Careltu Hna Sinin Biahalnak

Paul nih 2 Korin 6:​14 ah “a zum lomi hna” tiah a ti tikah ahote dah a ti duhmi hna a si?

2 Korin 6:​14 ah hitin a ti: “A zum lomi hna he i fon cetcut tuk in rian ṭuanṭi hlah u.” A hnuhmai bia kan zoh tikah Paul nih Khrihfa a si lomi hna kha a ti duhmi hna a si ti cu a fiang. Mah kha a dang Baibal caang hna zong nih an cohlan. Mah ah “a zum lomi” asiloah “a zum lomi hna” timi Paul hmanmi biafang kha an hman.

Tahchunhnak ah, Paul nih “a zum lomi” hna hmaiah pakhat le pakhat taza aa cuaimi Khrihfa hna kha fakpi in a mawhchiat hna. (1 Korin 6:6) Hika i a zum lomi hna timi cu Korin biaceihnak zung ah rian a ṭuanmi biaceihtu pawl kha an si. Paul nih a cakuat pahnihnak ah Satan nih a zum lomi hna i “an lungthin cu mui lakah a chiah” tiah a ti. Mah zumlotu hna nih thawngṭha an hmuh nakhnga lo an mit cu “puan” in khampiak a si. Mah a zum lomi hna nih Jehovah rian kha ṭuan an duh lo. Paul nih a hmasa ah a langhter cang bantukin ‘Bawipa lei i an hun i mer tikah puan cu aa hawk.’​—2 Korin 3:​16; 4:4.

Zumlotu cheukhat cu a ding loin khua an sa asiloah siasal an bia. (2 Korin 6:​15, 16) Asinain an dihlak in Jehovah salle a ralchanhmi cu an si lo. Cheukhat nih biatak kong kha hngalh an duh. Tam deuh i an innchunghawi cu Khrihfa an si i anmah he nuam tein khuasak kha an duh. (1 Korin 7:​12-​14; 10:27; 14:22-​25; 1 Peter 3:​1, 2) Asinain a cunglei ah langhtermi bantukin “Bawipa a zummi hna” in dirhmi Khirhfabu ah aa tel lomi hna kha Paul nih “a zum lomi hna” tiah a auh tawn hna.​—Lamkaltu 2:​41; 5:​14; 8:​12, 13.

2 Korin 6:​14 ah hmuhmi phunglam cu hnulei sining aa lo lomi Khrihfa hna caah a sunglawi tukmi lamhruainak a si i innchunghawi a kawlmi Khrihfa hna ca zongah a ṭha tukmi ruahnak cheuhnak pakhat in cherhchan lengmangmi a si. (Matthai 19:​4-6) Aa pumpe i tipil a ing cangmi Khrihfa pakhat nih cun zumlotu chungin innchunghawi a kawl lai lo. A ruang cu zumlotu hna i an nuncan ziaza, an hmuitinh le an zumhnak hna cu a hmaanmi Khrihfa hna he aa thleidan tuk caah a si.

Asinain Baibal a hlathlai i Khrihfabu he pehtlaihnak a ngeimi hna tah zeitin? Tipil a ing rih lomi thawngthanhtu hna tah? Annih cu zumlotu maw an si? A si lo. Thawngṭha he aa tlaimi biatak kha an cohlan i tipil in dingin hmaan tein a ṭhangcho liomi an si caah zumlotu tiah kan auh hna awk a si lo. (Rom 10:10; 2 Korin 4:​13) Kornelias kha tipil a in hlanin ‘biaknaklei ah aa zuam ngaingaimi le Pathian a biami’ tiah auh a si.​—Lamkaltu 10:2.

Tipil a ing cangmi Khrihfa pakhat nih tipil a ing rih lomi thawngthanhtu pakhat he i duh in an i ṭhitum ahcun 2 Korin 6:​14 i Paul ruahnak cheuhnak kha a zulh tiah kan ti kho lai maw? Kan ti kho lai lo. Zeicah? Paul nih Khrihfa nuhmei hna sin direct in ruahnak a cheuhmi hna bia ruangah a si. Hitin a ti: “A duhmi pa he i ṭhit awk kha a luat, amah belte an i ṭhitnak cu Khrihfa ṭhitumnak [Bawipa ah a ummi he lawng, NW] a si awk a si.” (1 Korin 7:​39) Mah ruahnak cheuhnak ningin a pum aa pe cangmi Khrihfa hna cu “Bawipa ah a ummi he lawng” i ṭhitum awkah tha pek an si.

‘Bawipa ah’ timi biafang a sullam cu zeidah a si?  Paul nih “kan dawtmi kan nau Taikhikas cu zumh awk tlakmi, Bawipa rianṭuannak i kan ṭuanhawi [le Bawipa sal, NW] a si” tiah Kolose 4:7 ah a ti.

Mi pakhat cu zeitik ah dah ‘Bawipa sal’ a hung si? Amah duhnak kha hlaw in sal pakhat nih ṭuan dingmi rian kha lungtho tein a ṭuan tikah a si. Jesuh nih hitin a ti: “Ahohmanh nih zulh nan ka duh ahcun nanmahle nanmah nan i philh i nan vailamtahnak nan i put i nan ka zulh a herh.” (Matthai 16:24) Mi pakhat nih Pathian sin aa pumpek tikah Khrih hnu a hun zulhmi a si i Pathian duhnak kha tling tein a cohlanmi a si. Mah hnuah tipil a ing i Jehovah mithmai ṭha a hmumi, phungchim dingin rian pekmi pakhat a hung si. * Cucaah “Bawipa ah a ummi he lawng” i ṭhitum ding timi cu a pum aa pe cangmi “Pathian le Bawipa Jesuh Khrih sal” le zumtu taktak a simi pakhat he i ṭhitum kha a chim duhmi a si.​—Jeim 1:1.

Jehovah Tehte Hna he Baibal a hlathlai i a ṭhangchomi pakhat cu thangṭhat awkah aa tlakmi a si. Asinain anih cu Jehovah sinah a pum aa pe rih lo i Pathian caah mahca ṭhatnak hlaw in a rian zong a ṭuan rih lo. A herhmi ningin thlennak a tuah lio lawng a si rih. Ṭhitumnak ti bantuk nunnak ah a dang thlennak nganpi kha a tuah hlanah Pathian sinah i pumpe in tipil a ingmi pakhat a si nakhnga thlennak nganpipi a tuah hmasa a hau.

Tipil ka in hnuah kan i um lai timi hmuitinh he Baibal a hlathlai i a ṭhangcho thluahmahmi pakhat he i duh awk a si maw? A si lo. Tipil a ing cangmi pakhat nih vat asiloah ṭhit a ka duh ko nain tipil ka in hnu lawngah a si lai ti kha Baibal a cawngmi nih a hngalh ahcun a hmuitinh kong he aa tlaiin lungawṭawm in a um kho.

Mi pakhat cu tipil in khawh dingin a ṭhangchomi a si hmanhah tipil a ing rih lomi thawngthanhtu a si lio ahcun ri a ngei. Cucaah Bawipa ah a ummi he lawng i ṭhitum ding timi ruahnak cheuhnak cu aa tlakmi a si. Asinain Khrihfa innchungkhar ah a ṭhang i caan saupi chung Khrihfabu ah a cawlcangmi, tipil a ing rih lomi thawngthanhtu pakhat a si ah tah zeitin? Cutin a si ahcun Jehovah sinah i pumpek lo dingin zeinihdah a dawnh? Zeicah tipil in dingin aa cungcang? Lungawṭawmnak a ngeih caah maw? Anih cu zumlotu cu a si lo nain ‘Bawipa ah a ummi’ tiah ti khawh a si lo.

Ṭhitumnak kong he aa tlaimi Paul ruahnak cheuhnak cu kanmah ṭhatnak caah a si. (Isaiah 48:17) Aa ṭhium dingmi cu an pahnih in Jehovah sinah aa pumpemi an si ahcun ṭhitum biakamnak cu a fekmi thlaraulei hram cungah aa bunhmi a si lai. Annih cu aa khatmi phunglam le aa khatmi hmuitinh zong an ngei lai. Mah nih a nuammi chungkhar a siter lai. Cun ‘Bawipa ah aa ṭhiummi’ an sinak thawngin Jehovah cungah zumhawktlak tein a ummi an si kha an langhter. Cutin an tuahnak thawngin thluachuah an hmu zungzal lai. Zeicahtiah ‘[Jehovah] cu zumhawktlak a simi sinah zumhawktlak in a um’ caah a si.​—Salm 18:25.

[A Tanglei Fianternak]

[Hmanthlak]

‘[Jehovah] cu zumhawktlak a simi sinah zumhawktlak in a um’