Kestyon Lekter

Dan 2 Korentyen 6:14, lekel Pol ti pe refer avek ler i ti servi sa term “non-krwaryan”?

Dan 2 Korentyen 6:14, i dir: “Pa bezwen asosye zot avek bann non-krwaryan.” Si nou get son konteks, i evidan ki Pol ti pe koz lo bann dimoun ki pa form parti kongregasyon Kretyen. Lafason ki Pol i servi sa lekspresyon “non-krwaryan” oubyen “bann non-krwaryan” dan lezot verse Labib, i siport sa konprenezon.

Par egzanp, Pol i reprimann bann Kretyen pour al an kour “devan en ziz non-krwaryan.”(1 Korentyen 6:6) La, i ti pe koz lo bann ziz dan lakour an Korent. Dan son dezyenm let, Pol i dir ki Satan “i’n avegle lespri bann non krwayan.” I annan en “vwal” lo lizye sa bann non krwayan ki fer zot pa vwar sa bon nouvel. Sa bann non krwayan pa’n montre ki zot anvi servi Zeova, akoz Pol ti eksplike pli boner: “Sa vwal i tonbe zis kan en dimoun i konverti dan Senyer.”—2 Korentyen 3:16; 4:4, NW.

Serten non krwayan i fer sa ki mal oubyen ador zidol. (2 Korentyen 6:15, 16) Me pa tou bann non krwayan ki opoz bann serviter Zeova. Serten i montre en lentere dan laverite. Bokou zot i annan bann msye oubyen madanm ki Kretyen e zot kontan pour reste avek zot. (1 Korentyen 7:12-14; 10:27; 14:22-25; 1 Pyer 3:1, 2) Me Pol ti toultan aplik sa lekspresyon “non-krwayan” avek bann dimoun ki, parey i’n ganny dir pli boner, pa form parti avek kongregasyon Kretyen. Kongregasyon i konpoze avek bann dimoun ki “krwar e aksepte Senyer.”—Akt 2:41; 5:14; 8:12, 13.

Sa prensip ki trouve dan 2 Korentyen 6:14 i en bon gidans pour Kretyen dan tou laspe lavi. Souvan sa verse in ganny servi konman en bon konsey pour bann Kretyen ki anvi marye. (Matye 19:4-6) Avek lasazes, en Kretyen ki’n dedye son lavi e batize pa pou rod en dimoun parmi bann non krwayan pour marye avek. Sa i akoz prensip, krwayans, ek lobzektif bann non krwayan i sitan diferan avek en vre Kretyen.

Me ki nou pou dir lo bann dimoun ki pe etidye Labib e asosye avek kongregasyon Kretyen oubyen bann proklanmater ki pa ankor batize? Eski zot bann non krwayan? Non. Bann dimoun ki’n aksepte laverite lo sa bon nouvel e pe progrese ptit-a-pti ver  batenm pa devret ganny apele bann non krwayan. (Romen 10:10; 2 Korentyen 4:13) Avan Korney ti batize, i ti ganny apele konman ‘sa zonm byen relizye.’—Akt 10:2.

Alor, vi ki 2 Korentyen 6:14 pa toutafe aplik pour en dimoun ki’n ganny aksepte konman en proklanmater non batize, eski i pou saz pour en Kretyen batize pwente oubyen marye avek en tel dimoun? Non i pa saz fer sa. Akoz non? Akoz sa konsey byen direk ki Pol ti donn bann Kretyen ki vev. Pol ti ekrir: “I lib pour marye avek sa ki fer li plezir, me i devre fer li [selman dan Senyer, NW ].” (1 Korentyen 7:39) An armoni avek sa konsey, bann Kretyen i ganny ankouraze pour rod en dimoun pour marye avek selman parmi sa bann ki dan Senyer.

Ki sinifikasyon sa lekspresyon ‘dan Senyer’ ek sa lot lekspresyon “dan Kris”? Pol i koz lo bann dimoun ki ti “dan Kris” oubyen “dan travay Senyer” dan Romen 16:8-10 ek Kolosyen 4:7. Si ou lir sa bann verse, ou pou vwar ki sa bann dimoun i “koleg travay,” “bon zanmi dan Senyer,” e “travayer fidel.”

Kan eski en dimoun i vin ‘en serviter dan travay Senyer’? Sa i arive ler en dimoun i volonterman fer sa ki en lesklav i devret fer e aret mazin zis son lekor. Zezi i eksplike: “Si en dimoun i oule vin avek mwan, fodre ki i aret mazin zis limenm e pran son [poto, NW ] e swiv mwan.” (Matye 16:24) En dimoun i konmans swiv Kris e soumet antyerman avek lavolonte Bondye ler i dedye son lavi avek Bondye. Apre sa, i batize e vin en minis ordonnen avek en kondisyon aprouve devan Zeova. * Alor, ‘marye dan Senyer’ i vedir marye avek en dimoun ki’n demontre ki i vreman en krwayan, savedir “en serviter Bondye ek Senyer Zezi-Kri.”—Zak 1:1.

En dimoun ki pe etidye Labib avek Temwen Zeova e ki pe fer bon progre i merit ganny felisite. Me i pa ankor dedye son lavi avek Zeova e montre ki i’n pare pour servi Li, e viv en lavi sakrifis. I ankor pe fer sanzman neseser. I bezwen fer tou bann sanzman neseser ki enplike pour vin en Kretyen batize e dedye, avan mazin fer lezot sanzman enportan dan lavi, parey marye.

Eski i bon pour en Kretyen pwente avek en dimoun ki paret pe fer bon progre dan son letid Labib—petet avek lentansyon pour espere ziska ki i batize avan marye avek li? Non. Sa i kapab fer sa etidyan Labib pa konnen pour ki rezon i oule batize, si i konnen en Kretyen batize i anvi marye avek li me i pou fer li selman apre ki i’n batize.

Laplipar-di-tan, en proklanmater non batize pa pran bokou letan pour fer progre pour kapab batize. Alor, sa konsey pour marye selman dan Senyer i rezonnab. Me si en dimoun i annan laz pour marye, i’n ganny elve dan en fanmiy Kretyen, i’n aktif dan kongregasyon pour detrwa lannen, e i en proklanmater ki pa ankor batize? Dan sa ka, kwa ki anpes li donn son lavi avek Zeova? Akoz i ezite? Eski i annan dout? Menm si i pa en non krwayan, nou pa kapab dir ki i ‘dan Senyer.’

Konsey Pol lo maryaz i pour nou prop dibyen. (Izai 48:17) Ler tou le de dimoun in dedye zot lavi avek Zeova, zot langazman anver kanmarad dan maryaz i baze lo en fondasyon spirityel ki solid. Zot partaz menm prensip e menm lobzektif. Sa i kontribye bokou pour fer en lavi maryaz ere. Deplis, ler en dimoun i ‘marye dan Senyer’ i montre li fidel avek Zeova e sa i anmenn bann benediksyon dirab, akoz “avek en dimoun fidel [Zeova] pou azir avek fidelite.”—Psonm 18:25.

[Not anba lo paz]