Amepusho Ukufuma ku Babelenga

Pali 2 Abena Korinti 6:14, bushe “abashasumina” abo Paulo alelandapo ni bani?

Pali 2 Abena Korinti 6:14, patila: “Mwiba kwi koli limo line na bashasumina.” Nga kukonka icalelandwapo, naci-ilanga ukuti Paulo alelanda pa bantu abashaba mu cilonganino ca Bena Kristu. Ukuumfwila aya mashiwi muli yi nshila kuleumfwana na malembo yambi aya mu Baibolo umo Paulo abomfya amashiwi pamo nga “uushasumina” nelyo “abashasumina.”

Ku ca kumwenako, Paulo aebaula Abena Kristu pa kuya ku cilye “ku cinso ca bashasumina.” (1 Abena Korinti 6:6) Abashasumina abalandwapo muli ili lembo ni bakapingula abalebombela mu filye fya mu Korinti. Muli kalata yakwe iya bubili, Paulo alondolola ukuti Satana ‘alipofwisha amatontonkanyo ya bashasumina.’ Amenso ya aba bantu bashasumina ‘yalifimbwa’ ukutaluka ku mbila nsuma. Aba bantu bashasumina tabafwaya ukubombela Yehova, pantu mu kubalilapo fye Paulo alondolwele ati: “Ilyo kwaba ukupilibukila kuli Yehova, icifimbo cilafimbulwa.”—2 Abena Korinti 3:16; 4:4.

Abashasumina bamo balaitumpa muli bumpulamafunde nelyo mu kupepo tulubi. (2 Abena Korinti 6:15, 16) Lelo, te bonse abakaanya ababomfi ba kwa Yehova. Bamo balitemwa icine. Abengi baupana na Bena Kristu kabili basalapo ukutwalilila ukuba na bo mu cupo. (1 Abena Korinti 7:12-14; 10:27; 14:22-25; 1 Petro 3:1, 2) Na lyo line, Paulo lyonse abomfya ishiwi lya kuti “uushasumina” ku kulosha ku bantu, abo nga fintu tulandilepo, tababa mu cilonganino ca Bena Kristu, icapangwa na ‘basumina muli Shikulu.’—Imilimo 2:41; 5:14; 8:12, 13.

Icishinte cisangwa pali 2 Abena Korinti 6:14 calicindama nga nshi ku kutungulula Abena Kristu mu mikalile yabo yonse kabili ilingi cilabomfiwa ku kufunda Abena Kristu abalefwaya aba kuupana na bo. (Mateo 19:4-6) Umwina Kristu waipeela kabili uwabatishiwa tafwaya uwa kuupana nankwe mu bantu abashasumina, pantu ifipimo fya mibele isuma, amabuyo, ne fisumino fyalipusana sana ne fya Bena Kristu ba cine.

Lelo, ni shani ulwa basambilila Baibolo no kubishanya ne cilonganino ca Bena Kristu? Ni shani ulwa bakasabankanya bashabatishiwa? Bushe aba tabasumina? Awe bena balisumina. Abantu abapokelela icine ca mbila nsuma kabili abalelunduluka bwino ukulola ku kubatishiwa tabafwile ukwitwa ati abashasumina. (Abena Roma 10:10; 2 Abena Korinti 4:13) Ilyo talabatishiwa, Korneli aleitwa ati ‘kapepa kabili uutina Lesa.’—Imilimo 10:2.

Lelo bushe kuti caba fye bwino ku Mwina Kristu waipeela ukwishishanya nelyo ukuupana na kasabankanya ushabatishiwa, apo, nga kukonka fye amashiwi ya kwa Paulo pali 2 Abena Korinti 6:14 tayalosha kuli kasabankanya uushabatishiwa? Awe te kuti cibe bwino. Mulandu nshi? Ni pa mulandu wa kufunda kwa kulungatika Paulo apeele bamukamfwila Abena Kristu. Paulo alembele ati: “Muntungwa ukuupwa ku o alefwaya, ni muli Shikulu epela.” (1 Abena Korinti 7:39) Ukulingana no ku kufunda, Abena Kristu baipeela bacincishiwa ukufwaya aba kuupana na bo mu bantu ababa “muli Shikulu.”

Bushe amashiwi ya kuti “muli Shikulu” na mashiwi yapalako aya kuti “muli Kristu” yalola mwi? Paulo alanda pa bantu ababa “muli Kristu” nelyo “muli Shikulu” pa Abena  Roma 16:8-10 na pa Abena Kolose 4:7. Nga mwabelenga ifi fikomo, kuti mwamono kuti aba bantu ‘babomfi banensu,’ ‘abasuminishiwa,’ ‘bamunyina batemwikwa,’ ‘bakapyunga ba cishinka,’ kabili ‘basha banensu.’

Ni lilali umuntu asanguka “umusha muli Kristu”? Ni lintu mu kuitemenwa acita fintu umusha afwile ukucita no kuikaana umwine. Yesu alondolola ati: “Umuntu nga alefwaya ukunkonka, aikaane umwine, asende icimuti cakwe ica kucushiwilwapo, alenkonka.” (Mateo 16:24) Ilyo umo aipeela umwine kuli Lesa e lintu atendeka ukukonka Kristu no kuinashisha umupwilapo ku kufwaya kwa kwa Lesa. Pa numa, alaipeela mu lubatisho no kuba umutumikishi wasontwa kabili alasenaminwa na Yehova Lesa. * E co kanshi, ‘ukuupila muli Shikulu’ kuupana no muntu uwaipeela kabili uwalangisha apabuuta ukuti mu cine cine alisumina, no kuti aliipeela ukuba “umusha wa kwa Lesa kabili uwa kwa Shikulu Yesu Kristu.”—Yakobo 1:1.

Umuntu uulesambilila Baibolo ne Nte sha kwa Yehova kabili uulelunduluka bwino lwa ku mupashi alecite cisuma. Nalyo line, talati aipeele kuli Yehova kabili talaipeelesha ukubomba e lyo no kuipusula. Acili alealulako fimo mu mikalile yakwe. Afwile ayaluka mu fikalamba ifikabilwa pa kuba Umwina Kristu waipeela, uwabatishiwa ilyo talatendeka ukutontonkanya pa kwaluka kukalamba mu mikalile yakwe, pamo nge cupo.

Bushe kuti cabamo amano ku Mwina Kristu ukwishishanya no muntu uulemoneka ukulunduluka mwi sambililo lyakwe ilya Baibolo, limbi ukutontonkanyo kutila kuti amulolela ukufikila abatishiwa e lyo bakoopane? Awe iyo. Ico kuti calufyanya icilelenga uulesambilila Baibolo ukubatishiwa, pantu naishiba ukuti pa kuti Umwina Kristu waipeela akoopane nankwe kano abatishiwa.

Ilingi line, umuntu aba kasabankanya ushabatishiwa pa nshita inono, ukufikila alunduluka no kubatishiwa. Kanshi uku kufunda ukwa kuupila fye muli Shikulu kwalilinga. Lelo, ni shani ulwa kwishishanya no muntu uufikile pa mushinku wa kuupwa nelyo ukuupa, uwakulila mu lupwa lwa Bena Kristu, uwaba mu cilonganino pa myaka iingi, kabili ni kasabankanya uushabatishiwa? Nga e fintu cili, ninshi cinshi camulenga ukukanaipeela kuli Yehova? Mulandu nshi ashingashingila? Bushe alatwishika? Nelyo ca kuti alisumina, te kuti etwe ukuti aba “muli Shikulu.”

Ukufunda kwa kwa Paulo pa cupo kulatunonsha. (Esaya 48:17) Nga ca kuti abale-enekela ukuupana bali-ipela kuli Yehova, ukukakililwako kwabo mu cupo kulakosa kabili kushimpwa pa fya ku mupashi. Bakwata ifipimo fimo fine na mabuyo yamo yene. Ici cilalenga sana mu cupo ukuba insansa. Kabinge, ilyo umo ‘aupila muli Shikulu,’ alanga bucishinka kuli Yehova, kabili ico cifumamo amapaalo yabelelela, pantu ‘ku wa luse nelyo uwa cishinka [Yehova] wa luse.’—Amalumbo 18:25.

[Futunoti]

[Icikope pe bula 31]

‘Ku wa luse nelyo uwa cishinka [Yehova] wa luse’