Mga Pangutana Gikan sa mga Magbabasa

Sa 2 Corinto 6:14, kinsay gitumong ni Pablo sa dihang gigamit niya ang terminong “mga dili-magtutuo”?

Sa 2 Corinto 6:14, atong mabasa: “Ayaw pagpayugo nga dili timbang sa mga dili-magtutuo.” Kon atong susihon ang konteksto, tataw nga si Pablo naghisgot sa mga tawo nga dili gayod sakop sa Kristohanong kongregasyon. Kining maong pagsabot gipaluyohan sa ubang mga bersikulo sa Bibliya nga nagrekord sa paggamit ni Pablo sa terminong “dili-magtutuo” o “mga dili-magtutuo.”

Pananglitan, si Pablo nagbadlong sa mga Kristohanon tungod sa pagpakigburoka “atubangan sa mga dili-magtutuo.” (1 Corinto 6:6) Dinhi, ang mga dili-magtutuo mao ang mga maghuhukom nga nag-alagad diha sa sistema sa hukmanan sa Corinto. Diha sa iyang ikaduhang sulat, si Pablo nag-ingon nga si Satanas “nagbuta sa mga hunahuna sa mga dili-magtutuo.” Ang mga mata sa maong mga dili-magtutuo ‘nataptapan’ sa maayong balita. Kining maong mga dili-magtutuo dili interesadong moalagad kang Jehova, sanglit sayosayo pa niana si Pablo nag-ingon: “Sa dihang modangop kang Jehova, ang taptap pagakuhaon.”—2 Corinto 3:16; 4:4.

Ang pipila ka dili-magtutuo naghimog kalapasan o idolatriya. (2 Corinto 6:15, 16) Hinunoa, dili tanang dili-magtutuo ang misupak sa mga alagad ni Jehova. Ang uban nagpakitag interes sa kamatuoran. Daghan ang adunay Kristohanong mga kapikas ug malipayong nagpuyo uban kanila. (1 Corinto 7:12-14; 10:27; 14:22-25; 1 Pedro 3:1, 2) Apan, si Pablo subsob nga nagpadapat sa terminong “dili-magtutuo” ngadto sa mga tawo kinsa, sama sa gihisgotan sa ibabaw, dili sakop sa Kristohanong kongregasyon, nga gilangkoban sa “mga magtutuo sa Ginoo.”—Buhat 2:41; 5:14; 8:12, 13.

Ang prinsipyo nga makaplagan diha sa 2 Corinto 6:14 maoy usa ka mapuslanong giya alang sa mga Kristohanon diha sa tanang kahimtang sa kinabuhi ug subsob nga gikutlo ingong maalamong tambag alang sa mga Kristohanon nga nangitag kapikas sa kaminyoon. (Mateo 19:4-6) Ang usa ka dedikado, bawtismado nga Kristohanon maalamong dili mangitag kapikas sa kaminyoon taliwala sa mga dili-magtutuo, sanglit ang mga prinsipyo, tumong, ug pagtulon-an sa mga dili-magtutuo lahi man kaayo kay sa iya sa matuod nga Kristohanon.

Apan, unsa kaha kon ang mga indibiduwal nagtuon sa Bibliya ug nakig-uban sa Kristohanong kongregasyon? Komosta man kadtong dili-bawtismadong mga magmamantala? Sila ba mga dili-magtutuo? Dili. Ang mga tawong midawat sa kamatuoran sa maayong balita ug padayong nag-uswag ngadto sa bawtismo dili gayod matawag nga mga dili-magtutuo. (Roma 10:10; 2 Corinto 4:13) Sa wala pa siya mabawtismohi, si Cornelio gitawag na nga “usa ka debotadong tawo ug usa nga mahadlokon sa Diyos.”—Buhat 10:2.

Nan, maalamon ba alang sa usa ka Kristohanon nga makigtrato ug makigminyo sa usa ka tawo nga bag-o lang gidawat ingong dili-bawtismadong magmamantala, tungod kay, sa estriktong pagkasulti, ang tambag ni Pablo nga narekord diha sa 2 Corinto 6:14 dili man mapadapat sa maong kahimtang? Dili, dili kana maalamon. Nganong dili man? Tungod sa direktang tambag nga gihatag ni Pablo labot sa Kristohanong mga babayeng balo. Si Pablo nagsulat: “Siya gawasnon nga magminyo kang bisan kinsa nga buot niya, lamang diha sa Ginoo.” (1 Corinto 7:39) Uyon sa maong tambag, ang dedikadong mga Kristohanon mangitag mga kapikas sa kaminyoon taliwala lamang niadtong “diha sa Ginoo.”

Unsay kahulogan sa mga pulong nga “diha sa Ginoo” ug ang nalangkit nga mga pulong nga “diha kang Kristo”? Si Pablo naghisgot bahin sa mga tawong “diha kang Kristo” o “diha sa Ginoo” sa Roma 16:8-10 ug Colosas 4:7. Kon imong basahon kanang mga bersikuloha, imong makita nga ang maong mga tawo maoy ‘mga isigkamagbubuhat,’ ‘mga inuyonan,’ ‘hinigugmang  mga igsoon,’ ‘matinumanong mga ministro,’ ug ‘mga isigkaulipon.’

Kanus-a nga ang usa mahimong ‘ulipon diha sa Ginoo’? Mahitabo kana sa dihang siya kinabubut-ong magbuhat kon unsay angayng buhaton sa usa ka ulipon ug magdumili sa iyang kaugalingon. Si Jesus miingon: “Kon adunay buot mosunod kanako, padumilia siya sa iyang kaugalingon ug ipapas-an ang iyang estaka sa pagsakit ug magpadayon sa pagsunod kanako.” (Mateo 16:24) Ang usa ka tawo mosugod sa pagsunod kang Kristo ug bug-os nga magpasakop sa iyang kaugalingon sa kabubut-on sa Diyos sa dihang iyang ipahinungod ang iyang kaugalingon ngadto sa Diyos. Human niana, iyang itanyag ang iyang kaugalingon alang sa bawtismo ug mahimong ordinadong ministro nga may inuyonang baroganan atubangan kang Jehova nga Diyos. * Busa, ang ‘pagminyo diha sa Ginoo’ nagkahulogan nga magpakasal sa usa nga nakapasundayag na nga siya maoy tinuod gayod nga magtutuo, usa ka dedikadong “ulipon sa Diyos ug sa Ginoong Jesu-Kristo.”—Santiago 1:1.

Ang usa ka tawo nga nagtuon sa Bibliya uban sa mga Saksi ni Jehova ug kinsa nakahimog maayong espirituwal nga pag-uswag takos dayegon. Apan, siya wala pa magpahinungod sa iyang kaugalingon kang Jehova ug wala pa magtugyan sa iyang kaugalingon alang sa usa ka kinabuhi nga nag-alagad ug nagsakripisyo. Siya nagahimo pa sa gikinahanglang mga kausaban. Kinahanglan pa niyang bug-oson ang dagkong mga kausaban nga nalangkit sa pagkahimong usa ka dedikado, bawtismado nga Kristohanon sa dili pa maghunahuna ug laing dakong kausaban sa kinabuhi, sama sa kaminyoon.

Maalamon bang makigtrato ang usa ka Kristohanon sa usa ka tawo nga daw nakahimo nag maayong pag-uswag sa iyang pagtuon sa Bibliya—tingali sa tuyo nga hulaton lang siya hangtod mabawtismohan sa dili pa magpakasal kaniya? Dili. Ang mga motibo sa usa ka estudyante sa Bibliya mahimong dili mailhan kon siya mahibalo nga ang usa ka dedikadong Kristohanon buot makigminyo kaniya apan dili una mohimo niana hangtod siya mabawtismohan.

Kasagaran, ang usa ka tawo maoy dili-bawtismadong magmamantala sulod lamang sa makadiyot nga panahon, hangtod siya mouswag ngadto sa punto nga magpabawtismo. Busa ang gihisgotan sa ibabaw nga tambag nga magminyo lamang diha sa Ginoo maoy makataronganon. Apan, komosta man ang pagpakigtrato sa usa nga husto na sa edad nga magminyo, nagdako diha sa usa ka Kristohanong pamilya, aktibo diha sa kongregasyon sulod sa ubay-ubayng mga tuig, ug nag-alagad ingong dili-bawtismadong magmamantala? Buweno, unsa bay nakapugong kaniya sa dili pagpahinungod sa iyang kinabuhi ngadto kang Jehova? Nganong nag-ukon-ukon man siya? Duna ba siyay mga pagduhaduha? Bisan tuod siya dili usa ka dili-magtutuo, siya dili matawag ingong “diha sa Ginoo.”

Ang tambag ni Pablo labot sa kaminyoon maoy alang sa atong kaayohan. (Isaias 48:17) Sa dihang ang duha ka managtrato parehong nagpahinungod sa ilang kaugalingon kang Jehova, ang ilang mga panaad sa usag usa diha sa kaminyoon adunay malig-on, espirituwal nga pundasyon. Sila parehog mga prinsipyo ug mga tumong. Kini dako kaayog ikatampo sa malipayong kaminyoon. Dugang pa, pinaagi sa ‘pagminyo diha sa Ginoo,’ gipakita sa usa ang iyang pagkamaunongon kang Jehova, ug kana motultol ngadto sa dumalayong mga panalangin, tungod kay “sa maunongon [si Jehova] magmaunongon.”—Salmo 18:25.

[Footnote]

[Hulagway sa panid 31]

“Sa maunongon [si Jehova] magmaunongon”