa Bethel, nagtabang saiya na makayanan iyan. Sa ibong kan saiyang nagluluyang salud, iniimbitaran mi sa samong kuarto an manlaenlaen na miembro kan mga sangang opisina sa bilog na kinaban na yaon kaidto sa Brooklyn para sa pagsasanay. Narurumdoman ko an pagbisita ni Don asin Earlene Steele, Lloyd asin Melba Barry, Douglas asin Mary Guest, Martin asin Gertrud Poetzinger, Pryce Hughes, asin dakol pang iba. Sa parate iineestorya ninda samo an nagkapirang eksperyensia hale sa saindang nasyon. Hinangaan ko espesyalmente an mga eksperyensia dapit sa karigonan kan satong mga tugang na nasa irarom nin pagprohibir.

Kan marealisar ni Nathan na madali na siang magadan, tinawan nia ako nin marahay na sadol tanganing tabangan akong makayanan an pagkabalo. Sinabi nia: “Nagin maogma an satong pag-agoman. Dakol na tawo an dai noarin man nakaeksperyensia kaiyan.” An sarong bagay na nagpaogma sa samong pag-agoman iyo an pagkamaginirumdom ni Nathan. Halimbawa, kun dakol kaming nakakatagbo sa samong mga pagbiahe, sinasabi nia sako: “Audrey, kun may beses na dai ko sinda ipinapamidbid saimo, iyan huli ta nalingawan ko an ngaran ninda.” Ikinaogma ko nanggad na sinasabi nia iyan sako antes pa.

Ipinagirumdom sako ni Nathan: “Pagkagadan, an satong paglaom segurado, asin dai na kita noarin man giraray mag-aagi nin kolog.” Dangan sinadol nia ako: “Magtanaw ka sa ngapit, huli ta duman mo makukua an saimong balos. Dai mo pagparaisipon an nakaagi​—minsan ngani pirmeng yaon an saimong mga rekuerdo. An paglihis nin panahon matabang saimo na maulian. Dai ka magsentir asin dai mo kaherakan an saimong sadiri. Maogma ka na nakamtan mo an mga kagayagayahan asin bendisyon na ini. Paghaloyhaloy, mamamatean mo na an mga rekuerdo nagtatao saimo nin kagayagayahan. An mga rekuerdo regalo nin Dios sato.” Idinagdag nia: “Magdanay kang sibot​—hingoahon mong gamiton an saimong buhay sa paggibo nin kapakipakinabang para sa iba. Matatabangan ka kaining makanompong nin kagayagayahan sa buhay.” Sa kahurihurihi, kan Hunyo 8, 1977, natapos an buhay ni Nathan digdi sa daga.

 Naagom ni Glenn Hyde

Sinabi sako ni Nathan na puede akong mabuhay sa pagparagirumdom kan nakaagi o na puede akong magkaigwa nin bagong buhay. Kaya kan 1978, pakabalyo ko sa Watchtower Farms sa Wallkill, Nueva York, nagpakasal ako ki Glenn Hyde, sarong guapohon, toninong, asin maboot na tawo. Bago sia nagin Saksi, naglingkod sia sa Hukbong-Dagat kan an Estados Unidos nakikiguerra kaidto sa Hapon.

Si Glenn nasa barkong PT (patrol torpedo) kaidto asin nakaasignar sa kuartong kinamumugtakan kan makina. Huli sa ribok kan makina, medyo nawaran sia nin pandangog. Pakatapos kan guerra, sia nagin bombero. Dakol na taon siang binabangungot huli sa mga inagihan nia sa guerra. Nanodan nia an katotoohan sa saiyang sekretarya, na naghulit saiya sa impormal na paagi.

Kan huri, kan 1968, inapod si Glenn sa Bethel tanganing maglingkod bilang bombero sa Brooklyn. Dangan, kan an Watchtower Farms magkaigwa nin trak nin bombero, ibinalyo sia duman kan 1975. Pag-abot nin panahon, nagkaigwa sia nin helang na Alzheimer’s. Pakatapos nin sampulong taon na kami nagin mag-agom, nagadan si Glenn.

Paano ko iyan nakayanan? An kadonongan na itinao sako ni Nathan kan aram na nia na madali na siang magadan nakaranga liwat sako. Padagos kong binabasa an isinurat nia sako manongod sa pag-atubang sa pagigin balo. Sagkod ngonyan sinasabi ko an mga tataramon na ini sa iba na nagadanan nin agom, asin sinda nararanga man kan sadol ni Nathan. Iyo, marahay na magtanaw sa ngapit siring kan inenkaminar niang gibohon ko.

Sarong Mahalagang Marhay na Kasararoan nin Magturugang

An espesyalmenteng nakakontribwir sa sakong maogma, nakakakontentong buhay iyo an mahal na mga katood sa pamilyang Bethel. Partikular na si Esther Lopez, na naggradwar kan 1944 sa ikatolong klase kan Paadalan sa Biblia kan Watchtower sa Gilead. Nagbalik sia sa Brooklyn kan Pebrero 1950 tanganing maglingkod bilang paratradusir kan satong mga babasahon sa Biblia sa Kastila. Sa parate kun nasa biahe kaidto si Nathan, si Esther an sakong dayupot na kaibaiba. Sia nasa Watchtower Farms man. Ngonyan na mga 95 anyos na, nagluluya na an saiyang salud asin inaataman sa samong impirmarya.

Sa pinakaharani kong kapamilya, si Russell asin Clara na sana an buhay. Si Russell labing 90 anyos na asin maimbod na naglilingkod sa Bethel sa Brooklyn. Kabilang sia sa mga enot na tinogotan na magdanay sa Bethel pakatapos mag-agom. Kan 1952, pinakasalan nia an kapwa Bethelite na si Jean Larson. An tugang ni Jean na si Max nag-abot sa Bethel kan 1939 asin iyo an suminalida ki Nathan bilang paraataman sa imprentahan kan 1942. Padagos pang ginigibo ni Max an mga paninimbagan sa Bethel, kaiba an pagtabang sa pag-asikaso sa saiyang mahal na agom, si Helen, na may helang na multiple sclerosis.

Sa paggirumdom kan nakaaging 63 na taon sa bilog na panahon na paglilingkod ki Jehova, masasabi ko na talagang nagin nakakakontento an buhay ko. An Bethel an nagin harong ko, asin padagos akong naglilingkod digdi na magayagaya an puso. Utang ko sa sakong mga magurang an pagtadom sa samo kan kahalagahan nin pagtrabaho asin an pagmawot na paglingkodan si Jehova. Alagad an nagpapangyari talaga na magin nakakakontento an buhay iyo an satong marahayon na kasararoan nin magturugang asin an paglaom na mabuhay kaiba an satong mga tugang na lalaki asin babae sa sarong paraisong daga, na naglilingkod sa satong Kaharohalangkaweng Kaglalang, an iyo sanang tunay na Dios, si Jehova, sa bilog na panahon na daing sagkod.

[Ritrato sa pahina 24]

An sakong mga magurang kan kasal ninda kan Hunyo 1912

[Ritrato sa pahina 24]

Wala patoo: Si Russell, Wayne, Clara, Ardis, ako, asin si Curtis kan 1927

[Ritrato sa pahina 25]

Nakatindog sa pag-oltanan ni Frances asin Barbara McNaught, mantang nagpapayunir kan 1944

[Ritrato sa pahina 25]

Sa Bethel kan 1951. Poon sa wala patoo: Ako, si Ester Lopez, asin an sakong hipag, si Jean

[Ritrato sa pahina 26]

Kaiba si Nathan asin an saiyang mga magurang

[Ritrato sa pahina 26]

Kaiba si Nathan kan 1955

[Ritrato sa pahina 27]

Kaiba si Nathan sa Hawaii

[Ritrato sa pahina 29]

Kaiba an sakong ikaduwang agom, si Glenn