Pregunta del Maga Quien Ta Le

Na 2 Corinto 6:14, con quien ta refiri si Pablo cuando ya usa le con el expresion “aquellos quien gendeh ta cree”?

Na 2 Corinto 6:14, puede kita le: “No ustedes man junto con aquellos quien gendeh ta cree.” (El Nuevo Testamento na Chavacano) Si mira kita con el contexto de este, claro que ta refiri si Pablo con aquellos quien gendeh parte del Cristiano congregacion. Ta suporta con este el otro maga texto na Biblia donde ya usa si Pablo con este expresion.

Por ejemplo, ya corecta si Pablo con el maga Cristiano quien ta anda na corte “na presencia pa de aquellos nuay fe con Jesucristo” o aquellos quien gendeh ta creé. (1 Corinto 6:6, El Nuevo Testamento) Aqui, aquellos quien gendeh ta creé ta refiri con el maga juez na corte na Corinto. Na de suyu segundo carta, si Pablo ya habla que si Satanas “ta hace bulak con el ojos del maga gente quien hende ta tene fe” o gendeh ta creé. El ojos de ese maga persona tapao de “velo” na buen noticia. Nuay sila dale mira interes para sirvi con Jehova, ciendo ya habla si Pablo: “Ay cai lang ese velo cuando sila ay bira con el Señor.”​—2 Corinto 3:16; 4:4, El Nuevo Testamento.

El cuanto de aquellos quien gendeh ta creé ta participa na maldad o idolatria. (2 Corinto 6:15, 16) Pero, gendeh todo kanila el tan contra con el maga siervo del Dios. El cuanto ta dale mira interes na verdad. Manada kanila casao na un Cristiano y alegre que esta casao kanila. (1 Corinto 7:12-14; 10:27; 14:22-25; 1 Pedro 3:1, 2) Pero, pirmi ya usa si Pablo con el expresion “aquellos quien gendeh ta cree” para refiri con el maga individual quien, como cosa ya menciona enante, gendeh parte del Cristiano congregacion donde el todo ta “cree con el Señor.”​—Maga Actividad 2:41; 5:14; 8:12, 13.

El principio na 2 Corinto 6:14 amo un buen consejo para con el todo maga Cristiano pero especialmente para con aquellos quien quierre casa. (Mateo 19:4-6) El un dedicao y bautizao Cristiano gendeh ta busca con quien casa entre con aquellos quien gendeh ta creé, ciendo bien diferente el diila maga principio, goal y creencia si compara con el maga verdadero Cristiano.

Pero, quetal aquellos maga persona quien ta estudia con el Biblia y ta atende na diaton maga miting? Quetal aquellos maga unbaptized publisher? Incluido ba tambien sila con aquellos quien gendeh ta creé? Gendeh. El maga persona quien ya acepta con el verdad acerca na buen noticia y ta continua progresa para na bautismo gendeh incluido na este expresion. (Roma 10:10; 2 Corinto 4:13) Antes bautiza con Cornelio, ya llama con ele como un gente “bien [religioso] y devoto.”​—Maga Actividad 10:2.

Entonces, bueno ba para na un dedicao Cristiano que tene romantico relacion y casa con el un unbaptized publisher, ciendo el consejo de Pablo na 2 Corinto 6:14 gendeh aplicable na ese situacion? Gendeh. Porque? Por causa na directa consejo que ya dale si Pablo acerca na maga Cristiano viuda. Si Pablo ya escribi: “Libre ya le para casa maskin con quien le quiere, pero siempre na un cristiano [“na Señor,” NWT].” (1 Corinto 7:39) Base na ese consejo, ta anima con el maga dedicao Cristiano que casa con aquellos lang quien Cristiano.

Cosa quierre decir del expresion “na Señor” y del semejante expresion “de Cristo”? Na Roma 16:8-10 y Colosa 4:7, ya discuti si Pablo acerca na maga individual quien “de Cristo” o “del Señor.” Si le tu con ese maga texto, puede tu mira que ese maga individual amo ‘maga uban na trabajo,’ ‘hermano,’ ‘fiel ayudante,’ y esclavo o ‘uban na servicio.’

Cuando ba el un persona ta queda un esclavo na servicio del Señor? Ta sucede este si preparao le hace si cosa ta hace el un esclavo y ta desconoce con el de suyu mismo cuerpo. Si Jesus ya explica: “Si quien quiere queda dimio maga siguidor, necesita olvida el disuyo mismo cuerpo, carga el disuyo cruz [“estaca,” NWT] y sigui conmigo.” (Mateo 16:24) Ta principia sigui el un persona con el Cristo si ta hace le con el voluntad del Dios y ta dedica el de suyu vida con Dios. Despues, ta bautiza le y ta hace este posible para tene le buen relacion con Dios Jehova. * Poreso, el expresion “casa . . . na un cristiano” quierre decir que casa na un persona quien claro ya dale mira que ele amo un dedicao “muchacho [o esclavo] del Dios y del Señor Jesucristo.”​—Santiago 1:1.

El un persona quien ta estudia con el Biblia junto na maga Testigo de Jehova y ta progresa na espiritual debe ricibi comendacion. Pero, nuay pa le dedica el de suyu mismo cuerpo con Jehova y promete que usa con el de suyu vida para sirvi con Jehova. Ta hace pa le maga necesita cambio. Antes le principia pensa acerca na matrimonio, necesita anay le hace con ese maga cambio y queda un dedicao Cristiano.

Bueno ba para na un Cristiano que man date con el un persona quien dol ta progresa na de suyu Bible study y plaña que casa dayun con ele si bautizao ya le? Gendeh. Baka queda gendeh justo el motivo del un persona na de suyu Bible study si sabe le que hay casa con ele el un dedicao Cristiano si bautiza le.

Mas mucho, corto tiempo lang el ta pasa antes ta bautiza el un unbaptized publisher. Poreso, razonable el consejo que casa con el un Cristiano lang. Pero paquemodo si el un persona na edad ya para casa, ya engranda na un Cristiano familia, activo na congregacion por cuanto año y un unbaptized publisher? Bueno, cosa el ta sangga con ele para dedica el de suyu vida con Jehova? Porque le tan alang-alang? Tiene ba le maga duda? Maskin gendeh le un persona quien gendeh ta creé, gendeh kita puede habla que “un cristiano” le.

Para na diaton mismo beneficio el consejo de Pablo acerca na matrimonio. (Isaias 48:17) Si el dos persona quien quierre casa amo maga dedicao siervo de Jehova, hay tene sila fuerte matrimonio cay tiene sila buen relacion con Jehova. Tiene sila igual maga principio y goal. Hay ayuda este kanila para queda alegre. Mas pa, si el un persona casa na un Cristiano, ta dale le mira el de suyu lealtad con Jehova y hay resulta se na maga bendicion cay “hay queda [si Jehova] leal con aquellos quien leal.”​—Salmo 18:25.

[Footnote]

[Letrato]

“Hay queda [si Jehova] leal con aquellos quien leal”