Penji mi jusom

I 2 Jukorintho 6:14, Paulo ubeweco pi ng’a kinde m’etiyo ku wec ma nia, “juyic ungo”?

I 2 Jukorintho 6:14, wasomo kumae: “Kud wuriburu karacelo ku ju ma gi juyic ungo.” Ka waneno wec mange mi ng’et giragora eno, e nen kamaleng’ nia Paulo ubeweco pi ju ma gitie ngo dhanu mi cokiri mi Jukristu. Nyang’ maeni ujengere iwi ayi ma Paulo utiyo ko ku wec ma nia, “jayic ungo” kunoke “juyic ungo” i verse mange bende.

Ku lapor, Paulo umiyo juk ma tek ni Jukristu pilembe gibetero juwagi i pido “i wang’ ju ma gi juyic de ngo.” (1 Jukorintho 6:6) Kakeni, juyic ungo nyutho jupoklembe ma gibed gitimo i otpido mi Korintho. I baruwa pare mir arionde, Paulo ukiewo nia Sitani ‘uumo wang’ pidoic mi dhanu ma juyic ungo.’ ‘Bongu uumo’ wang’ dhanu maeno ma gi juyic ungo i kum lembanyong’a. Ginyutho ngo nia gimaru nitimo ni Yehova, kum Paulo ular ukiewo pigi i wang’e kumae: “Kinde ma ng’atini ulokere i bang’ Yehova, bongune gam kabere cen.”​—2 Jukorintho 3:16; 4:4.

Jumoko ma gi juyic ungo gibed gituro cik, kunoke gibed gitimo ni ayi gin m’acwiya. (2 Jukorintho 6:15, 16) Re gin ceke ngo ma gijay ni jutic pa Yehova. Jumoko ginyutho nia gimaru lemandha. Ju mapol gigamiri ku Jukristu man gimaru nibedo ku judoggi i gamiri migi. (1 Jukorintho 7:12-14; 10:27; 14:22-25; 1 Pethro 3:1, 2) Ento calu ma walar wayero malu, Paulo utiyo ku wec ma nia, “jayic ungo” i kakare ceke pi niweco iwi ju ma gitie ngo dhanu mi cokiri mi Jukristu, ma i iye junwang’u “ju m’uyiyo Rwoth.”​—Tic mi Jukwenda 2:41; 5:14; 8:12, 13.

Cik mir ukungu ma nwang’ere i 2 Jukorintho 6:14 tie telowic ma pire tek ni Jukristu ceke, man jubed jutiyo kude pi nimiyo juk mi rieko ni Jukristu ma gibeyenyo ng’atu ma giromo gamiri kude. (Matayo 19:4-6) Jakristu m’uthiero kwo pare ni Yehova man m’ulimo batizo nyutho nia e riek kinde m’ebeyenyo ngo ng’atu m’emito gamu kunoke m’emito giero i kind dhanu ma gi juyic ungo; pilembe cik mir ukungu, lembakeca, man yiyoyic mi dhanu ma gi juyic ungo ukoc bor dit ku mi Jukristu mandha.

Waromo yero ang’o pi dhanu ma gibeponjo Biblia man gicikudikiri ku cokiri mi Jukristu? Kadong’ jurwey ma fodi gilimo ngo batizo ke? Nyo gin de gitie juyic ungo? Ungo. Jucikiri ngo nilwong’o dhanu ma giyiyo lemandha mi lembanyong’a, man ma gibetimo mediri ma tek pi nitundo i kum batizo, nia gitie juyic ungo. (Jurumi 10:10; 2 Jukorintho 4:13) I wang’ ma fodi Kornelio ulimo ngo batizo, julwong’e nia “ng’atu ma woro Mungu man ma lworo Mungu.”​—Tic mi Jukwenda 10:2.

Dong’, nyo etie lembe mi rieko nia Jakristu m’uthiero kwo pare ni Yehova ucak the mer mi gamiri, man ugam kukoke ugier ng’atu ma juyiyo nia ubed jarwey ma fodi ulimo ngo, calu ma jubewacu nia juk pa Paulo i 2 Jukorintho 6:14 ubeweco ngo pigi? Ungo, eno tie lembe mi rieko ngo. Pirang’o etie lembe mi rieko ngo? Pi thelembe mi juk ma kamaleng’ ma Paulo umiyo ni montho ma Jukristu. Paulo ukiewo kumae: “Etie agonya nigiero ng’atu moko ci ma iye maru, re kende kende i Rwoth” (1 Jukorintho 7:39) Nimakere ku juk maeno, jukwayu Jukristu ma githiero kwo migi ni Yehova nia giyeny judoggi mi gamiri kende kende i kind ju ma gitie “i Rwoth.”

Wec ma nia, “i Rwoth” man mange m’uyenyo rombo kude ma nia, “i Kristu” thelembene tie ang’o? Paulo uweco pi dhanu moko ma gibino “i Kristu” kunoke “i Rwoth” i Jurumi 16:8-10 man Jukolosai 4:7. Kan isomo giragora maeno, ibineno nia dhanu maeno gitie ‘jutic wadijo,’ ‘ju ma juyiyo,’ ‘umego ma jumer,’ ‘jutic mandha,’ man ‘ng’eca wadijo.’

Ng’atini doko “ng’eca i Rwoth” niai saa ma kani? Lembe maeno timere kinde ma ng’atini uyiyo ku cwinye ceke nitimo gin ma ng’eca ucikere nitimo, man ekwerere gire. Yesu uyero kumae: “Tek ng’atu moko ubemito elub toka, ekwerere gire man eting’ yen mi can pare, e emedere nilubo toka.” (Matayo 16:24) Ng’atini caku lubo tok Kristu man ejwigere en gire pi nitimo yeny pa Mungu niai ma ethiero kwo pare ire. Ing’eye, ewodhere pi nilimo batizo man edoko jatic ma pire ung’eyere, m’unwang’u bero i wang’ Yehova Mungu. * Pieno, nigamiri ‘i Rwoth’ nyutho nigamiri ku ng’atu m’unyutho kamaleng’ nia etie jayic man ethiero kwo pare calu “ng’eca pa Mungu man pa Rwoth Yesu Kristu.”​—Yakobo 1:1.

Ng’atu m’ubeponjo Biblia ku Jumulemba pa Yehova man ebetimo mediri ma ber i thenge mi tipo uromo ku foyofoc. Ento, fodi ethiero ngo kwo pare ni Yehova, man emaku ngo yub mi caku timo ire man mi kwo kwo mi twoniri ku lembe moko. Fodi ebetimo alokaloka ma pigi tek. Ukwayu ekeedar nitimo alokaloka ceke m’ukwayere pi nithiero kwo pare ni Yehova man nilimo batizo, i wang’ nitimo alokoka mange ma dongo mi kwo, calu ve gamiri.

Nyo ecopo bedo lembe ma ber nia Jakristu ucak the mer mi gamiri ku ng’atu moko m’ubetimo mediri ma ber i ponji pare mi Biblia, m’ebeparu nia ebikure nitundo ma elim batizo ka gibigamiri? Ungo. Thelembe m’ubecwalu japonj Bibliane pi nidoko Jakristu m’ulimo batizo, romo nyothere kan eng’eyo nia Jakristu moko m’uthiero kwo pare ni Yehova ubemito game, kunoke nigiere, re ebigame ngo kunoke ebigiere ngo ka fodi elimo ngo.

Wang’ mapol ng’atini bedo jarwey ma fodi ulimo ngo pi nindo moko kende, nitundo m’ebitimo ko mediri i kadhiri m’ukwayere pi nilimo batizo. Pieno, juk ma malu m’uwacu nia jugamiri kende kende i Rwoth tie ngo juk m’ukadhu mukero. Kadong’ ng’atu m’utie ku oro m’uromo ka gam, edongo de i ot mi Jukristu, etimo pi oro ma dupa i cokiri, man ebetimo calu jarwey ma fodi ulimo ngo ke? Tek kumeno, ang’o m’ubecere nimiyo kwo pare ni Yehova nikadhu kud i thieriri gijo ke? Ebelworo ang’o ke? Nyo jiji n’i iye eni? Kadok nwang’u etie ngo jayic ungo de, re jucopo yero ngo nia eni “i Rwoth.”

Juk ma Paulo umiyo iwi gamiri tie pi bero mwa. (Isaya 48:17) Ka dhanu ario ma gibemito gamiri, githiero kwo migi ni Yehova twic migi i kum ng’atuman m’ikindgi pi gamiri bedo tek man ukungune bedo nuti i thenge mi tipo. Giworo cik mir ukungu ma rom man gibedo ku lembakeca de marom. Lembe maeno konyogi lee mandha kara gamiri migi ubed ku mutoro. M’umedo maeno, tek ng’atini ugamere ‘i Rwoth,’ enyutho nia ebegwoko bedoleng’ pare ni Yehova man eno ketho enwang’u mugisa ma lee, kum “ni ng’atu m’ugwoko bedoleng’ pare [Yehova] bitimo ku bedoleng’.”​—Zaburi 18:25, NWT.

[Korolembe mi there]

[Cal]

“Ni ng’atu m’ugwoko bedoleng’ pare [Yehova] bitimo ku bedoleng’”