Mme Mbụme Ẹtode Mme Andikot

Mmanie ke Paul etịn̄ aban̄a ke 2 Corinth 6:14 nte “mmọ eke mînịmke ke akpanikọ”?

Nnyịn ikot ke 2 Corinth 6:14 ite: “Ẹkûbọp idem utịn̄e-utịn̄e ye mmọ eke mînịmke ke akpanikọ.” Edieke nnyịn isede udọn̄ikọ emi, ana in̄wan̄-in̄wan̄ nte ke Paul etịn̄ aban̄a mme owo oro mîbuanake ye esop Christian. Mme ufan̄ikọ en̄wen ke Bible, oro ẹdade ikọ Paul emi “owo eke mînịmke ke akpanikọ” m̀mê “mmọ eke mînịmke ke akpanikọ” ẹsọn̄ọ se nnyịn itịn̄de emi.

Ke uwụtn̄kpọ, Paul ọsọn̄ọ asua ọnọ mme Christian ndikot nditọete mmọ ikpe ke “iso mmọ emi mînịmke ke akpanikọ.” (1 Corinth 6:6) Mi, mmọ emi mînịmke ke akpanikọ ẹdi mme ebiereikpe oro ẹkesikpede ikpe ke esopikpe Corinth. Paul owụt ke udiana leta esie nte ke Satan anam “ikike mmọ eke mînịmke ke akpanikọ ekịm.” N̄kpọ ‘ofụk’ enyịn utọ mmọ eke mînịmke ke akpanikọ mi abaha eti mbụk. Mmọ eke mînịmke ke akpanikọ mi inamke usio-ukot ndomokiet ndinam n̄kpọ Jehovah, koro Paul ama anam an̄wan̄a ke mbemiso ete: “Ini ekededi mmọ ẹwọn̄ọrede ẹtiene Ọbọn̄, ẹmen ufụk-iso oro ẹfep.”—2 Corinth 3:16; 4:4.

Ndusụk mmọ eke mînịmke ke akpanikọ ẹbuana ke ukwan̄ido m̀mê ukpono ndem. (2 Corinth 6:15, 16) Nte ededi, idịghe kpukpru mmọ ẹsibiọn̄ọ mme asan̄autom Jehovah. Ndusụk mmọ ẹsinyene udọn̄ ke akpanikọ. Ediwak ẹnyene nsan̄a ndọ oro ẹdide Christian ẹnyụn̄ ẹkop inemesịt ndika iso ndọ mmọ. (1 Corinth 7:12-14; 10:27; 14:22-25; 1 Peter 3:1, 2) Nte ededi, Paul ada ikọ emi “owo eke mînịmke ke akpanikọ” etịn̄ ndien ndien aban̄a mbon oro ikasiakde ke enyọn̄ emi, oro mîbuanake ye esop Christian, emi “mmọ eke ẹnịmde [Ọbọn̄] ke akpanikọ” ẹnamde.—Utom 2:41; 5:14; 8:12, 13.

Edumbet oro ẹkụtde ke 2 Corinth 6:14 ọnọ mme Christian eti ndausụn̄ ke kpukpru ikpehe uwem ndien ẹsiwak ndikot enye nte eti item emi enyenede mme Christian oro ẹyomde nsan̄a ndọ. (Matthew 19:4-6) Ikpowụtke eti ibuot Christian oro ama akayak idem ọnọ onyụn̄ ana baptism ndimek nsan̄a ndọ ke otu mmọ eke mînịmke ke akpanikọ, sia mme idaha ido uwem, utịtmbuba, ye se mmọ ẹnịmde ke akpanikọ ẹnen̄erede ẹkpụhọde ye eke ata Christian.

Nte ededi, nso kaban̄a mme owo oro ẹkpepde Bible ẹnyụn̄ ẹbuanade ye esop Christian? Nso kaban̄a mbon oro ẹdide mme asuanetop oro mînaha baptism? Ndi mmọ ẹdi mmọ eke mînịmke ke akpanikọ? Baba. Owo ikpokotke mbon oro ẹnyịmede akpanikọ eti mbụk ẹnyụn̄ ẹnamde n̄kọri ẹka ndina baptism, mmọ eke mînịmke ke akpanikọ. (Rome 10:10; 2 Corinth 4:13) Mbemiso Cornelius akanade baptism, ẹkekot enye “owo emi eten̄ede Abasi onyụn̄ abakde Abasi.”—Utom 10:2.

Do, nte okpowụt eti ibuot Christian oro ama akayak idem ọnọ ndiyom ima nnyụn̄ nduak ndidọ owo oro ẹnyịmede nte asuanetop oro mînaha kan̄a baptism, sia, ke nditịm ntịn̄, item Paul oro ẹwetde ke 2 Corinth 6:14 mînyeneke n̄kpọ ndinam ye idaha enye emi? Baba, oro iwụtke eti ibuot. Ntak-a? Ke ntak in̄wan̄-in̄wan̄ item oro Paul ọkọnọde aban̄a mme ebeakpa Christian. Paul ekewet ete: ‘Enye atara, onyụn̄ enyene unen ndidọ owo eke enye amade; edi yak enye ọdọ owo Abasi [m̀mê, ke Ọbọn̄] ikpọn̄-ikpọn̄.’ (1 Corinth 7:39) Ke n̄kemuyo ye item oro, ẹsịn udọn̄ ẹnọ mme Christian oro ẹma ẹkeyak idem ẹnọ ndiyom nsan̄a ndọ n̄kukụre ke otu mme owo oro ẹdide nsan̄autom ‘ke Ọbọn̄.’

Nso ke ikọ emi ‘ke Ọbọn̄’ ye mbiet ikọ oro  “ke Christ” ẹwọrọ? Paul etịn̄ ke Rome 16:8-10 ye Colossae 4:7, aban̄a mme owo emi ẹkedide nsan̄autom “ke Christ” m̀mê ‘ke Ọbọn̄.’ Edieke afo okotde mme ufan̄ikọ oro, afo oyokụt ke mme utọ owo oro ẹdi ‘mme nsan̄autom,’ ‘mbon oro ẹdomode ẹfiọk,’ ‘ndima nditọete,’ ‘mbonutom emi ẹnamde akpanikọ,’ ye [‘mme ekemmọ ifịn,’ NW].

Ini ewe ke owo akabade edi “ofụn ke Ọbọn̄”? (NW) Oro etịbe ke ini owo enyịmede ndinam utom ofụn nnyụn̄ ntụk idemesie. Jesus anam an̄wan̄a ete: “Edieke owo ekededi oyomde nditiene Mi, yak enye otụk idem esie, onyụn̄ emen [“eto ndutụhọ,” NW] esie, etiene Mi.” (Matthew 16:24) Owo ọtọn̄ọ nditiene Christ onyụn̄ osụk ibuot ọyọhọ ọyọhọ ọnọ uduak Abasi ke ini enye ayakde idemesie ọnọ Abasi. Ke oro ebede, enye ana baptism onyụn̄ akabade edi asan̄autom oro ẹma ẹkedori ubọk emi enyenede eti idaha ke iso Jehovah Abasi. * Mmọdo, ‘ndidọ ke Ọbọn̄’ ọwọrọ ndidọ owo oro owụtde ke imọ inen̄ede idi andinịm ke akpanikọ, kpa enye oro ama akayak idem ọnọ nte ofụn “Abasi ye Ọbọn̄ Jesus Christ.”—James 1:1.

Odot ẹtoro owo oro ekpepde Bible ye Mme Ntiense Jehovah onyụn̄ anamde eti n̄kọri eke spirit. Nte ededi, enye iyakke idemesie kan̄a inọ Jehovah inyụn̄ iyakke idemesie isịn ke edinam utom n̄waidem. Enye ke osụk ananam mme ukpụhọde oro ẹyomde. Oyom enye ebem iso anam ikpọ ukpụhọde oro ẹbuanade ke enye ndikabade ndi Christian oro ama akayak idem ọnọ onyụn̄ ana baptism, mbemiso enye ekerede aban̄a ndinam akamba ukpụhọde efen ke uwem, utọ nte ndọ.

Nte okpowụt eti ibuot Christian ndiyom ima ye owo oro etiede nte ke anam eti n̄kọri ke ukpepn̄kpọ Bible esie—eyedi ye uduak edibet tutu enye ana baptism mbemiso ọdọde enye? Baba. Emi ekeme nditịmede uduak eyen ukpepn̄kpọ Bible oro ndikabade ndi Christian oro ama akana baptism edieke enye ọfiọkde ke Christian oro ama akayak idem ọnọ oyom ndidọ imọ, edi ididọhọ imọ ibọhọke imọ ina baptism.

Ke ediwak idaha, owo esidi asuanetop oro mînaha kan̄a baptism ke esisịt ini mbemiso anade baptism. Ntre item eke enyọn̄ emi, oro ọdọhọde ẹdọ ke Ọbọn̄ ikpọn̄-ikpọn̄ owụt eti ibuot. Nte ededi, nso kaban̄a ediyom ima ye owo oro ekemde ndidọ ndọ, emi ẹbọkde ke ubon Christian, onyụn̄ abuanade ifịk ifịk ye esop ke ediwak isua nte asuanetop oro mînaha kan̄a baptism? Ke edide ntre, nso ikpan enye ndiyak uwem esie nnọ Jehovah? Ntak emi enye emen̄ede ndinam oro? Ndi enye enyene eyịghe? Okposụkedi enye mîdịghe owo emi mînịmke ke akpanikọ, owo ikemeke ndidọhọ ke enye edi nsan̄autom “ke Ọbọn̄.”

Item oro Paul ọnọde aban̄a ndọ edi ke ufọn nnyịn. (Isaiah 48:17) Ke ini eren ye n̄wan oro ẹduakde ndidọ ndọ ẹyakde idem ẹnọ Jehovah, un̄wọn̄ọ emi mmọ ẹnamde ndidọ kiet eken enyene eti itiat idakisọn̄ eke spirit. Mmọ ẹnyene ukem idaha ido uwem ye mme ukem utịtmbuba. Emi enen̄ede etịp esịn ke edinyene inem inem ndọ. Akan oro, ke ‘ndidọ ke Ọbọn̄,’ owo owụt ke imanam akpanikọ inọ Jehovah ndien emi ayada mme edidiọn̄ oro ẹbịghide edi, koro “[Jehovah] ayanam akpanikọ ye owo akpanikọ.”—Psalm 18:25, NW.

[Ikọ idakisọn̄]

[Ndise ke page 31]

“[Jehovah] ayanam akpanikọ ye owo akpanikọ”