Storia di Bida

Un Bida Cu A Duna Mi Satisfaccion Apesar di Tristesa

SEGUN E RELATO DI AUDREY HYDE

Recordando e 63 añanan cu mi a pasa den sirbishi di tempo completo—di cua 59 aña na e cede mundial di Testigonan di Yehova—mi por bisa cu mi tawatin un bida cu a duna mi satisfaccion. Ta berdad si cu tawata masha doloroso pa mi para wak mi prome casa muri lentamente di cancer y mi di dos casa sufri di e efectonan teribel di malesa di Alzheimer. Pero laga mi conta bo con mi a mantene mi goso apesar di e calamidadnan aki.

MI A lanta riba un boerderij serca di e pueblito Haxtun riba e sabananan extenso den parti nortost di Colorado, pega cu e frontera di Nebraska. Mi mayornan, Orille cu Nina Mock, tawatin seis yiu, y ami tawata e di cinco yiu. Russell, Wayne, Clara y Ardis a nace entre 1913 y 1920, y ami a nace e siguiente aña. Curtis a nace na 1925.

Na 1913, Mama a bira un Studiante di Bijbel, manera nan tawata yama Testigonan di Yehova e tempo ei. Cu tempo, nos tur den e famia tambe a bira Testigo.

Un Bida Sano den Sabana

Tata tawata masha habri pa ideanan nobo. Nos tawatin lus di coriente den tur nos edificionan riba e boerderij, algo cu casi bo no tawata mira e tempo ei. Tambe nos a disfruta di e productonan comun di bida di cunucu: webo di nos propio galiñanan, y lechi, crema y manteca di nos propio bacanan. Nos a uza cabai pa ara e tera y nos a planta strawberry, batata, y tambe trigo cu maishi.

Tata tawata di opinion cu tur su yiunan mester siña traha. Prome cu mi a cuminsa bai  scol mes, ya nan a siña mi traha den cunucu. Mi ta corda con den zomer, den solo cayente, mi tawatin cu chapi yerba for di canalnan largo den nos hofi. Mi tawata puntra mi mes: ‘Ta ki dia mi ta yega na fin di e canal?’ Sodo tawata core na mi lomba, y abeha tawata pica mi. Tin biaha mi tawata sinti duele di mi mes pasobra otro muchanan no tawatin cu traha dje duro manera nos. Pero en realidad, ora mi wak bek riba mi infancia, mi ta gradicido cu mi mayornan a siña nos traha.

Nos tur tawatin tarea pa haci. Ardis por a hala lechi miho cu mi, pesei mi trabou tawata pa limpia stal di e cabainan, y saca e mest pafo. Sinembargo, nos a pasa pret tambe y tawata hunga wega. Ami cu Ardis a hunga den un team local di softball. Ami tawata picha of hunga tercera base, anto Ardis tawata hunga primera base.

Anochi riba e sabananan extenso, e shelo sin nubia tawata masha bunita mes. E miles di streyanan cu bo por a mira a laga mi corda riba nos Creador, Yehova Dios. Asta como mucha mi tawata pensa riba Salmo 147:4, cu ta bisa: “E [Yehova] ta determina e cantidad di e streyanan; e ta yama nan tur na nan nomber.” Durante hopi di e anochinan aki cu shelo cla, nos cacho, Judge, tawata pone su cabes den mi scochi y compaña mi. Atardi, hopi bes mi tawata sinta riba nos porch y admira e cunucunan di trigo berde segun cu biento tawata supla nan y laga nan parce plata den e lus di solo.

E Bon Ehempel di Mi Mama

Mi mama tawata un esposa masha dedica. Pa Mama, Tata tawata semper e cabes di cas, y el a siña nos respet’e. Na 1939 Tata tambe a bira un Testigo di Yehova. Nos tawata sa cu Tata stima nos maske el a pone nos traha duro y no a malcria nos. Hopi biaha den winter e tawata laga dos cabai hala un slee y tawata bai keiro cu nos riba slee. Nos tawata gosa sin fin di e sneu briyante!

Sinembargo, ta Mama ta esun cu a siña nos stima Dios y respeta Bijbel. Nos a siña cu Dios su nomber ta Yehova y cu e ta e Fuente di bida. (Salmo 36:9; 83:18, NW) Tambe nos a siña cu Yehova a percura guia pa nos, no pa stroba nos di gosa, sino pa nos probecho. (Isaias 48:17) Mama constantemente a corda nos cu nos tin un trabou special pa haci. Nos a siña cu Hesus a bisa su siguidonan: “E evangelio aki di e reino lo wordo predica den henter mundo como un testimonio na tur nacion, y e ora ei e fin lo yega.”—Mateo 24:14.

Tempo mi tawata chikito, asina cu mi yega cas for di scol y mi mama no ta den cas, mi tawata sali bai busc’e. Un biaha, mi tawatin mas o menos seis of shete aña, mi a bin hay’e  den mangasina. Awasero a cuminsa cai masha duro mes. Nos tawata den e zolder caminda ta warda yerba seco, y mi a puntr’e si ta un otro Dilubio Dios tawata bai trece. El a sigura mi cu Dios a priminti cu nunca mas lo e bolbe destrui e tera cu un dilubio. Tambe mi ta corda con hopi biaha nos mester a core bai sconde den bodega, ya cu hos tawata pasa tur ora.

Mama a participa den e trabou di predica for di prome cu mi a nace. Tawatin un grupo ta reuni den nos cas, y nan tur tawatin e speransa di biba cu Cristo den shelo. Aunke e predicacion di cas pa cas tawata dificil pa Mama, el a laga su amor pa Dios vence su miedo. Mama a keda fiel te dia el a muri na edad di 84 aña, dia 24 di november 1969. Mi tawata masha contento di por tawata serca Mama e dia ei y comparti cu ne mi confiansa den su speransa celestial! Mi a fluister den su horea: “Mama, bo ta bai shelo, y lo bo ta cu e hendenan cu bo conoce.” Cu un stem abou el a bisa: “Mi ta aprecia con bo ta trata mi.”

Nos A Cuminsa Predica

Na 1939, Russell a bira pionero, manera nos ta yama predicadonan di tempo completo den Testigonan di Yehova. El a traha pionero na Oklahoma y Nebraska te cu 1944, ora cu el a haya invitacion pa bin sirbi na e sede mundial di Testigonan di Yehova (yama Betel), na Brooklyn, New York. Ami a cuminsa traha pionero dia 20 di september 1941, y mi a sirbi na varios luga den Colorado, Kansas y Nebraska. E añanan ei den e sirbishi di pionero tawata añanan felis, no solamente pasobra mi por a yuda otro hende siña tocante Yehova, sino tambe pasobra mi a siña tene pleno confiansa den Yehova.

Pa un tempo Wayne tawatin un trabou, y despues el a bai universidad, net rond di e tempo cu Russell a cuminsa traha pionero. Despues Wayne a haya invitacion pa bin Betel. El a sirbi pa basta tempo na Kingdom Farm, serca di Ithaca, New York. Einan, nan tawata planta cuminda pa e famia chikito di e boerderij y tambe pa e staf di mas o menos 200 trahado na Betel di Brooklyn. Wayne a uza su habilidadnan y experencia den e sirbishi di Yehova te na su morto na aña 1988.

Mi ruman mohe Ardis a casa cu James Kern, y nan a haya cinco yiu. Ardis a muri na 1997. Mi otro ruman mohe, Clara, a keda fiel na Yehova te awe, y te ainda ora mi tin facansi mi ta bai bishit’e na su cas na Colorado. Nos ruman mas chikito, Curtis, a bin Betel di Brooklyn meimei di decada di 1940. E tawata core un truck entre Kingdom Farm y Brooklyn pa transporta material y varios producto di cunucu. E no a casa nunca, y a muri na 1971.

Mi Deseo—Sirbishi di Betel

Mi ruman hombernan a bai Betel prome, y mi tambe kier a sirbi einan. Mi tin sigur cu ta nan bon ehempel tawata e motibo cu mi a haya e invitacion pa bin. Loke a lanta den mi e deseo pa bai sirbi na Betel tawata di tende mi mama papia tocante e historia di Dios su organisacion y di mira pa mi mes e cumplimento di profecianan biblico relaciona cu e  ultimo dianan. Mi a priminti Yehova solemnemente den oracion cu si e laga mi sirbi na Betel, lo mi no bai for di einan nunca, a menos cu mi tawatin obligacionnan cristian pa cumpli cu ne.

Mi a yega Betel dia 20 di juni 1945, y mi asignacion tawata pa traha den limpiesa. Tur dia mi tawatin 13 camber pa limpia, cu 26 cama pa drecha, plus limpia gang, trapi y bentana. E trabou tawata pisa. Tur dia, segun cu mi tawata traha, mi tawata bisa mi mes: ‘Bo ta cansa, ta berdad, pero bo ta na Betel, e cas di Dios!’

Na principio di mi sirbishi di Betel, mi a pasa un berguensa grandi. Mi a lanta den cunucu, kiermen mi no tawata sa cu un “dumbwaiter” (waiter bobo) ta un lift chikito cu nan ta uza pa transporta articulo di un piso pa otro. Wel, un dia na trabou mi a haya un yamada cu e peticion: “Bo por manda e dumbwaiter abou, por fabor?” E ruman cu a bel a sera e telefon asina lihe, cu mi no tawata sa kico pa haci. Pero e ora ei mi a corda cu riba e piso cu mi ta limpia tin un ruman ta biba cu ta waiter. Pues, mi a bai bati na su porta y mi di cu ne: “Nan kier pa bo bin abou den cushina.”

Mi Ta Casa cu Nathan Knorr

For di decada di 1920, betelitanan cu tawata desea di casa mester a sali for di Betel y sirbi interesnan di Reino un otro caminda. Pero na principio di decada di 1950, nan a permiti un par di pareha cu tawatin basta tempo ta sirbi na Betel pa casa y keda na Betel. Pesei ora Nathan H. Knorr, kende e tempo ei tawata hiba delantera den e trabou mundial di Reino, a mustra interes den mi, mi a pensa: ‘Esaki si ta un cu sigur lo keda Betel!’

Nathan tawatin hopi responsabilidad pa por a supervisa e actividad mundial di Testigonan di Yehova. Pesei e tawata masha franco cu mi, y a duna mi hopi motibo pakico mi tin cu pensa bon prome cu mi acepta su proposicion pa casa. Den e tempo ei, e tawata biaha hopi pa bishita e sucursalnan di Testigonan di Yehova rond mundo y hopi bes e tawata bai pa varios siman. Pesei el a splica mi cu nos lo ta separa pa periodonan largo.

Tempo mi tawata hobensita, mi a soña di casa den lente y bai pasa luna di miel riba e islanan di Hawai. Wel, nos a casa den pleno winter, dia 31 di januari 1953, y nos a pasa nos luna di miel e diasabra atardi ei y su diadomingo na New Jersey. Dialuna nos a cuminsa traha bek. Sinembargo, un siman despues, si nos a tuma un siman liber pa pasa nos luna di miel.

Un Compañero Trahado

Nathan tawatin 18 aña ora cu el a bin Betel na 1923. El a haya entrenamento balioso serca veteranonan manera Joseph F. Rutherford,  kende tawata encabesa e obra di e Testigonan, y serca e manager di e drukkerij Robert J. Martin. Ora cu Ruman Martin a muri na september 1932, Nathan a bira manager di e drukkerij. E siguiente aña, Ruman Rutherford a hiba Nathan hunto cu ne ora el a bai bishita sucursalnan di Testigonan di Yehova na Europa. Na januari 1942 ora cu Ruman Rutherford a muri, Nathan a ricibi e responsabilidad di supervisa e obra mundial di Testigonan di Yehova.

Nathan tawata gusta mira padilanti, y semper tawata plania pa crecemento den futuro. Algun ruman a considera esaki inapropiado, ya cu nan a pensa cu fin di e sistema aki tawata hopi serca. De echo, un ruman cu a mira e plannan di Nathan a puntr’e: “Kico esaki ta Ruman Knorr? Bo no tin fe cu e fin ta serca?” Nathan a contesta: “Si, mi tin fe, pero den caso cu e fin no bin mes lihe cu nos ta spera, nos lo ta prepara.”

Un idea cu Nathan tawata hopi combenci di dje ta pa establece un scol pa misionero. Pues, dia 1 di februari 1943, un scol di misionero a cuminsa na e boerderij grandi caminda mi ruman Wayne tawata sirbi e tempo ei. Aunke e scol a consisti di un curso intenso di studio di Bijbel cu a dura aproximadamente cinco luna, Nathan a percura pa e studiantenan haya poco recreo tambe. Durante e prome añanan di e scol, e mes tambe tawata hunga den e weganan di softball. Pero despues el a stop di hunga ya cu e tawatin miedo di haya lesion cu lo por a strob’e di asisti na e congresonan di districto den zomer. Na luga di hunga, el a opta pa fungi como umpire. E studiantenan tawata pasa masha pret specialmente ora cu abiertamente e tawata cambia e reglanan di wega na fabor di e studiantenan di exterior cu tawata hunga.

Mi Biahenan cu Nathan

Cu tempo mi a cuminsa compaña Nathan durante su biahenan den exterior. Mi tawata gusta comparti experencia cu e boluntarionan cu ta traha na sucursal y cu e misioneronan. Mi por a mira personalmente nan amor y debocion, y mi a siña tocante nan rutina y condicion di bida den nan paisnan asigna. Atrabes di añanan y te cu awor, mi ta haya carta cu ta expresa aprecio pa e bishitanan ei.

Reflexionando riba nos biahenan, mi ta corda hopi experencia. Por ehempel, tempo cu nos a bishita Polonia, dos ruman mohe tawata fluister cu otro cu ami para einan. Mi a puntra nan: “Dicon boso ta fluister?” Nan a pidi mi despensa, y a splica cu nan a custumbra di fluister, ya cu e obra di Testigonan di Yehova tawata prohibi na Polonia y nan tawata tap combersacionnan di nan casnan.

Ruman Adach tawata un di e tantisimo ruman mohenan cu a sirbi bou di prohibicion na Polonia. E tawatin cabei cu hopi krul y un puyino. Un biaha el a hisa su puyino y a mustra mi e cicatris di un kap hundo cu el a haya di un persiguido cu a golpi’e. Mi tawata geshock pa mira cu mi mes wowo e resultadonan di trato cruel cu nos rumannan tawatin cu soporta.

Despues di Betel, ta Hawai ta mi luga preferi. Mi ta corda e congreso einan den e stad Hilo na 1957. Tawata un ocasion memorabel, y asistencia tawata mas grandi cu e cantidad total di Testigonan local. E alcalde a asta duna Nathan yabi di e stad. Hopi ruman a bin cuminda nos y bisti nos cu coyar di flor.

Un otro congreso emocionante tawata na Nuremberg, Alemania, na 1955, teni den e luga caminda Hitler tawatin custumber di reuni su tropanan pa parada. Ta bon conoci cu Hitler a hura cu lo el a extermina e pueblo di Yehova for di Alemania, pero awor e stadion aki tawata yen yen di Testigo di Yehova! Mi no por a contene mi  lagrimanan. E plataforma tawata inmenso y tawatin un background impresionante cu a consisti di 144 pilar grandi. Mi tawata riba plataforma y mi por a mira e auditorio inmenso di mas cu 107.000 persona. E distancia tawata asina grandi cu apenas mi por a mira e ultimo rei.

Nos por a sinti e integridad di e rumannan Aleman y e fortalesa cu nan a ricibi di Yehova durante nan persecucion bou di gobernacion Nazi. Esei a fortalece nos propio determinacion pa keda fiel y mantene nos integridad na Yehova. Nathan a duna e discurso final, y ora el a termina el a zuai man pa bisa e auditorio ayo. Mesora e rumannan a reacciona door di zuai cu nan lensonan pa bisa ayo. Esei a keda mescos cu un bunita tereno tur na flor.

Un otro bishita inolvidabel tawata nos bishita na Portugal na december 1974. Nos tawata presente na e prome reunion di Testigonan di Yehova na Lisboa despues cu nos trabou di predica a bira legal. E tawata prohibi pa 50 aña! Aunke tawatin solamente 14.000 publicado di Reino den e pais na e tempo ei, mas cu 46.000 hende tawata presente pa e dos reunionnan cu nan a tene. Mi wowo a yena cu awa ora cu e rumannan a bisa: “Nos no tin cu sconde mas. Nos ta liber.”

For di tempo cu mi tawata biaha cu Nathan te cu awe, mi ta gusta duna testimonio informal—den avion, na restaurant—y predica riba caya. Semper mi ta cana cu literatura ya asina mi ta prepara pa duna testimonio. Un biaha cu nos tawata warda riba un avion cu tawatin retraso, un señora a puntra mi unda mi ta traha. Esei a hiba na un combersacion cu ne y cu otro hendenan rond di nos cu tawata scucha. Sirbishi di Betel y mi actividad di predica a tene mi ocupa y masha felis.

Malesa y Animacion di Despedida

Na 1976, Nathan a haya cancer, y ami, hunto cu e personal di Betel, a yud’e trata cu esei. Apesar cu su salu tawata bayendo atras, nos tawata invita varios miembro di oficinanan di sucursal di rond mundo na nos camber, kendenan e tempo ei tawata na Brooklyn pa haya entrenamento. Mi ta corda e bishitanan di Don cu Earlene Steele, Lloyd cu Melba Barry, Douglas cu Mary Guest, Martin cu Gertrud Poetzinger, Pryce Hughes y hopi otro mas. Hopi bes nan tawata conta nos algun experencia di nan pais. Mi tawata keda specialmente impresiona cu e experencianan cu ta mustra e firmesa di nos rumannan bou di prohibicion.

Ora cu Nathan a realisa cu e tawata serca di muri, el a duna mi algun bon conseho pa yuda mi ora mi bira biuda. El a bisa: “Nos tawatin un matrimonio felis. Hopi hende nunca ta experencia esei.” Un cos cu a haci nos matrimonio felis tawata cu Nathan a tene hopi consideracion cu mi. Por ehempel, ora nos tawata topa diferente ruman durante nos biahenan, e tawata bisa mi: “Audrey, si de bes en cuando mi no introduci bo na nan, ta pasobra mi no por corda nan nomber.” Mi tawata hopi contento cu el a bisa mi esei di antemano.

Nathan a recorda mi: “Despues di morto, nos speransa ta sigur, y nunca mas nos lo no sufri dolor.” Anto el a bisa mi cu insistencia: “Wak padilanti, pasobra ta einan bo recompensa ta. No biba den pasado, aunke lo bo keda cu recuerdo. Tempo lo yuda bo recupera. No bira amarga ni sinti duele di bo mes. Keda contento cu bo tawatin e goso- y bendicionnan aki. Despues di un tempo, lo bo ripara cu e recuerdonan ta duna bo goso. Recuerdo ta un regalo cu Dios a duna nos.” El a agrega: “Keda ocupa; purba uza bo bida haciendo algo pa otro hende. Esaki lo yuda bo haya goso den bida.” Anto dia 8 di juni 1977, Nathan a bandona e mundo aki.

Mi Ta Casa cu Glenn Hyde

Nathan a bisa mi cu sea mi ta biba den pasado cu mi recuerdonan of mi por a forma un  bida nobo. Pesei na 1978, despues cu mi a muda pa Watchtower Farms na Wallkill, New York, mi a casa cu Glenn Hyde. E tawata un persona keto y suave y cu masha bon tipo. Prome cu Glenn a bira Testigo, e tawata marinier tempo cu Merca tawata den guera cu Japon.

Glenn a traha riba un boto cu a patruya pa torpedo y tawata asigna na e machinekamer. Debi na e bochincha di motor, el a perde un parti di su oido. Despues di guera, el a bira pagado di candela. Pa hopi aña el a sufri di pesadiya debi na loke el a experencia den guera. El a siña e berdad biblico serca su secretaria, kende a dun’e testimonio informal.

Despues, na 1968, Glenn a haya invitacion pa bin Betel pa traha como bombero na Brooklyn. Anto ora cu Watchtower Farms a haya nan auto di paga candela, el a ser transferi einan na 1975. Cu tempo el a haya e malesa di Alzheimer. Despues cu nos tawatin dies aña casa, Glenn a muri.

Con lo mi a trata cu e situacion? E palabranan sabi cu Nathan a duna mi ora cu e tawata sa cu e ta bai muri, a bolbe consola mi. Mi a keda lesa loke el a skirbi mi tocante con pa trata cu mi situacion ora mi bira biuda. Te ainda mi ta comparti e palabranan aki cu otro rumannan cu perde nan casa, y nan tambe a haya consuelo for di Nathan su conseho. Si, ta bon pa wak padilanti manera el a anima mi pa haci.

Un Hermandad Precioso

Loke specialmente a haci mi bida felis y a duna mi satisfaccion ta amigonan stima den e famia di Betel. Un di nan en particular ta Esther Lopez, kende a gradua na 1944 di e tercer klas di e Scol Biblico di Galad di Watchtower. El a bin bek na Brooklyn na februari 1950 pa sirbi como traductor di nos publicacionnan biblico na Spaño. Hopi bes ora cu Nathan tawata di biahe, Esther tawata mi compañera intimo. E tambe ta na Watchtower Farms. Awor e tin 90 y pico aña, y su salu ta bayendo atras y e ta ser cuida den nos hospital di Betel.

Di mi famia mas serca, ta Russell cu Clara so ta na bida ainda. Russell tin riba 90 aña y ta sirbi fielmente na Betel di Brooklyn. E tawata un di e promenan cu tawatin mag di keda Betel despues cu el a casa. Na 1952, el a casa cu un otro betelita, Jean Larson. Jean su ruman homber Max a bin Betel na 1939 y a bira superintendente di e drukkerij na luga di Nathan na 1942. Max ainda tin hopi responsabilidad na Betel, incluso yuda cuida su casa stima, Helen, kende ta sufri di multiple sclerosis.

Reflexionando riba e 63 añanan di sirbishi di tempo completo na Yehova, mi por bisa cu di berdad mi tawatin un bida cu a duna mi satisfaccion. Betel a bira mi cas, y mi ta sigui sirbi einan cu curason contento. Mi tin cu duna merito na mi mayornan pa e echo cu nan a inculca den nos e importancia di traha y e deseo di sirbi Yehova. Pero loke realmente ta duna bida satisfaccion ta nos maraviyoso hermandad y e speransa di biba hunto cu nos rumannan riba un tera comberti den paradijs, sirbiendo nos Magnifico Creador, e unico Dios berdadero, Yehova, pa eternidad.

[Plachi na pagina 24]

Mi mayornan, dia nan a casa na juni 1912

[Plachi na pagina 24]

Di robes pa drechi: Russell, Wayne, Clara, Ardis, ami y Curtis na 1927

[Plachi na pagina 25]

Ami ta para entre Frances y Barbara McNaught, trahando pionero na 1944

[Plachi na pagina 25]

Na Betel na 1951. Di robes pa drechi: Ami, Esther Lopez, y mi cuña, Jean

[Plachi na pagina 26]

Ami cu Nathan y su mayornan

[Plachi na pagina 26]

Ami cu Nathan na 1955

[Plachi na pagina 27]

Ami cu Nathan na Hawai

[Plachi na pagina 29]

Ami cu mi di dos casa, Glenn